Yehovah e frulusu a sma di e pina
Yehovah e frulusu a sma di e pina
„Den rampu fu a regtfardikiwan furu, ma Yehovah e frulusu en fu den alamala.”—PSALM 34:19.
1, 2. Sortu problema wan getrow Kresten ben abi, èn fu san ede a sani dati kan pasa nanga wi tu?
KEIKO * na wan yongu uma di de wan Kotoigi fu Yehovah moro leki 20 yari kaba. Wan pisi ten a ben e dini leki wan gewoon pionier, noso wan furuten Kownukondre preikiman. A ben lobi a diniwroko fu en trutru. Ma no so langa pasa, Keiko bigin firi sari, èn a ben e firi leki a de en wawan. „Na soso krei mi ben man krei”, na so a e taki. Keiko bigin gebroiki moro ten fu studeri, fu di a no ben wani firi brokosaka moro. „Toku mi no ben man kenki a fasi fa mi ben e denki”, na so a e taki. „Mi ben e firi brokosaka so te taki mi ben wani dede.”
2 Yu e firi brokosaka tu? Leki wan Kotoigi fu Yehovah, yu abi bun furu reide fu prisiri, bika wan sma di e dini Gado getrow ’sa kisi wan pramisi di abi fu du nanga a libi di a e libi now, èn sosrefi nanga a libi di a o kisi na ini a ten di e kon’ (1 Timoteyus 4:8). Nownowde yu e libi na ini wan paradijs na yeye fasi! Ma dati wani taki dati nowan problema sa miti yu? Kwetikweti! Bijbel e taki: „Den rampu fu a regtfardikiwan furu” (Psalm 34:19). A sani disi no e fruwondru wi, fu di „heri grontapu de na ini a makti fu na ogriwan”, Satan Didibri (1 Yohanes 5:19). Awansi fa a no fa, wi alamala e ondrofeni den bakapisi fu a sani dati.—Efeisesma 6:12.
San kan pasa te wi e pina?
3. Taki fu wan tu futuboi fu Gado na ini Bijbel, di ben e firi brokosaka srefisrefi.
3 Te wi e pina fu wan langa pisi ten, dan dati kan meki wi firi brokosaka (Odo 15:15). Luku na eksempre fu na opregti man Yob. Na a ten di Yob ben e pina hebi, a ben taki: „Libisma, di wan uma meki, e libi syatu èn a abi furu problema” (Yob 14:1). Yob no ben abi nowan prisiri moro na ini a libi. Wan pisi ten a ben e denki srefi taki Yehovah ben gowe libi en (Yob 29:1-5). Yob no ben de a wan-enkri futuboi fu Gado di ben e pina so hebi. Bijbel e sori taki Hana „ben e sari trutru”, fu di a no ben abi pikin (1 Samuel 1:9-11). Fu di a situwâsi na ini na osofamiri fu Rebeka ben e gi en bigi broko-ede, meki a taki: „Mi kon weri fu a libi fu mi” (Genesis 27:46). Di David ben e prakseri den fowtu di a ben meki, dan a taki: „Heri dei mi waka e firi sari” (Psalm 38:6). Disi na wan tu eksempre nomo di e sori krin taki mansma nanga umasma di ben e dini Gado na ini a ten bifo Krestes, ben e firi brokosaka srefisrefi fu wan pisi ten.
4. Fu san ede wi no musu fruwondru taki son Kresten na ini a ten disi „lasi-ati”?
4 Fa a de nanga Kresten? Na apostel Paulus ben feni en prenspari fu taigi den Tesalonikasma fu „taki na wan fasi di e trowstu den sma di lasi-ati” (1 Tesalonikasma 5:14). Wan buku e taki dati a Griki wortu di vertaal leki „sma di lasi-ati”, kan abi fu du nanga den sma „di e broko den ede wan pisi ten nanga den problema na ini a libi”. Den wortu fu Paulus e sori taki sonwan fu den salfuwan na ini a gemeente dati na ini Tesalonika, ben lasi-ati, noso taki den ben e firi brokosaka. Na ini a ten disi yu abi Kresten tu di lasi-ati. Ma fu san ede den lasi-ati? Meki wi go luku dri sani di nofo tron e meki taki sma e brokosaka.
Kande wi e broko wi ede nanga na onvolmaaktifasi fu wi
5, 6. Sortu trowstu wi kan kisi fu den wortu na ini Romesma 7:22-25?
5 Tra fasi leki ogrisma di „no sabi moro san bun, noso san ogri”, a e hati tru Kresten taki den abi sondu (Efeisesma 4:19). Kande den e firi neleki fa Paulus ben e firi, di a ben skrifi: „Na ini mi ati mi e prisiri trutru nanga a wet fu Gado, ma mi e si taki wan tra wet de na ini mi skin, èn a wet disi e feti nanga a wet fu mi frustan èn a e meki taki mi e tron wan srafu fu sondu di de leki wan wet na ini mi skin.” Ne Paulus taki nanga tranga sten: „Ke, pôti fu mi!”—Romesma 7:22-24.
6 Oiti yu ben firi soleki fa Paulus ben e firi? A no de wan fowtu sani fu sabi krin sortu swakifasi yu abi, fu di dati kan meki yu frustan o seryusu sondu de, èn a kan meki yu kisi wan moro fasti bosroiti fu no du ogri. Ma yu no abi fu sari doronomo fu di yu abi swakifasi. Baka di Paulus taki fu den swakifasi fu en, dan a taki moro fara: „Mi e taki Gado tangi nanga yepi fu wi Masra Yesus Krestes!” (Romesma 7:25) Iya, Paulus ben abi na overtoigi taki a brudu di Yesus trowe, kan frulusu en fu a sondu di a kisi.—Romesma 5:18.
7. San kan yepi wan sma fu no firi brokosaka fu di a abi swakifasi?
7 Efu yu e broko yu ede fu di yu abi swakifasi, dan yu kan feni trowstu na ini den wortu fu na apostel Yohanes. A ben skrifi: „Efu wan sma du wan sondu, dan wi abi wan yepiman na a Tata, dati na Yesus Krestes, wan regtfardiki sma. En na wan ofrandi di e tapu den sondu fu wi èn di e meki wi kon bun baka nanga Gado, ma a no wan ofrandi gi den sondu fu wi wawan, ma sosrefi gi den sondu fu heri grontapu” (1 Yohanes 2:1, 2). Efu yu e firi brokosaka fu di yu abi swakifasi, dan ala ten hori na prakseri taki Yesus no dede gi volmaaktisma, ma gi sondusma. Fu taki en leti, „ala sma sondu èn den no man doro a glori fu Gado”.—Romesma 3:23.
8, 9. Fu san ede wi no musu denki takru fu wisrefi?
8 Ma kon meki wi taki dati yu du wan seryusu sondu na ini a ten di pasa. A no de fu taki dati yu taki nanga Yehovah fu a tori disi na ini begi, èn kande yu du dati furu leisi srefi. Yu kisi yepi na yeye fasi fu den Kresten owruman (Yakobus 5:14, 15). Yu sori taki yu abi berow trutru, èn fu dati ede yu tan wan memre fu a gemeente. Noso kande yu ben gowe libi Gado en organisâsi fu wan pisi ten, ma bakaten yu sori berow èn yu kisi wan bun banti baka nanga Yehovah. Awansi sortu situwâsi yu ben de na ini, a ben kan pasa taki yu e prakseri a sondu di yu ben du, èn dati kan meki yu firi brokosaka. Efu dati e pasa, dan hori na prakseri taki Yehovah e „gi furu pardon” na den wan di abi berow (Yesaya 55:7). Boiti dati, Yehovah no wani yu fu denki taki A no feni yu bun srefisrefi moro. Na Satan wani yu fu abi a denki dati (2 Korentesma 2:7, 10, 11). Didibri sa kisi pori fu di a e frudini dati, ma a wani meki yu denki taki yu e frudini fu kisi pori tu (Openbaring 20:10). No meki Satan kisi yu, bika a wani taki yu lasi bribi (Efeisesma 6:11). Na presi fu dati, yu „musu kakafutu gi en” te a abi fu du nanga a sani disi, neleki fa yu e kakafutu gi en na tra fasi.—1 Petrus 5:9.
9 Na ini Openbaring 12:10, Bijbel e kari Satan „a sma di e taki ogri fu wi brada”, namku fu den salfu Kresten. Satan e „taki lei fu den” na fesi Gado, èn a e du dati „dei nanga neti”. Te yu e prakseri a tekst disi, dan dati kan yepi yu fu si taki Satan, a leiman di e taki ogri fu trawan, o breiti te yu e denki takru fu yusrefi, aladi Yehovah no e si yu na a fasi dati (1 Yohanes 3:19-22). Sobun, te yu meki wan fowtu, dan a no de fanowdu taki yu e tan broko yu ede so te, taki te fu kaba yu e prakseri fu gi abra. No gi pasi taki Satan pori a banti di yu abi nanga Gado. Noiti no meki Didibri kisi yu, so taki yu e frigiti taki Yehovah na wan Gado di ’abi sari-ati nanga switifasi, di no e atibron esi, èn di abi bun-ati pasa marki’.—Exodus 34:6.
Wi kan firi brokosaka te wi no man du so furu moro
10. Sortu sani kan meki taki wi e firi brokosaka fu di wi no man du so furu moro na ini a diniwroko?
10 Son Kresten e firi brokosaka fu di den no man du so furu moro na ini a diniwroko fu Gado. Yu abi a problema dati? Kande yu no man du so furu moro na ini a diniwroko leki fosi, fu di yu abi wan seryusu siki, fu di yu kon owru, noso fu di yu abi tra problema. A no de fu taki dati Kresten e kisi a rai fu gebroiki ibri okasi bun fu du a diniwroko fu Gado (Efeisesma 5:15, 16). Ma san yu kan du te trutru yu no man du so furu moro na ini a diniwroko, èn te a sani disi e meki yu firi brokosaka?
11. Sortu wini wi e kisi fu a rai fu Paulus di skrifi na ini Galasiasma 6:4?
11 Bijbel e taigi wi taki wi no musu lesi, ma taki wi musu „waka baka na eksempre fu den sma di kisi den pramisi fu di den ben abi bribi èn fu di den ben abi pasensi” (Hebrewsma 6:12). Wi kan du disi soso te wi e luku a bun eksempre fu den èn te wi e meki muiti fu kon abi a srefi bribi leki den. Ma wi no sa kisi wini te wi e feni taki trawan bun moro wi, èn te wi e feni taki wi no man du nowan enkri sani bun. Fu dati ede a bun fu teki a rai disi fu Paulus: „Meki ibri sma ondrosuku san na den sani di a e du, dan dati sa meki taki a e prisiri nanga san ensrefi e du, èn no fu di a e teki ensrefi gersi nanga tra sma.”—Galasiasma 6:4.
12. Fu san ede wi kan prisiri nanga a diniwroko di wi e du gi Yehovah?
12 Srefi te Kresten no man du so furu moro fu di den siki seryusu, toku den abi bun reide fu prisiri. Bijbel e gi wi a dyaranti: „Gado no de onregtfardiki taki a sa frigiti den wroko fu unu èn taki a sa frigiti a lobi di unu sori gi a nen fu en” (Hebrewsma 6:10). Kande yu no man yepi taki yu de na ini wan situwâsi di e meki en muilek gi yu fu du so furu leki san yu ben du fosi. Ma Yehovah man yepi yu so taki yu kan feni tra fasi fu du moro na ini a Kresten diniwroko. Iya, kande yu kan gi kotoigi nanga yepi fu telefon noso brifi. Yu kan abi a dyaranti taki Yehovah Gado sa blesi yu fu di yu e du a diniwroko nanga yu heri ati, èn fu di yu e sori lobi gi en èn gi tra sma.—Mateyus 22:36-40.
Den „muilek ten” kan meki wi firi brokosaka
13, 14. (a) Fa den „muilek ten” disi kan meki wi pina? (b) Sortu buweisi e sori taki sma na ini a ten disi no lobi makandra?
13 Aladi wi e fruwakti fu libi na ini a regtfardiki nyun grontapu fu Gado, toku a de so taki nownowde wi e libi na ini ’muilek ten di tranga fu pasa’ (2 Timoteyus 3:1). Wi kan kisi trowstu te wi sabi taki den sari sani di e pasa e sori taki wi sa kisi frulusu heri esi. Ma toku den sani di e pasa na grontapu abi krakti na wi tapu. Fu eksempre, yu abi problema fu feni wroko? Te a no makriki fu feni wan wroko, èn yu e suku wroko wan tu mun langa kaba, dan yu kan bigin aksi yusrefi efu Yehovah e si na ini sortu situwâsi yu de, èn efu a e arki den begi fu yu. A kan de so tu taki sma e desko yu, noso taki den no e handri na wan reti fasi nanga yu. Srefi te yu e leisi koranti, yu kan kon firi neleki fa a regtfardiki man Lot ben e firi. Lot ben e firi brokosaka srefisrefi fu di den sma na ini a ten dati ben e libi wan yayolibi.—2 Petrus 2:7.
14 Ma wi no musu frigiti wán spesrutu sani di abi fu du nanga den lasti dei. Bijbel ben taki na fesi dati furu sma „no sa lobi trawan” (2 Timoteyus 3:3). Na ini furu osofamiri sma no lobi makandra trutru. Iya, „buweisi e sori taki te sma e kiri trawan, te sma e meshandri trawan, te sma e taigi trawan hati sani, noso te sma e dwengi trawan fu abi seks nanga den, dan moro furu dati na sani di e pasa na ini osofamiri”, na so wan buku e taki (Family Violence). „Aladi na osofamiri musu de a presi pe sma lobi makandra èn pe den no abi fu frede taki ogri o miti den, toku a de a presi pe seryusu ogri kan miti son bigisma nanga pikin-nengre.” Te sma kisi fu du nanga den takru sani di pasa na ini na osofamiri fu den, dan yari baka dati, a kan pasa taki ten na ten den e broko den ede nanga den sani dati, èn taki den e firi brokosaka. San yu kan du te a sani disi e pasa nanga yu?
15. Na sortu fasi a lobi di Yehovah abi gi wi bigi moro leki a lobi di iniwan libisma abi gi wi?
15 A psalm skrifiman David ben singi: „Efu mi eigi papa nanga mi eigi mama ben o gowe libi mi, dan Yehovah srefi ben sa teki mi” (Psalm 27:10). A e trowstu wi trutru fu sabi taki a lobi di Yehovah abi gi wi, bigi moro leki a lobi di iniwan papa noso mama kan abi gi wi! Awansi fa a e hati yu taki yu papa noso mama no wani yu moro, taki den meshandri yu, noso taki den gowe libi yu, toku dati no abi krakti tapu a lobi di Yehovah abi gi yu (Romesma 8:38, 39). Hori na prakseri taki Gado e hari den wan di a lobi kon na en (Yohanes 3:16; 6:44). Awansi fa libisma handri nanga yu, yu hemel Tata lobi yu!
Wan tu sani di yu kan du fu no firi brokosaka moro
16, 17. San wan sma di e firi brokosaka kan du fu tan tranga na yeye fasi?
16 Yu kan du wan tu sani fu no firi brokosaka moro. Fu eksempre, yu kan teki prati na so wan fasi na a Kresten diniwroko, taki yu e kisi deki-ati fu dati. Denki dipi fu Gado Wortu, spesrutu te yu e firi brokosaka srefisrefi. A psalm skrifiman ben singi: „Te mi ben taki: ’Mi futu seiker sa degedege’, dan yu eigi lobi bun-ati, o Yehovah, ben e tan horibaka gi mi. Te den broko-ede fu mi ben e kon furu na inisei fu mi, dan yusrefi trowstu mi so taki mi ati ben e prisiri” (Psalm 94:18, 19). Te yu e leisi Bijbel doronomo, dan dati sa yepi yu fu prakseri wortu di e trowstu yu èn di e gi yu deki-ati.
17 A de tumusi prenspari fu begi tu. Srefi te yu no man taigi Yehovah krin fa yu e firi dipi na ini yu ati, toku A sabi san yu e pruberi fu taigi en (Romesma 8:26, 27). A psalm skrifiman ben gi wi a dyaranti disi: „Trowe yu hebi tapu Yehovah, èn ensrefi sa horibaka gi yu. Noiti a sa gi pasi taki a regtfardikiwan e degedege.”—Psalm 55:22.
18. San na wan tu bun sani di wan sma kan du te a e firi brokosaka?
18 Son sma e firi brokosaka fu di den siki na frustan sei. * Efu a de so nanga yu, dan pruberi fu poti prakseri na a nyun grontapu fu Gado èn na a ten te „nowan sma di e libi drape sa taki: ’Mi siki’” (Yesaya 33:24). Efu yu e tan firi brokosaka wan langa pisi ten, dan kande a ben o bun fu suku yepi na datra (Mateyus 9:12). A de prenspari tu taki yu e sorgu yusrefi bun. A bun fu nyan gosontu nyanyan èn fu oefen yu skin pikinso. Sorgu taki yu e rostu nofo. No tan luku telefisi te lati neti, èn no abi prisiriten di sa meki taki yu kon weri srefisrefi. A sani di de moro prenspari, na taki yu musu tan du diniwroko gi Gado! Aladi a ten no doro ete taki Yehovah sa ’figi ala watra puru na sma ai’, toku a sa yepi yu fu horidoro.—Openbaring 21:4; 1 Korentesma 10:13.
Wi de „na ondro a makti anu fu Gado”
19. San Yehovah e pramisi den wan di e pina?
19 Bijbel e gi wi a dyaranti taki aladi den rampu fu a regtfardikiwan furu, toku „Yehovah e frulusu en fu den alamala” (Psalm 34:19). Fa Gado e du dati? Di na apostel Paulus ben tan aksi Gado fu puru a ’maka na ini en skin’, dan Yehovah taigi en: „A krakti fu mi e kon volmaakti te yu swaki” (2 Korentesma 12:7-9). San Yehovah ben pramisi Paulus, èn san A e pramisi yu? Yehovah no e pramisi taki a sa dresi yu wantewante na ini a ten disi, ma a e pramisi taki a sa gi yu a krakti fu horidoro.
20. Aladi wi e kisi tesi, toku sortu dyaranti wi e kisi fu 1 Petrus 5:6, 7?
20 Na apostel Paulus ben skrifi: „Saka unsrefi na ondro a makti anu fu Gado, so taki a kan hei unu na a reti ten; èn un musu trowe ala un sorgu na en tapu, bika a e broko en ede nanga unu” (1 Petrus 5:6, 7). Fu di Yehovah e broko en ede nanga yu, meki a no sa gowe libi yu. A sa yepi yu aladi yu e ondrofeni tesi. Hori na prakseri taki getrow Kresten de „na ondro a makti anu fu Gado”. Te wi e dini Yehovah, dan a e gi wi krakti fu horidoro. Efu wi de getrow na en, dan nowan ogri di e miti wi na yeye fasi sa de fu ala ten. Fu dati ede, meki wi tan getrow na Yehovah so taki wi kan nyan bun fu a têgo libi di a pramisi wi na ini a nyun grontapu, pe trutru wi sa si a dei te den wan di e pina e kisi têgo frulusu!
[Futuwortu]
^ paragraaf 1 Wi kenki a nen.
^ paragraaf 18 Disi de heri tra fasi leki te sma e firi brokosaka fu wan tra sani ede. Wan sma di e firi brokosaka fu di a siki na frustan sei e sari srefisrefi fu wan langa pisi ten. Efu yu wani sabi moro fu a tori disi, dan luku De Wachttoren fu 15 oktober 1988, bladzijde 25-29, di fu 15 november 1988 bladzijde 21-24, èn di fu 1 september 1996, bladzijde 30-31.
Yu e memre disi ete?
• Fu san ede a de so taki srefi den futuboi fu Yehovah e pina?
• San na wan tu sani di kan meki taki wan tu futuboi fu Gado e firi brokosaka?
• Fa Yehovah e yepi wi fu horidoro te wi e kisi fu du nanga broko-ede?
• Na sortu fasi wi de „na ondro a makti anu fu Gado”?
[Aksi fu a tori disi]
[Prenki na tapu bladzijde 25]
Aladi a pipel fu Yehovah e kisi tesi, toku den abi bun reide fu prisiri
[Prenki na tapu bladzijde 28]
Wán fasi fa wi kan du diniwroko gi Yehovah nanga wi heri ati, na fu gi kotoigi nanga yepi fu telefon