Ondrofenitori

Te fu kaba wi osofamiri kon de wán na ini a tru anbegi!

SOLEKI FA SUMIKO HIRANO FRUTERI

Mi ben kon sabi san na a moro bun fasi fu libi, èn mi ben wani mi masra teki a fasi fu libi dati tu. A ben o teki fotenti na tu yari fosi a sani dati pasa.

MI NANGA mi masra trow na ini 1951, di mi ben abi 21 yari. Fo yari baka dati wi ben abi tu manpikin, èn a ben gersi leki ala sani ben e waka bun na ini mi libi.

Wan dei na ini 1957, mi bigi sisa taigi mi taki wan zendeling fu Yehovah Kotoigi ben e kon na en. Aladi mi sisa ben abi a Buda bribi, toku a bigin studeri Bijbel nanga a zendeling, èn a gi mi deki-ati fu studeri Bijbel tu. Mi ben feni dati bun. Mi ben e go na wan Protestant kerki, èn mi ben o man sori den Kotoigi fu Yehovah sortu kruktu bribi den ben abi. We, na so mi ben e denki.

Heri esi mi kon si taki mi no ben sabi furu fu Bijbel. Mi ben musu aksi a zendeling: „Suma na Yehovah?” Noiti mi ben yere a nen dati na ini a kerki fu mi. A zendeling, Daphne Cooke (bakaten a trow Pettitt), sori mi Yesaya 42:8, di e taki krin taki Yehovah na a nen fu na Almakti Gado. Daphne piki ala den aksi fu mi nanga yepi fu Bijbel.

Mi poti den srefi aksi disi gi a domri fu mi. A taigi mi: „A no bun fu poti aksi. Yu musu bribi nomo san yu e leri.” Aladi mi no ben e agri nanga a sani dati, toku mi tan go na a kerki siksi mun langa. Mi ben e du dati ibri sonde mamanten, èn te bakadina mi ben e go na den konmakandra fu den Kotoigi fu Yehovah.

A krakti di a sani disi ben abi tapu a trowlibi fu mi

Den sani di mi ben e leri fu Bijbel ben naki mi ati trutru, èn mi fruteri mi masra, Kazuhiko, den  sani dati. Ibri leisi te mi ben e studeri Bijbel èn te mi ben e go na den konmakandra, mi ben e fruteri en san mi leri. A sani dati meki taki mi nanga en no ben man feni en so bun moro nanga makandra. A no ben wani mi tron wan Kotoigi, ma mi ben lobi fu studeri Bijbel so te, taki mi tan studeri nanga den Kotoigi, èn mi tan abi demakandra nanga den.

Fosi mi ben e komoto na oso fu go na den konmakandra te neti, mi ben e bori nyanyan di Kazuhiko ben lobi, ma a bigin go nyan na restaurant. Te mi ben kon na oso baka den konmakandra, dan a ben e atibron, èn a no ben wani taki nanga mi. Baka tu noso dri dei, a no ben e atibron so moro, ma dan a ten ben doro baka taki mi ben musu go na a tra konmakandra.

Na a ten disi, mi kisi tuberculosis, wan siki di ben kiri wan tu sma kaba na ini mi masra en famiri. Kazuhiko ben e broko en ede trutru nanga a sani disi, èn a taigi mi taki mi ben kan du iniwan sani di mi ben wani efu mi kon betre baka. A wan-enkri sani di mi aksi en, na fu libi mi meki mi go na den konmakandra ibri wiki. A ben feni dati bun.

A ben teki siksi mun fosi mi kon betre, èn na ini a pisi ten dati mi studeri Bijbel finifini. Mi suku fu feni fowtu na ini den leri fu den Kotoigi, èn mi ben abi na prakseri fu tapu nanga a studie fu mi efu mi ben feni wán fowtu nomo. Mi no ben man feni nowan enkri fowtu. Na presi fu dati, mi kon si moro krin sortu fowtu ben de na ini den leri fu a Protestant Kerki. Mi kon leri sabi Yehovah leki wan Gado di abi lobi nanga retidu, èn mi kon si sortu wini a ben abi fu libi akruderi den wet fu en.

Baka di mi kon betre, dan mi masra hori ensrefi na en pramisi, èn a no gens mi te mi ben wani go na den konmakandra. Mi tan go na fesi na yeye fasi, èn na ini mei 1958, mi teki dopu leki wan Kotoigi fu Yehovah. Mi ben e winsi taki mi osofamiri ben kan anbegi a tru Gado makandra nanga mi.

Mi e yepi den pikin fu mi fu kon leri sabi Gado

Ala ten den boi fu mi ben de nanga mi na den konmakandra èn na ini a preikiwroko, ma wan tu sani pasa di meki mi kon frustan taki den ben e leri furu sani fu Bijbel. Wan dei, Masahiko, mi boi fu siksi yari, ben e prei na dorosei. Mi yere wan babari, èn wan sma bari bun tranga. Wan birti sma lon kon na ini mi oso, èn a bari taki wan oto naki a boi fu mi. Mi ben denki taki a dede. Mi lon go na dorosei, èn mi dwengi misrefi fu no bruya. Di mi si taki a baisigri fu en ben fowfow na ala sei, dan mi bigin beifi. Ma baka dati mi si a e waka kon na mi, èn a no ben abi nowan enkri bigi mankeri. A ben e hori mi steifi di a taki: „Mama, Yehovah yepi mi, a no so?” Mi bigin krei di mi si taki a ben de na libi èn di mi yere den moi wortu dati.

Wan tra dei, di wi ben de na ini a preikiwroko, wi miti wan owru man. A man disi bari gi wi: „Fu san ede yu e dwengi so wan yongu pikin fu go preiki makandra nanga yu? Mi e firi sari gi en.” Fosi mi ben kan piki en, Tomoyoshi di ben abi aiti yari, taki: „Owpa, mi mama no e dwengi mi fu preiki. Mi e preiki fu di mi wani dini Yehovah.” Na owru man luku wi nomo, èn a no ben man taki noti.

Den boi fu mi no ben abi wan papa di ben e  yepi den na yeye fasi. Na mi ben musu meki den kon sabi den tru tori fu Bijbel, aladi misrefi ben musu leri furu sani. Mi sorgu taki mi kon kisi moro lobi èn moro faya gi Yehovah, èn mi sorgu sosrefi taki mi kisi wan moro tranga bribi na ini en. Na so mi pruberi fu de wan bun eksempre gi den pikin fu mi. Ala dei mi ben e taki Yehovah tangi, so taki den pikin fu mi ben kan yere dati. Mi ben e fruteri den fu den sani di mi ben e ondrofeni na ini a preikiwroko. A sani disi gi den deki-ati. Bakaten, te sma ben e aksi fu san ede den tron pionier noso dinari na ini a furuten diniwroko fu Yehovah Kotoigi, dan den ben e piki: „Wi si fa wi mama ben de koloku di a ben e dini leki pionier, èn wi ben wani de koloku tu.”

Mi ben e luku bun taki mi no ben e taki nowan takru sani fu a papa fu den, noso fu sma na ini a gemeente. Mi kon si taki te mi ben o taki takru fu sma, dan dati no ben o abi bun krakti tapu den pikin fu mi. Kande den ben o lasi lespeki gi den sma dati, èn gi mi sosrefi.

Mi e meki muiti fu go na fesi, aladi dati no makriki

Na ini 1963, wi ben musu froisi go na Taiwan fu di mi masra ben musu go wroko drape. A taigi mi taki efu mi ben o preiki gi den Yapansma di ben e libi drape, dan dati ben o tyari problema kon. Den ben o seni wi go baka na Yapan, èn dati no ben o bun gi a bedrijf pe a ben e wroko. A no ben wani wi fu abi demakandra moro nanga den Kotoigi.

Na ini Taiwan, ala den konmakandra ben e hori na ini Sneisitongo, èn den Kotoigi drape gi wi wan switikon. Mi bosroiti fu leri Sneisitongo, so taki mi ben kan gi kotoigi na den sma drape, na presi fu gi kotoigi na den sma fu Yapan. Na so fasi, mi ben kan wai pasi gi den problema di ben o kon, soleki fa mi masra ben feni.

A banti di wi ben abi nanga den Kotoigi na ini Taiwan gi wi deki-ati. Wan zendeling trowpaar, Harvey nanga Kathy Logan, ben de wan bigi yepi gi wi. Brada Logan tron wan papa na yeye fasi gi den boi fu mi. A sori den taki a dini di wi e dini Yehovah, no wani taki dati wi musu libi wan soi libi pe wi musu hori wisrefi na wan lo wet. Mi de seiker taki na ini Taiwan den boi fu mi teki a bosroiti fu dini Yehovah.

Tomoyoshi nanga Masahiko go na wan Amerkan skoro, pe den leri Ingrisitongo nanga Sneisitongo. A leri dati sreka den fu dini leki dinari fu a tru Gado, Yehovah, bakaten. Mi de nanga tangi trutru taki Yehovah meki wi kisi wan lo blesi na ini a pisi ten di wi ben de na ini Taiwan, na presi taki wi kisi wan lo problema. Baka di wi ben prisiri fu tan dri nanga afu yari na ini Taiwan, wi drai go baka na Yapan.

Den boi ben de tini now, èn moro nanga moro den ben wani teki den eigi bosroiti. Mi gebroiki furu yuru fu taki-go-taki-kon nanga den fu den gronprakseri fu Bijbel, èn Yehovah yepi  den fu pasa a muilek ten dati. Di Tomoyoshi gowe libi middelbaar skoro, dan a bigin pionier. Na ini den bigin yari, a ben man yepi fo sma fu gi densrefi abra na Gado èn fu teki dopu. Masahiko teki na eksempre fu en brada, èn a bigin pionier wantewante baka di a klari skoro. Na ini den fosi fo yari di a ben e pionier, a yepi fo yongusma fu tron Kotoigi.

Baka dati Yehovah blesi den boi moro srefi. Tomoyoshi studeri nanga a masra fu wan uma di mi ben yepi fu kon sabi a waarheid fu Bijbel. Den tu yongu umapikin fu den tron Kotoigi tu. Bakaten Tomoyoshi trow nanga Nobuku, a moro owruwan fu den umapikin disi, èn Masahiko trow nanga Masako, a moro yonguwan. Tomoyoshi nanga Nobuko e dini now na a edekantoro fu Yehovah Kotoigi na ini Brooklyn, New York. Masahiko nanga Masako na zendeling na ini Paraguay.

Mi masra e kenki safrisafri

Aladi a ben gersi leki mi masra no ben wani sabi noti fu a bribi fu wi, toku wi kon si taki a ben e kenki safrisafri na ini den yari dati. Te tra sma ben e taki takru fu mi, dan a ben e opo taki gi a bribi fu mi, èn fu taki en leti, a ben e horibaka gi a waarheid fu Bijbel sondro taki a ben sabi dati. A yepi Kotoigi di ben de na nowtu. Na a trowfesa fu wan fu den boi fu wi, a ben hori wan syatu taki fu taigi den sma tangi, èn a ben taki: „A wroko di unu e du fu leri sma san na a yoisti fasi fu libi, na a moro moi wroko di de, èn a de sosrefi a moro muilek wroko. Den manpikin fu mi nanga den wefi fu den bosroiti fu teki a hebi wroko disi na den tapu. Mi e begi unu, yepi den.” Den sortu sani disi ben e gi mi na overtoigi taki wan dei a ben o dini Yehovah makandra nanga wi.

Mi seti sani so taki tra Kotoigi ben e kon na wi oso fu abi demakandra nanga wi. Mi ben e gi Kazuhiko wan kari fu kon na den Kresten konmakandra, na bigi konmakandra, èn sosrefi na a Memrefesa fu Krestes en dede. Te a no ben abi fu wroko, dan a ben e kon na den konmakandra disi, ma yu ben kan si taki a no ben wani de drape trutru. Furu tron mi ben denki taki kande a ben o teki wan bijbelstudie, èn fu dati ede mi aksi Kresten owruman fu kon na wi oso. Ma a no ben wani studeri Bijbel. Mi ben aksi misrefi fu san ede a no ben wani du dati.

Mi ben e memre den wortu fu na apostel Petrus: „Un uma, na so un musu saka unsrefi tu na ondro un eigi masra, so taki te sonwan fu den no e du san a wortu e taki, dan unu kan wini den sondro wortu nanga yepi fu a fasi fa unu e tyari unsrefi, bika den si nanga den eigi ai fa unu e tyari unsrefi na wan krin fasi èn nanga bigi lespeki” (1 Petrus 3:1, 2). Mi kon frustan taki mi no ben handri akruderi a rai dati ala ten. Mi ben musu tyari misrefi moro leki wan Kresten, so taki mi ben kan de wan bun eksempre gi mi masra.

Na ini 1970, mi bigin pionier fu di mi ben wani tron wan moro bun Kresten. Tin yari pasa, dan 20 yari pasa. Toku mi no ben si taki mi masra ben wani kon sabi moro fu Gado. Wan bijbelstudenti ben taki wan leisi: „A musu fu muilek gi yu fu yepi tra sma aladi yu no man yepi yu eigi masra srefi.” A sani dati meki mi firi brokosaka, ma mi no lasi howpu.

Na ini den yari krosibei fu 1990, den papa nanga mama fu wi ben e kon swaki moro nanga moro. A ben hebi srefisrefi gi mi fu sorgu gi den èn fu du den tra frantwortu fu mi na a srefi ten. A sani dati ben e gi mi furu broko-ede. Furu yari langa den no ben feni en bun taki mi ben e bribi na ini Yehovah, ma mi du ala san mi man fu sori den taki mi lobi den. Syatu fosi mi mama di ben abi 96 yari, dede, a taigi mi, „Sumiko, efu mi kisi wan opobaka, dan mi sa teki a bribi fu yu.” Mi kon si taki mi no ben meki muiti fu soso.

Mi masra ben si ala san mi ben du gi den papa nanga a mama fu wi. Fu sori mi taki a ben de nanga tangi gi san mi ben du, a bigin kon na den konmakandra doronomo. A du dati furu yari langa, ma a no ben e go na fesi na yeye fasi. Mi tan pruberi fu du sani fu plisi en. Mi kari den mati fu en fu kon nyan na wi oso, iya, mi kari srefi den bisnis mati fu en fu tra kondre. Mi ben e abi prisiriten makandra nanga en. Di den yuru di wan pionier ben kan wroko na ini a preikiwroko, ben saka kon tron 70 yuru wan mun, dan mi teki moro ten fu de nanga en.

 Wan kenki kon di mi masra go nanga pensyun

Mi masra go nanga pensyun na ini 1993. Mi ben denki taki a ben o abi ten now fu studeri Bijbel. Ma a taki dati efu a ben o anbegi Gado soso fu di a ben abi ten fu du dati, dan a no ben o sori lespeki gi Gado. Na presi fu dati, a taki dati a ben o anbegi Gado te a ben e firi fu du dati, èn taki mi no ben musu dwengi en.

Wan dei Kazuhiko aksi mi efu mi ben kan libi soso gi en, now di wi ben kon owru. A sani dati hati mi, bika sensi a dei di mi trow nanga en, mi ben e du ala muiti fu gi en san a wani. Mi ben du ala muiti fu meki a de koloku, ma a ben feni taki mi ben abi moro ten gi Yehovah leki gi en. Baka di mi denki a sani dati wan pisi ten, dan mi taigi en taki mi no ben o man du moro gi en leki san mi ben e du kaba. Ma efu a ben o dini Yehovah makandra nanga mi, dan wi ben kan bigin wan moi nyun libi makandra, èn a libi dati no ben o de fu ete wan tu yari nomo, ma fu têgo. Furu dei langa mi masra no piki mi. Te fu kaba a aksi mi: „Yu wani studeri Bijbel nanga mi dan?” Ibri leisi te mi e prakseri den wortu dati, mi ati e prisiri.

Mi sreka sani so taki wan Kresten owruman ben kan studeri nanga mi masra, ma mi masra taigi mi: „Mi no wani studeri Bijbel nanga nowan enkri tra sma boiti yu.” Sobun wi bigin studeri Bijbel ibri dei. Fu di mi de na ini wan Sneisi gemeente, èn fu di mi masra e taki a tongo dati bun, meki wi studeri Bijbel na ini Sneisitongo. Wi leisi a heri Bijbel makandra tu na ini pikinmoro wán yari.

Na ini a ten dati, wan owruman fu wan Sneisi gemeente èn sosrefi a wefi fu en, ben e meki muiti fu kon leri sabi mi nanga mi masra moro bun. Aladi den sma disi yongu moro leki den pikin fu wi, toku den tron bun mati fu wi. Furu tra Kotoigi meki muiti tu fu kon leri sabi mi masra. Den kari wi kon na den oso, èn den ben e taki nanga Kazuhiko neleki a ben de den papa. A sani dati gi en furu prisiri.

Wan dei wi kisi wan karta fu go na wan trowfesa fu sma na ini a gemeente. A nen fu mi masra ben skrifi na tapu a karta. A naki en ati trutru fu si taki sma ben e lespeki en leki edeman fu na osofamiri, èn a bosroiti fu go na a trowfesa dati. Heri esi, a bigin sori switifasi gi den Kotoigi, èn a bigin studeri Bijbel nanga wan Kresten owruman. A ben e go na fesi na yeye fasi, fu di a ben e studeri Bijbel, a ben e go na den konmakandra, èn a ben lobi a gemeente.

Te fu kaba mi osofamiri kon de wán na ini a bribi

Na ini december 2000, mi masra teki dopu fu sori taki a ben gi ensrefi abra na Yehovah. Den manpikin fu mi nanga den wefi fu den komoto fu farawe fu si a wondru disi. Fotenti na tu yari ben pasa, ma te fu kaba wi osofamiri kon de na wán na ini a tru anbegi.

Now mi nanga mi masra e taki fu a deitekst ibri mamanten, èn wi e leisi Bijbel makandra. Ibri dei wi e taki fu yeye afersi èn wi e teki prati makandra na sani di abi fu du nanga na anbegi fu wi. Now mi masra na wan dinari ini a diniwroko na ini a gemeente, èn no so langa pasa a hori wan Bijbel publikitaki na ini Sneisitongo. Mi e taki Yehovah tangi taki a tyari wi kon na wán. Mi e howpu taki, mi nanga ala den famiriman nanga lobiwan fu mi, sa hori a nen fu Yehovah hei èn taki wi sa horibaka gi en leki a Moro Hei Tiriman, fu têgo.

[Karta na tapu bladzijde 13]

(Efu yu wani si pe den sani disi skrifi, luku a tijdschrift)

CHINA

DEMOKRATISCH VOLKSREPUBLIEK KOREA

REPUBLIEK KOREA

Se fu Yapan

YAPAN

Tokio

Owstu China Se

TAIWAN

Taipei

[Prenki na tapu bladzijde 12]

Mi nanga mi osofamiri na ini 1958, a yari di mi teki dopu

[Prenki na tapu bladzijde 13]

Di wi froisi gowe libi Tokio fu go tan na Taipei, dan wi kisi deki-ati fu mati soleki Harvey nanga Kathy Logan

[Prenki na tapu bladzijde 15]

Tide na a dei mi osofamiri de na ini wánfasi na ini a tru anbegi