A Wortu fu Yehovah de libilibi

Edepenti fu den brifi di skrifi gi den Korentesma

NA APOSTEL Paulus e broko en ede trutru nanga a fasi fa sani e waka na ini a gemeente na Korente. A yere taki den brada nanga sisa drape abi trobi nanga makandra. Sma de na ini a gemeente di e du hurudu, ma den no e puru den sma dati fu a gemeente. A gemeente skrifi Paulus tu, fu di den wani kon sabi moro fu spesrutu tori. Fu dati ede, na ini a yari 55, te Paulus de na ini Efeise na a di fu dri zendelingwaka fu en, a e skrifi a fosiwan fu den tu brifi gi den Korentesma.

A di fu tu brifi, di a skrifi kande wan tu mun baka a fosiwan, abi fu du nanga den sani di a ben skrifi kaba na ini a fosi brifi. A situwâsi na ini a gemeente èn na dorosei fu a gemeente Korente fu a fosi yarihondro, de a srefi leki a situwâsi na ini a ten fu wi. Fu di dati de so, meki a boskopu na ini den brifi di Paulus skrifi gi den Korentesma, prenspari trutru gi wi.—Hebr. 4:12.

’TAN NA AI, TANAPU KÁNKAN, ÈN KON TRANGA’

(1 Kor. 1:1–16:24)

Paulus e gi a frumane disi: „Den sani di iniwan fu unu e taki musu kruderi nanga makandra” (1 Kor. 1:10). ’Nowan tra fondamenti no de, boiti Yesus Krestes’, èn wi musu bow na en tapu fu di na so wi kan kon abi den fasi di wan Kresten musu abi (1 Kor. 3:11-13). Te a abi fu du nanga wan huruman na ini a gemeente, dan Paulus e taki: „Puru na ogriman na un mindri” (1 Kor. 5:13). „A skin no meki fu du hurudu, ma a de fu dini Masra”, na so a e taki.—1 Kor. 6:13.

Leki piki tapu ’den sani di den Korentesma skrifi en’, Paulus e gi den bun rai di abi fu du nanga sma di trow èn sma di no trow (1 Kor. 7:1). Paulus e taki fu a Kresten seti di e sori taki ala sma abi wan edeman, a e taki dati sani musu waka na wan fasi di fiti na ini a Kresten gemeente, èn a e sori taki na opobaka o de seiker. Baka dati, Paulus e gi a rai disi: „Tan na ai, tanapu kánkan na ini a bribi, tyari unsrefi leki mansma, èn kon tranga.”—1 Kor. 16:13.

Piki tapu den aksi fu Bijbel:

1:21—A de so trutru taki Yehovah e gebroiki „don sani” fu frulusu den sma di e bribi? Nôno, a no e du dati. Ma fu di „grontapu nanga ala en koni no kon sabi [Gado]”, meki den sani di Gado e gebroiki fu frulusu sma, de leki don sani gi grontapu.—Yoh. 17:25.

5:5—’Den ben musu libi na ogri man gi Satan, so taki wan kaba kan kon na a krakti di a sondu fu en abi tapu trawan, èn na so fasi a yeyefasi fu a gemeente sa tan bun.’ San a tekst  disi wani taki? Te den e puru wan sma fu a gemeente di e du seryusu sondu sondro fu abi berow, dan a sma dati e kon tron wan pisi baka fu na ogri grontapu fu Satan (1 Yoh. 5:19). Fu dati ede, a tekst disi e taki dati den ben musu libi a man disi gi Satan. Fu di den puru a sma disi na ini a gemeente, meki na so fasi den puru a takru krakti di a sma kan abi tapu trawan na ini a gemeente. Disi e meki taki a yeye, noso a krin fasi fu a Kresten gemeente no pori.—2 Tim. 4:22.

7:33, 34—Wan man di trow noso wan uma di trow e broko en ede nanga „den sani fu grontapu”. San na den sani dati? Paulus ben taki fu den sani fu na aladei libi, nanga san Kresten trowpaar musu broko den ede. Den sani disi na nyanyan, krosi, nanga wan presi fu tan, ma den no abi fu du nanga den ogri sani fu a grontapu disi di Kresten e wai pasi gi.—1 Yoh. 2:15-17.

11:26—Paulus ben taki dati sma musu memre a dede fu Yesus „ibri leisi”. Omeni leisi den ben musu du dati, èn „teleki” o ten? Paulus ben taki dati ibri leisi te den salfu Kresten e nyan a brede èn e dringi a win na a Memrefesa, den „e tan meki a dede fu Masra bekènti”. Disi e pasa wán leisi wan yari tapu 14 Nisan. Den salfuwan e du dati „teleki [Krestes] doro”, noso teleki a gi den wan opobaka fu go na hemel.—1 Tes. 4:14-17.

13:13—Na sortu fasi lobi prenspari moro leki bribi nanga howpu? Bribi na te wi e ’fruwakti taki den sani di wi e howpu, o kon seiker’. Te den sani dati di wi e howpu èn e fruwakti kon tru, dan a bribi dati èn a howpu dati, no o de moro (Hebr. 11:1). Lobi prenspari moro bribi nanga howpu, fu di lobi e tan fu têgo.

15:29—San a wani taki dati sma e „teki dopu fu tron dedesma”? Paulus no ben taki dati den sma di de na libi musu teki dopu gi den dedesma di no teki dopu. Paulus e taki dyaso fu a dopu fu salfu Kresten di de klariklari fu libi na wan fasi pe den e tan getrow teleki dede. Baka dati, den salfuwan disi e kisi wan opobaka fu go na hemel.

Sani di wi kan leri:

1:26-31; 3:3-9; 4:7. Wi no musu meki bigi gi wisrefi. Te wi e meki bigi gi Yehovah na wan sakafasi, dan dati e meki taki a gemeente de na ini wánfasi.

2:3-5. A foto Korente ben de a moro prenspari presi pe sma ben e kisi leri fu Griki filosofia nanga tra sani. Di Paulus ben e preiki na ini a foto dati, dan a ben kan de so taki a ben e broko en ede efu a ben o man overtoigi den arkiman fu en. Ma nowan swakifasi noso a frede di a ben kan abi gi libisma, ben tapu en fu du a diniwroko di Gado gi en fu du. Na a srefi fasi, wi no musu meki muilek situwâsi noso situwâsi di wi no gwenti, tapu wi fu preiki a bun nyunsu fu Gado Kownukondre. Neleki Paulus, wi kan abi na overtoigi taki Yehovah o yepi wi tu.

2:16. Te wi e „denki soleki fa Krestes e denki”, dan dati wani taki dati wi sabi fa a e denki, wi sabi fu san ede a e denki so, wi e frustan krin fa a de, èn wi e waka baka na eksempre fu en (1 Petr. 2:21; 4:1). A de prenspari taki wi e ondrosuku Yesus en libi nanga en diniwroko finifini.

3:10-15; 4:17. Wi musu luku fa wi e gi sma leri èn fa wi e meki disipel. Boiti dati, wi musu luku na sortu fasi wi kan du dati moro bun (Mat. 28:19, 20). Te wi no e gi a studenti fu wi bun leri, dan a kan pasa taki a no o man horidoro te a e kisi tesi tapu a bribi fu en. Disi o de so wan hati sani gi wi, taki wi o kon de leki wan sma di kisi ’frulusu fu faya’.

6:18. Wi musu „lowe gi hurudu”. Dati wani taki dati wi no musu du sani di abi fu du nanga por·neiʹa. Boiti dati, wi no musu luku seks buku nanga seks felem, wi no musu libi na wan fasi di no fiti, wi no musu prakseri morsu seks sani, èn wi no o taki noso du sani di e meki trawan denki taki wi e suku den. Iya, wi no musu du nowan sani di kan meki taki wi fadon na ini hurudu.—Mat. 5:28; Yak. 3:17.

7:29. Trowpatna musu luku bun taki a trowlibi fu den no de moro prenspari leki Kownukondre afersi.

10:8-11. Yehovah no ben feni en bun srefisrefi, di den Israelsma ben krutukrutu teige Moses nanga Aron. A de wan koni sani te wi e luku bun taki wi no e kisi a gwenti fu krutukrutu.

16:2. Te wi e seti sani bun na fesi fu gi bijdrage  fu horibaka gi a preikiwroko di e du na heri grontapu, dan wi o kisi a gwenti fu du dati doronomo.

„TAN MEKI MUITI FU KON BAKA NA TAPU A RETI PASI”

(2 Kor. 1:1–13:14)

Paulus e taigi den Korentesma taki den musu ’de klariklari fu gi pardon èn fu trowstu’ wan sma di kisi piri-ai èn di abi berow fu en sondu. Aladi a fosi brifi fu Paulus ben meki den Korentesma sari, toku a breiti fu di den ’sari so te, taki den kisi berow’.—2 Kor. 2:6, 7; 7:8, 9.

’Neleki fa den Korentesma abi ala sani bogobogo’, na so den musu „gi bogobogo” soleki fa Paulus e gi den a deki-ati fu du. Baka di Paulus piki den gensman fu en, a e gi wan lasti rai na ala sma. A taki: „Tan de nanga prisiri, tan meki muiti fu kon baka na tapu a reti pasi, tan warderi a trowstu di trawan e gi unu, tan abi wán denki, èn tan libi na ini vrede.”—2 Kor. 8:7; 13:11.

Piki tapu den aksi fu Bijbel:

2:15, 16—Na sortu fasi wi de „wan switismeri fu Krestes”? Wi de wan switismeri fu di wi e gi yesi na Bijbel èn wi e preiki a boskopu di skrifi na ini. Aladi a „smeri” disi kan de wan tingi smeri gi sma di no de regtfardiki, toku a de wan switismeri gi Yehovah èn gi opregtisma.

5:16—Fa den salfu Kresten „no sabi nowan sma na wan libisma fasi”? Den no e si sma soleki fa libisma e si den. Disi wani taki dati den no lobi a wan sma moro a trawan fu di a sma dati gudu, noso fu di a de fu wan spesrutu ras, kulturu, noso kondre. A sani di de prenspari gi den, na taki den abi wan bun matifasi nanga den Kresten brada nanga sisa fu den.

11:16; 12:11—A de so taki Paulus no ben e gebroiki en frustan trutru, soleki fa den Korentesma ben feni? Nôno, dati no ben de so. A ben kan gersi leki a e meki bigi èn taki a no e gebroiki en frustan, fu di a ben musu taki sani fu buweisi dati en na wan apostel trutru.

12:1-4—Suma ben ’de a man di den ben tyari go na ini paradijs’? Bijbel no e taki fu wan tra sma di ben kisi so wan fisyun, èn den vers baka dati e taki fu den buweisi di Paulus ben gi fu sori taki en na wan apostel trutru. Fu dati ede, a kan de so taki Paulus ben e taki fu san ensrefi ben ondrofeni. A sani di na apostel ben si na ini a fisyun, ben kan de a yeye paradijs pe a Kresten gemeente ben o de na ini, na ini „a ten fu a kaba”.—Dan. 12:4.

Sani di wi kan leri:

3:5. Fu taki en leti, a vers disi e sori wi taki Yehovah e sorgu taki Kresten bun nofo fu du a diniwroko. A e du dati nanga yepi fu en Wortu, en santa yeye, nanga a pisi fu en organisâsi di de na grontapu (Yoh. 16:7; 2 Tim. 3:16, 17). A bun te wi e studeri Bijbel nanga Bijbel publikâsi finifini, te wi e tan aksi Gado fu en santa yeye na ini begi, te wi e go na den Kresten konmakandra doronomo, èn te wi e teki prati na den.—Ps. 1:1-3; Luk. 11:10-13; Hebr. 10:24, 25.

4:16. Fu di Yehovah e meki ’a sma di wi de fu inisei kisi nyun krakti dei fu dei’, meki wi musu gebroiki den sani di a e gi wi doronomo. Disi wani taki dati ibri dei wi musu du sani fu kisi wan moro bun matifasi nanga Gado.

4:17, 18. Te wi e hori na prakseri taki „a banawtu de fu wan syatu pisi ten nomo èn [taki] a no hebi”, dan dati kan yepi wi fu tan getrow na Yehovah te wi de na ini muilek situwâsi.

5:1-5. Na wan tumusi moi fasi Paulus e taki fa den salfu Kresten e feni en taki den abi a howpu fu libi na hemel.

10:13. A de so nofo tron taki wi musu wroko soso na ini den kontren pe a gemeente musu wroko, boiti efu sani seti spesrutu taki wi wroko na ini wan tra kontren pe moro preikiman de fanowdu.

13:5. Te wi e „tan ondrosuku efu [wi] de na bribi”, dan wi musu luku efu wi e tyari wisrefi soleki fa wi leri na ini Bijbel. Te wi wani „buweisi sortu sma [wi] de”, dan wi musu luku efu a matifasi di wi abi nanga Gado bun ete, èn wi musu luku fa wi kan ’gebroiki wi frustan fu man si sani krin’ na wan moro bun fasi. Boiti dati, wi musu luku efu wi e du ala san wi man fu sori taki wi abi bribi (Hebr. 5:14; Yak. 1:22-25). Te wi e teki a bun rai fu Paulus, dan wi kan tan waka na tapu a pasi fu waarheid.

[Prenki na tapu bladzijde 26, 27]

„Ibri leisi te unu e nyan a brede disi èn e dringi fu a kan disi.” San den wortu disi wani taki? —1 Kor. 11:26