Kon sabi Gado finifini moro nanga moro

ALA den futuboi fu Yehovah wani taki a feni den bun. Fu dati ede, wi e du ala san wi man fu kon abi wan moro tranga bribi èn fu du santa diniwroko gi en fayafaya. Ma na apostel Paulus ben sori taki wi musu luku bun nanga wan spesrutu sani, fu di a sani dati ben abi krakti tapu son Dyu na ini a ten fu en. Paulus ben taki: „Den de fayafaya fu dini Gado, ma den no abi soifri sabi” (Rom. 10:2). Ma awansi wi de fayafaya, toku moro de fanowdu efu wi wani abi wan tranga bribi, èn efu wi wani tan anbegi Yehovah na wan fasi di fiti. Wi musu kon abi soifri sabi fu wi Mekiman èn fu a wani fu en.

Na ini wan fu den tra buku fu en, Paulus sori taki te wan sma e du ala muiti fu kon sabi Gado moro bun, dan dati sa yepi en fu tyari ensrefi na wan fasi di A feni bun. Paulus ben begi taki den bakaman fu Krestes ’kan kon sabi a wani fu Gado finifini’, so taki ’den kan waka na wan fasi di Yehovah feni bun’. A sani disi ben o yepi den fu ’plisi Gado dorodoro aladi den ben e tan meki froktu na ini ibri bun sani di den ben e du, èn te den ben e kon sabi Gado finifini moro nanga moro’ (Kol. 1:9, 10). Fu san ede a de so prenspari fu kon „sabi Gado finifini”? Èn fu san ede wi musu kisi a sabi disi moro nanga moro?

Wan prenspari sani di kan yepi wi fu abi bribi

Wi abi bribi fu di wi studeri Bijbel fu kon sabi Gado finifini, èn fu di wi kon sabi tu san na a wani fu en. Efu wi no ben abi a soifri sabi dati, dan a bribi di wi abi na ini Yehovah ben o de neleki wan oso di meki fu karta. Wan pikin winti nomo ben o wai na oso dati puru. Paulus e gi wi a deki-ati fu du santa diniwroko gi Gado nanga wi „frustan” èn a gi wi deki-ati tu fu „teki wan nyun fasi fu denki” (Rom. 12:1, 2). Wi sa man du den sani disi te wi e studeri Bijbel doronomo.

Ewa, wan gewoon pionier na ini Polen, e taki: „Efu mi no ben e studeri Gado Wortu doronomo, dan mi no ben o kon sabi Yehovah moro bun. Mi no ben o tyari misrefi moro leki wan Kresten, èn a bribi fu mi ben o kon swaki. Te fu kaba, a sani disi ben o meki taki Yehovah no feni mi bun moro.” Meki a sani dati noiti no pasa nanga wi! Na ini den paragraaf di e kon, wi sa poti prakseri na a eksempre fu wan man di ben tan leri sabi Yehovah moro bun. A sani disi meki taki Yehovah ben feni en bun. Meki wi go luku na eksempre dati.

„Fu tru, mi lobi yu Wet!”

A singi di wi sabi leki Psalm 119 na ini wi Bijbel, e sori wi fa a psalm skrifiman ben feni den wet, den frumane, den komando, nanga den krutu bosroiti fu Yehovah. A psalm skrifiman ben skrifi: „Mi sa abi wan lostu gi den wet bosroiti fu yu . . . Na den frumane fu yu mi lobi.” A ben skrifi tu: „Fu tru, mi lobi yu wet! Heri dei mi e poti prakseri na en.”—Ps. 119:16, 24, 47, 48, 77, 97.

Soleki fa wi si, dan a psalm skrifiman ben abi lostu gi a wet, èn a ben e poti prakseri na en. Disi e sori taki a ben e denki dipi fu a wet disi. Fu taki en leti, a ben lobi fu denki dipi fu a wet. Den wortu dati e sori krin taki a psalm skrifiman trutru ben lobi fu studeri a wet fu Gado. A lobi disi no ben de wan firi nomo di a ben abi na ini en ati. Ma a ben angri fu „poti prakseri” na a wet, so taki a ben kan frustan den wortu fu Yehovah moro krin. Disi e sori wi taki a ben  wani kon sabi Gado èn sosrefi a wani fu en dorodoro.

A de krin taki a psalm skrifiman ben lobi Gado Wortu nanga en heri ati. Wi kan aksi wisrefi a sani disi: ’Na so a de nanga mi? Mi lobi fu leisi èn fu ondrosuku wan pisi fu Bijbel ibri dei? Mi e meki ala muiti fu leisi Gado Wortu ibri dei? Èn fosi mi e du dati, mi e begi Gado fu yepi mi fu frustan san mi e leisi?’ A fasi fa wi e piki den aksi disi sa sori efu wi „e kon sabi Gado finifini moro nanga moro”.

Ewa e taki: „Doronomo mi e pruberi fu studeri moro bun. Sensi wi kisi a brochure di nen ’Zie het goede land’, mi e gebroiki en pikinmoro ibri leisi te mi e studeri. Moro nanga moro mi e pruberi fu ondrosuku sani na ini a buku Inzicht in de Schrift èn na ini tra buku te dati de fanowdu.”

Luku sosrefi na eksempre fu Wojciech nanga Małgorzata, di abi furu frantwortu na ini na osofamiri fu den. Fa den e feni ten fu studeri Bijbel? „Te a kan, wi e meki ten fu studeri Gado Wortu aparti. Èn te wi e studeri leki osofamiri èn e taki tori nanga makandra, dan wi e taki fu den moi sani di wi kon sabi di wi ben e studeri.” Fu di den e studeri Bijbel finifini, meki den de koloku trutru èn den „e kon sabi Gado finifini moro nanga moro”.

Opo yu ati fu teki den leri fu Gado

Leki Kresten, wi e bribi taki Gado wani „taki ala sortu sma musu kisi frulusu èn taki den musu kon sabi a waarheid soifri” (1 Tim. 2:3, 4). Disi e sori o prenspari a de fu leisi Bijbel èn fu meki muiti fu kon ’frustan san a wani taki’ (Mat. 15:10). Wán fasi fa wi kan du dati, na te wi e opo wi ati fu teki den leri fu Gado. Na dati den Bereasma fu owruten ben du di Paulus ben e preiki a bun nyunsu gi den. Bijbel e taki: „Den ben teki a wortu nanga den heri ati, èn den ben e ondrosuku Gado Buku finifini ibri dei fu si efu den sani disi ben tru.”—Tori. 17:11.

Yu de leki den Bereasma? Yu e studeri Bijbel nanga yu heri ati? Te yu e studeri Bijbel, dan yu e sorgu taki tra sani no e hari yu prakseri? Srefi te wan Kresten no ben lobi fu studeri fosi, toku a kan meki muiti fu de leki den Bereasma. Boiti dati, te son sma e kon moro owru, dan den no e leisi so furu moro èn den no e studeri so furu moro tu. Ma a no abi fu de so nanga wan Kresten. Awinsi omeni yari wan sma abi, toku a kan sorgu taki tra sani no hari en prakseri. Èn te yu e leisi, yu kan meki muiti fu kon sabi sani di yu kan fruteri trawan. Fu eksempre, kande yu kan teki en leki wan gwenti fu fruteri yu patna noso wan tra Kresten mati sortu sani yu leisi noso leri di yu ben e studeri Bijbel. Disi kan yepi yu fu no frigiti den sani di yu leri, èn den sani disi sa abi krakti tapu na ati fu yu. Boiti dati, yu sa man gi trawan deki-ati tu.

Te yu e studeri Bijbel, dan yu kan teki na eksempre fu Esra fu owruten. A futuboi disi fu Gado, ben „e sreka en ati fu suku rai na ini a wet fu Yehovah” (Esra 7:10). Fa yu kan du dati? Yu kan suku wan presi pe a sa de moro makriki gi yu fu studeri. Baka dati, sidon èn begi Yehovah fu yepi yu fu kon frustan sani moro bun (Yak. 1:5). Aksi yusrefi: ’San mi wani leri fu den sani di mi o studeri?’ Te yu e leisi wan pisi na ini Bijbel, dan suku fu kon sabi san na den moro prenspari sani na ini a pisi tori dati. Kande yu kan skrifi den sani disi na tapu papira, noso kande yu wani poti wan marki na den prenspari pisi di yu wani hori na prakseri. Luku fa yu  kan gebroiki den sani dati na ini a preikiwroko, te yu musu teki bosroiti, noso te yu e gi yu Kresten brada nanga sisa deki-ati. Te yu kaba studeri, dan luku syatu baka sortu sani yu leri. Dati sa yepi yu fu no frigiti den sani dati.

Ewa e taki fa a e studeri: „Te mi e leisi Bijbel, dan mi e luku den verwijstekst, mi e gebroiki sosrefi na Index van Wachttoren-publikaties, nanga a Watchtower Library na tapu CD-ROM. Mi e skrifi wan tu sani di mi wani gebroiki na ini a preikiwroko.”

Son sma studeri Bijbel finifini furu yari langa, èn den lobi fu leri moro fu Gado (Odo 2:1-5). Ma toku den abi furu frantwortu èn den no e feni ten makriki fu studeri Bijbel. Efu na so a de nanga yu, dan sortu kenki yu kan tyari kon?

Fa mi kan feni ten?

Kande yu e agri taki a moro makriki fu meki ten gi sani di yu lobi. Furu sma kon si taki, wan sani di yepi den fu kon lobi studeri Bijbel, na te den e poti marki di den man doro. Fu eksempre, kande den suku fu leisi a heri Bijbel. Ma kande a no makriki fu leisi den langa pisi di abi fu du nanga famirilin. Kande a no makriki fu leisi den pisi di e fruteri finifini fa na owruten tempel ben de. Noso kande yu no lobi fu leisi den muilek profeititori di gersi leki den no abi noti fu du nanga na aladei libi. Pruberi fu du wan tu sani di sa yepi yu fu doro a marki fu yu. Fu eksempre, fosi yu e studeri wan pisi fu Bijbel di yu feni muilek, dan yu ben kan leisi fa sani ben de na a ten dati, noso yu kan leisi san yu kan leri fu a tori dati. Yu kan leisi den sani dati na ini a buku „De gehele Schrift is door God geinspireerd en nuttig”, di de fu kisi na ini pikinmoro 50 tongo.

Wan sani di sa meki en moro makriki gi yu fu leisi Bijbel, na te yu e si a tori neleki yusrefi ben de drape. Disi kan yepi yu fu si den sma na yu fesi èn fu si tu san e pasa. Te yu e du den sani disi, dan dati kan yepi yu kaba fu abi moro prisiri te yu e studeri èn yu sa kisi moro wini tu. A sani disi sa meki yu kisi na angri fu studeri. A sa kon de moro makriki gi yu fu leisi Bijbel ibri dei.

Soleki fa wi si, dan den sani di wi leri na ini na artikel disi kan yepi ibriwan fu wi fu studeri Bijbel. Ma fa a de nanga wan osofamiri di abi furu frantwortu? Fu san ede unu no e sidon fu taki  nanga makandra fu den wini di a abi te unu e studeri leki osofamiri? Te unu e du dati, dan dati kan yepi unu fu feni difrenti fasi fa unu kan studeri leki osofamiri. Kande unu kan opo pikinso moro fruku ibri dei, noso na tapu difrenti dei na ini a wiki, fu poti prakseri na wan pisi fu Bijbel. Noso kande unu sa kon si taki a de fanowdu fu tyari wan tu kenki kon na ini a fasi fa unu e du sani leki osofamiri. Fu eksempre, son osofamiri feni en wan bun sani fu taki nanga makandra fu a deitekst, noso fu leisi wan pisi fu Bijbel te den kaba nyan. Fosi wan sma e bigin krin a tafra noso fosi den e opo go du wan tra sani, dan na osofamiri e teki 10 noso 15 miniti fu taki fu a deitekst, noso fu leisi a Bijbel leisipisi fu a wiki dati. Kande a sani disi no sa makriki na a bigin, ma fosi yu denki a kan tron wan gwenti gi na osofamiri èn den sa kisi furu prisiri fu dati.

Wojciech nanga Małgorzata e fruteri san yepi na osofamiri fu den: „Fosi, wi ben e gebroiki furu ten gi sani di no ben de so prenspari. Wi bosroiti fu no gebroiki so furu ten moro fu skrifi brifi gi sma nanga yepi fu Internet. Wi no e gebroiki so furu ten moro tu fu meki prisiri, èn wi poti spesrutu dei nanga spesrutu ten fu studeri Bijbel finifini.” A no de fu taki, dati na osofamiri disi breiti taki den tyari den kenki disi kon, èn na so a kan de tu nanga na osofamiri fu yu.

Yu sa kisi wini te yu e kon sabi Gado moro bun!

Te yu e studeri Gado Wortu finifini, dan dati sa yepi yu fu meki ’froktu na ini ibri bun sani di yu e du’ (Kol. 1:10). Te dati e pasa nanga yu, dan ala sma sa man si taki yu e go na fesi. Yu sa de wan sma di e frustan den tru tori fu Bijbel bun. Yu sa man teki moro koni bosroiti, èn yu sa sabi moro bun fa fu yepi trawan. Boiti dati, yu no sa de leki den sma di no abi soifri sabi fu Bijbel èn di no e tyari densrefi na wan fasi di fiti. Ma a moro prenspari sani, na taki yu sa kon moro krosibei na Yehovah. Yu sa abi moro warderi gi den fasi fu en, èn dati sa de fu si te yu e fruteri trawan fu en.—1 Tim. 4:15; Yak. 4:8.

Awinsi omeni yari yu abi, noso awinsi o furu ondrofeni yu abi, du ala san yu man fu tan lobi Gado Wortu. Du ala san yu man tu fu studeri a Wortu disi finifini èn fu bribi den sani di yu e leri. Yu kan abi a dyaranti taki Yehovah no sa frigiti a muiti di yu e meki (Hebr. 6:10). A sa gi yu furu blesi.

[Faki na tapu bladzijde 13]

TE WI „E KON SABI GADO FINIFINI MORO NANGA MORO”. . .

A bribi di wi abi na ini Yehovah sa kon moro tranga, èn wi sa libi na wan fasi di a feni bun.—Kol. 1:9, 10

Wi e kon frustan sani moro bun, èn fu di wi man si sani krin, meki wi e teki koni bosroiti.—Ps. 119:99

A sa gi wi prisiri moro nanga moro fu yepi trawan fu kon krosibei na Yehovah.—Mat. 28:19, 20

[Prenki na tapu bladzijde 14]

Aladi a no makriki fu feni wan bun presi pe yu kan studeri Bijbel, toku a sani disi de prenspari

[Prenki na tapu bladzijde 15]

Son osofamiri e leisi wan pisi fu Bijbel te den kaba nyan