A trowlibi èn a frantwortu fu papa nanga mama na ini den lasti dei disi
A trowlibi èn a frantwortu fu papa nanga mama na ini den lasti dei disi
„A ten di tan abra kon syatu.”—1 KOR. 7:29.
1. (a) San na wan fu den sani di e meki taki a ten disi „tranga fu pasa”? (b) Fu san ede wi musu broko wi ede nanga den kenki di de fu si na ini na osofamiri libi?
GADO WORTU ben taki dati na ini „ a ten fu a kaba”, orloku, gronseki, angriten, nanga siki ben o de (Dan. 8:17, 19; Luk. 21:10, 11). Bijbel ben warskow tu taki na ini a prenspari pisi ten disi, bigi kenki ben o kon na ini a libimakandra. Wan fu den sani di ben o pasa na ini den muilek „lasti dei” disi di „tranga fu pasa”, na taki problema ben o de na ini na osofamiri libi (2 Tim. 3:1-4). Fu san ede wi musu broko wi ede nanga den sortu kenki dati? Fu di den kenki disi de fu si na ala sei. Boiti dati, den abi so furu krakti tapu sma, taki den ben kan meki Kresten na ini a ten disi kisi wan fowtu denki fu a trowlibi èn fu a frantwortu di den abi leki papa nanga mama. Fa so?
2. Fa furu sma na grontapu e denki fu a trowlibi èn fu brokotrow?
2 Na ini a ten disi, sma na ala sei e broko trow esi-esi, èn na ini furu kondre moro nanga moro sma e broko trow. Ma wi musu tan hori na prakseri taki te a abi fu du nanga a trowlibi èn nanga brokotrow, dan Yehovah Gado e denki heri tra fasi leki furu sma na grontapu. We, fa Yehovah e denki fu den tori disi?
3. Fa Yehovah nanga Yesus Krestes e si a trowlibi?
3 Yehovah Gado wani taki trowpatna musu tan getrow na makandra. Di Yehovah tyari a fosi man nanga uma kon na wán leki trowpatna, dan a taki dati „wan man . . . musu tai hori na en wefi èn den musu tron wán skin”. Bakaten, Yesus Krestes gebroiki den srefi wortu dati baka, èn a taki sosrefi a sani disi: „Fu dati ede, nowan sma musu prati san Gado poti na ondro wán tyatyari.” Yesus ben taki moro fara: „Efu wan man broko trow nanga en wefi, ma a wefi no ben du hurudu, èn a man trow nanga wan tra uma, dan a du sutadu” (Gen. 2:24; Mat. 19:3-6, 9). Sobun, gi Yehovah nanga Yesus a trowlibi e kon na wan kaba soso te wan fu den trowpatna dede (1 Kor. 7:39). Fu di a trowlibi na wan santa seti, meki wi musu si en leki wan seryusu sani te sma e broko trow. Fu taki en leti, Gado Wortu e taki dati Yehovah no lobi en kwetikweti te sma e broko trow na wan fasi di no e kruderi nanga Bijbel. *—Leisi Maleaki 2:13-16; 3:6.
Si a trowlibi leki wan seryusu sani
4. Fu san ede son yongu Kresten e sari taki den trow tumusi fruku?
4 Na ini na ogri grontapu disi, furu sma lobi fu poti prakseri na seks. Ibri dei, wi kan si wan lo sani di abi fu du nanga seks. A no de fu taki dati den sani disi kan abi krakti na wi tapu, spesrutu tapu den lobi yonguwan fu wi na ini a gemeente. Den sani disi kan wiki den sekslostu fu den, sondro fu den wani. San yongu Kresten kan du fu sorgu taki den takru sani disi no abi krakti na den tapu? Sonwan fu den trow yonguyongu fu pruberi fu wai pasi gi a problema dati. Den e howpu taki a sani dati sa yepi den fu no du hurudu. Ma syatu baka di den trow, furu yonguwan ben e sari taki den trow so fruku. Fu san ede? Te den no e firi a switi moro fu a nyun libi fu den, dan heri esi den e kon si taki den nanga a trowpatna fu den no e agri nanga makandra te a abi fu du nanga den aladei afersi fu a libi. A no de fu taki dati den trowpaar dati abi wan seryusu problema.
5. San o yepi trowpatna fu tan getrow na makandra? (Luku sosrefi san skrifi na ondrosei fu a bladzijde disi.)
5 A kan de wan bigi tyalensi fu abi wan trowpatna di de heri tra fasi leki fa yu ben denki, awansi a sma dati na wan Kresten (1 Kor. 7:28). Ma awansi tru Kresten abi problema na ini a trowlibi fu den, toku den sabi taki a no fiti fu broko trow na wan fasi di no e kruderi nanga Bijbel, soso fu di den wani feni wan lusu gi den problema di den abi. Fu dati ede, te Kresten brada nanga sisa di wani tan getrow na a trowpatna fu den e tan du tranga muiti fu meki a trowlibi fu den waka bun, dan a fiti taki den memre fu a Kresten gemeente e sori lespeki gi den èn taki den e yepi den na wan lobi-ati fasi. *
6. San yongu Kresten musu hori na prakseri te a abi fu du nanga a trowlibi?
6 Yu na wan yongusma di no trow ete? Efu dati de so, dan san yu musu hori na prakseri te a abi fu du nanga a trowlibi? A ben o bun te yu e wakti teleki yu lepi nofo fu trow, fosi yu e bigin hori nanga wan sma. Na so yu sa sorgu taki yu no e teki wan bosroiti di sa hati yu bakaten. A no de fu taki dati Bijbel no e taki omeni yari wan sma musu abi fu trow. * Ma toku Bijbel e sori taki a bun fu wakti teleki yu pasa a pisi ten na ini yu libi te den sekslostu fu yu tranga srefisrefi (1 Kor. 7:36). Fu san ede? Fu di den tranga seks firi fu yu kan bruya yu èn den kan meki taki yu teki don bosroiti di kan meki yu sari bakaten. Na ini Bijbel, Yehovah e gi koni rai di abi fu du nanga a trowlibi, èn a bun fu hori na prakseri taki den rai disi na fu yepi yu so taki yu kan de koloku.—Leisi Yesaya 48:17, 18.
A seryusu frantwortu di papa nanga mama abi
7. San son yonguwan e ondrofeni, èn fa disi kan meki taki a trowlibi no e waka bun?
7 Son leisi a e pasa taki trowpatna di trow yonguyongu e kisi pikin, aladi den no lepi ete fu kweki pikin. Fu taki en leti, den srefi no feni ten ete fu kon leri sabi makandra bun, èn now den e kisi wan beibi di den sa musu luku dei nanga neti. Te a beibi gebore, dan a no de fu taki dati a mama sa poti ala en prakseri na en, èn a sani disi kan meki taki a yongu masra fu en e dyarusu. Boiti dati, te den e lasi sribi te neti, dan dati kan meki taki den e kisi trobi nanga makandra, èn a sani dati e meki taki a trowlibi no e waka bun. Wantronso a yongu trowpaar e kon si taki den no man libi moro soleki fa den wani. Now den no man go moro na ala den presi pe den ben e go fosi, èn den no man du ala den sani di den ben lobi fu du. Fa den musu si a nyun libi fu den?
8. Fa papa nanga mama musu si a frantwortu di den abi, èn fu san ede?
8 Neleki fa wan sma musu si a trowlibi leki wan seryusu sani, na so papa nanga mama musu si a frantwortu fu den leki wan grani di Gado gi den. Awansi fa a libi fu wan Kresten trowpaar e kenki te den kisi wan pikin, toku den musu du ala san den man fu tyari a frantwortu fu den. Fu di Yehovah sorgu taki libisma man kisi pikin, meki papa nanga mama musu si wan beibi leki „wan gudu di e kon fu Yehovah” (Ps. 127:3). Wan Kresten papa nanga mama sa du muiti fu tyari a frantwortu fu den leki ’papa nanga mama di e du a wani fu Masra’.—Ef. 6:1.
9. (a) San a wani taki fu kweki wan pikin? (b) San wan masra kan du fu yepi en wefi fu tan abi wan tranga bribi?
9 Papa nanga mama musu du iniwan sani di de fanowdu fu man kweki den pikin fu den bun. A sani disi di den sa musu du furu yari langa, e teki furu ten nanga krakti. Wan Kresten masra musu frustan taki wan tu yari baka te a pikin fu den gebore, a wefi fu en kande no sa man poti ala en prakseri moro na den konmakandra. Kande a no sa man feni furu okasi moro tu fu studeri Bijbel èn fu denki dipi fu den sani di a e leri. A sani disi ben kan swaki a bribi fu a wefi fu en. Wan masra di e tyari a frantwortu fu en, e du ala san a man fu yepi sorgu a pikin dati. Te a wefi fu en no ben man yere spesrutu sani so bun na a konmakandra, dan a kan taki nanga en fu den sani dati te den de na oso. Kande a kan yepi en wefi tu fu luku a beibi, so taki en wefi kan teki prati na a Kownukondre preikiwroko.—Leisi Filipisma 2:3, 4.
10, 11. (a) Fa papa nanga mama kan yepi den pikin fu kon ’kisi a denki fu Yehovah’? (b) Fu san ede a fiti taki furu Kresten papa nanga mama kisi prèise?
10 Fu kweki wan pikin bun, no wani taki nomo taki papa nanga mama musu gi en nyanyan, krosi, wan tanpresi, noso taki den musu tyari en go na datra te a siki. Spesrutu na ini den lasti dei disi pe furu ogri kan miti sma, yonguwan musu leri frukufruku kaba fa fu tyari densrefi na wan fasi di fiti. Papa nanga mama musu kweki den pikin fu den ’nanga a leri fu Yehovah èn den musu frumane den, so taki den kan kisi a denki fu En’ (Ef. 6:4). Disi wani taki dati den musu yepi a pikin fu kon kisi a srefi denki fu Yehovah, èn den musu du dati fu sensi a pikin de beibi, teleki a doro den muilek tini yari.—2 Tim. 3:14, 15.
11 Di Yesus taigi den bakaman fu en taki den ben musu „go na sma fu ala kondre èn meki den tron disipel”, dan a ben abi na prakseri tu taki papa nanga mama ben musu yepi den pikin fu den fu tron disipel (Mat. 28:19, 20). A sani disi no makriki, fu di grontapu abi furu krakti tapu yonguwan. Fu dati ede, te papa nanga mama yepi den pikin fu den fu tron getrow Kresten, dan a fiti taki ala sma na ini a gemeente e prèise den na wan lobi-ati fasi. Den papa nanga mama disi „wini” grontapu, fu di den abi bribi èn fu di den tyari a frantwortu fu den na wan bun fasi.—1 Yoh. 5:4.
Den abi bun reide fu no trow èn fu no meki pikin
12. Fu san ede son Kresten e bosroiti fu wakti wan tu yari fosi den trow?
12 Fu di „a ten di tan abra kon syatu”, èn fu di „a komedi-prei fu grontapu e kenki”, meki Gado Wortu e gi wi deki-ati fu poti prakseri na den winimarki di a abi te wi no trow (1 Kor. 7:29-31). Fu dati ede, son Kresten e bosroiti fu no trow noiti, noso den e bosroiti fu wakti wan tu yari fosi den trow. A moi fu si taki den no e teki a bosroiti disi soso fu di den wani suku den eigi bun. Furu Kresten e bosroiti fu no trow fu di den wani dini Yehovah „sondro taki sani puru den prakseri”. (Leisi 1 Korentesma 7:32-35.) Wan tu Kresten e dini leki pionier, noso den e wroko na Bethel. Furu trawan e pruberi fu doro den marki fu man go na a Dinariskoro, so taki den kan du moro na ini na organisâsi fu Yehovah. Son Kresten di no ben trow du furuten diniwroko wan pisi ten, èn bakaten den bosroiti fu trow. Nofo tron den Kresten disi di du furuten diniwroko e kon si taki den bun sani di den leri na ini den yari di den no ben trow, e yepi den fu abi wan bun trowlibi.
13. Fu san ede son Kresten trowpaar e bosroiti fu no kisi pikin?
13 Na ini son kondre na grontapu, ete wan kenki de fu si na ini na osofamiri libi. Furu trowpaar e bosroiti fu no kisi pikin. Sonwan fu den e du dati fu di den no abi nofo moni fu sorgu pikin, ma trawan e du dati fu di den wani de fri fu du wan wroko di e pai furu moni. Son Kresten trowpaar e bosroiti tu fu no kisi pikin. Ma nofo tron den e du dati fu di den wani abi moro ten fu dini Yehovah. Disi no wani taki dati den trowpaar disi no e nyan bun fu a trowlibi fu den. Aladi den e nyan bun fu a trowlibi fu den, toku Kownukondre afersi de moro prenspari gi den leki tra sani di ben kan gi den prisiri na ini a trowlibi (1 Kor. 7:3-5). Sonwan fu den trowpaar dati e dini Yehovah èn den brada nanga sisa fu den na ini a kringwroko, a distriktwroko, noso na Bethel. Trawan fu den e dini leki pionier noso leki zendeling. Yehovah no sa frigiti a wroko di den du èn a lobi di den sori fu a bun fu a nen fu en.—Hebr. 6:10.
„Banawtu na ini den libi”
14, 15. Sortu „banawtu” Kresten papa nanga mama kan kisi na ini den libi?
14 Na apostel Paulus ben taigi Kresten di trow taki den ben o kisi „banawtu na ini den libi” (1 Kor. 7:28). Disi kan abi fu du nanga siki di kan miti wan fu den trowpatna, den pikin fu den, noso a papa nanga a mama fu den di kon owru. Den wortu dati kan abi fu du tu nanga den problema nanga a sari di trowpatna kan kisi te den e kweki den pikin fu den. Soleki fa wi ben si na a bigin fu na artikel disi, Bijbel ben taki dati na ini ’den lasti dei muilek ten ben o de di tranga fu pasa’. Wan fu den sani di ben o meki taki den dei ben o de muilek fu pasa, na pikin di e ’trangayesi den papa nanga mama’.—2 Tim. 3:1-3.
15 A no makriki srefisrefi gi Kresten papa nanga mama fu kweki den pikin fu den. Den sani di e pasa na ini den „muilek ten disi” kan abi furu krakti na wi tapu. Fu dati ede, Kresten papa nanga mama musu tan kakafutu gi a takru krakti di „a grontapu sistema disi” kan abi tapu den pikin fu den (Ef. 2:2, 3). Ma a no ala ten den abi bun bakapisi! Te wan manpikin noso wan umapikin fu wan Kresten osofamiri e tapu fu dini Yehovah, dan dati trutru na wan „banawtu” gi a papa nanga mama di pruberi fu kweki a pikin dati na ini a tru anbegi fu Gado.—Odo 17:25.
„Wan bigi banawtu o de”
16. Fu sortu „banawtu” Yesus ben e taki na ini wan profeititori?
16 Ma boiti den „banawtu” di trowpatna e kisi na ini a trowlibi fu den, noso te den e kisi pikin, wan moro bigi banawtu de. Yesus ben taki wan profeititori di ben abi fu du nanga a denoya fu en èn nanga a kaba fu a sistema disi. Na ini a profeititori dati a ben taki: „Wan bigi banawtu o de, di sensi a bigin fu grontapu teleki now no ben de ete, nôno, a no sa kon noiti moro tu” (Mat. 24:3, 21). Bakaten, Yesus tyari kon na krin taki wan bigi ipi sma ben o pasa a „bigi banawtu” disi libilibi. Ma a sistema fu Satan sa feti wan lasti leisi nanga den Kotoigi fu Yehovah di lobi vrede, ma a no sa abi bun bakapisi. A no de fu taki dati a ten dati sa de wan muilek ten gi wi alamala, awansi wi na bigisma noso pikin-nengre.
17. (a) Fu san ede wi kan abi a frutrow taki sani sa waka bun na ini a ten di e kon? (b) San musu abi krakti tapu a fasi fa wi e si a trowlibi èn a frantwortu di papa nanga mama abi?
17 Toku wi no musu frede tumusi gi a ten di e kon. Papa nanga mama di e dini Yehovah na wan getrow fasi kan abi a howpu taki den nanga den yongu pikin fu den sa kisi kibri. (Leisi Yesaya 26:20, 21; Sef. 2:2, 3; 1 Kor. 7:14) Now di wi sabi taki wi e libi na ini muilek ten, dan meki a de so taki a sani dati abi krakti tapu a fasi fa wi e si a trowlibi èn a frantwortu di wi abi leki papa nanga mama na ini den lasti dei disi (2 Petr. 3:10-13). Na so a libi fu wi sa gi grani na Yehovah èn na a Kresten gemeente, awansi wi na sma di trow, noso sma di no trow, èn awansi wi na sma di abi pikin, noso sma di no abi pikin.
[Futuwortu]
^ paragraaf 3 Luku na ondro-edeprakseri di nen „Hij heeft echtscheiding gehaat” na tapu bladzijde 125 fu a buku Leef met Jehovah’s dag in gedachten (Hori a dei fu Yehovah na prakseri doronomo).
^ paragraaf 5 Den sma di abi problema na ini a trowlibi sa kisi deki-ati te den e luku den artikel baka di abi fu du nanga a trowlibi. Wan tu fu den artikel disi de fu feni na ini A Waktitoren fu 15 september 2003, nanga na Ontwaakt! fu 8 yanuari 2001.
^ paragraaf 6 Luku kapitel 30 di nen „Ben ik gereed voor het huwelijk?”, na ini a buku Wat jonge mensen vragen — Praktische antwoorden.
Luku baka san wi leri
• Fu san ede yongu Kresten no musu trow tumusi fruku?
• San a wani taki fu kweki wan pikin?
• Fu san ede furu Kresten no e trow, èn fu san ede furu Kresten di trow e bosroiti fu no meki pikin?
• Sortu „banawtu” Kresten papa nanga mama kan kisi?
[Aksi fu a tori disi]
[Prenki na tapu bladzijde 17]
Fu san ede a bun te yongu Kresten no e trow tumusi fruku?
[Prenki na tapu bladzijde 18]
Wan masra kan du furu fu yepi en wefi, so taki a kan abi wan bun prati na a Kresten diniwroko
[Prenki na tapu bladzijde 19]
Fu san ede son Kresten trowpaar e bosroiti fu no kisi pikin?