A getrow futuboi èn a Tiri Skin di e teki presi gi en

„Suma na trutru a getrow futuboi, a koniwan, di en masra sa poti fu luku ala den futuboi fu en, so taki a kan tan gi den a nyanyan fu den na a reti ten?”​—LUK. 12:42.

1, 2. Sortu prenspari aksi Yesus ben poti gi den disipel fu en di a ben fruteri den sortu sani ben o pasa na ini den lasti dei?

DI YESUS ben e fruteri den disipel fu en sortu sani ben o pasa na ini den lasti dei, dan a aksi den a sani disi: „Suma na trutru a getrow èn koni srafu di en masra poti fu luku den futuboi fu en, fu kan gi den nyanyan na a reti ten?” Baka dati, Yesus taki dati a srafu disi ben o kisi blesi, fu di a ben o kisi a frantwortu fu luku ala den sani di a Masra abi.​—Mat. 24:45-47.

 ² Wan tu mun na fesi, Yesus ben aksi den disipel fu en wan srefi sortu sani. (Leisi Lukas 12:42-44.) A ben kari a srafu wan „futuboi”. Son leisi wan masra e poti wan fu den futuboi fu en fu luku den tra futuboi na ini na oso fu en. Ma a futuboi dati e dini a masra fu na oso tu. Suma na a srafu, noso a futuboi disi èn fa a e gi den tra futuboi „nyanyan na a reti ten”? A de tumusi prenspari taki wi alamala e kon sabi suma Gado e gebroiki fu gi den futuboi fu en yeye nyanyan.

3. (a) Fa den leriman fu Krestenhèit e frustan den sani di Yesus ben taki fu „a srafu”? (b) Suma na „a srafu”, èn suma na „ala den futuboi”?

³ Nofo tron den leriman fu Krestenhèit e taki dati a srafu di Yesus ben taki fu en, abi fu du nanga Kresten di abi frantwortu na ini den kerki fu den. Ma Yesus di de a „masra” na ini na agersitori, no ben taki dati furu srafu ben o de na ini den difrenti kerki fu Krestenhèit. Na presi fu dati, a sori krin taki wán „futuboi” nomo, noso wán „srafu” ben o de, èn a ben o poti en fu luku ala den sani di a abi. Sobun, soleki fa A Waktitoren sori furu leisi, a futuboi e prenki a „pikin ipi”, noso a heri grupu fu salfu disipel. Ma fosi Yesus ben poti na aksi di skrifi na ini Lukas 12:42, a ben taki fu a pikin ipi disi (Luk. 12:32). Den wortu „ala den futuboi” abi fu du nanga a srefi grupu disi, ma den wortu dati e poti prakseri na a frantwortu di ibriwan fu den abi. A sani disi e meki a moi aksi disi opo kon: A de so taki ibri memre fu a srafu-grupu abi a frantwortu fu gi den tra futuboi yeye nyanyan na a reti ten? Wi sa kisi piki tapu na aksi disi te wi e ondrosuku finifini san Bijbel e taki fu a tori disi.

A futuboi fu Yehovah na ini owruten

4. Fa Yehovah ben kari Israel fu owruten? Sortu prenspari sani wi musu sabi fu a pipel dati?

⁴ Yehovah ben kari Israel fu owruten, en futuboi. Yehovah ben taki: „’Unu [wan grupu] na mi kotoigi [wan grupu]’, na so Yehovah taki, ’iya, mi futuboi [wán sma] di mi frukisi’” (Yes. 43:10). A heri pipel dati ben de a srafu-grupu. Ma a de prenspari fu sabi taki na soso den priester nanga den Leifisma di no ben de priester, ben abi a frantwortu fu gi a pipel leri.​—2 Kron. 35:3; Mal. 2:7.

5. Soleki fa Yesus ben taki, dan sortu bigi kenki ben o kon?

⁵ A de so taki a pipel fu Israel ben de a srafu di Yesus ben taki fu en? Nôno. Wi sabi dati, fu di Yesus ben taigi den Dyu fu a ten fu en a sani disi: „Den sa puru a kownukondre fu Gado na un anu èn den sa gi en na wan pipel di e meki den froktu fu a kownukondre” (Mat. 21:43). A de krin taki wan kenki ben o kon. Yehovah ben o gebroiki wan nyun pipel. Ma a srafu na ini na agersitori fu Yesus ben o gi sma leri na a srefi fasi leki fa a „futuboi” fu Gado na ini Israel fu owruten ben e du dati.

A getrow srafu e kisi frantwortu

6. Sortu nyun pipel kon de na a Pinksterfesa fu a yari 33, èn suma tron wan memre fu a pipel dati?

⁶ A nyun pipel, noso „na Israel fu Gado”, na wan grupu fu Israelsma na yeye fasi (Gal. 6:16; Rom. 2:28, 29; 9:6). Na Israel disi kon de di a yeye fu Gado kon na tapu den disipel na a Pinksterfesa fu a yari 33. Baka dati, ala den salfu Kresten kon tron memre fu a pipel di e dini now leki a srafu-grupu di Yesus Krestes, a Masra, poti fu luku den sani di a abi. Ibri memre fu a pipel dati ben kisi a komando fu preiki a bun nyunsu èn fu meki disipel (Mat. 28:19, 20). Ma a de so taki ibri memre ben abi a frantwortu fu gi den tra futuboi nyanyan na a reti ten? Meki wi luku fa Bijbel e piki na aksi disi.

7. San ben de a moro prenspari frantwortu fu den apostel fosi? Sortu tra frantwortu den kisi bakaten?

⁷ Di Yesus teki den 12 apostel fu en, dan a moro prenspari wroko di den ben musu du, ben de fu go preiki a bun nyunsu gi tra sma. (Leisi Markus 3:13-15.) A wroko disi ben e kruderi nanga san a Griki wortu apostolos wani taki. A wortu dati komoto fu wan tra  wortu di wani taki „seni go”. Ma baka wan pisi ten di a Kresten gemeente ben de fu seti, dan den apostel kisi wan tra frantwortu. Now den ben o wroko „leki opziener”.​—Tori. 1:20-26.

8, 9. (a) San ben de a moro prenspari sani gi den 12 apostel? (b) Sortu tra sma a tiri skin ben e gi moro frantwortu?

⁸ San ben de a moro prenspari sani gi den 12 apostel? Wi e kisi piki tapu na aksi dati te wi e luku san pasa baka a Pinksterfesa. Di sma bigin krutu taki son uma di ben lasi den masra na ini dede, no ben e kisi nyanyan, dan den 12 apostel kari den disipel kon na wán. Den taigi den: „A no bun taki wi e tapu fu preiki Gado wortu, fu go prati nyanyan gi sma.” (Leisi Tori fu den Apostel 6:1-6.) Ne den apostel poti tra lepi brada fu du a „prenspari wroko” disi. Na so den apostel ben kan gebroiki den ten fu „preiki a wortu”. Yehovah blesi a seti disi, èn „moro nanga moro sma na ini Yerusalem ben e tron disipel” (Tori. 6:7). Sobun, na den apostel ben abi a tumusi prenspari frantwortu fu gi den futuboi fu Gado yeye nyanyan.​—Tori. 2:42.

⁹ Baka wan pisi ten, tra brada ben e kisi bigi frantwortu. Nanga yepi fu a santa yeye, a gemeente fu Antiokia seni Paulus nanga Barnabas fu go du zendelingwroko. Èn aladi den tu Kresten disi no ben de fu a fosi grupu fu apostel, toku sma kon sabi den leki apostel (Tori. 13:1-3; 14:14; Gal. 1:19). Bakaten, a tiri skin na ini Yerusalem agri taki den man disi ben de apostel (Gal. 2:7-10). Syatu baka dati, Paulus ben yepi fu prati yeye nyanyan gi den futuboi fu Gado. Nanga yepi fu santa yeye, a skrifi a fosi brifi fu en di tron wan pisi fu Bijbel.

10. A de so taki ala salfu Kresten ben e sreka yeye nyanyan na ini a fosi yarihondro? Fruklari dati.

¹⁰ Ma a de so taki ala salfu Kresten ben e tiri a preikiwroko èn taki den alamala ben e sreka yeye nyanyan? Nôno. Na apostel Paulus e taki: „A no alamala na apostel, a no so? A no alamala na profeiti, a no so? A no alamala na leriman, a no so? A no alamala e du wondru, a no so?” (1 Kor. 12:29) Aladi ala salfu Kresten ben e teki prati na a preikiwroko, toku wan pikin grupu nomo, iya, aiti man, ben kisi a frantwortu fu skrifi den 27 buku fu den Kresten Griki Buku fu Bijbel.

A getrow srafu na ini a ten disi

11. Sortu „sani” a srafu musu luku?

¹¹ Den wortu fu Yesus di skrifi na Mateyus 24:45, e sori krin taki wan getrow èn koni srafu ben o libi ete na grontapu na a ten fu a kaba. Openbaring 12:17 e kari den sma disi „den pikin” di ben tan abra fu na uma. Leki grupu, den pikin disi kisi a frantwortu fu luku ala den sani di Krestes abi na grontapu. Den „sani” di a getrow futuboi musu luku, na den sani di a Kownu abi na grontapu. Dati na den sma na grontapu di e horibaka gi a Kownukondre, èn sosrefi den sani di den futuboi fu Krestes e gebroiki fu du a diniwroko.

12, 13. Fa wan Kresten brada noso sisa sabi taki a abi a howpu fu go libi na hemel?

¹² Fa wan Kresten brada noso sisa sabi efu a abi a howpu fu libi na hemel, èn efu a de wan fu den sma fu na Israel na yeye fasi? Wi e kisi piki tapu na aksi disi te wi e luku san Paulus e taigi den wan di, neleki en, abi a howpu fu libi na hemel. Paulus ben taki: „Bika ala den sma di a yeye fu Gado e tiri, na manpikin fu Gado. Bika Gado no gi unu wan yeye fu tron srafu, so taki unu e kon frede baka, ma unu kisi wan yeye di e sori taki Gado teki unu leki en manpikin. A yeye dati e meki wi bari taki: ’Abba, Tata!’ A yeye srefi e buweisi makandra nanga a yeye fu wi taki wi na pikin fu Gado. Fu dati ede, efu wi na pikin, dan wi na sma di o kisi wan gudu tu, iya, wi o kisi wan gudu fu Gado, ma wi o kisi en makandra nanga Krestes, soso te wi e nyan pina makandra nanga en, so taki wi kan kisi glori tu makandra nanga en.”​—Rom. 8:14-17.

 ¹³ Fu taki en leti, den sma disi tron salfuwan nanga yepi fu a santa yeye fu Gado, èn den e kisi a „kari” fu go libi na hemel (Hebr. 3:1). Na Gado srefi e gi den a kari disi. Den wan di kisi a kari, e teki en wantewante, sondro taki den e tweifri noso e frede fu tron manpikin fu Gado. (Leisi 1 Yohanes 2:20, 21.) Sobun, a no densrefi e bosroiti taki den abi a howpu disi, ma na Yehovah e poti a marki, noso en santa yeye na den tapu.​—2 Kor. 1:21, 22; 1 Petr. 1:3, 4.

Wi musu abi a yoisti denki

14. Fa den salfuwan e denki fu a kari di den kisi?

¹⁴ Sortu denki den salfuwan musu abi fu densrefi, aladi den e wakti fu go na hemel? Den e frustan taki aladi den kisi wan tumusi moi kari, den musu hori na prakseri taki na wan kari nomo den kisi. Fu man kisi a prijs, den musu tan gi yesi na Gado te na dede. Nanga sakafasi den e taki den srefi wortu disi di Paulus ben taki: „Brada, mi no e denki fu misrefi taki mi grabu en hori kaba; ma wán sani de seiker: Mi frigiti den sani di de na mi baka èn mi e pusu go na fesi fu kisi den sani di de na mi fesi; dati meki mi e du muiti fu doro a marki, so taki mi kan wini a prijs, namku a kari di Gado gi mi fu go na hemel nanga yepi fu Krestes Yesus” (Fil. 3:13, 14). A grupu fu salfuwan di e libi ete na grontapu, musu du ala muiti fu ’waka na wan fasi di fiti a kari di den ben kisi, èn den musu abi sakafasi dorodoro’. Den musu du dati „nanga frede èn nanga beifi”.​—Ef. 4:1, 2; Fil. 2:12; 1 Tes. 2:12.

15. Fa Kresten musu denki fu den wan di e nyan fu a brede èn e dringi fu a win na a Memrefesa? Fa salfuwan e denki fu densrefi?

¹⁵ Ma a kan taki wan sma feni taki a de wan salfuwan, èn a e bigin nyan fu a brede èn dringi fu a win na a Memrefesa. Fa tra Kresten musu denki fu a sma dati? Wi no musu krutu a sma dati. A tori disi abi fu du nanga a sma èn nanga Yehovah (Rom. 14:12). Ma Kresten di trutru tron salfuwan, no e dwengi trawan fu poti spesrutu prakseri na den. Den no abi a denki taki na fu di den de salfuwan, meki den man si sani moro krin leki sonwan fu den lepi brada nanga sisa di de fu a „bigi ipi” (Openb. 7:9). Den no feni tu taki den abi moro santa yeye leki den Kresten brada nanga sisa fu den di de fu den „tra skapu” (Yoh. 10:16). Den no e fruwakti taki sma e handri  tra fasi nanga den. Èn den no abi a denki tu taki den hei moro den owruman na ini a gemeente, soso fu di den e nyan fu a brede èn e dringi fu a win.

16-18. (a) A de so taki ala den salfuwan e tyari nyun tori fu Bijbel kon na krin? Fruklari dati nanga yepi fu wan eksempre. (b) Fu san ede a Tiri Skin no abi fu aksi ala Kresten di feni taki den na salfuwan, fa den e denki fu wan spesrutu tori?

¹⁶ A de so taki ala den salfuwan disi na heri grontapu e wroko makandra fu tyari nyun tori fu Bijbel kon na krin? Nôno. Aladi a srafu-grupu abi a frantwortu fu gi den futuboi fu Gado yeye nyanyan, toku a no de so taki ala den memre fu a srafu-grupu abi den srefi frantwortu, èn den no e du a srefi wroko tu. (Leisi 1 Korentesma 12:14-18.) Soleki fa wi ben si kaba, na ini a fosi yarihondro, ala den Kresten ben e teki prati na a tumusi prenspari preikiwroko. Ma wan pikin grupu nomo ben abi a frantwortu fu skrifi Bijbel buku èn fu teki fesi na ini a Kresten gemeente.

¹⁷ Luku na eksempre disi: Son leisi, Bijbel e taki dati „a gemeente” e krutu wan afersi (Mat. 18:17). Fu taki en leti, na soso den owruman abi a frantwortu fu du disi leki fesiman fu a gemeente. Den owruman no e aksi ala sma na ini a gemeente fa den e denki fu a tori, so taki den kan teki wan bosroiti. Den e du san den musu du leki owruman. Den e handri gi a bun fu a heri gemeente.

¹⁸ Na so a de tu na ini a ten disi, taki wan pikin grupu fu brada abi a frantwortu fu teki presi gi a srafu-grupu. A grupu disi na a Tiri Skin fu Yehovah Kotoigi. Den salfu brada na ini a grupu disi e tiri a Kownukondre preikiwroko èn den e sorgu taki den futuboi fu Gado e kisi yeye nyanyan. Ma neleki fa a ben de na ini a fosi yarihondro, na so a Tiri Skin no e aksi ibri memre fu a srafu-grupu rai, fosi a teki wan bosroiti. (Leisi Tori fu den Apostel 16:4, 5.) Ma ala den salfu Kotoigi e teki prati fayafaya na a tumusi prenspari kotiwroko di e pasa now. A „getrow èn koni srafu” grupu na wán skin, ma ibriwan fu den memre e du difrenti sortu wroko.​—1 Kor. 12:19-26.

19, 20. Sortu yoisti denki a bigi ipi musu abi fu a „getrow èn koni srafu” èn fu a Tiri Skin di e teki presi gi a srafu disi?

¹⁹ Sortu krakti den sani di wi leri na ini na artikel disi, musu abi tapu a bigi ipi di e kon bigi moro nanga moro èn di abi a howpu fu libi fu têgo na grontapu? Leki memre fu a bigi ipi, den na wan fu den sani di a Kownu abi, èn den e prisiri fu horibaka fayafaya gi den seti fu a Tiri Skin di e teki presi gi „a getrow èn koni srafu”. Den memre fu a bigi ipi abi warderi gi a yeye nyanyan di den e kisi nanga yepi fu a Tiri Skin. Ma aladi den memre fu a bigi ipi e sori lespeki gi a srafu-grupu, den e luku bun taki den no e hei sma di feni taki den de fu a salfu grupu. Nowan enkri Kresten di trutru kon tron wan salfuwan nanga yepi fu a yeye fu Gado, ben o wani taki sma e handri so nanga en.​—Tori. 10:25, 26; 14:14, 15.

²⁰ Kande wi na „futuboi” di de fu a grupu fu salfuwan di e libi ete na grontapu, noso kande wi na memre fu a bigi ipi. Awansi fa a no fa, meki wi abi a fasti bosroiti fu horibaka fayafaya gi a getrow futuboi èn a Tiri Skin di e teki presi gi en. Meki a de so taki ibriwan fu wi e „tan na ai” èn e tan gi yesi na Gado te na a kaba.​—Mat. 24:13, 42.

Yu e memre disi ete?

• Suma na „a getrow èn koni srafu”, èn suma na den futuboi?

• Fa wan Kresten brada noso sisa sabi taki a abi a howpu fu go libi na hemel?

• Suma abi a moro prenspari frantwortu fu sreka nyanyan di abi fu du nanga nyun Bijbel tori?

• Fa wan salfuwan musu denki fu ensrefi?

[Aksi fu a tori disi]

[Prenki na tapu bladzijde 23]

Na ini a ten disi, a Tiri Skin e teki presi gi a getrow èn koni srafu. Wan srefi sortu seti ben de na ini a fosi yarihondro