A gwenti di sma abi fu meki trawan firi leki den no warti

„Ibri sani di ben e pasa na ini a kampu, ben de fu meki sma firi leki den no warti.”—MAGDALENA KUSSEROW REUTER, WAN UMA DI KOMOTO LIBILIBI NA INI WAN NAZI STRAFUMAN KAMPU.

NA A ten fu a di fu Tu Grontapufeti, tumusi ogri sani pasa nanga sma na ini den Nazi strafuman kampu. Ma dati no ben de a fosi leisi taki sma du sani fu meki trawan firi leki den no warti, èn a no ben de a lasti leisi tu taki sma du den sortu sani dati. Te wi e luku a ten di pasa, noso a ten di wi e libi na ini now, dan wán sani de krin: A no tide sma e du sani fu meki trawan firi leki den no warti.

Ma den tumusi ogri sani di sma du nanga trawan na ini a ten di pasa, a no den wan-enkri sani di sma du fu wisiwasi trawan. Furu tron sma e du dati na tra fasi pe yu no e si wantewante taki den e du wan ogri. Prakseri wan pikin di trawan e lafu fu di den feni taki a no moi. Prakseri sosrefi wan trakondre sma di trawan e spotu fu di a abi tra gwenti. Noso prakseri wan sma di trawan e desko fu di a de fu wan tra ras, noso fu wan tra kondre. Den sma di e du so nanga trawan, e si a sani disi leki wan lafutori, ma a no de wan sani fu lafu te yu e si fa sma e sari èn e syen te trawan e spotu den.—Odo 26:18, 19.

San a wani taki te wan sma e firi warti?

Wan buku e taki dati te wan sma e firi warti, dan a e firi taki trawan e lespeki en, èn taki den lobi en. Sobun, a firi disi abi fu du nanga a fasi fa wi e si wisrefi èn sosrefi nanga a fasi fa trawan e handri nanga  wi. Aladi difrenti sani kan meki taki wi e si wisrefi na wan spesrutu fasi, toku a fasi fa trawan e si wi, noso a fasi fa den e handri nanga wi, abi bun furu krakti tu tapu a fasi fa wi e si wisrefi.

Na ini ala libimakandra yu abi pôtiwan nanga swakiwan. Ma a no abi fu de so taki wan sma di pôti noso swaki, no warti. Ma a fasi fa tra sma e si den sortu sma disi, èn a fasi fa den e handri nanga den, kan meki taki den e kon firi leki den no warti. A de wan sari sani taki nofo tron den sma di de na ini muilek situwâsi, na den wan di trawan e kwinsi èn e wisiwasi. Prakseri omeni leisi wi e yere fa sma e meshandri pôtisma, owrusma, noso sikisma fu di den feni taki den sma disi „no warti noti”, taki den „no warti fu kisi sani”, èn taki den „e gi sma syen”!

Fu san ede sma e wisiwasi trawan? Wan ten sa kon pe ala sma sa meki trawan firi taki den warti? Na artikel di e kon now, sa gi wi a yoisti piki nanga yepi fu Gado Wortu, Bijbel.