Markus—’A yepi fu du a diniwroko’

A GEMEENTE na ini Antiokia ben kisi fu du nanga wan tu problema kaba, ma a kesekese na mindri na apostel Paulus nanga Barnabas ben de wan tra sortu problema. Den man disi ben o go preiki a bun nyunsu na ini wan tra kontren, ma di den ben musu bosroiti suma ben o go nanga den, dan den tu man dati „kisi bun bigi trobi” (Tori. 15:39). A sani disi meki taki den ala tu teki den eigi pasi. A trobi fu den ben abi fu du nanga wan tra zendeling, èn dati ben de Markus.

Suma ben de Markus? San meki taki tu apostel ben e haritaki nanga makandra fu a man disi ede? Fu san ede den no ben e agri nanga makandra? Den tu man dati kenki a denki fu den te fu kaba? Èn san yu kan leri fu a tori fu Markus?

Na ini Yerusalem, a presi pe a kweki

Markus ben de wan Dyu di ben kweki na ini Yerusalem, èn soleki fa a sori, dan a famiri fu en ben gudu. Den fosi sani di wi e kon sabi fu en, abi fu du nanga a pisi ten di a Kresten gemeente seti na ini a fosi yarihondro. Na ini a yari 44, di na apostel Petrus ben de na ini a strafu-oso  fu Herodes Agripa I, dan na engel fu Yehovah fri en na wan wondru fasi. Baka dati, Petrus go ’na a oso fu Maria, a mama fu Yohanes di sma ben kari Markus tu, èn furu sma ben de drape e begi’.—Tori. 12:1-12 *.

Soleki fa a sori, dan a gemeente na ini Yerusalem ben e hori konmakandra na ini na oso fu Markus en mama. Na oso dati ben musu fu de wan bigi oso, fu di „furu sma” ben de na a konmakandra. Maria ben abi wan umasrafu di ben nen Roda. Di Petrus naki „na a portu”, dan na a umasrafu disi go opo a portu gi en. Den sani disi e sori taki Maria ben gudu. Èn Bijbel no e taki dati na oso ben de fu en masra, ma taki a ben de fu en. Sobun, a kan taki Maria ben lasi en masra na ini dede, èn a kan de so tu taki na a ten dati, Markus ben yongu ete.—Tori. 12:13.

A kan taki Markus ben de na mindri den sma di ben kon makandra fu begi. A ben musu de so taki a ben sabi den disipel fu Yesus heri bun, èn sosrefi tra sma di ben de nanga Yesus di a ben e du a diniwroko fu en. Fu taki en leti, a kan taki na Markus ben de a yonkuman di ben pruberi fu go luku san sma ben o du nanga Yesus di sma ben grabu En fu a fosi leisi. Ma a lowe gowe di den ben wani grabu en hori.—Mark. 14:51, 52.

Den grani di a kisi na ini a gemeente

A no de fu taki, dati a demakandra di Markus ben abi nanga lepi Kresten, ben abi furu krakti na en tapu. A go na fesi na ini a tru anbegi, èn den brada di ben e teki fesi ben si fa a ben gro. Na a ten fu a yari 46, Paulus nanga Barnabas ben komoto fu Yerusalem fu tyari sani gi den brada nanga sisa na ini Antiokia, „fu yepi den” pasa wan angriten. Di den doro drape, dan den teki ten fu leri sabi Markus moro bun. Di Paulus nanga Barnabas drai go baka na Antiokia, dan den tyari Markus go nanga den.—Tori. 11:27-30; 12:25.

Te yu ben o leisi a tori disi frafra, dan yu ben o denki taki den dri man disi no ben sabi makandra bun, èn taki na Kresten brada nomo den ben de fu makandra. Kande a ben o gersi leki Paulus nanga Barnabas ben tyari Markus go nanga den soso fu di a ben abi spesrutu koni. Ma wán fu den brifi di Paulus skrifi, e tyari kon na krin taki Markus ben de wan neef fu Barnabas (Kol. 4:10). Disi kan yepi wi fu frustan fu san ede son sani di ben abi fu du nanga Markus, ben kon pasa.

Baka wan yari, a santa yeye tiri Paulus nanga Barnabas fu go preiki a bun nyunsu na wan tra kontren. Den gowe libi Antiokia fu go na Siprus. Yohanes Markus go nanga den „fu yepi den” (Tori. 13:2-5). A kan taki Markus ben musu yepi den nanga difrenti sani te den ben de na pasi. Na so den tu apostel ben o man poti ala den prakseri na a wroko di den ben musu du leki zendeling.

Paulus, Barnabas, nanga Markus go preiki na ala sei fu Siprus, èn baka dati den go na Pikin Asia. Di den ben de drape, dan Yohanes Markus teki wan bosroiti di Paulus no ben lobi. Bijbel e taki dati, di den man disi doro na Perga, dan „Yohanes gowe libi den, èn a drai go baka na Yerusalem” (Tori. 13:13). Bijbel no e taki fu san ede a du dati.

Wan tu yari baka dati, Paulus, Barnabas, nanga Markus ben de baka na ini Antiokia. Den tu  apostel ben e sreka sani fu go preiki baka na ini a kontren pe den ben go a fosi leisi. Barnabas ben wani tyari en neef go tu, ma Paulus no ben wani dati kwetikweti, fu di Markus ben gowe libi den a fosi leisi. Na a sani disi meki taki den tu apostel bigin meki trobi nanga makandra, soleki fa wi ben si na a bigin fu na artikel disi. Barnabas teki Markus, èn den go wroko na Siprus, a presi pe Barnabas ben kweki. Ma Paulus hari go na Siria (Tori. 15:36-41). A de krin taki Paulus nanga Barnabas no ben e denki a srefi fu a bosroiti di Markus ben teki a fosi leisi.

Den e meki en bun baka nanga makandra

A no de fu taki, dati Markus ben e sari srefisrefi fu a sani di ben pasa. Ma toku a tan du a diniwroko fu en nanga en heri ati. Sowan 11 noso 12 yari baka di Markus ben kisi a kesekese nanga Paulus, dan a nen fu en de fu si baka na ini den Bijbel tori di abi fu du nanga den fosi Kresten. San Markus ben e du na a ten dati? Kande yu no ben fruwakti dati, ma a ben de baka nanga Paulus!

Na ini a pisi ten fu a yari 60 nanga a yari 61, Paulus ben de na strafu-oso na ini Rome, di a seni wan tu brifi gi difrenti gemeente. Now den brifi dati na pisi fu Bijbel. Na ini a brifi di Paulus ben seni gi den Kolosesma, a ben skrifi: „Aristarkus, di de nanga mi na strafu, e seni taki unu odi, èn Markus, wan omupikin fu Barnabas, e seni taki unu odi tu (na fu en mi ben taigi unu taki, efu a kon na unu, dan un musu gi en wan switikon) . . . Den wawan e wroko makandra nanga mi gi a kownukondre fu Gado, iya, na den ben de wan yepi gi mi, èn den gi mi tranga.”—Kol. 4:10, 11.

Dati na wan bigi kenki trutru! Paulus no ben atibron moro nanga Markus. Na presi fu dati, a ben breiti baka taki a ben e wroko makandra nanga Markus. Soleki fa a sori, dan Paulus ben taigi den Kolosesma taki kande Markus ben o go luku den. Efu dati ben pasa trutru, dan Markus ben o teki presi gi Paulus.

A de so taki yari na fesi, Paulus ben krutu Markus tumusi hebi? Noso a de so taki Markus ben kisi wini fu a trangaleri di a ben kisi? Noso na ala den tu sani disi ben pasa? Awinsi fa a no fa, a de krin fu si taki Paulus nanga Markus ben de lepi Kresten, fu di den ben meki en bun baka nanga makandra. Fu di den no hori makandra na ati, meki den ben man wroko bun nanga makandra baka. Dati na wan heri moi eksempre gi iniwan sma di abi wan kesekese nanga wan tra Kresten brada noso sisa fu en!

Markus ben go na difrenti presi

Te yu e leisi fu den difrenti presi pe Markus go, dan yu e si taki a ben de wan sma di ben e teki waka furu leisi. A ben kweki na ini Yerusalem, ne a froisi go na Antiokia, èn fu drape a teki boto go na Siprus nanga Perga. Baka dati, a go na Rome. Di a ben de drape, Paulus ben wani seni en go na Kolose. Ma dati a no ala!

Na apostel Petrus ben skrifi a fosi brifi fu en na ini a pisi ten fu a yari 62 te go miti a yari 64. A ben skrifi: „A wan di de na Babilon . . . e seni taki unu odi; Markus, mi manpikin, e seni taki unu odi tu” (1 Petr. 5:13). Disi e sori taki Markus ben go na Babilon fu dini makandra nanga na apostel di yari na fesi ben e go na den Kresten konmakandra di ben e hori na ini en mama oso.

Na ini a yari 65, Paulus ben de na ini Rome pe a ben e koti strafu fu a di fu tu leisi. Di a ben de drape, a skrifi wan brifi fu seni kari Timoteyus di ben de na ini Efeise. Paulus ben taki tu: „Tyari Markus kon nanga yu” (2 Tim. 4:11). Sobun,  Markus ben de na ini Efeise na a ten dati. Èn a ben musu de so taki a drai go baka na Rome makandra nanga Timoteyus, soleki fa Paulus ben taigi en fu du. Na a ten dati, a no ben makriki fu go fu a wán presi na a trawan, ma Markus ben de klariklari fu du dati.

A kisi wan tra bigi grani

Wan fu den bigi grani di Markus ben abi, na taki Yehovah ben meki a skrifi wan fu den Evangelietori. Aladi en nen no kari na ini a di fu tu Evangelie, toku sma fu fositen ben e bribi taki na Markus skrifi a buku, èn taki na Petrus ben fruteri en fa sani ben e waka. Fu taki en leti, Petrus ben ondrofeni ala den sani di Markus skrifi na ini na Evangelie fu en.

Sabiman di ondrosuku na Evangelie fu Markus e bribi taki Markus ben skrifi den tori dati gi sma di no ben de Dyu. A fruklari gwenti di den Dyu ben abi, so taki sma di no ben de Dyu ben kan frustan sani moro bun (Mark. 7:3; 14:12; 15:42). Markus vertaal Arameisi wortu di sma di no ben de Dyu no ben o man frustan (Mark. 3:17; 5:41; 7:11, 34; 15:22, 34). A gebroiki furu Latijntongo wortu, èn a gebroiki Latijntongo fu fruklari Griki wortu di sma ben e gwenti gebroiki na ini na aladei libi. Te a ben e taki fu Dyu moni, dan a ben e sori tu omeni dati ben de na ini a moni fu den Romesma. (Mark. 12:42, futuwortu.) Ala den sani disi e kruderi nanga a bribi di sma ben abi langa ten kaba, taki na Markus skrifi na Evangelie fu en na ini Rome.

’A yepi mi nanga a diniwroko’

A skrifi di Markus skrifi na Evangelie fu en, a no a wan-enkri sani di a du na ini Rome. Luku baka san Paulus ben taigi Timoteyus: „Tyari Markus kon nanga yu.” Fu san ede Paulus ben aksi dati? Paulus taki moro fara: „Bika a kan yepi mi nanga a diniwroko.”—2 Tim. 4:11.

Disi na a lasti sani di wi e kon sabi fu Markus. Den wortu na ini a tekst dati e fruteri wi furu fu en. Te Bijbel e taki fu a wroko di Markus du na ini a Kresten gemeente, dan noiti a e kari Markus wan apostel, wan fesiman, noso wan profeiti. A ben de wan dinari, iya, wan sma di ben e dini trawan. Èn na a pisi ten dati, syatu bifo Paulus dede, na apostel disi ben abi a yepi fu Markus fanowdu trutru.

Te wi e luku ala den tori disi fu Markus, dan wi e si taki a man disi ben e preiki a bun nyunsu fayafaya na difrenti presi fu grontapu. Iya, Markus ben e dini trawan nanga prisiri. A no de fu taki dati Markus kisi heri moi grani fu di a tan dini fayafaya!

Neleki Markus, wi leki futuboi fu Gado abi a fasti bosroiti tu fu preiki a bun nyunsu fu a Kownukondre. Neleki fa a ben de nanga Markus, na so sonwan fu wi man go na difrenti kontren noso kondre fu preiki a bun nyunsu drape. Aladi furu fu wi no man froisi go na wan tra presi, toku wi alamala kan leri ete wan sani fu Markus. Neleki fa Markus ben e du ala san a ben man fu dini en Kresten brada nanga sisa, na so wi musu de klariklari tu fu du ala san wi man fu yepi wi Kresten brada nanga sisa, so taki den kan tan dini Gado. Te wi e du dati, dan wi kan de seiker taki wi sa tan kisi blesi fu Yehovah.—Odo 3:27; 10:22; Gal. 6:2.

[Futuwortu]

[Karta/​Prenki na tapu bladzijde 8, 9]

(Efu yu wani si pe den sani disi skrifi, luku a tijdschrift)

Wan tu fu den foto pe Markus go

Rome

Efeise

Kolose

Perga

Antiokia (fu Siria)

Siprus

MINDRIKONDRE SE

Yerusalem

Babilon