Meki Gado tan lobi yu

„Gado sa tan lobi unu, aladi unu e wakti teleki wi Masra Yesus Krestes sa sori unu sari-ati, so taki unu kan kisi têgo libi.”​—YUDAS 21.

1, 2. Fa Yehovah sori taki a lobi wi? Fa wi du sabi taki wi no kan du iniwan sani di wi wani, efu wi wani taki Yehovah tan lobi?

YEHOVAH GADO sori wi na furu difrenti fasi taki a lobi wi. Ma a no de fu taki, dati a moro moi fasi fa Yehovah sori taki a lobi wi, na taki a seti a frulusu-ofrandi gi wi. A lobi libisma so te, taki a seni en lobi Manpikin kon na grontapu fu dede gi wi (Yoh. 3:16). Yehovah du a sani dati, fu di a wani taki wi musu libi fu têgo, èn a wani tu taki wi kisi wini fu têgo fu a lobi fu en!

² Ma wi kan fruwakti taki Yehovah sa tan lobi wi, awinsi san wi e du? Nôno. Fu di den wortu na Yudas 20, 21 e sori taki wi musu du wan sani so taki ’Gado sa tan lobi wi, aladi wi e wakti teleki wi Masra Yesus Krestes sa sori wi sari-ati, so taki wi kan kisi têgo libi.’ We, dan san wi musu du efu wi wani taki Gado tan lobi wi?

Fa wi kan meki Gado tan lobi wi?

3. Soleki fa Yesus ben taki, dan san a ben musu du efu a ben wani taki en Papa tan lobi en?

³ Wi e kisi piki tapu na aksi dati, te wi e luku san Yesus srefi ben taki a lasti neti di a ben de dyaso na grontapu. Yesus ben taki: „Efu unu e hori unsrefi na den komando fu mi, dan mi o tan lobi unu, neleki fa mi hori misrefi na den komando fu a Tata èn a tan lobi mi” (Yoh. 15:10). Soleki fa a tekst disi e sori, dan Yesus ben sabi taki a ben musu tan gi yesi na den komando fu Yehovah, efu a ben wani taki en Papa tan lobi en. We, efu a volmaakti Manpikin fu Gado ben musu du dati, dan wi musu du dati tu, a no so?

4, 5. (a) San na a moro prenspari fasi fa wi kan sori taki wi lobi Yehovah? (b) Fu san ede wi no abi reide fu no gi yesi na den komando fu Yehovah?

⁴ A moro prenspari fasi fa wi kan sori taki wi lobi Yehovah, na te wi e gi yesi na en. Luku  fa na apostel Yohanes ben tyari disi kon na krin. A ben taki: „Disi na san a lobi fu Gado wani taki, dati wi e hori wisrefi na den komando fu en; ma toku den komando fu en no de wan hebi” (1 Yoh. 5:3). A no de fu taki, dati furu sma na ini a ten disi no lobi fu gi yesi na trawan. Ma luku san Yohanes ben taki: „Toku den komando fu en no de wan hebi.” Yehovah no e aksi wi fu du wan sani di hebi tumusi gi wi fu du.

⁵ Fu eksempre, yu ben o aksi wan bun mati fu yu fu opo wan sani gi yu, aladi yu sabi taki a sani dati hebi tumusi gi en? Kwetikweti! Yehovah abi moro switifasi leki wi, èn a sabi sani moro wi tu. Bijbel e gi wi a dyaranti taki Yehovah „e hori na prakseri taki na fu doti wi meki” (Ps. 103:14). Noiti a ben o aksi wi fu du wan sani di wi no man du. Sobun, wi no abi reide fu no gi yesi na den komando fu Yehovah. Ma wi sabi taki te wi e gi yesi na Yehovah, dan dati na wan tumusi moi fasi fa wi kan sori wi hemel Tata taki wi lobi en trutru èn taki wi wani taki a tan lobi wi.

Wan prenspari kado di Yehovah gi wi

6, 7. (a) San na a konsensi? (b) Gi wan eksempre di e sori fa a konsensi kan yepi wi fu meki Gado tan lobi wi.

⁶ Fu di wi e libi na ini wan bruya grontapu, meki furu fu den bosroiti di wi musu teki, na okasi fu sori taki wi e gi yesi na Gado. Fa wi kan de seiker taki den bosroiti di wi e teki e kruderi nanga a wani fu Gado? Yehovah gi wi wan kado di kan de wan bigi yepi gi wi fu tan gi yesi na en. A kado dati na a konsensi fu wi. San na a konsensi? A konsensi na a koni di wi abi fu sabi wisrefi. A de leki wan krutuman di e krutu wi, so taki wi kan kon sabi sortu bosroiti wi musu teki. A e yepi wi tu fu kon si efu den bosroiti di wi teki kaba, na bun bosroiti, noso don bosroiti.​—Leisi Romesma 2:14, 15.

⁷ Na sortu fasi a konsensi fu wi kan yepi wi? Luku na eksempre disi. Prakseri wan sma di e waka na strati na ini a dungru. San a abi fanowdu fu sorgu taki a no naki en futu fadon, èn taki ogri no miti en? A musu abi wan flashlight fu man si pe a e waka. Sondro a flashlight a no o man si pe a e go. A kan fadon, noso wan ogri kan miti en. Na so a de tu nanga a konsensi fu wi. Efu wi no ben abi wan konsensi, dan wi no ben o man teki koni bosroiti.

8, 9. (a) San kan meki taki a konsensi fu wi no e wroko bun? (b) San wi kan du fu sorgu taki a konsensi fu wi de wan yepi gi wi trutru?

⁸ Ma neleki fa a de nanga wan flashlight, na so a konsensi no e wroko bun ala ten. Efu den batterij fu a flashlight kon leigi, dan a flashlight no sa wroko moro, èn wi no o man si moro pe wi e waka. Na so a de tu nanga a konsensi fu wi. Efu wi ben o meki den firi nanga den denki fu wi basi wi te wi musu teki bosroiti, dan san ben o pasa? We, a konsensi fu wi no ben o wroko bun moro. Bijbel e warskow wi taki „na ati e kori sma moro leki iniwan tra sani, èn a pori srefisrefi” (Yer. 17:9; Odo 4:23). Ma wi abi Gado Wortu, Bijbel, fanowdu tu, fu man teki bun bosroiti. Gado Wortu ala ten e tiri wi na a yoisti fasi. Te wi no e meki Gado Wortu tiri wi, dan wi konsensi no sa de wan yepi gi wi trutru (Ps. 119:105). A de wan sari sani taki furu sma na ini a ten disi e meki den firi nanga den denki fu den basi den, èn den no e poti prakseri srefisrefi na den markitiki di de fu feni na ini Gado Wortu. (Leisi Efeisesma 4:17-19.) Dati meki so furu sma e du ogri-ati sani, aladi den abi wan konsensi.​—1 Tim. 4:2.

⁹ Wi musu abi a fasti bosroiti fu no de leki den sma dati noiti! Na presi fu dati, wi musu tan teki leri fu Gado Wortu, so taki a konsensi fu wi kan yepi wi fu teki bun bosroiti. Wi no musu meki den firi nanga den denki fu wi basi wi, ma wi musu arki a konsensi fu wi di e wroko na wan fasi di e kruderi nanga Bijbel gronprakseri. Na a srefi ten, wi musu  lespeki a konsensi fu wi lobi-ati Kresten brada nanga sisa tu. Wi e hori na prakseri taki kande a konsensi fu wi e wroko tra fasi leki a di fu wi Kresten brada nanga sisa, èn fu dati ede wi e du ala san wi man fu no meki den naki futu.​—1 Kor. 8:12; 2 Kor. 4:2; 1 Petr. 3:16.

10. Na sortu dri sani wi sa poti prakseri now?

¹⁰ Meki wi poti prakseri now na dri fasi fa wi kan sori taki wi lobi Yehovah. Wi e sori a lobi dati te wi e gi yesi na En. A no de fu taki, dati na ini ala dri situwâsi wi sa musu arki a konsensi fu wi. Ma efu wi wani taki a konsensi fu wi tiri wi na a yoisti fasi, dan a sa musu wroko na wan fasi di e kruderi nanga den markitiki fu Bijbel. Den dri fasi fa wi e sori taki wi lobi Yehovah, na: (1) Te wi lobi den wan di Yehovah lobi, (2) te wi e sori lespeki gi den wan di e teki fesi, èn (3) te wi e meki muiti fu sorgu taki Gado e tan si wi leki sma di krin.

Lobi den wan di Yehovah lobi

11. Fu san ede wi musu lobi den wan di Yehovah lobi?

¹¹ A fosi fasi fa wi kan sori taki wi lobi Yehovah, na te wi lobi den wan di Yehovah lobi. Te a abi fu du nanga mati, dan libisma de leki katun. Wi e teki sani abra fu tra sma makriki. Wi Mekiman sabi heri bun taki fu di wi na sondu libisma, meki mati kan tyari takru bakapisi kon gi wi. Ma a sabi tu taki mati kan de wan bigi yepi gi wi. Dati meki a e gi wi a koni rai disi: „A sma di e waka nanga konisma, sa tron wan koni sma, ma a sma di abi demakandra nanga donsma, no sa abi bun bakapisi” (Odo 13:20; 1 Kor. 15:33). Nowan fu wi wani abi ’takru bakapisi’. Wi alamala wani ’tron koni sma’. Nowan sma kan meki Yehovah kon moro koni leki fa a de, fu di a abi ala koni kaba. Èn nowan sma kan meki Yehovah kisi takru fasi. Ma toku Yehovah de wan moi eksempre gi wi te a abi fu du nanga  den sma di a e teki leki mati. Denki a tori: Sortu sondu libisma Yehovah e teki leki en mati?

12. Sortu sma Yehovah e teki leki en mati?

¹² Yehovah ben kari a famiri-edeman Abraham „mi mati” (Yes. 41:8). A man disi ben de wan heri moi eksempre, fu di a ben e dini Gado nanga en heri ati, a ben de wan bun sma, èn a ben e gi yesi na Yehovah. Iya, a ben de wan man di ben abi bribi (Yak. 2:21-23). Na den sortu sma dati Yehovah e teki leki mati. Na ini a ten disi, a e suku den sortu sma dati tu fu de en mati. Efu Yehovah e suku den sortu mati dati, dan wi musu du dati tu, a no so? Na so wi sa waka nanga konisma, so taki wi kan tron konisma tu.

13. San kan yepi yu fu teki bun mati?

¹³ San kan yepi yu fu teki bun mati? Te yu e poti prakseri na a eksempre fu sma na ini Bijbel ten, dan dati kan de wan deki-ati gi yu. Poti prakseri na a matifasi di Rut ben abi nanga Naomi, a mama fu a masra fu Rut. Prakseri sosrefi a matifasi fu David nanga Yonatan, noso a di fu Timoteyus nanga Paulus (Rut 1:16, 17; 1 Sam. 23:16-18; Fil. 2:19-22). Wan prenspari reide fu san ede den sma disi ben de bun mati fu makandra, na fu di den ben lobi Yehovah trutru. Yu man feni mati di lobi Yehovah neleki fa yu lobi en? Yu kan abi a dyaranti taki yu kan feni furu fu den sortu mati dati na ini a Kresten gemeente. Den sortu mati dati no sa gi yu deki-ati fu du wan sani di Yehovah no lobi. Na presi fu dati, den sa yepi yu fu gi yesi na Yehovah, den sa yepi yu fu kon abi wan moro bun matifasi nanga en, èn den sa yepi yu fu du san a yeye wani. (Leisi Galasiasma 6:7, 8.) Den sa yepi yu fu tan wan sma di Gado lobi.

Sori lespeki gi den wan di Yehovah poti fu teki fesi

14. Sortu sani e meki en muilek gi wi fu sori lespeki gi den wan di e teki fesi?

¹⁴ A di fu tu fasi fa wi kan sori taki wi lobi Yehovah, na te wi e sori lespeki gi den wan di e teki fesi. Fu san ede a muilek gi wi fu du dati son leisi? Wán reide, na taki den wan di e teki fesi na sondu libisma. Boiti dati, wi na sondu libisma tu. Wi alamala e feti nanga a firi di wi abi fu opo wisrefi teige trawan.

15, 16. (a) Fu san ede a de prenspari taki wi e sori lespeki gi den wan di Yehovah gi a frantwortu fu luku a pipel fu en? (b) Te wi e luku fa Yehovah ben e si na opo di den Israelsma ben opo densrefi teige Moses, dan sortu prenspari sani wi e leri?

¹⁵ Sobun, kande yu e aksi yusrefi: ’Efu a muilek so gi wi fu sori lespeki gi den wan di e teki fesi, dan fu san ede wi musu du dati?’ A piki tapu na aksi disi, abi fu du nanga a sma di abi a reti fu tiri. Suma yu sa teki leki yu tiriman? Efu wi e teki Yehovah leki a Moro Hei Tiriman fu wi, dan wi musu sori lespeki gi den wan di a poti fu teki fesi. Te wi no e du dati, dan fu taki en leti, wi no kan kari Yehovah wi Tiriman, a no so? Boiti dati, nofo tron Yehovah e tiri wi nanga yepi fu den sondu libisma di a gi a frantwortu fu luku a pipel fu en. Efu wi ben o opo wisrefi teige den sma dati, dan fa Yehovah o feni dati?​—Leisi 1 Tesalonikasma 5:12, 13.

¹⁶ Fu eksempre, di den Israelsma ben e krutu nanga Moses, èn di den ben e opo densrefi teige en, dan Yehovah ben si a sani dati leki na opo den ben e opo densrefi teige En (Num. 14:26, 27). Gado no kenki. Efu oiti wi ben o opo wisrefi teige den wan di a poti fu teki fesi, dan wi ben o opo wisrefi teige en!

17. Fa wi kan sori lespeki gi den wan di e teki fesi na ini a gemeente?

¹⁷ Na apostel Paulus e tyari kon na krin fa wi kan sori lespeki gi den wan di abi frantwortu na ini a Kresten gemeente. A ben skrifi: „Gi yesi na den wan di e teki fesi na un mindri èn saka unsrefi na den ondro, bika den e sorgu unu; den e du disi leki sma di sa musu gi frantwortu fu dati; na so fasi den kan du disi nanga prisiri èn den no sa du dati nanga geme, bika disi no ben o bun gi unu” (Hebr. 13:17). A no de fu taki, dati wi musu meki furu muiti fu tron sma di de klariklari fu gi  yesi na trawan èn fu saka wisrefi na trawan ondro. Ma hori na prakseri taki wi wani taki Gado tan lobi wi. Dati meki wi wani du ala san wi man fu doro a marki dati, a no so?

Meki Yehovah tan si yu leki wan sma di krin

18. Fu san ede Yehovah wani taki wi musu de krin?

¹⁸ A di fu dri fasi fa wi kan sori taki wi lobi Yehovah, na te wi e meki muiti fu tan sma di krin. Nofo tron papa nanga mama e du ala san den man fu sorgu taki den pikin fu den krin. Fu san ede den e du dati? Wan reide na taki te a pikin krin, dan a no sa kon siki makriki. Wan tra reide, na taki te wan pikin krin, dan dati e sori taki en papa nanga mama lobi en èn taki den e sorgu en bun. Fu den srefi sani disi ede, meki Yehovah wani taki wi musu de krin. A sabi taki te wi krin, dan dati de gi wi eigi bun. A sabi tu taki te wi krin, dan wi e gi glori na en, fu di en na wi hemel Tata. A sani disi prenspari srefisrefi, bika te sma e si taki wi de heri tra fasi leki den sma na ini a doti grontapu disi, dan kande den sa wani anbegi a Gado fu wi.

19. Fa wi du sabi taki a de prenspari fu hori wi skin èn den sani di wi abi krin?

¹⁹ Na sortu fasi wi musu tan krin? Fu taki en leti, wi musu tan krin na ala fasi. Na ini Israel fu owruten, Yehovah ben meki a pipel fu en kon frustan o prenspari a de fu sorgu taki a skin fu den, nanga den sani di den abi ben de krin (Lef. 15:31). A Wet di Gado ben gi Moses ben sori den Israelsma taki den ben musu trowe a doti fu den, taki den ben musu krin den prapi fu den, taki den ben musu wasi den anu, den futu, nanga den krosi fu den (Ex. 30:17-21; Lef. 11:32; Num. 19:17-20; Deut. 23:13, 14). A Wet ben e memre den Israelsma taki a Gado fu den, Yehovah, na wan santa Gado. Disi wani taki dati a „krin”, èn taki a „soifri”. Futuboi fu a santa Gado musu de santa tu.​—Leisi Lefitikus 11:44, 45.

20. Na sortu fasi wi musu tan krin?

²⁰ Fu dati ede, wi musu de krin na ala fasi. Wi e meki muiti fu tan abi wan krin denki. Wi e tan hori wisrefi na den markitiki fu Yehovah di e sori wi fa wi musu tyari wisrefi na wan fasi di fiti, awinsi sma na wi lontu e libi wan yayolibi. San moro prenspari, na taki wi wani anbegi Gado na wan krin fasi. Dati wani taki dati wi no wani abi noti fu du nanga falsi anbegi. Wi no wani frigiti a warskow di Gado e gi wi na Yesaya 52:11. Drape skrifi: „Un drai gowe! Drai gowe èn komoto fu drape. No fasi nowan sani di no krin èn komoto fu drape. Un hori unsrefi krin.” Na ini a ten disi, wi e wai pasi gi iniwan sani di abi fu du nanga falsi anbegi, èn na so wi e hori na anbegi fu wi krin. Fu dati ede, wi e luku bun taki wi no e teki prati na pôpi fesa di abi fu du nanga falsi anbegi. A tru taki a no makriki fu tan krin. Ma a pipel fu Yehovah e meki muiti fu tan krin, fu di dati o meki taki Gado tan lobi den.

21. San o gi wi a dyaranti taki Gado o tan lobi wi?

²¹ Yehovah wani taki wi musu kisi wini fu têgo fu a lobi fu en. Ma ibriwan fu wi musu sorgu taki a e du ala san a man fu meki Gado tan lobi en. Wi kan du disi te wi e teki na eksempre fu Yesus, èn te wi e gi yesi na den komando fu Yehovah fu di wi lobi En. Na so wi sa abi a dyaranti taki noti „sa man puru wi fu a lobi fu Gado, iya, a lobi di de na ini Krestes Yesus, wi Masra”.​—Rom. 8:38, 39.

Yu e memre disi ete?

• Fa a konsensi fu wi kan yepi wi fu meki Gado tan lobi wi?

• Fu san ede wi musu lobi den wan di Yehovah lobi?

• Fu san ede a de tumusi prenspari fu sori lespeki gi den wan di Yehovah poti fu teki fesi?

• Fu san ede a prenspari taki a pipel fu Gado e tan krin?

[Aksi fu a tori disi]

[Faki/​Prenki na tapu bladzijde 20]

WAN BUKU DI E YEPI WI FU TYARI WISREFI NA WAN FASI DI FITI

Na den distrikt kongres fu 2008-2009, wan buku kon na doro di nen Blijf in Gods liefde (Meki Gado tan lobi yu). A buku disi abi 224 bladzijde. Fa wi kan kisi wini fu a nyun buku disi? A buku disi na fu yepi Kresten fu kon sabi den markitiki fu Yehovah èn fu lobi den. A buku disi e poti prakseri moro furu na a fasi fa Kresten musu tyari densrefi. Te wi e studeri a buku Blijf in Gods liefde, dan wi sa kisi wan moro tranga overtoigi taki te wi e hori wisrefi na den markitiki fu Yehovah, dan dati na a moro bun fasi fa wi kan libi now. Te wi e hori wisrefi na den markitiki dati, dan wi sa kisi têgo libi.

Boiti dati, a buku disi na fu yepi wi fu kon si taki a no de wan hebi fu gi yesi na Yehovah. Na presi fu dati, te wi e gi yesi na Yehovah, dan wi e sori en o furu lobi wi abi gi en. Dati meki te wi e studeri a buku disi, dan wi sa aksi wisrefi: ’Fu san ede mi e gi yesi na Yehovah?’

Te son sma e meki a bigi fowtu fu drai baka gi Yehovah, dan dati no e kon fu di den no e frustan den leri fu Gado, ma a e kon fu di den no e tyari densrefi na wan fasi di fiti. Dati meki, a de tumusi prenspari taki wi e kon abi moro lobi nanga warderi gi den wet nanga den gronprakseri fu Yehovah di e tiri wi na ini wi aladei libi! Wi abi a frutrow taki a nyun buku disi sa yepi Yehovah en skapu na heri grontapu fu abi a fasti bosroiti fu du san reti, èn fu sori taki Satan na wan leiman. Ma san moro prenspari, na taki den sa meki Gado tan lobi den!​—Yud. 21.

[Prenki na tapu bladzijde 18]

„Efu unu e hori unsrefi na den komando fu mi, dan mi o tan lobi unu, neleki fa mi hori misrefi na den komando fu a Tata èn a tan lobi mi”