San a dei fu Yehovah o tyari kon na krin?

’A dei fu Yehovah o kon neleki fa wan fufuruman e kon, èn grontapu nanga ala den sani di libisma meki, o kon na krin.’—2 PETR. 3:10.

1, 2. (a) Fa na ogri sistema o kon na wan kaba? (b) Na sortu aksi wi sa poti prakseri?

LIBISMA na ini na ogri sistema disi e bribi taki den man tiri grontapu nanga bun bakapisi, sondro taki den abi Yehovah fanowdu. Ma dati na wan bigi lei (Ps. 2:2, 3). Wan sani di no tru kan tan fu têgo? Kwetikweti! Ma toku wi no abi fu wakti teleki a grontapu fu Satan e kon na wan kaba fu ensrefi. Na presi fu dati, Gado poti wan ten pe a sa pori a grontapu disi, èn a sa du dati na wan fasi di ensrefi feni bun. Den sani di Gado sa du nanga a ogri grontapu disi sa sori krin taki a de wan lobi-ati Gado di ala ten e du san reti.—Ps. 92:7; Odo 2:21, 22.

² Na apostel Petrus ben skrifi: „A dei fu Yehovah o kon neleki fa wan fufuruman e kon, èn na a dei dati den hemel o pasa gowe esi-esi nanga wan bun bigi babari, ma den sani di de wan pisi fu hemel nanga grontapu o kon faya so te, taki den o smèlter gowe; boiti dati, grontapu nanga ala den sani di libisma meki, o kon na krin” (2 Petr. 3:10). San na „den hemel” nanga a „grontapu” di kari na ini a tekst disi? San na „den sani di de wan pisi fu hemel nanga grontapu” èn di sa smèlter gowe? Èn san Petrus ben wani taki nanga den wortu „grontapu nanga ala den sani di libisma meki, o kon na krin”? Te wi sabi den piki tapu den aksi disi, dan dati sa yepi wi fu sreka wisrefi gi den bigi sani di o pasa heri esi.

Den hemel nanga a grontapu di o pasa gowe

3. San na „den hemel” di kari na 2 Petrus 3:10, èn fa den o pasa gowe?

³ Te den wortu „den hemel” gebroiki na wan agersi fasi na ini Bijbel, dan nofo tron den wortu dati abi fu du nanga tirimakti di hei moro den wan di de na den ondro (Yes. 14:13, 14; Openb. 21:1, 2). ’Den hemel di o pasa gowe’ e prenki libisma tirimakti di e tiri na ogri sistema disi. Te Bijbel e taki dati den hemel o pasa gowe nanga „wan bun bigi babari”, dan a kan de so taki den hemel disi o kon na wan kaba esi-esi.

4. San na a „grontapu”, èn fa a o kisi pori?

⁴ A wortu „grontapu” e prenki ala libisma na grontapu di no e anbegi a tru Gado. Na so grontapu ben de na ini a ten fu Noa, èn Gado ben gi a komando fu pori a grontapu dati nanga yepi fu a Frudu. Bijbel e taki: „Nanga yepi fu a srefi wortu dati, Gado libi den hemel nanga a grontapu fu now fu bron den nanga faya, èn a e libi den teleki a dei te a o krutu èn pori den ogrisma ” (2 Petr. 3:7). A Frudu pori ala den ogrisma na a srefi ten, ma na a ten fu „a bigi banawtu”, sani o kisi pori a wan baka a trawan (Openb.7:14). Na a fosi presi, Gado o meki den politiek tiriman fu a grontapu disi pori „Babilon a Bigiwan”. Na so a o sori taki a e tegu gi a huru-uma disi di e prenki den kerki fu grontapu (Openb. 17:5, 16; 18:8). Baka dati, te na orloku fu Armagedon o feti na a kabapisi fu a bigi banawtu, dan Yehovah srefi o pori den sani di tan abra fu a grontapu fu Satan.—Openb. 16:14, 16; 19:19-21.

„Den sani di de wan pisi fu hemel nanga grontapu . . . o smèlter gowe”

5. San na den sani di de wan pisi fu hemel nanga grontapu?

⁵ San na „den sani di de wan pisi fu hemel  nanga grontapu” èn di „o smèlter gowe”? Den sani di Petrus ben kari, na den prenspari sani di e meki taki grontapusma abi fasi, denki, nanga marki di no e kruderi nanga den gronprakseri fu Gado. ’A yeye fu grontapu di e wroko na ini den sma di e trangayesi Gado’ na wan fu den sani tu di o smèlter gowe (1 Kor. 2:12; leisi Efeisesma 2:1-3.) A „yeye” dati, panya na ala sei fu a grontapu fu Satan. A e meki sma prakseri sani, a e meki den seti sani, taki sani, èn du sani di e kruderi nanga a denki fu Satan, a sma di abi heimemre, di trangayesi, èn „di abi makti na tapu a krakti di e tiri sma denki”.

6. Fa a yeye fu grontapu e sori ensrefi?

⁶ Fu dati ede, den sma di e meki a yeye fu grontapu abi krakti na den tapu, e gi pasi taki Satan e tiri a frustan nanga na ati fu den. Disi e meki taki den e denki neleki Satan. Leki bakapisi fu dati, den sma disi e du san densrefi wani, sondro taki den e broko den ede nanga a wani fu Gado. Den sma disi abi heimemre, den e denki densrefi nomo, èn den e opo densrefi teige den wan di e teki fesi. Boiti dati, den e meki ’a lostu fu a skin èn a lostu fu den ai basi den’.—Leisi 1 Yohanes 2:15-17. *

7. Fu san ede wi musu „kibri [wi] ati”?

⁷ Dati meki a prenspari srefisrefi taki wi e „kibri [wi] ati”. Iya, wi musu hori wisrefi na den markitiki fu Gado te wi e bosroiti sortu sma wi o teki leki mati, sortu sani wi o leisi, sortu prisiriten wi o abi, èn sortu sani wi o luku na tapu Internet! (Odo 4:23) Na apostel Paulus ben skrifi: „Luku bun: kande wan sma sa kisi unu nanga filosofia èn nanga soso sani di de fu bedrigi sma; den sani disi no abi fu du nanga den leri fu Krestes, ma nanga den gwenti fu libisma, èn nanga den sani di de prenspari gi grontapusma” (Kol. 2:8). A warskow dati e kon seryusu moro nanga moro, now di a dei fu Yehovah e doro. Dati de so, fu di a tumusi bigi „faya” fu a dei dati o meki taki „den sani di de wan pisi fu hemel nanga grontapu” o smèlter gowe. Na so a o kon na krin taki den o kisi pori trutru na ini a faya fu Gado en atibron. A sani disi e meki wi prakseri den wortu fu Maleaki 4:1: „Wan dei e kon di faya leki wan onfu. Ala den heimemre sma nanga ala den ogrisma o kon de leki drei grasi. A dei di e kon o bron den gowe, so taki nowan rutu noso taki fu den tan abra.”

„Grontapu nanga ala den sani di libisma meki, o kon na krin”

8. Fa grontapu nanga den sani di libisma meki „o tyari kon na krin”?

⁸ San Petrus ben wani taki nanga den wortu „grontapu nanga ala den sani di libisma meki, o kon na krin”? Petrus ben wani taki dati na a ten fu a bigi banawtu, Yehovah sa tyari kon na krin taki a grontapu fu Satan e gens En nanga a Kownukondre fu En, èn fu dati ede a musu kisi pori. A profeititori na Yesaya 26:21 ben taki fu a ten dati: „Yehovah o komoto na en presi fu aksi frantwortu na den sma fu a kondre di sondu teige en. Grontapu no o kibri den dedewan moro, iya, a no o kibri a brudu nanga den skin fu den wan di sma kiri.”

9. (a) Gi sortu sani wi musu wai pasi, èn fu san ede? (b) Sortu fasi wi musu kweki, èn fu san ede?

⁹ Na a dei fu Yehovah, den wan di gi pasi taki grontapu èn a takru yeye fu en abi krakti na den tapu, sa sori suma den de trutru na ini den ati. Den sma disi sa kiri makandra na wan ogri-ati fasi srefi. Fu taki en leti, a kan taki den difrenti sortu ogri-ati felem nanga tra sani di furu sma e luku na ini a ten disi, e bigin sreka a denki fu sma gi a ten te libisma „o feti nanga makandra” (Sak. 14:13). Dati meki a prenspari srefisrefi taki wi e wai pasi gi iniwan sani di kan meki wi kon abi fasi di Gado e tegu gi. Iya, wi musu wai pasi gi felem, buku, video game, nanga tra sani di kan meki wi kisi heimemre, èn di kan meki wi lobi ogridu! (2 Sam. 22:28; Ps. 11:5) Na presi fu dati, meki wi kweki den  froktu fu a yeye fu Gado, fu di den fasi dati o yepi wi fu pasa na agersi faya fu a dei fu Yehovah libilibi.—Gal. 5:22, 23.

„Nyun hemel nanga wan nyun grontapu”

10, 11. San na den „nyun hemel” èn a „nyun grontapu”?

¹⁰ Leisi 2 Petrus 3:13. Den „nyun hemel” na a hemel Kownukondre fu Gado di ben seti na ini 1914. Na ini a yari dati, „a reti ten fu den tra kondre sma doro en kaba” (Luk. 21:24). Den wan di e tiri na ini a kownukondre disi na Krestes Yesus nanga den 144.000 salfuwan, èn furu fu den salfuwan dati kisi libi kaba na hemel. A buku Openbaring e kari den salfuwan dati ’a santa foto, a Nyun Yerusalem di ben komoto fu Gado na ini hemel, saka kon na ondro. Den ben sreka en leki a trowmisi di ben meki ensrefi moi gi a man di ben o tron en masra’ (Openb. 21:1, 2, 22-24). Na ini owruten, a Yerusalem na grontapu ben de a presi pe a tirimakti fu owruten Israel ben de. Na so a de tu taki a Nyun Yerusalem nanga a Trowmasra fu en na a tirimakti fu a nyun sistema. A hemel foto disi sa ’saka komoto fu hemel’, èn dati wani taki dati a sa poti prakseri na grontapu.

¹¹ A „nyun grontapu” abi fu du nanga a nyun libimakandra fu sma di sori taki den de klariklari fu saka densrefi na ondro a Kownukondre fu Gado. Now a pipel fu Gado de kaba na ini wan yeye paradijs. Ma na ini „a grontapu di musu kon ete” den o libi na ini wan trutru paradijs (Hebr. 2:5). Fa wi kan kisi a grani fu libi na ini a nyun sistema dati?

Sreka yusrefi gi a bigi dei fu Yehovah

12. Fu san ede grontapusma sa skreki te a dei fu Yehovah kon?

¹² Paulus nanga Petrus ben taki dati a dei fu Yehovah ben o kon „leki wan fufuruman”. Dati wani taki dati a o kon sondro taki sma e fruwakti dati. (Leisi 1 Tesalonikasma 5:1, 2.) Srefi tru Kresten di e fruwakti a dei dati, o fruwondru te a o kon wantronso (Mat. 24:44). Ma a no skreki den grontapusma o skreki nomo. Paulus ben skrifi: „Te [den wan di no e dini Yehovah] taki: ’Vrede de èn ala sani e waka bun!’, dan wan pori o kon na den tapu wantronso neleki a hebi pen fu wan uma di de fu kisi en pikin; den no sa man lowe kwetikweti.”—1 Tes. 5:3.

13. Te sma e bari „Vrede de èn ala sani e waka bun!”, dan fa wi kan sorgu taki dati no e kori wi?

¹³ Te sma o bari „Vrede de èn ala sani e waka bun!”, dan dati sa de ete wan lei di e komoto fu ogri yeye. Ma a lei dati no sa kori den futuboi fu Yehovah. Paulus ben skrifi: „Unu no de na ini dungru, èn dati meki a dei dati no sa kon na un tapu wantronso, leki fa deiten e kon miti fufuruman wantronso, bika un alamala na manpikin fu a leti èn manpikin fu deiten” (1 Tes. 5:4, 5). Sobun, meki wi tan na ini a leti, iya, meki wi tan farawe fu a dungru grontapu fu Satan. Petrus ben skrifi: „Un lobiwan, fu di a de so taki unu sabi den sani disi na fesi, meki un musu luku bun taki den lei fu den wan di e trangayesi a wet, no e hari unu gowe, so taki unu no tanapu kánkan moro.”—2 Petr. 3:17.

14, 15. (a) Sortu grani Yehovah e gi wi? (b) Sortu warskow fu Gado wi musu hori na prakseri?

 ¹⁴ A moi fu si taki Yehovah no e taigi wi nomo fu „luku bun”. Na presi fu dati, a e gi wi grani, fu di a e meki wi kon ’sabi na fesi’ san o pasa na ini a ten di e kon.

¹⁵ Ma a sari fu taki dati son sma no e broko den ede nanga den warskow di den e kisi fu tan na ai, èn son sma e spotu srefi nanga den warskow dati. Kande den e taki ’Wi e yere a tori dati omeni yari langa kaba’. Ma den sma dati no musu frigiti taki te den e taki den sortu sani dati, dan dati no e sori nomo taki den e tweifri na a srafu-grupu, ma fu taki en leti, den e tweifri na Yehovah èn na a Manpikin fu en. Yehovah ben taki: „Un musu tan fruwakti” (Hab. 2:3). Yesus ben taki tu: „Tan na ai, bika unu no sabi sortu dei un Masra o kon” (Mat. 24:42). Boiti dati, Petrus ben skrifi: „Un musu luku taki unu e tyari unsrefi na wan santa fasi èn taki unu e du sani di e sori taki unu e dini Gado na wan getrow fasi; boiti dati, un musu fruwakti a dei fu Yehovah èn un musu hori bun na prakseri taki a dei dati o kon” (2 Petr. 3:11, 12). Noiti a getrow srafu grupu nanga a Tiri Skin fu en sa si den tru wortu dati leki lawlaw sani!

16. Sortu denki wi no musu kon abi, èn fu san ede?

¹⁶ A no de fu taki, dati na a „ogri srafu” feni taki a Masra no e kon ete (Mat. 24:48). Na ogri srafu dati de fu a grupu di kari na 2 Petrus 3:3, 4. Petrus ben skrifi: ’Na ini den lasti dei spotuman o kon di o handri akruderi den eigi lostu’, èn den o spotu den wan di e tan fruwakti a dei fu Yehovah. Iya, na presi taki den spotuman disi e poti prakseri na Kownukondre afersi, den e poti prakseri na densrefi nomo èn na den eigi lostu. Meki wi noiti no kon de leki den sma disi di trangayesi èn di abi wan takru denki! Na presi fu dati, meki wi tan „si a pasensi fu wi Masra leki frulusu”. Fu dati ede, wi musu preiki a Kownukondre boskopu fayafaya èn wi musu meki disipel tu. Boiti dati, wi no musu broko wi ede tumusi fu kon sabi o ten Yehovah Gado o du san a abi na prakseri.—2 Petr. 3:15; leisi Tori fu den Apostel 1:6, 7.

Frutrow na ini a Gado di o frulusu wi

17. San den reti-ati Kresten du di Yesus taigi den fu lowe komoto na ini Yerusalem, èn fu san ede den du dati?

¹⁷ Baka di den legre fu Rome broko go na ini Yudea na ini a yari 66, dan reti-ati Kresten gi yesi na a warskow di Yesus ben gi den fu lowe komoto na ini Yerusalem wantewante (Luk. 21:20-23). Fu san ede den no ben musu draidrai fu handri? A de krin taki den ben hori a warskow fu Yesus bun na prakseri. A no de fu taki, dati den ben sabi taki a bosroiti di den  teki ben o tyari problema kon gi den, soleki fa Krestes ben taigi den. Ma den ben sabi tu taki Yehovah noiti no ben o libi den wan di e tan gi yesi na en.—Ps. 55:22.

18. Fa den wortu di skrifi na Lukas 21:25-28, abi krakti tapu a fasi fa yu e denki fu a bigi banawtu di o kon?

¹⁸ Wi sosrefi musu frutrow dorodoro tapu Yehovah, fu di na en wawan sa gi wi frulusu te na ogri sistema disi sa kisi fu du nanga wan bigi banawtu di noiti ete ben miti libisma. Baka te a bigi banawtu bigin, syatu bifo Yehovah sa krutu den tra libisma na grontapu, dan sma „o lasi-ati krinkrin, fu di den frede te fu dede èn fu di den no sabi san e pasa nanga grontapu”. Ma aladi den feanti fu Gado sa beifi fu di den e frede, toku den reti-ati futuboi fu Yehovah no sa frede kwetikweti. Na presi fu dati, den sa prisiri fu di den sabi taki a frulusu fu den de krosibei.—Leisi Lukas 21:25-28.

19. Na sortu sani wi sa poti prakseri na ini a tra artikel?

¹⁹ Iya, wan tumusi moi ten e wakti den wan di e hori densrefi aparti fu grontapu èn fu „den sani di de wan pisi fu hemel nanga grontapu”! Ma a tra artikel sa sori, taki efu wi wani kisi libi, dan wi no musu wai pasi nomo gi san ogri. Wi musu kon abi den fasi di Yehovah lobi, èn wi musu du sani di a feni bun.—2 Petr. 3:11.

[Futuwortu]

Yu kan tyari disi kon na krin?

• Fruklari san den sani disi e prenki:

’den hemel èn a grontapu’ fu a ten disi?

„den sani di de wan pisi fu hemel nanga grontapu”?

den ’nyun hemel nanga a nyun grontapu’?

• Fu san ede wi e frutrow dorodoro tapu Gado?

[Aksi fu a tori disi]

[Prenki na tapu bladzijde 5]

Fa yu kan „kibri yu ati” so taki yu e tan aparti fu grontapu?

[Prenki na tapu bladzijde 6]

Fa wi kan sori taki wi „e si a pasensi fu wi Masra leki frulusu”?