Poti marki di yu man doro, so taki yu kan de koloku

„OMENI leisi mi pruberi fu du a sani disi, ma mi no man!” Omeni leisi yu taki den wortu dati, fu di yu no ben man du san yu abi na prakseri fu du? Wan yongu Kresten mama kan denki na a fasi dati, te a weri fu di a beibi fu en e teki furu fu en ten, èn a no sabi fa a kan du moro na ini a diniwroko. Wan tra Kresten kan feni taki a no bun nofo fu doro en marki, fu di a fasi fa a kweki e meki a denki ala ten taki a no e du nofo na ini a gemeente. Wan owru sisa kan firi brokosaka fu di a no man du so furu moro na ini a diniwroko, leki fosi di a ben yongu èn di a ben man waka bun ete. „Te wan lezing e hori di e gi sma deki-ati fu go na ini a pionierwroko, dan dati e meki mi krei son leisi”, na so Christiane e taki. A sisa disi no man du so furu leki san a wani na ini a diniwroko fu Yehovah, fu di a situwâsi na ini en osofamiri e tapu en fu du dati.

San wi kan du te wi e firi so? Fa son Kresten ben man poti marki gi densrefi di den man doro na ini a situwâsi fu den? Sortu wini wi sa kisi te wi no e fruwakti tumusi furu fu wisrefi?

Poti marki di yu man doro

Na apostel Paulus e taigi wi san wi kan du fu no lasi wi prisiri: „Ala ten un musu prisiri na ini a diniwroko fu Masra. Ete wan tron mi o taki: Un musu prisiri! Meki ala sma kon sabi taki unu de klariklari fu fiti unsrefi” (Fil. 4:4, 5). Te wi wani de nanga prisiri èn te wi wani de koloku na ini a diniwroko fu Gado, dan wi musu hori na prakseri san wi man du èn san na a situwâsi fu wi. Na so fasi wi o man poti yoisti marki di wi man doro. Efu wi e poti marki gi wisrefi di wi no o man doro awinsi san wi e du, dan wi o broko wi ede nanga sani sondro taki dati de fanowdu. Na a tra sei, wi musu luku bun taki wi no e fruwakti pikinso nomo fu wisrefi. Aladi a kan de so taki wi man du moro, toku wi kan feni taki wi no abi fu du so furu na ini a Kresten diniwroko, fu di den swakifasi noso a situwâsi fu wi no e gi wi pasi fu du dati.

Awansi na ini sortu situwâsi wi de, Yehovah e fruwakti taki wi e du ala san wi man gi en. Iya, a e fruwakti taki wi e du diniwroko gi en nanga wi heri sili èn nanga wi heri ati (Kol. 3:23, 24). Efu wi no ben o du ala san wi man gi Yehovah, dan wi no ben o du san wi pramisi en di wi gi wi libi abra na en (Rom. 12:1). Boiti dati, wi no ben o abi prisiri trutru, èn wi no ben o kisi tra blesi tu di e kon leki bakapisi fu a diniwroko di wi du nanga wi heri ati.—Odo 10:22.

Na ini Bijbel, den wortu di vertaal nanga „fiti unsrefi”, wani taki tu dati wan sma e hori trawan na prakseri. Den wortu disi trutru wani taki saka yusrefi (Yak. 3:17). Boiti dati, den wortu dati e sori taki wan sma no musu fruwakti tumusi furu fu ensrefi. Sobun, efu wi e fiti wisrefi, dan wi o man abi a yoisti denki fu a situwâsi fu wi. A muilek fu du dati? Aladi son sma man hori trawan na prakseri, toku den e feni en muilek fu du dati. Kon meki wi taki dati wan bun mati fu wi weri srefisrefi fu di a e du  tumusi furu sani. Wi ben o pruberi fu yepi en si taki a de wan koni sani fu tyari kenki kon na ini en libi, a no so? Na a srefi fasi wi musu frustan o ten wi e du moro leki san wi man na ini a situwâsi fu wi.—Odo 11:17.

A kan moro muilek gi wi fu no fruwakti tumusi furu fu wisrefi, efu wi papa nanga mama kweki wi na so wan fasi taki den ben gwenti fu fruwakti tumusi furu fu wi. Di son sma ben de moro yongu, dan den ben feni taki ala ten den ben musu du moro so taki den papa nanga mama sori lobi gi den. Efu na so a de nanga wi, dan wi kan abi wan fowtu denki fu a fasi fa Yehovah e si wi. Yehovah lobi wi, fu di wi e du diniwroko gi en nanga wi heri ati. Gado Wortu e gi wi a dyaranti taki Yehovah „sabi heri bun fa wi meki; a e hori na prakseri taki wi na doti” (Ps. 103:14). A sabi san wi man du èn a lobi wi te wi e dini en fayafaya, aladi wi no man du furu noso aladi a situwâsi fu wi muilek. Te wi e hori na prakseri taki Gado no de leki wan basi di e fruwakti taki wi e du moro leki san wi man, dan dati sa yepi wi fu sori sakafasi fu di wi e frustan san wi no man du.—Mika 6:8.

Ma toku, son sma e feni taki a muilek fu no fruwakti tumusi furu fu densrefi. Efu yu e denki so tu, dan fu san ede yu no e suku yepi na wan lepi Kresten di sabi yu bun? (Odo 27:9) Fu eksempre, a de so taki yu wani dini leki wan gewoon pionier? Dati na wan heri bun marki! A muilek gi yu fu doro a marki dati? Kande yu abi yepi fanowdu fu kenki wan tu sani, so taki yu e libi soso nanga den sani di yu abi fanowdu trutru. Noso yu kan taki nanga a Kresten mati fu yu di yu e frutrow. Unu kan luku efu a de wan koni sani gi yu fu go now na ini a gewoon pionierwroko, aladi yu e hori na prakseri taki yu abi furu frantwortu na ini yu osofamiri. A mati fu yu kan yepi yu fu si efu yu o man du a gewoon pionierwroko trutru, noso a kan yepi yu tu fu si sortu kenki yu musu tyari kon so taki yu man du moro. Wan masra kan yepi en wefi tu fu man si o furu a man du. Fu eksempre, a kan taigi en wefi fu rostu pikinso fosi a bigin du moro na ini a diniwroko na ini wan tra mun. Disi kan meki taki a wefi abi moro krakti èn a no o lasi en prisiri na ini a diniwroko.

Luku san yu man du

Te wi e kon owru noso te a gosontu fu wi e go na baka, dan dati kan tapu wi fu du son sani na ini a diniwroko fu Yehovah. Efu yu na wan papa noso wan mama, dan kande yu e denki taki yu no e kisi furu wini fu a studeri di yu e studeri Bijbel, noso fu den Kresten konmakandra, fu di furu fu yu ten nanga yu krakti e go na den yongu pikin fu yu. Ma a de so taki yu e poti tumusi furu prakseri na den sani di yu no man du? A de so taki son leisi a sani disi e meki taki yu no man si san yu man du ete na ini yu diniwroko?

Dusundusun yari pasa, wan Leifisma ben taki dati a abi a winsi fu du wan sani di a no ben o man du. A ben abi a spesrutu grani fu dini ibri yari, tu wiki langa na ini a tempel. Ma toku, a ben abi a moi winsi fu tan fu têgo krosibei  na a altari (Ps. 84:1-3). San yepi a getrow man disi fu de nanga prisiri? A ben kon frustan taki wán dei na ini a fesidyari fu a tempel, ben de wan aparti grani kaba (Ps. 84:4, 5, 10). Na so wi musu du tu. Na presi fu tan poti prakseri na den sani di wi no man du, wi musu pruberi fu frustan èn warderi den sani di wi man du.

Luku na eksempre fu Nerlande, wan Kresten sisa na ini Kanada. A sisa disi de na ini wan rolsturu, èn a sani dati ben meki a denki taki a no man du furu na ini a diniwroko. Ma a kenki a fasi fa a ben e denki èn a bigin preiki na ini wan bigi wenkri di de krosibei fu en oso. A e taki: „Mi e sidon na ini mi rolsturu krosibei fu wan fu den bangi na ini a wenkri. A e gi mi prisiri fu gi kotoigi na den sma di e kon sidon na tapu a bangi fu rostu pikinso.” Disi na wan prenspari fasi fa Nerlande e teki prati na a diniwroko, èn dati e gi en prisiri trutru.

Tyari kenki kon te dati de fanowdu

Wan seiriboto kan waka bun esi te winti e wai na ini den seiri. Ma te wan bigi winti e wai, dan a botoman musu drai den seiri fu en go na wan tra sei. A botoman no man du noti fu tapu a bigi winti, ma a kan du san de fanowdu fu tyari a boto na wan bun fasi. Na so a de tu nanga wi. Nofo tron wi no man du noti te wi e kisi fu du nanga muilek situwâsi na ini a libi, di de leki bigi winti. Neleki fa a botoman e drai den seiri fu tyari a boto bun, na so wi musu kenki wan tu sani na wisrefi èn na a fasi fa wi e denki, so taki wi libi kan waka moro bun. Te wi e hori na prakseri taki a situwâsi fu wi kenki, dan dati sa yepi wi fu no lasi a prisiri fu wi na ini a diniwroko fu Gado.—Odo 11:2.

Luku wan tu eksempre. Efu wi sabi taki wi e weri esi, dan tapu den dei te wi abi konmakandra, a ben o bun fu no du tumusi furu. Na so fasi wi no o weri tumusi fu go na den Kresten konmakandra na a mofoneti. Disi sa yepi wi fu man kisi wini dorodoro fu a demakandra di wi abi nanga wi Kresten brada nanga sisa. Efu wan mama no man teki prati na a oso-fu-oso preikiwroko fu di en pikin siki, dan a ben o bun kande efu a e aksi wan Kresten sisa fu kon na en oso, so taki den kan gi kotoigi na telefon aladi a pikin e sribi.

Kon meki wi taki dati yu no man sreka yusrefi gi ala den sani di wi o luku na den gemeente konmakandra. San yu ben o du? Yu kan luku omeni yu man du èn sreka yusrefi bun gi dati. Te wi e kenki wan tu sani fu man doro den marki fu wi, dan wi kan tan du wi diniwroko fayafaya èn wi kan tan de koloku.

 Te wi e poti marki di wi man doro, dan a wani taki dati wi musu meki tranga muiti èn wi no musu meki noti tapu wi fu doro den marki dati. Serge nanga Agnès, wan trowpaar na ini Fransikondre, ben musu tyari bigi kenki kon na den marki di den ben poti gi densrefi. Serge e taki: „Di Agnès kon de nanga bere, dan wi ben sabi taki wi no ben o man doro a marki di wi ben poti fu tron zendeling.” Serge abi tu umapikin now di de nanga prisiri ala ten. A e fruteri san den du fu poti tra marki gi densrefi leki trowpaar. Serge e taki: „Fu di wi no ben man dini leki zendeling na tra kondre, meki wi bosroiti fu du a srefi sortu wroko di zendeling e du, èn wi du dati na ini wi eigi kondre. Fu dati ede, wi go dini na ini wan gemeente pe sma e taki wan tra tongo.” A de so taki a trowpaar disi kisi wini fu di den poti tra marki gi densrefi? Serge e taki: „Wi e si trutru taki wi man yepi den brada nanga sisa na ini a gemeente.”

Odile, wan Kresten sisa na ini Fransikondre, owru moro leki 70 yari èn a abi wan siki di e meki a abi furu pen na en kindi. A sisa disi no man tanapu langa. A ben brokosaka, fu di a siki fu en e meki taki a no man du na oso-fu-oso preikiwroko. Ma toku a sisa disi tan horidoro. A fiti ensrefi na a situwâsi fu en, èn now a e gi kotoigi na telefon. A e taki: „Fu preiki na a fasi disi, moro makriki èn mi lobi dati srefisrefi, iya, a de moro leki san mi ben fruwakti!” A fasi fa a sisa disi e preiki now, meki taki a kon kisi deki-ati fu go doro nanga a diniwroko fu en.

Wi e kisi blesi te wi e poti marki di wi man doro

Te wi e hori na prakseri san wi man du, dan dati sa meki taki wi no abi tumusi furu broko-ede. Fu di wi o poti marki di wi man doro, meki wi o abi prisiri aladi wi no man du furu. Fu dati ede wi sa breiti nanga san wi man du, awinsi dati no furu.—Gal. 6:4.

Te wi abi wan yoisti denki fu a fasi fa wi e si wisrefi, dan dati sa yepi wi fu hori wi Kresten brada nanga sisa na prakseri. Wi o si san den no man du, èn na so wi sa abi warderi ala ten gi den sani di den e du gi wi. Te wi e sori warderi gi a yepi di den e gi wi, dan dati sa meki taki wi o man wroko bun nanga makandra èn wi o frustan makandra bun (1 Petr. 3:8). Hori na prakseri taki Yehovah, di de leki wan lobi-ati Tata, noiti e aksi moro fu wi leki san wi man du. Te wi abi wan yoisti fasi fu si den sani di wi e fruwakti fu wisrefi fu di wi e du san wi man na ini na anbegi fu wi, èn te wi e poti marki di wi man doro, dan wi sa kisi moro prisiri èn wi sa de koloku.

[Prenspari pisi na tapu bladzijde 29]

Te wi wani de nanga prisiri èn te wi wani de koloku na ini a diniwroko fu Gado, dan wi musu hori na prakseri san wi man du èn san na a situwâsi fu wi

[Prenki na tapu bladzijde 30]

Nerlande e prisiri fu di a e du san a man na ini a preikiwroko

[Prenki na tapu bladzijde 31]

Leri fu seti den seiri na wan tra fasi

[Sma di abi a reti fu a prenki]

© Wave Royalty Free/age fotostock

[Prenki na tapu bladzijde 32]

Serge nanga Agnès kisi wini fu di den poti tra marki gi densrefi