Yu kan abi wan koloku trowlibi
Yu kan abi wan koloku trowlibi
„Wan oso sa bow nanga yepi fu koni, èn a sa seti steifi nanga yepi fu a koni fu man si sani krin.”—ODO 24:3.
1. Fu san ede wi kan taki dati Gado du wan koni sani di a meki a fosi libisma?
WI KONI hemel Tata sabi san bun gi wi. Fu eksempre, Gado ben si taki a wani fu En no ben o man kon tru efu ’a man ben o tan en wawan’ na ini a dyari fu Eden. Wan fu den prenspari sani di Gado ben wani, na taki trowpaar ben musu kisi pikin so taki ’grontapu ben kan lai’ nanga libisma.—Gen. 1:28; 2:18.
2. Sortu sani Yehovah seti fu a bun fu libisma?
2 Yehovah ben taki: „Mi o meki wan patna gi en di fiti en èn di kan yepi en.” Baka dati Gado meki a fosi man fadon na ini wan dipi sribi, a teki wan lebriki fu en volmaakti skin, èn a meki na uma nanga a lebriki dati. Di Yehovah tyari Eva, a volmaakti uma disi gi Adam, dan a man taki: „Ai, disi na trutru bonyo fu mi bonyo èn skin fu mi skin. A wan disi mi o kari Uma, bika a ben teki puru fu a man.” Eva ben de wan yepi gi Adam trutru. Ibriwan fu den ben o abi difrenti fasi, ma ala tu ben de volmaakti, èn den ben meki leki wan prenki fu Gado. Na so Yehovah seti a fosi trowlibi. Adam nanga Eva ben de klariklari fu fiti densrefi na a trowlibi disi di Gado ben seti, fu di dati ben o tyari wini kon gi den ala tu.—Gen. 1:27; 2:21-23.
3. Fa furu sma e si a trowlibi, èn sortu aksi e opo kon fu dati ede?
3 A de wan sari sani taki furu sma na grontapu no wani fiti densrefi. Ma Gado no de frantwortu gi den problema di e kon te sma e tyari densrefi na a fasi dati. Furu sma e wisiwasi a trowlibi di Gado seti, fu di den feni taki a no de wan sani gi a ten disi, èn taki a e tyari wan lo problema kon. Furu sma di trow e broko trow. Kande papa nanga mama no e sori lobi gi den pikin fu den, èn son leisi te problema de na ini a trowlibi, dan den e gebroiki den pikin fu den fu kisi wini gi densrefi. Furu papa nanga mama e weigri fu fiti densrefi, èn den no e meki muiti fu kenki a fasi fu den fu man tyari vrede nanga wánfasi kon na ini a trowlibi baka (2 Tim. 3:3). We, fa trowpaar kan abi wan koloku trowlibi na ini a muilek ten disi? Te trowpatna de klariklari fu fiti densrefi, dan fa dati kan yepi den fu no broko trow? San wi kan leri fu den trowpaar di tan abi wan koloku trowlibi na ini a ten disi?
Wi musu saka wisrefi na ondro a tiri fu Yehovah
4. (a) Sortu rai Paulus e gi sma di wani trow? (b) Fa Kresten e sori taki den e gi yesi na a rai fu Paulus?
4 Nanga yepi fu a santa yeye, a Kresten apostel Paulus ben gi uma di lasi den masra na ini dede a rai taki efu den ben wani trow baka, dan den ben musu du dati „soso na ini Masra” (1 Kor. 7:39). Disi no ben de wan nyun leri gi den Kresten di ben abi a Dyu bribi fosi. A Wet di Gado ben gi Israel ben taki krin taki den ’no ben musu trow’ nanga nowan enkri sma fu den tra pipel na den lontu. Yehovah ben taki ete wan sani di e sori sortu takru bakapisi ben kan miti den te den no ben e hori densrefi na a wet disi fu En. „Bika [wan sma di no de wan Israelsma] o meki den manpikin fu unu drai baka gi Gado èn den o go dini tra gado. Dan Yehovah en ati o bron nanga unu èn a no o draidrai fu kiri unu” (Deut. 7:3, 4). Sortu bosroiti Yehovah wani den disiten futuboi fu en musu teki ini a tori disi? Fu taki en leti, wan futuboi fu Gado musu trow „na ini Masra”, iya, a musu trow nanga wan anbegiman di gi ensrefi abra na Gado èn di dopu. A de wan koni sani te wi e saka wisrefi na ondro a tiri fu Gado te wi e bosroiti fu trow.
5. Fa Yehovah nanga Kresten di trow e si a pramisi di trowpaar e meki?
5 Te tu sma di e trow e pramisi fu tan getrow na makandra, dan Gado e si a pramisi disi leki wan santa sani. Disi na san Yesus, Gado en eigi Manpikin, ben taki fu a fosi trowpaar: „Nowan sma musu prati san Gado poti na ondro wán tyatyari” (Mat. 19:6). A psalm skrifiman e memre wi taki a de wan seryusu sani te wi e pramisi Gado wan sani. A e taki: „Gi tangi leki ofrandi na Gado, èn du san yu pramisi a Moro Heiwan” (Ps. 50:14). Te tu sma e trow, dan dati kan gi den furu prisiri, ma a pramisi di den meki na a trowdei fu den, na wan seryusu pramisi di e poti frantwortu na den tapu.—Deut. 23:21.
6. San wi kan leri fu na eksempre fu Yefta?
6 Luku a tori fu Yefta di ben e dini leki krutuman na ini Israel na ini a di fu 12 yarihondro bifo Krestes. A ben pramisi Yehovah a sani disi: „Efu yu meki mi wini den manpikin fu Amon trutru, èn efu yu meki mi drai kon baka fu a feti sondro taki wan sani pasa nanga mi, dan mi o gi Yehovah a sma di o komoto na ini mi oso kon miti mi. A sma dati o de leki wan bron-ofrandi gi yu.” Di Yefta drai go baka na oso na ini Mispa, dan a si taki na a umapikin fu en, namku en wan-enkri pikin, waka kon miti en. A sani disi tapu Yefta fu hori ensrefi na a pramisi di a ben meki? Nôno. A ben taki: „Mi opo mi mofo pramisi Yehovah wan sani èn now mi no man kenki moro san mi pramisi” (Krut. 11:30, 31, 35). Yefta du san a ben pramisi Yehovah, aladi disi ben wani taki dati a no ben o abi bakapikin fu tyari a nen fu en. A pramisi di Yefta ben meki e difrenti fu a pramisi di trowpaar e meki, ma fu di Yefta ben hori ensrefi na a pramisi fu en, meki Kresten masra nanga wefi kan leri wan bun sani fu en.
Fa wi kan meki a trowlibi fu wi waka bun?
7. Fa nyun trowpaar musu fiti densrefi na makandra?
7 Furu trowpatna e firi bun te den e prakseri fa a ben de di den ben e hori nanga makandra. A ben de wan prisiri fu leri sabi a sma di ben o tron a trowpatna fu den! O moro den ben de nanga makandra, o moro den ben e kon leri sabi makandra. Ma awansi den ben e hori nanga makandra fosi den trow, noso awansi na famiriman seti a trow, toku den ben abi fu fiti densrefi na makandra di den trow te fu kaba. Wan masra e taki: „A moro bigi problema di wi ben abi na a bigin fu wi trowlibi, na taki wi ben musu hori na prakseri taki wi no ben kan libi moro leki sma di no abi wan trowpatna. Wan pisi ten a ben muilek gi wi fu no gebroiki tumusi furu ten gi den mati nanga famiriman fu wi.” Wan tra masra, di trow 30 yari kaba, ben kon si frukufruku kaba taki a ben musu hori a wefi fu en na prakseri. Fosi a e teki a kari fu go na wan presi, èn fosi a e bosroiti fu du wan sani, dan a e taki fosi nanga a wefi fu en, èn baka dati a e teki wan bosroiti. Na so a e sori taki a no e denki ensrefi nomo, ma taki a e hori a wefi fu en na prakseri. Te wi de klariklari fu fiti wisrefi na wi trowpatna na ini den sortu situwâsi disi, dan sani sa waka bun.—Odo 13:10.
8, 9. (a) Fu san ede trowpatna musu taki krin nanga makandra? (b) O ten a kan de fanowdu taki trowpatna e fiti densrefi na makandra, èn fu san ede den musu du dati?
8 Son leisi, tu sma fu difrenti kulturu e trow nanga makandra. Spesrutu na ini den sortu situwâsi disi, trowpatna musu taki krin nanga makandra. A fasi fa sma e taki fu sani e difrenti. Te yu e luku fa yu trowpatna e taki nanga den famiriman fu en, dan dati kan yepi fu kon frustan moro bun fa a e denki èn fa a e firi. Son leisi a no den sani di wan sma e taki e sori fa a e denki, ma na a fasi fa a sma e taki. Èn wi kan leri furu te wi e luku fa wan sma e tyari ensrefi, na presi taki wi e poti prakseri nomo na san a e taki (Odo 16:24; Kol. 4:6). A de tumusi prenspari taki wi kon abi a koni fu man si sani krin, fu di dati sa yepi wi fu de koloku.—Leisi Odo 24:3.
9 Furu trowpatna kon si taki a de prenspari fu fiti densrefi na makandra te a abi fu du nanga den sani di den lobi du. Kande yu trowpatna ben gwenti fu teki prati na sport, noso na tra sani. A de fanowdu fu tyari wan tu kenki kon now? (1 Tim. 4:8) Fa a de nanga a ten di wi e gebroiki gi famiriman? Wi musu tyari wan tu kenki kon tu ini a tori dati? A no de fu taki dati trowpatna musu meki ten gi makandra, so taki den kan studeri nanga makandra èn kan teki prati na a tru anbegi.—Mat. 6:33.
10. Fa papa nanga mama di de klariklari fu fiti densrefi na trawan sa man feni en bun nanga den pikin fu den di trow?
10 Te wan man e trow, dan a e gowe libi en papa nanga mama, èn na so a de tu nanga wan uma. (Leisi Genesis 2:24.) Toku den musu tan gi yesi ete na a rai di Gado e gi fu lespeki den papa nanga mama. Sobun, srefi baka te wan man nanga wan uma trow, dan den sa meki ten gi den eigi papa nanga mama èn gi a papa nanga mama fu a trowpatna fu den. Wan masra di trow 25 yari kaba e taki: „Son leisi a muilek fu du ala sani di yu trowpatna, yu papa nanga mama, yu brada nanga sisa, èn a papa nanga mama fu yu trowpatna e aksi fu yu. Ma a rai di skrifi na Genesis 2:24 e yepi mi fu du a yoisti sani. Aladi mi sabi taki mi musu de getrow na den famiriman fu mi èn taki mi abi frantwortu na den, toku a tekst disi e sori mi taki mi musu poti prakseri na mi wefi.” Na so a de tu taki Kresten papa nanga mama di de klariklari fu fiti densrefi na trawan, e hori na prakseri taki den pikin fu den di trow abi den eigi osofamiri now, pe a masra e tyari a moro bigi frantwortu fu tiri na osofamiri dati.
11, 12. Fu san ede a de prenspari taki trowpatna e studeri èn e begi nanga makandra?
11 A de prenspari fu studeri doronomo leki osofamiri. Furu Kresten osofamiri ondrofeni taki a sani disi tru. Kande a no makriki fu bigin studeri leki osofamiri, èn fu tan du a sani dati doronomo. Wan papa e taki: „Efu wi ben kan kenki a fasi fa sani waka, dan wi ben o sorgu taki wi ben e studeri doronomo leki osofamiri, sensi a bigin fu wi trowlibi.” A e taki moro fara: „Te mi nanga mi wefi e studeri nanga makandra, dan mi e firi bun te mi e si fa a e prisiri fu di a leri wan moi sani.”
12 Wan tra sani di e yepi trowpatna fu kon abi wan koloku trowlibi, na te den e begi nanga makandra (Rom. 12:12). Te wan masra nanga wan wefi e anbegi Yehovah makandra, dan den e kisi wan moro bun matifasi nanga Gado, èn dati kan yepi den fu abi wan moro koloku trowlibi (Yak. 4:8). Wan Kresten masra e taki: „A bun fu aksi pardon wantewante gi fowtu di wi meki, èn a bun tu fu taki fu den fowtu dati te wi e begi nanga makandra. Na so wi kan sori taki wi e sari trutru taki wi du wan sani di trobi wi trowpatna, awansi na wan pikin sani nomo.”—Ef. 6:18.
Fiti yusrefi na yu trowpatna
13. Sortu rai Paulus ben gi trowpatna te a abi fu du nanga a sekslibi fu den?
13 Kresten di trow musu wai pasi gi sani di kan meki taki den e lasi lespeki gi makandra. Iya, den no musu teki den gwenti abra fu a grontapu disi pe ala sani abi fu du nanga seks. Disi na san Paulus ben taki fu a tori disi: „Meki a masra gi en wefi san a abi reti na tapu, èn meki a wefi du a srefi tu gi en masra. A wefi a no basi fu en eigi skin, ma na en masra; na so a masra a no basi tu fu en eigi skin, ma na en wefi.” Ne Paulus gi a krin rai disi: „No weigri fu gi makandra san unu abi reti na tapu, boiti efu unu ala tu agri fu du dati fu wan pisi ten.” Fu san ede? „So taki unu kan teki ten fu begi, so taki unu kan kon makandra baka; na so fasi Satan no kan tan tesi unu fu di unu no man hori unsrefi” (1 Kor. 7:3-5). Di Paulus taki fu a begi di trowpaar musu begi, dan nanga dati a sori san musu de a moro prenspari sani gi wan Kresten. Ma a sori krin tu taki ibri Kresten di trow musu hori na prakseri taki ten na ten a trowpatna fu en sa wani abi seks, èn taki a musu poti prakseri tu na den firi fu a trowpatna fu en.
14. Fa den gronprakseri fu Bijbel e yepi trowpatna fu abi wan bun sekslibi?
14 Wan masra nanga wan wefi musu taki krin nanga makandra te a abi fu du nanga a sekslibi fu den, èn den musu frustan taki te den no e hori a trowpatna fu den na prakseri, dan dati kan tyari problema kon. (Leisi Filipisma 2:3, 4; luku Mateyus 7:12.) Na disi pasa na ini son osofamiri pe den trowpatna no abi a srefi bribi. Awansi problema de na mindri den trowpatna disi, toku a trowpatna di de wan Kresten kan meki sani waka moro bun te a e tyari ensrefi na wan fasi di fiti, te a e sori switifasi, èn te a e wroko makandra nanga a patna fu en. Te a Kresten disi abi lobi gi Yehovah èn gi a trowpatna fu en, èn te a de klariklari fu fiti ensrefi na a patna fu en, dan dati sa meki sani waka moro bun.
15. Fu san ede a de prenspari taki trowpatna e sori lespeki gi makandra?
15 Te a abi fu du nanga tra afersi fu a trowlibi, dan wan masra di abi switifasi, sa sori lespeki tu gi a wefi fu en. Fu eksempre, a sa hori den firi fu en na prakseri, srefi te a abi fu du nanga pikinpikin sani. Wan masra di abi 47 yari, e taki: „Te nanga now mi e tan du muiti fu hori den firi fu mi wefi na prakseri.” Kresten wefi e kisi a rai fu sori dipi lespeki gi a masra fu den (Ef. 5:33). Wefi no e sori lespeki kwetikweti gi a masra fu den te den e taki takru fu en, noso te den e taki fu den fowtu fu en te den de makandra nanga trawan. Odo 14:1 e memre wi: „Na uma di koni trutru bow na oso fu en, ma a don uma e broko en puru nanga en eigi anu.”
No gi Didibri okasi
16. Fa trowpaar kan fiti a rai na Efeisesma 4:26, 27 na ini a trowlibi fu den?
16 „Unu kan kisi atibron, ma toku un no musu du sondu; no meki son dongo, dan unu e mandi ete; no gi Didibri okasi” (Ef. 4:26, 27). Te trowpaar e fiti a rai disi, dan dati kan yepi fu lusu problema noso fu wai pasi gi den. Wan sisa e taki: „Mi man memre taki te mi nanga mi masra ben abi wan kesekese, dan ala ten wi ben e taki fu en awansi a ben e teki omeni yuru fu lusu a problema dati.” Na a bigin fu a trowlibi fu den, a sisa disi nanga a masra fu en teki a bosroiti taki den no ben o meki a dei tapu sondro fu lusu den problema fu den. „Wi bosroiti taki awansi san na a problema, wi ben o gi makandra pardon èn wi no ben o hori makandra na ati. Wi ben o bigin a nyun dei sondro trobi.” Na so den weigri fu „gi Didibri okasi”.
17. San kan yepi trowpaar fu de koloku, awinsi a gersi leki den no fiti na makandra?
17 Ma fa a de te yu feni taki yu no ben musu trow nanga a trowpatna fu yu? Kande yu e si taki yu nanga yu trowpatna no lobi makandra soleki fa tra trowpaar lobi makandra. Ma te yu e hori na prakseri fa a Mekiman e si a trowlibi, dan dati sa de wan yepi gi yu. Nanga yepi fu a santa yeye, Paulus ben gi Kresten a rai disi: „Un alamala musu si a trowlibi leki wan lespeki sani èn un no musu doti a trowlibi fu unu, bika Gado o krutu huruman nanga sutaman” (Hebr. 13:4). Èn wi no musu frigiti den wortu disi: „Dri titei di frekti kon na wan, no man hari koti na tu makriki” (Preik. 4:12). Te wan masra nanga wan wefi wani du ala san den man fu no gi Yehovah porinen, dan den sa de wán nanga makandra, èn wán nanga Gado. Den musu du muiti fu kon abi wan koloku trowlibi, fu di den sabi taki disi sa gi grani na Yehovah, a Sma di seti a trowlibi.—1 Petr. 3:11.
18. Sortu dyaranti yu kan abi te a abi fu du nanga a trowlibi?
18 A no de fu taki dati Kresten kan abi wan koloku trowlibi. Ma den sa musu meki muiti fu sori den fasi fu Krestes. Wan fu den fasi dati, na taki den musu de klariklari fu fiti densrefi na a trowpatna fu den. Na ini a ten disi furu trowpaar na ini den gemeente fu Yehovah Kotoigi na heri grontapu e sori taki trowpatna kan abi wan koloku trowlibi.
San yu ben sa piki?
• Fu san ede wi kan bribi taki trowpatna kan abi wan koloku trowlibi?
• San kan yepi trowpaar fu abi wan koloku trowlibi?
• Sortu fasi trowpatna musu kweki?
[Aksi fu a tori disi]
[Prenki na tapu bladzijde 9]
Trowpatna e du bun fu taki nanga makandra fosi den e teki wan kari fu go na wan presi, noso bifo den e meki mofo fu du wan spesrutu sani
[Prenki na tapu bladzijde 10]
Meki muiti fu lusu problema a srefi dei, èn „no gi Didibri okasi”