Wi breiti taki „a wini makandra nanga a Pikin Skapu”

NA INI wan brifi di Carey W. Barber ben skrifi na ini 1971, a taki fu den fosi 50 yari fu a diniwroko di a du gi a tru Gado. A ben skrifi: „Den yari di mi du diniwroko gi Yehovah, ben moi srefisrefi. A demakandra di mi ben abi nanga a pipel fu en, a kibri di a kibri mi gi ogrisma na ini a grontapu fu Satan, a howpu di mi abi fu wini makandra nanga a Pikin Skapu, Yesus Krestes, èn sosrefi a buweisi taki Yehovah lobi mi, na sani di gi mi prisiri, èn sosrefi wan korostu firi di e kibri mi ati. Den sani dati gi mi a dyaranti tu taki mi o tron winiman te fu kaba.”

Siksi yari baka dati, Brada Barber di ben de wan salfu Kresten, bigin dini leki wan memre fu a Tiri Skin fu Yehovah Kotoigi. Na ini den 30 yari di a dini leki wan memre fu a Tiri Skin, a tan abi a howpu fu „wini makandra nanga a Pikin Skapu”. A wini fu di a tan getrow te na en dede. A brada disi dede tapu sonde 8 april 2007, di a ben abi 101 yari.—1 Korentesma 15:57.

Brada Barber gebore na Ingrisikondre na ini 1905, èn a dopu na ini 1921, na Winnipeg, wan foto na ini Kanada. Tu yari baka dati, Brada Barber nanga en twelengi brada Norman, froisi go na Brooklyn, New York, fu yepi nanga wan nyun wroko. Na a ten dati, Yehovah Kotoigi srefi ben o bigin druk buku fu prati a bun nyunsu fu a Kownukondre „gi sma na heri grontapu”(Mateyus 24:14). Wan fu den fosi wroko di Brada Barber ben e du na Bethel, na taki a ben e druk buku nanga wan pikin drukpers. Den ben e druk brifi tu di ben abi fu du nanga krutu afersi di den brada ben tyari go na a Hei Krutubangi fu Amerikankondre. Bakaten, Brada Barber wroko na a dienstafdeling pe a ben e poti prakseri na den afersi fu den gemeente, èn na a preikiwroko di e du na ini a heri kondre.

Fu di Brada Barber ben abi na ondrofeni dati, meki na ini 1948, a ben man teki a frantwortu na en tapu fu bigin nanga a kringwroko. A ben e go na bigi konmakandra èn na ala den gemeente na a westsei pisi fu Amerikankondre. A taki dati a sani di ben e gi en moro prisiri, na te a ben de na dorosei e preiki gi sma, na presi fu sidon na ini wan kantoro. Furu brada nanga sisa kon leri sabi Brada Barber di a ben e du a kringwroko. Fu di a ben srapu, èn fu di a ben lobi a preikiwroko, meki a no ben muilek gi en fu teki leri di a ben de na a di fu 26 klas fu a Waktitoren Bijbelskoro Gilead. Na drape a leri sabi sisa Sydney Lee Brewer di ben komoto fu Kanada. Baka a skoro, den trow, èn den go wantewante na a foto Chicago, Illinois pe Brada Barber ben o gi den gemeente drape deki-ati leki kring-opziener. Na ini den 20 yari di den ben de na ini a kringwroko, Sisa Barber ben de wan bigi yepi gi en masra doronomo.

Den wan di kon leri sabi Brada Barber na ini den yari di a dini leki distrikt-opziener noso leki kring-opziener, noso den wan di kon sabi en na ini den 30 yari di a dini leki wan memre fu a Tiri Skin, no sa frigiti den lezing di a ben hori èn den moi piki di a ben e gi. Fu tru, wi abi furu reide fu prisiri taki „a wini makandra nanga a Pikin Skapu”.