Yu kan libi fu têgo

FURU fu den sma na grontapu di abi wan bribi, abi a howpu taki den o libi fu têgo na wan noso tra fasi. A kan taki ibri kerki e taki fu a tori disi pikinso tra fasi. Ma te yu luku en bun, den e gi sma a srefi howpu, namku taki den kan libi koloku na wan presi pe ala sani e waka bun nanga den èn pe den no abi fu frede taki den o dede. Yu abi a howpu dati tu? Fu san ede so furu sma abi a tranga bribi disi? Èn oiti wan ten sa de te libisma o man libi fu têgo?

Den Buku fu Bijbel e sori taki sensi a bigin di a Mekiman meki a fosi man nanga uma, a poti a winsi fu libi fu têgo dipi na ini na ati fu libisma. Bijbel e taki: „Ten di no skotu [Gado] poti na ini den ati.”—Preikiman 3:11.

Ma efu a fosi man nanga uma ben wani libi fu têgo, dan den ben musu si Gado leki a sma di abi a reti fu bosroiti gi den san bun èn san no bun. Efu den ben o du dati, dan Yehovah ben o feni den warti fu libi „fu têgo” na ini a moi tanpresi di a ben meki gi den, namku a dyari fu Eden.—Genesis 2:8; 3:22.

Wi lasi a howpu fu libi fu têgo

Bijbel e sori taki na ini a dyari fu Eden, Gado ben prani „a bon fu sabi san na bun èn san na ogri”. A ben taigi Adam nanga Eva taki den no musu nyan fu a froktu, bika efu den ben o du dati, den ben o dede (Genesis 2:9, 17). Efu Adam nanga Eva no ben o nyan fu a froktu, dan dati ben o sori Gado taki den e lespeki a tirimakti fu en. Ma na a tra sei, efu den ben o nyan fu a froktu, dan dati ben o sori taki den no wani Gado leki den tiriman. Adam nanga Eva no du san Yehovah taigi den èn den teki a sei fu Satan, wan yeye di opo ensrefi teige a tirimakti fu Gado. Leki bakapisi fu dati, Gado bosroiti nanga leti taki Adam nanga Eva no ben fiti moro fu kisi têgo libi.—Genesis 3:1-6.

Gado ben gi den na okasi fu bosroiti efu den ben wani tan libi, noso efu den ben wani dede. Fu di den trangayesi Gado, meki te fu kaba den dede, iya den no ben de moro. Nowan towfru-dresi ben o man meki Adam, Eva nanga den bakapikin fu den kisi têgo libi. Den no ben abi wan sili tu di ben o libi go doro baka di den dede. *

Ala den bakapikin fu Adam e pina fu di a opo ensrefi teige Gado. Na apostel Paulus e taki fu den bakapisi di kon fu di Adam sondu. A ben skrifi: „Wán man meki sondu kon na grontapu èn sondu fu en sei tyari dede kon, èn na so fasi ala sma e dede, bika den alamala sondu.”—Romesma 5:12.

Wi abi a howpu baka fu libi fu têgo

Na apostel Paulus ben agersi a situwâsi fu den bakapikin fu  Adam nanga a situwâsi fu wan srafu na ini a fosi yarihondro. Fu di den bakapikin fu Adam nanga Eva kisi sondu, meki den alamala e gebore leki „srafu fu sondu”, èn dati abi dede leki bakapisi (Romesma 5:12; 6:16, 17). Ma koloku taki Yehovah seti sani fu bai den srafu disi puru na ini a katibo fu den. Paulus e fruklari: „Neleki fa wán sondu nomo [fu Adam] meki taki ala sortu sma kisi strafu, na so a wán reti sani di du, meki tu taki Gado o fruklari fu ala sortu sma taki den de regtfardiki, so taki den kan kisi libi.” A „wán reti sani di du”, na taki Yesus gi en volmaakti libi leki „wan lusu-paiman fu pai gi ala sma”. Yehovah teki a lusu-paiman, fu di a seti disi ben doro den regtfardiki markitiki fu en èn fu di a lusu-paiman kan meki taki a libisma famiri di „kisi krutu”, no kisi „strafu”.—Romesma 5:16, 18, 19; 1 Timoteyus 2:5, 6.

Dati meki, awinsi o furu den sabiman e ondrosuku a fasi fa libisma meki, toku den no o feni wan fasi fu meki sma libi fu têgo. A problema musu lusu na wan tra fasi. Soleki fa Bijbel e sori, dan a sani di e meki taki libisma e dede, abi fu du nanga a fasi fa sma e tyari densrefi èn nanga regtfardiki markitiki. A no abi fu du nanga wan siki di de na ini wi skin. A sani di sa meki taki libisma kisi têgo libi, namku a frulusu-ofrandi fu Yesus, abi fu du nanga regtfardiki markitiki tu. A lusu-paiman na wan seti di e sori taki Gado regtfardiki èn taki a lobi wi. Ma suma sa kisi wini fu a lusu-paiman èn kisi têgo libi te fu kaba?

Den kisi a grani fu no dede noiti moro

Yehovah Gado e libi „fu ten di no skotu te ten di no skotu”. A no man dede noiti (Psalm 90:2). A fosi sma di Yehovah gi a grani fu no dede noiti moro, na Yesus Krestes. Na apostel Paulus e fruklari: „Now di Krestes kisi wan opobaka, a no sa dede moro; dede no abi makti na en tapu moro” (Romesma 6:9). Fu tru, di Paulus ben e teki Yesus gersi nanga den tiriman fu grontapu, dan a ben taki dati Krestes wawan no man dede. Yesus sa „tan libi fu têgo”. A abi wan libi „di no man pori”.—Hebrewsma 7:15-17, 23-25; 1 Timoteyus 6:15, 16.

Yesus a no a wan-enkri sma di kisi a grani disi. Kresten di salfu nanga santa yeye èn di kisi a grani tu fu tiri leki kownu na ini hemel, e  kisi a srefi sortu opobaka neleki Yesus (Romesma 6:5). Na apostel Yohanes e sori taki 144.000 sma e kisi a grani disi (Openbaring 14:1). Den sma disi tu no o man dede noiti moro. Paulus e taki fu na opobaka fu den: „Skin nanga brudu no kan kisi a kownukondre fu Gado . . . A trompeti o bari, èn den dedesma o opo baka nanga wan skin di no man pori moro, èn wi o kenki. Bika a skin di man pori, musu tron wan skin di no man pori moro, èn a skin di kan dede, musu tron wan skin di no man dede moro.” Dede no abi makti tapu den wan di e kisi na opobaka disi.—1 Korentesma 15:50-53; Openbaring 20:6.

A sani disi di Gado tyari kon na krin, moi trutru. Srefi den engel man dede, awinsi den na yeye. Disi tru, fu di den engel di opo densrefi teige Gado makandra nanga Satan, sa kisi pori (Mateyus 25:41). Ma na a tra sei, den wan di sa tiri makandra nanga Yesus, kisi a grani fu no dede noiti moro. Disi e buweisi taki Yehovah abi a frutrow taki den o tan getrow.

Disi wani taki dan dati den 144.000 sma wawan e kisi têgo libi, aladi na milyardmilyard sma libi na grontapu? Nôno. Meki wi go luku fu san ede.

Têgo libi na tapu wan paradijs grontapu

A Bijbel buku Openbaring e taki fu wan moi sani di o pasa. A e sori taki wan bigi ipi sma o kisi têgo libi na ini wan paradijs na grontapu. Makandra nanga den sma disi, trawan sa de tu di ben dede, ma di kisi wan opobaka èn di kon yongu èn gosontu baka (Openbaring 7:9; 20:12, 13; 21:3, 4). Den o go na ’wan liba di abi watra di e gi libi; a watra krin leki dyamanti, èn a liba e lon komoto fu a kownusturu fu Gado’. Na a syoro fu a liba disi yu abi ’bon di e gi libi . . . Den wiwiri fu den bon na fu dresi den pipel’. Na wan switi fasi Yehovah sa gi den a kari: „Ibri sma di watra e kiri en, meki a kon; meki ibri sma di wani, kon dringi fu a watra di e gi libi èn di de fu kisi fu soso.”—Openbaring 22:1, 2, 17.

Den bon a no towfru-dresi di dresiman e suku fu meki someni hondro yari kaba, èn a watra no e kon fu wan fonten di e meki sma kon yongu baka èn di sma e suku sensi ten kaba. Na presi fu dati, den bon nanga a liba e prenki den sani di Gado seti nanga yepi fu Yesus Krestes, so taki a libisma famiri kan tron volmaakti baka soleki fa a ben de na a bigin.

Gado wani ete taki libisma di e gi yesi na en, kisi têgo libi na grontapu. A sani dati o kon tru seiker, fu di Yehovah de getrow. Psalm 37:29 e taki: „Na den regtfardikisma srefi sa abi grontapu leki a gudu fu den, èn den sa libi na tapu fu têgo.” Disi na trutru wan moi pramisi gi wi èn sosrefi gi den wan di sa libi na hemel sondro fu dede. Dati meki wi e taki: „Den sani di yu e du bigi èn den e fruwondru sma srefisrefi, Yehovah Gado na Almaktiwan. Yu di de Kownu fu têgo, e du sani na wan fasi di e sori taki yu de regtfardiki èn getrow. Yehovah, suma no sa frede yu trutru èn suma no sa gi yu nen glori? Bika yu wawan de loyaal!”—Openbaring 15:3, 4.

Yu e angri fu kisi a tumusi warti grani fu libi fu têgo? Efu dati de so, dan yu musu sori taki yu de loyaal na a „Kownu fu têgo”, èn yu musu gi yesi na en. Yu musu kon leri sabi Yehovah èn Yesus Krestes, a sma di meki taki wi man kisi têgo libi. Ala sma di e hori densrefi na den markitiki fu Gado di e sori san bun èn san no bun, sa kisi „têgo libi”.—Yohanes 17:3.

[Futuwortu]

[Faki/​Prenki na tapu bladzijde 5]

Wan winsi di sma abi langa ten kaba

A buku fu Gilgamesj, di e taki fu wan tori di pasa na ini Mesopotamia na ini a pisi ten fu 2000 b.G.T., e fruteri fu a suku di wan deki-ati man ben e suku fasi fu tan yongu fu têgo. Den Egeptesma fu owruten ben e sreka den skin fu dedesma so taki den no ben kan pori. Den ben e bribi taki a sili no man dede, èn taki a ben kan gebroiki a skin baka. Sobun, fu di den ben e bribi taki den dedewan e libi go doro, meki son grebi fu den Egeptesma ben lai nanga ala sani di den dedewan ben kan gebroiki bakaten.

Sensi a di fu aiti yarihondro  b.G.T., den sabiman tapu a kontren fu scheikunde fu China ben e bribi taki libisma kan libi fu têgo. Èn a kan taki sensi a di fu fo yarihondro b.G.T. den e bribi taki den kan kisi têgo libi nanga yepi fu wan towfru-dresi. Na ini a pisi ten fu 400 G.T. te go miti 1500 G.T., den sabiman fu Europa nanga Arabia ben e suku fu feni èn meki den eigi dresi di ben o meki den libi fu têgo. Wan tu fu den dresi fu den, ben abi tranga vergif soleki arseen, kwik, nanga swarfu. Nowan sma sabi omeni fu den man disi dede fu di den dringi den dresi disi!

Furu sma ben e bribi tu taki wan fonten ben de nanga watra di e meki sma kon yongu èn tranga baka efu den dringi fu en.

 [Faki/​Prenki na tapu bladzijde 7]

Yu denki taki a o soi fu libi fu têgo?

Son sma feni taki a o soi fu libi fu têgo. Den e prakseri taki na lasi yu o lasi yu ten nanga den srefi sortu sani di yu o du ibri tron baka. Kande den e denki taki te den o libi fu têgo, dan den o libi na a srefi fasi fa sma e libi na ini a ten disi èn na ini den srefi situwâsi. Iya, gi furu sma a libi na ini a ten disi soi èn den no abi wan marki di den wani doro na ini a libi. Ma Gado e pramisi taki na ini a Paradijs di a o meki baka, a libisma famiri o abi „switi prisiri na ini vrede di sa de pasa marki” (Psalm 37:11). So wan libi sa gi a libisma famiri na okasi fu leri fu den sani di Yehovah meki èn fu gebroiki den ten fu leri du ala sortu moi sani, fu studeri sani, èn fu du iniwan sani di den ben sa wani du, ma di den no man du na ini a ten disi.

Dr. Aubrey de Grey, wan datra na a Cambridge University di e ondrosuku sani fu meki sma libi moro langa, e taki: „Sma di kisi bun leri èn di abi a ten fu gebroiki den sani di den leri, noiti e fruferi na ini a ten disi, èn den no denki taki oiti wan ten o de pe den no man du nyun sani di den lobi.” Gado Wortu e taki dati „libisma noiti no sa kon sabi a wroko finifini di a tru Gado meki fu sensi a bigin te na a kaba”.—Preikiman 3:11.