A Wortu fu Yehovah de libilibi

Edepenti fu a buku Odo

KOWNU SALOMO fu owruten Israel „ben kan taki dri dusun odo” (1 Kownu 4:32). Wi kan kon sabi den koni odo disi? Iya, a Bijbel buku Odo di kaba skrifi na ini 717 b.G.T., abi furu fu den odo fu Salomo na ini. Soso den lasti tu kapitel na kapitel di tra skrifiman skrifi, namku Agur, a manpikin fu Yake, nanga Lemuel, a kownu. Ma son sma e bribi taki Lemuel na wan tra nen gi Salomo.

Den wortu na ini a buku Odo di skrifi nanga yepi fu santa yeye, abi tu marki, namku ’fu meki sma kon koni, èn fu gi den leri’ (Odo 1:2). Den odo disi e yepi wi fu kon kisi koni, iya, dati wani taki dati wi sa man si sani krin èn wi sa sabi fa fu lusu problema. Nanga yepi fu den odo disi wi e kisi trangaleri tu, di e sori wi fa fu tyari wisrefi na wan fasi di fiti. Te wi e poti prakseri na den odo disi èn te wi e teki a rai di den e gi wi, dan dati kan abi krakti tapu wi ati, wi sa de moro koloku, èn sani sa waka bun gi wi.—Hebrewsma 4:12.

’KON KISI KONI ÈN GRABU TRANGALERI HORI’

(Odo 1:1–9:18)

„A tru koni e tan bari tranga na tapu strati srefi”, na so Salomo e taki (Odo 1:20). Fu san ede wi musu arki a tranga sten fu Odo di de krin fu yere? Kapitel 2 e tyari kon na krin sortu wini wi kan kisi te wi kon kisi koni. Kapitel 3 e sori fa wi kan kon abi wan tranga banti nanga Yehovah. Baka dati, Salomo e taki: „Koni na a moro prenspari sani. Kon kisi koni; èn awansi san yu e kisi, kon kisi frustan. Grabu trangaleri hori; no lusu en.”—Odo 4:7, 13.

San sa yepi wi fu no de leki grontapusma di e tyari densrefi na wan fasi di no fiti? A di fu feifi kapitel fu Odo e taki: Gebroiki yu frustan, èn kon si fa grontapu e kori sma. Poti prakseri tu na den takru bakapisi di wi sa kisi te wi e tyari wisrefi na wan fasi di no fiti. A kapitel baka dati, e warskow wi fu no du sani èn fu no abi denki di sa pori a banti di wi abi nanga Yehovah. A di fu 7 kapitel e leri wi prenspari sani, fu di a e sori wi fa wan sma di e tyari ensrefi na wan fasi di no fiti, e handri. Kapitel 8 e sori wi na wan tumusi moi fasi o prenspari koni de èn fa koni e begi wi fu arki en. A di fu 9 kapitel, na wan tumusi moi agersitori di e gi wi a deki-ati fu kon kisi koni. A kapitel disi di e naki wi ati, e taki syatu fu den moro prenspari sani di kon na krin na ini den kapitel na fesi.

 Piki tapu den aksi fu Bijbel:

1:7; 9:10—Fa a frede gi Yehovah na „a bigin fu sabi” èn „a bigin fu koni”? Te wan sma no abi frede gi Yehovah, dan a no kan abi sabi, fu di Yehovah na a Mekiman fu ala sani èn en na a Skrifiman fu Bijbel (Romesma 1:20; 2 Timoteyus 3:16, 17). En na a Sma fu pe ala tru sabi komoto. Fu dati ede, wan sma musu abi frede gi Yehovah, fosi a kan abi sabi. Wan sma musu abi frede gi Gado tu, fosi a kan de wan koni sma, bika wan sma di no abi sabi no kan de wan koni sma. Boiti dati, wan sma di no abi frede gi Yehovah no sa gebroiki a sabi di a abi, fu gi grani na a Mekiman.

5:3—Fu san ede Bijbel e kari wan huru-uma, „wan freimde uma”? Odo 2:16, 17 e taki dati wan „freimde uma” na wan sma „di frigiti a frubontu fu en Gado”. Iniwan sma di ben e anbegi falsi gado, noso di ben e trangayesi a Wet di Gado ben gi Moses, ben de wan freimde sma, èn dati ben abi fu du tu nanga wan huru-uma.—Yeremia 2:25; 3:13.

7:1, 2—Nanga sortu sani „mi wortu” èn „den komando fu mi”, abi fu du? Boiti taki den sani disi abi fu du nanga den leri fu Bijbel, den abi fu du tu nanga den markitiki di papa nanga mama e poti na ini wan osofamiri so taki sani kan waka bun gi den memre fu na osofamiri. Yonguwan musu hori densrefi na den markitiki disi èn sosrefi na den leri fu Bijbel di a papa nanga mama fu den e gi den.

8:30—Suma na a „tumusi bun wrokoman”? A sma di e prenki koni e kari ensrefi wan tumusi bun wrokoman. Aladi a skrifiman e taki fu a sma disi fu tyari kon na krin sortu fasi koni abi, toku san moro prenspari, na taki a sma disi na a fosi gebore Manpikin fu Gado, namku Yesus Krestes, bifo a ben tron wan libisma. Langa ten bifo a ben gebore leki libisma na grontapu, Gado ’ben meki en leki a bigin fu ala sani’ (Odo 8:22). Leki „wan tumusi bun wrokoman”, a ben e wroko fayafaya makandra nanga en Tata na a ten di den ben e meki ala tra sani.—Kolosesma 1:15-17.

9:17—San na „fufuru watra”, èn fu san ede a „switi”? Bijbel e agersi a prisiri di trowpatna e kisi te den abi seks demakandra, nanga a dringi di sma e dringi watra fu wan peti. Fu dati ede, te Bijbel e taki fu fufuru watra, dan disi wani taki dati wan sma e du hurudu na wan kibri fasi (Odo 5:15-17). Fu di a sani disi e gi sma a denki taki trawan no sabi fu a tori, meki a gersi leki a watra disi switi.

Sani di wi kan leri:

1:10-14. Wi musu luku bun nanga sma di e pramisi wi gudu soso fu kori wi fu du sondu neleki den.

3:3. Wi musu si en leki wan prenspari sani fu abi bun-ati èn fu de getrow, èn wi musu sori sma krin taki wi abi den fasi disi, neleki te wi no ben o syen fu sori sma wan bun diri keti di wi e weri na wi neki. A de fanowdu tu taki den fasi disi skrifi na tapu wi ati, so taki den e tron wan prenspari pisi fu wi.

4:18. Safrisafri tru anbegiman e kon sabi a tru anbegi moro bun. Fu man tan na ini a leti dati, wi musu tan sori sakafasi nanga safri-ati fasi.

5:8. Wi musu abi noti fu du nanga nowan enkri sani di kan meki taki wi tyari wisrefi na wan fasi di no fiti, awansi dati na poku, prisiriten, Internet, noso buku nanga tijdschrift.

5:21. Wan sma di lobi Yehovah no sa pori a bun banti di a abi nanga a tru Gado, soso fu abi prisiri fu wan syatu pisi ten, a no so? Kwetikweti! A moro prenspari reide fu san ede wi no e du hurudu, na fu di wi sabi taki Yehovah e si san wi e du èn taki a sa aksi frantwortu fu wi.

6:1-5. Den vers disi e gi wi bun rai fu no ’tron borgu’ gi trawan, èn fu no du bisnis na wan fasi di sa tyari problema kon, soso fu di wi wani du trawan wan bun! Efu wi e ondrosuku sani moro bun èn wi e kon si taki wi teki wan don bosroiti, dan wi no musu draidrai fu ’tan begi a sma nomonomo’ fu puru wi na ini a problema disi.

6:16-19. Pikinmoro ibri sortu ogri di sma e du, abi fu du nanga den seibi sani disi di kari na ini den vers. Wi musu tegu gi den sani disi.

 6:20-24. Te wan sma kweki nanga a leri fu Bijbel, dan dati kan yepi en fu no fadon na ini wan trapu fu du hurudu. Papa nanga mama no musu draidrai fu gi den pikin fu den a leri disi.

7:4. Wi musu kon lobi koni nanga a koni fu man si sani krin.

DIFRENTI ODO DI E GI WI LERI

(Odo 10:1–29:27)

Den tra odo fu Salomo syatu, ma ibriwan fu den e leri wi wan sani. Salomo e taki moro furu fu sani di de kontrari fu makandra, fu sani di e kruderi nanga makandra, èn a e agersi a wan sani nanga a trawan. Den odo disi e sori wi krin fa wi musu tyari wisrefi, fa wi musu taki, èn sortu denki wi musu abi.

Kapitel 10 te go miti 24 e sori krin o prenspari a de fu abi frede gi Yehovah. Den odo na ini kapitel 25 te go miti 29, na odo di „den man fu Heskia, a kownu fu Yuda”, skrifi abra (Odo 25:1). Den odo disi e leri wi fu poti wi frutrow tapu Yehovah, èn den e leri wi tra prenspari sani tu.

Piki tapu den aksi fu Bijbel:

10:6—Fa „a mofo fu den ogrisma e kibri ogridu”? Kande disi abi fu du nanga den moi sani di wan ogri sma e taki soso fu di a no wani sma sabi sortu ogri a e prakseri fu du nanga trawan. Noso a kan de so taki den ogrisma e tan tiri fu di sma no lobi den èn fu di sma no e handri na wan switi fasi nanga den.

10:10—Fa „a sma di e pingi en ai” e meki trawan sari? Boiti taki „wan man di no warti noti” kan „taki bedrigi sani”, a kan meki sani tu nanga en anu èn nanga en skin, noso a kan „pingi en ai”, so taki sma no e kon sabi san a abi na prakseri fu du (Odo 6:12, 13). Te a e bedrigi sma na a fasi disi, dan dati kan meki trawan sari srefisrefi.

10:29—San na „a pasi fu Yehovah”? Den wortu disi no abi fu du nanga a fasi fa wi musu libi, ma a abi fu du nanga a fasi fa Yehovah e handri nanga libisma. A fasi fa Gado e handri nanga libisma e sori taki den wan di no du ogri kan abi a dyaranti taki sani sa waka bun gi den, ma den ogriwan sa kisi pori.

11:31—Fu san ede na ogriwan e kisi moro pai leki a regtfardikiwan? A pai disi abi fu du nanga a strafu di ibriwan fu den e kisi. Te a regtfardikiwan meki wan fowtu, dan a pai di a e kisi, na trangaleri. Na ogrisma e sondu fu espresi èn a e weigri fu kenki den fasi fu en. Fu dati ede, a e frudini fu kisi hebi strafu, èn na dati a e kisi tu.

12:23—Fa wan sma ’e kibri sabi’? Te wan sma e kibri sabi, dan dati no wani taki dati a no e sori taki a abi sabi. Na presi fu dati, a sma disi no e meki bigi te a e sori taki a abi sabi.

14:17–San den wortu ’sma abi bita-ati gi a man di abi frustan’ wani taki kande? Den Hebrew wortu di vertaal leki „abi frustan” kande wani taki a koni fu man si sani krin, noso a prakseri di wan sma abi fu du ogri. A no de fu taki dati sma abi bita-ati gi wan sma di e prakseri fu du ogri. Ma sma abi bita-ati tu gi wan sma di e gebroiki en frustan èn di bosroiti fu „no de wan pisi fu grontapu”.—Yohanes 15:19.

18:19—Fa ’wan brada di wan sma du wan ogri nanga en, de moro muilek fu wini leki wan tranga toren’? Neleki fa den sma na ini wan tranga foto no e gi abra te sma lontu a foto dati, na so wan sma di wan trawan du ogri nanga en, kan weigri fu gi a sma dati pardon. A trobi di a abi nanga a sma di du en wan ogri, no kan lusu, neleki fa sma no man puru ’a postu di e sroto a doro fu wan toren pe sma e tan na ini’.

 Sani di wi kan leri:

10:11-14. Efu wi wani gi sma deki-ati nanga den sani di wi e taki, dan wi musu teki soifri sabi, wi musu wani sori lobi gi trawan, èn wi musu taki nanga koni.

10:19; 12:18; 13:3; 15:28; 17:28. Wi musu denki fosi wi e taki, èn wi no musu taki tumusi furu.

11:1; 16:11; 20:10, 23. Yehovah no wani taki wi bedrigi trawan te wi e du bisnis.

11:4. A de wan don sani fu feti fu kon gudu, aladi wi no e teki ten fu studeri Bijbel, fu go na den konmakandra, fu begi, èn fu teki prati na a preikiwroko.

13:4. A no nofo fu „wani” kisi frantwortu na ini a gemeente, noso fu „wani” kisi libi na ini a nyun grontapu. Wi musu wroko fayafaya tu èn wi musu meki tranga muiti fu doro den markitiki.

13:24; 29:15, 21. Wan papa noso mama di lobi en pikin, no e pori en èn a no e tapu en ai gi den fowtu fu a pikin. Na presi fu dati, a e piri-ai gi a pikin so taki den sani dati no e kon tron wan gwenti gi a pikin.

14:10. Fu di wi no man taki soifri ala ten san de tapu wi ati, èn fu di sma no e frustan ala ten fa wi e firi, meki den no sa man trowstu wi ala ten. Son leisi na Yehovah wawan kan yepi wi nanga den problema fu wi.

15:7. Neleki fa wan gronman no e sai ala en siri na wan presi, na so wi no musu de gaw fu fruteri sma ala san wi sabi. Wan koni sma e meki trawan kon sabi sani safrisafri te dati de fanowdu.

15:15; 18:14. Te wi e tan abi wan bun denki fu sani, dan dati sa yepi wi fu de nanga prisiri, srefi te wi de na ini muilek situwâsi.

17:24. Tra fasi leki „a don sma” di e luku èn e prakseri ala sortu sani na presi fu poti prakseri na prenspari afersi, wi musu suku fu kon frustan sani so taki wi kan handri nanga koni.

23:6-8. Te wi e kari sma kon na wi oso, dan wi musu du dati nanga wi heri ati.

27:21. Te sma e prèise wi, dan dati kan tyari kon na krin fa wi de trutru. Wi sa sori taki wi abi sakafasi te a prèise di wi e kisi e meki wi kon si taki wi musu de Yehovah tangi, èn te a prèise e gi wi deki-ati fu tan dini en. Wi sa sori taki wi no abi sakafasi, te a prèise di wi e kisi e gi wi a firi taki wi bun moro trawan.

27:23-27. Den odo disi di e taki fu wan boitipresi, e tyari kon na krin o prenspari a de fu wroko tranga èn fu de tevrede nanga wan libi sondro tumusi furu pranpran. A sani di de moro prenspari na taki den odo disi musu meki wi kon frustan krin taki wi musu poti wi frutrow tapu Gado. *

28:5. Te wi e begi Yehovah èn te wi e studeri en Wortu, dan na so fasi wi e ’suku En’, èn dati sa yepi wi fu „frustan ala sani” di wi musu du fu man dini en na a fasi di a feni bun.

’TUMUSI PRENSPARI BOSKOPU’

(Odo 30:1–31:31)

Na a kaba fu a Bijbel buku Odo yu abi tu ’tumusi prenspari boskopu’ (Odo 30:1; 31:1). A boskopu fu Agur e agersi difrenti sani nanga makandra fu poti wi na prakseri broki. Nanga yepi fu wan agersitori a boskopu e sori taki sma di gridi noiti no abi nofo, èn a e sori tu taki a fasi fa wan man e kori wan yonguwenke e dangra sma trutru. * A boskopu e warskow wi tu fu no meki bigi èn fu no taigi trawan hati sani.

A tumusi prenspari boskopu di Lemuel kisi fu en mama, e gi wi bun rai te a abi fu du nanga win èn nanga sopi, èn a e sori wi tu taki wi musu krutu sani na wan reti fasi. A lasti vers fu a kapitel di e taki fu wan bun wefi, e taki: „Gi en fu den froktu fu en anu, èn meki den wroko fu en prèise en.”—Odo 31:31.

Kon kisi koni, teki trangaleri, kon abi frede gi Gado, èn frutrow tapu Yehovah. Den odo di skrifi nanga yepi fu santa yeye, e leri wi tumusi prenspari sani! Iya, meki wi teki a rai di den odo disi e gi wi, dan wi sa de koloku neleki „a man di abi frede gi Yehovah”.—Psalm 112:1.

[Futuwortu]

[Prenki na tapu bladzijde 16]

Yehovah na a Sma fu pe ala tru sabi komoto

[Prenki na tapu bladzijde 18]

San a wani taki fu ’panya sabi’?