Howpu tapu Yehovah, èn abi deki-ati

„Howpu tapu Yehovah; abi deki-ati èn meki yu ati de tranga. Iya, howpu tapu Yehovah.”—PSALM 27:14.

1. O prenspari a de fu abi howpu, èn fa a wortu disi gebroiki na ini den Buku fu Bijbel?

TRUTRU howpu de leki wan faya di e skèin krin. A e yepi wi fu no tan poti prakseri na den tesi fu wi, ma fu luku go na a tamara nanga deki-ati èn nanga prisiri. Yehovah wawan kan gi wi trutru howpu, èn dati a e du nanga en Wortu di a meki sma skrifi nanga yepi fu santa yeye (2 Timoteyus 3:16). Fu taki en leti, a wortu „howpu” skrifi furu leisi na ini Bijbel, èn a e sori go na a fruwakti di wan sma e fruwakti wan bun sani fayafaya, fu di a sabi taki a sani dati sa kon seiker. Ma a wortu disi abi fu du tu nanga a sani di wan sma e howpu na tapu. * Te wan sma abi so wan howpu, dan a no e winsi nomo fu kisi wan sani sondro fu abi a dyaranti taki a sani dati o kon tru.

2. Sortu krakti howpu ben abi tapu a libi fu Yesus?

² Di Yesus kisi tesi nanga problema, dan a no ben e tan poti prakseri na den sani di a ben e ondrofeni na a momenti dati, ma a ben e howpu tapu Yehovah. „Bika na fu a prisiri di ben e wakti en, meki a dede na a pina-postu èn a no ben broko en ede taki a ben o kisi syen; a go sidon na a reti-anusei fu a kownusturu fu Gado” (Hebrewsma 12:2). Yesus tan gi yesi na Gado awinsi san ben kan pasa nanga en. A du disi fu di a ben wani sori taki Yehovah wawan abi a reti fu tiri hemel nanga grontapu èn fu di a ben wani santa a nen fu En.

3. Sortu krakti howpu abi tapu a libi fu den futuboi fu Gado?

³ Kownu David ben sori san howpu abi fu du nanga deki-ati, di a taki: „Howpu tapu Yehovah; abi deki-ati èn meki yu ati de tranga. Iya, howpu tapu Yehovah” (Psalm 27:14). Efu wi wani meki wi ati de tranga, dan noiti wi musu meki a howpu fu wi kon swaki, ma wi musu tan hori en bun na prakseri èn a musu de na ini wi ati ala ten. Dati sa yepi wi fu waka baka na eksempre fu Yesus èn fu sori deki-ati nanga faya aladi wi e du a  wroko di a gi en disipel fu du (Mateyus 24:14; 28:19, 20). Fu tru, Bijbel e sori taki howpu de tumusi prenspari, neleki bribi nanga lobi, èn den futuboi fu Gado e sori den fasi disi doronomo na ini den libi.—1 Korentesma 13:13.

Yu e kisi „moro howpu”?

4. Sortu tumusi moi blesi den salfu Kresten nanga den „tra skapu” e fruwakti fu kisi na ini a ten di e kon?

⁴ A pipel fu Gado sa kisi tumusi moi blesi na ini a ten di e kon. Salfu Kresten e wakti fayafaya fu dini makandra nanga Krestes na ini hemel. Ma den „tra skapu” abi a howpu fu „komoto na ini a katibo di e tyari pori kon, èn na so fasi den o tron pikin fu Gado [na grontapu] èn den o kisi kefalek bigi fri” (Yohanes 10:16; Romesma 8:19-21; Filipisma 3:20). Te den o kisi „kefalek bigi fri”, dan den o kon fri sosrefi fu sondu èn fu den tumusi takru bakapisi di sondu tyari kon. Fu tru, Yehovah, a Sma di e gi „ibri bun presenti nanga ibri volmaakti kado”, o gi den loyaalwan fu en den moro moi blesi.—Yakobus 1:17; Yesaya 25:8.

5. Fa wi kan kisi „moro howpu”?

⁵ O furu krakti a Kresten howpu musu abi tapu wi libi? Na ini Romesma 15:13 wi e leisi: „Meki a Gado di e gi sma howpu, gi unu prisiri nanga vrede pasa marki fu di unu e bribi, so taki unu kan kisi moro howpu nanga yepi fu a krakti di a santa yeye e gi.” Iya, howpu no de leki wan kandra na ini wan dungru presi, ma a de leki a faya fu a mamanten son di e skèin krin. Wan sma di abi a howpu disi abi vrede na ini en libi, a de koloku, a abi wan marki na ini en libi, èn a abi deki-ati. Hori na prakseri taki wi e kisi „moro howpu” te wi e bribi san skrifi na ini a Wortu fu Gado èn te wi e kisi a santa yeye fu en. Romesma 15:4 e taki: „Ala sani di sma skrifi fositen, ben skrifi fu leri wi wan sani, so taki a fasi fa wi e horidoro èn a trowstu di Gado Buku e gi, kan gi wi howpu.” Sobun, aksi yusrefi: ’Mi e studeri Bijbel fayafaya èn mi e leisi en ibri dei, so taki a howpu fu mi kan tan libilibi? Mi e begi Gado furu fu aksi en fu gi mi en santa yeye?’—Lukas 11:13.

6. Nanga san wi musu luku bun efu wi wani tan abi wan tranga howpu?

⁶ Yesus, na Eksempre fu wi, ben kisi krakti fu Gado Wortu. Te wi e poti bun prakseri na a eksempre di a gi wi, dan wi no e „kon weri èn lasi-ati” (Hebrewsma 12:3). Wi kan frustan taki, efu a howpu di wi kisi fu Gado no de so tranga moro na ini wi frustan nanga wi ati, noso efu wi e bigin poti prakseri na tra sani soleki gudu noso tra grontapu sani, dan fosi wi denki wi kan kon weri na yeye fasi. Te fu kaba wi no abi a krakti nanga a deki-ati moro fu tyari wisrefi na wan fasi di fiti. Efu dati ben o pasa nanga wi, dan ’wi kan lasi a bribi fu wi, neleki wan sipi di sungu’ (1 Timoteyus 1:19). Na a tra sei, trutru howpu e tranga a bribi fu wi.

Howpu de tumusi prenspari gi a bribi fu wi

7. Na sortu fasi howpu prenspari gi a bribi fu wi?

⁷ Bijbel e taki: „Bribi na te wan sma e fruwakti taki den sani di a e howpu, o kon seiker; a de a krin buweisi fu sani di de trutru, ma di wi no man si” (Hebrewsma 11:1). Howpu de prenspari, neleki fa bribi de prenspari. Sobun, wan sma no kan abi bribi efu a no abi howpu. Luku na eksempre fu Abraham. Yehovah ben pramisi Abraham nanga Sara taki den ben o kisi wan pikin, ma gi libisma, dan en nanga en wefi Sara ben owru tumusi fu kisi pikin (Genesis 17:15-17). San Abraham du? „Aladi a ben gersi leki howpu no ben de, toku Abraham ben bribi fu di a ben abi a howpu taki a ben o tron papa fu furu pipel” (Romesma 4:18). Iya, a howpu di Abraham ben kisi fu Gado, ben tranga en bribi taki a ben o kisi pikin. Leki bakapisi fu dati, a bribi fu en tranga a howpu fu en èn a ben gi en a dyaranti taki a ben o kisi a sani di a ben howpu. Abraham nanga Sara ben abi a deki-ati srefi fu gowe libi den oso nanga den famiriman fu go tan den heri libi langa na ini tenti ini wan tra kondre!

8. Fa wi e kisi wan moro tranga howpu te wi e horidoro na wan getrow fasi?

⁸ Abraham ben gi yesi na Yehovah dorodoro awinsi a ben muilek gi en, èn dati meki a howpu fu en ben kon moro tranga (Genesis 22:2, 12). Te wi e gi yesi na Yehovah tu èn te wi e horidoro na ini a diniwroko fu en, dan wi kan de seiker taki wi sa kisi a pai fu wi. Paulus ben skrifi: „Te wi e horidoro, dan Gado o feni wi bun; te Gado feni  wi bun, dan wi sa abi howpu; a howpu dati no sa meki wi kisi syen” (Romesma 5:4, 5). Dati meki Paulus ben skrifi: „Wi wani srefisrefi taki ibriwan fu unu musu abi a srefi faya, so taki unu kan de seiker fu a howpu te na a kaba” (Hebrewsma 6:11). Te wi abi sowan tranga howpu di e kon fu di wi abi wan krosibei matifasi nanga Yehovah, dan dati kan yepi wi fu abi deki-ati te wi e kisi problema, èn wi o man prisiri srefi.

„Prisiri nanga a howpu di unu abi”

9. San wi musu du doronomo, so taki wi kan ’prisiri nanga a howpu di wi abi’?

⁹ A howpu di Gado gi wi, bun omeni tron moro iniwan sani di wi kan kisi na ini grontapu. Psalm 37:34 e taki: „Howpu tapu Yehovah èn hori a pasi fu en, èn en sa hei yu so taki yu kan kisi grontapu. Te den sa koti na ogriwan puru, dan yu sa si disi.” Iya, wi abi ala reide fu ’prisiri nanga a howpu di wi abi’ (Romesma 12:12). Ma efu wi wani du dati, dan wi musu tan hori na prakseri sortu howpu wi abi. Yu e prakseri doronomo fu a howpu di Gado gi yu? Yu kan si yusrefi kaba na ini a Paradijs, pe yu abi wan bun gosontu, pe problema no o de, pe yu sa de soso nanga sma di lobi yu, èn pe yu sa du wroko di e gi yu trutru prisiri? Yu e prakseri dipi fu den prenki na ini den buku fu wi di abi fu du nanga a Paradijs? Te wi e du dati doronomo, dan a de neleki wi e krin wan grasi fensre fu pe wi kan luku go na dorosei fu si wan moi presi. Efu wi no e krin a grasi, heri esi a kan kon doti, dan wi no o man si a moi presi so bun moro èn a no o hari wi moro fu luku en. Te fu kaba, tra sani kan bigin hari wi prakseri. Noiti wi musu meki dati pasa!

10. San a matifasi fu wi nanga Yehovah abi fu du nanga a fruwakti di wi e fruwakti fu kisi pai?

¹⁰ A no de fu taki, dati a moro prenspari reide fu san ede wi e anbegi Yehovah, na fu di wi lobi en (Markus 12:30). Ma toku wi musu fruwakti a paiman fu wi fayafaya. Fu taki en leti, Yehovah wani taki wi du dati! Hebrewsma 11:6 e taki: „Sondro bribi wan sma no kan prisiri Gado, bika a sma di e anbegi Gado musu bribi taki a de trutru èn taki a sa pai den sma di e suku en fayafaya.” Fu san ede Yehovah wani taki wi musu si en leki a Sma di o pai wi? Te wi e du dati, dan wi e sori taki wi sabi wi hemel Tata heri bun. A lobi fu gi sani èn a lobi den pikin fu en. Efu wi no ben o abi „wan tamara èn wan howpu”, dan wi no ben o de koloku srefisrefi èn wi ben o lasi-ati makriki.—Yeremia 29:11.

11. Fa a howpu di Moses kisi fu Gado, yepi en fu teki koni bosroiti?

¹¹ Wan sma di de wan tumusi moi eksempre gi wi na ini a tori disi, ben de Moses. A ben tan hori na prakseri sortu howpu Gado ben gi en. Leki „a manpikin fu na umapikin fu Farao” Moses ben kan kisi makti, a ben kan kisi barinen, èn a ben kan kon gudu na ini Egepte. A ben o feti baka den sani disi, noso a ben o dini Yehovah? Moses ben sori deki-ati di a bosroiti fu dini  Yehovah. Fu san ede a teki a bosroiti dati? Fu di „a ben poti ala en prakseri na a pai di a ben o kisi” (Hebrewsma 11:24-26). A de krin taki Moses no ben e si a howpu di Yehovah ben gi en leki wan soso sani.

12. Fu san ede a Kresten howpu de neleki wan helm?

¹² Na apostel Paulus ben agersi howpu nanga wan helm. Na agersi helm fu wi e kibri wi frustan. A e yepi wi tu fu teki koni bosroiti, fu poti den yoisti sani na a fosi presi na ini wi libi, èn fu tan getrow na Gado (1 Tesalonikasma 5:8). Yu e weri na agersi helm disi ala ten? Efu yu e du dati, dan yu e teki na eksempre fu Moses nanga Paulus, fu di yu no e poti yu howpu ’tapu gudu di kan lasi gowe, ma tapu Gado di e gi wi ala sani bogobogo, so taki wi kan abi prisiri’. A tru taki wi musu abi deki-ati fu no feti baka wi eigi sani soleki fa furu sma e du dati. Ma a warti fu meki a muiti dati! Den wan di e howpu tapu Yehovah èn di lobi En, sa kisi „a trutru libi”. Èn fu taki en leti, wi no wani nowan tra sani leki a libi dati, a no so?—1 Timoteyus 6:17, 19.

„Mi no sa libi yu kwetikweti”

13. Sortu dyaranti Yehovah e gi den loyaal futuboi fu en?

¹³ A grontapu disi de na ini „wan banawtu di de leki a hebi pen fu wan uma di de fu kisi en pikin”, èn a banawtu dati e kon hebi moro nanga moro. Dati meki den sma di e poti den howpu tapu a sistema disi, musu fu frede te den e prakseri den ogri sani di o miti den (Mateyus 24:8). Ma den wan di e howpu tapu Yehovah, no abi fu frede. Den sa tan „abi wan bun libi èn [den] no sa frede te rampu miti [den]” (Odo 1:33). Fu di den no poti den howpu tapu a sistema disi, meki den e teki a rai fu Paulus nanga prisiri, di a taki: „No meki a fasi fa unu e libi sori taki unu lobi moni, ma un musu de tevrede nanga den sani di unu abi now. Bika a taki: ’Mi no sa libi yu kwetikweti èn noiti mi no sa gowe fu yu.’”—Hebrewsma 13:5.

14. Fu san ede Kresten no abi fu broko den ede pasa marki nanga den sani di den abi fanowdu fu tan na libi?

¹⁴ Den wortu „kwetikweti” nanga „noiti” e gi wi a dyaranti taki Gado sa sorgu gi wi ala ten. Yesus ben gi wi a dyaranti tu taki Gado o sorgu gi wi na wan lobi-ati fasi. A ben taki: „Tan suku a kownukondre nanga En regtfardikifasi fosi, dan unu sa kisi ala den tra sani tu [namku den sani di wi abi fanowdu fu tan na libi]. Sobun, noiti un musu broko un ede nanga tamara, bika tamara sa abi en eigi broko-ede” (Mateyus 6:33, 34). Yehovah sabi taki a no makriki gi wi fu wroko fayafaya gi a Kownukondre fu en èn na a srefi ten, fu tyari a frantwortu di wi abi fu sorgu gi den sani di wi abi fanowdu fu kan tan na libi. Sobun, meki wi abi a frutrow dorodoro taki Yehovah man sorgu gi wi èn taki a wani du dati tu.—Mateyus 6:25-32; 11:28-30.

15. Fa Kresten e ’hori den ai krin’?

¹⁵ Wi e sori taki wi e frutrow tapu Yehovah, te wi e ’hori wi ai krin’ (Mateyus 6:22, 23). Te wan sma ai krin, dan a de opregti, a no e du sani nanga takru prakseri, a no gridi, èn a no e du sani fu kisi wini gi ensrefi nomo. Te wi ai krin, dan dati no wani taki dati wi musu pina wisrefi, noso taki wi no e broko wi ede nanga a frantwortu di wi abi fu sorgu gi den sani di wi abi fanowdu fu tan na libi. Na presi fu dati, a wani taki dati wi de nanga „krin frustan”, aladi wi e tan poti a diniwroko fu Yehovah na a fosi presi ini wi libi.—2 Timoteyus 1:7.

16. Fu san ede wi musu abi bribi nanga deki-ati fu kan hori wi ai krin?

¹⁶ Efu wi wani hori wi ai krin, dan wi musu abi bribi nanga deki-ati. Fu eksempre, efu yu wroko basi wani nomonomo taki yu musu wroko na wan ten pe yu musu go na den Kresten konmakandra, dan yu o abi a deki-ati fu tan poti yu anbegi na a fosi presi? Efu wan sma e tweifri taki Yehovah sa sorgu gi den futuboi fu En soleki fa A pramisi, dan a wan sani di Satan musu du nomo, na fu meki a tesi kon moro hebi. Te fu kaba so wan sma kan bigin misi ala den konmakandra. Iya, efu wi bribi swaki, dan Satan kan abi krakti na wi tapu. Na so fasi wi e meki Satan bosroiti gi wi san musu kon na a fosi presi na ini wi libi, na presi taki wi e meki Yehovah du dati. Dati ben o de wan sari sani trutru!—2 Korentesma 13:5.

 „Howpu tapu Yehovah”

17. Fa den wan di e frutrow tapu Yehovah e kisi blesi nownow kaba?

¹⁷ Ibri tron baka den Buku fu Bijbel e sori taki den wan di e howpu èn e frutrow tapu Yehovah, noiti sa lasi (Odo 3:5, 6; Yeremia 17:7). A tru taki, ten na ten den musu de tevrede nanga pikinso sani nomo, ma den de klariklari fu teki a pina dati now, fu di den sabi taki den o kisi bun furu blesi bakaten. Na so fasi den e sori taki den e „howpu tapu Yehovah” èn den abi a frutrow taki a sa gi den loyaalwan fu en ala den regtfardiki sani di den ati wani (Psalm 37:4, 34). Fu dati ede, den de koloku nownow kaba. „A fruwakti fu den regtfardikiwan na wan prisiri, ma a howpu fu den godelowsuwan no sa de moro.”—Odo 10:28.

18, 19. (a) Sortu dyaranti Yehovah e gi wi na wan lobi-ati fasi? (b) Fa wi kan sorgu taki Yehovah e tan na wi „reti-anu”?

¹⁸ Te wan pikin boi e waka nanga en papa aladi a e hori en anu, dan a no e frede noti. Na so a de tu te wi e waka nanga wi hemel Tata. Yehovah ben taigi Israel: „No frede, bika mi de nanga yu. . . . Mi wani yepi yu trutru. . . . Bika mi, Yehovah yu Gado, e grabu yu hori na yu reti-anu. Mi na a wan di e taigi yu: ’No frede. Misrefi o yepi yu.’”—Yesaya 41:10, 13.

¹⁹ Wi e firi bun trutru te wi e prakseri fa Yehovah e hori wi anu na wan lobi-ati fasi. David ben skrifi: „Mi poti Yehovah na mi fesi doronomo. Fu di a de na mi reti-anu, den no sa meki mi degedege” (Psalm 16:8). Fa wi kan sorgu taki Yehovah e tan na wi „reti-anu”? Wi kan du disi na tu fasi. Na a fosi presi, wi e meki en Wortu tiri wi heri libi. Èn na a di fu tu presi, wi e poti prakseri na a tumusi moi pai di Yehovah sa gi wi. A psalm skrifiman Asaf ben singi: „Mi de nanga yu doronomo; yu grabu mi reti-anu hori. Nanga yu rai yu sa tiri mi, èn baka dati yu sa tyari mi go na glori srefi” (Psalm 73:23, 24). Fu di wi abi a dyaranti disi, meki trutru wi kan abi a frutrow taki sani sa waka bun nanga wi na ini a ten di e kon.

„A frulusu fu unu de krosibei”

20, 21. San den wan di e howpu tapu Yehovah sa kisi na ini a ten di e kon?

²⁰ O moro den dei e pasa, o moro wi musu sorgu taki Yehovah tan na wi reti-anu. Heri esi, a grontapu fu Satan o ondrofeni wan bigi banawtu di noiti no pasa ete, èn a sa bigin te falsi bribi o kisi pori (Mateyus 24:21). Den sma di no e bribi na ini Gado, sa frede trutru. Ma toku, na ini a bruya pisi ten dati, den futuboi fu Yehovah di abi deki-ati, sa prisiri fu di den abi howpu! Yesus ben taki: „Te den sani disi e bigin, dan opo tanapu leti-opo èn opo un ede luku go na loktu, bika a frulusu fu unu de krosibei.”—Lukas 21:28.

²¹ Fu dati ede, meki wi prisiri nanga a howpu di Gado gi wi. Wi no musu meki Satan kori wi nanga den triki fu en. Ma meki wi wroko tranga fu kisi moro bribi, lobi, nanga frede gi Gado. Te wi e du dati, dan wi sa abi a deki-ati fu gi yesi na Yehovah na ini ala situwâsi, èn wi o man kakafutu gi Didibri (Yakobus 4:7, 8). Iya, „abi deki-ati èn meki yu ati de tranga, unu alamala di e wakti Yehovah”.—Psalm 31:24.

[Futuwortu]

Yu kan gi piki?

• Fa a howpu di Yesus ben abi, yepi en fu abi deki-ati?

• San bribi abi fu du nanga howpu?

• Fa howpu nanga bribi kan gi wan Kresten deki-ati fu poti den yoisti sani na a fosi presi ini en libi?

• Fu san ede den wan di e „howpu tapu Yehovah” kan abi a frutrow taki sani o waka bun nanga den na ini a ten di e kon?

[Aksi fu a tori disi]

[Prenki na tapu bladzijde 28]

Awinsi yu yongu noso owru, yu kan si yusrefi kaba na ini a Paradijs?