„Fu tru, mi lobi yu wet!”

PSALM 119 na wan singi di e sori fa a skrifiman fu a psalm disi feni a boskopu noso a wortu di Gado meki sma skrifi. A psalm skrifiman e singi: „Mi kibri a wortu fu yu leki wan gudu na ini mi ati.” „Mi sa lobi den markitiki fu yu.” „Ala ten mi sili e angri srefisrefi fu den krutu bosroiti fu yu.” „Na den frumane fu yu mi lobi.” „Mi e angri gi den komando fu yu.” „Mi sa prisiri nanga den komando fu yu di mi lobi.” „Mi sa poti prakseri na den wet fu yu.” „Fu tru, mi lobi yu wet! Heri dei mi e poti prakseri na en.”—Psalm 119:11, 16, 20, 24, 40, 47, 48, 97.

A no de fu taki dati a psalm skrifiman ben abi bigi warderi gi a wortu fu Gado di libisma kon sabi! Yu abi warderi tu gi a boskopu fu Gado Wortu, Bijbel? Yu wani kon lobi Bijbel tu? Efu yu wani dati, dan a fosi sani di yu musu du na fu kon kisi a gwenti fu leisi Bijbel doronomo, iya, ibri dei efu a kan. Yesus Krestes ben taki: „Sma no musu libi fu brede wawan, ma fu ibri wortu di Yehovah mofo taki” (Mateyus 4:4). A di fu tu sani di yu musu du na fu denki dipi fu den sani di yu e leisi. Te yu e prakseri den tru tori di abi fu du nanga Gado, nanga den fasi fu en, nanga a wani fu en, èn nanga den sani di a abi na prakseri, dan dati sa meki yu kisi moro warderi gi Bijbel (Psalm 143:5). Èn a moro prenspari sani di yu musu du, na fu fiti den bun rai fu Bijbel na ini yu aladei libi.—Lukas 11:28; Yohanes 13:17.

Sortu wini yu sa kisi te yu e kon lobi den sani di Bijbel e taki? „Koloku fu den sma di e hori densrefi na den frumane fu [Gado]”, na so Psalm 119:2 e taki. Den frumane di wi e feni na ini Bijbel sa yepi yu fu kon sabi san fu du te yu e kisi problema na ini yu libi (Psalm 1:1-3). Yu sa kisi koni, yu sa kisi a koni fu man si sani krin, èn yu sa kon frustan sani moro bun, èn den sani dati sa yepi yu fu ’hori yu futu fu no waka na tapu nowan enkri takru pasi’ (Psalm 119:98-101). Te yu sabi den tru tori di abi fu du nanga Gado èn nanga den sani di a abi na prakseri gi grontapu, dan dati sa gi yu wan moro bun marki na ini yu libi, èn yu sa abi wan moi howpu gi a ten di e kon.—Yesaya 45:18; Yohanes 17:3; Openbaring 21:3, 4.

Yehovah Kotoigi wani yepi trawan trutru fu kon sabi Bijbel moro bun èn fu kon lobi a boskopu na ini. Wi e howpu trutru taki yu sa teki a kari di skrifi na ondrosei.