Sori pasensi neleki fa Yehovah e du dati
Sori pasensi neleki fa Yehovah e du dati
„Yehovah no e draidrai fu du san a pramisi, . . . ma a abi pasensi.” —2 PETRUS 3:9.
1. Sortu tumusi moi kado Yehovah wani gi wi?
YEHOVAH wani gi wi wan sani di nowan tra sma kan gi wi. Bun furu sma wani a sani disi èn a warti trutru, ma wi no kan bai en èn wi no kan kisi en fu di wi frudini en. A sani di Yehovah wani gi wi, na têgo libi. Gi furu fu wi, dati wani taki têgo libi na ini wan paradijs grontapu (Yohanes 3:16). Dati sa gi wi trutru prisiri! Den sani di e meki wi sari, no sa de moro. Sani soleki feti, ogridu, pôtifasi, siki, èn dede srefi, no sa de moro. Trutru vrede nanga wánfasi sa de na mindri libisma te a Kownukondre fu Gado sa tiri na wan lobi-ati fasi. Iya, wi e angri trutru fu libi na ini a Paradijs dati!—Yesaya 9:6, 7; Openbaring 21:4, 5.
2. Fu san ede Yehovah no puru na ogri sistema fu Satan ete?
2 Yehovah srefi e angri fu a ten te a sa meki grontapu tron wan Paradijs. Disi de so fu di Yehovah lobi regtfardikifasi nanga retidu (Psalm 33:5). A no e prisiri te a e si taki sma na grontapu no wani sabi noti fu den regtfardiki markitiki fu en, èn taki den e wisiwasi den. A no lobi fu si fa sma na grontapu e weigri fu saka densrefi ondro a tirimakti fu en, èn fa den e frufolgu a pipel fu en. Ma Yehovah sabi heri bun fu san ede a no du wan sani ete fu puru na ogri sistema fu Satan. Disi abi fu du nanga na aksi di opo kon, namku efu a abi a reti fu tiri leki a Moro Hei Tiriman. Fu man lusu a problema disi, Yehovah e sori wan moi fasi di e meki wi kon lobi en moro. Furu sma no abi a fasi dati. Dati na pasensi.
3. (a) San a Griki wortu nanga a Hebrew wortu di vertaal nanga „pasensi” na ini Bijbel, wani taki trutru? (b) Sortu aksi wi sa go luku now?
3 Na ini Bijbel, wan Griki wortu de di trutru wani taki „langa bro”, èn fu dati ede a vertaal furu tron nanga „langa pasensi” noso „pasensi” na ini a Nyun-Grontapuvertaling. Furu tron, a Griki wortu nanga a Hebrew wortu di vertaal nanga „pasensi”, e sori go na wan sma di e tan frudrage wan sani èn di no e atibron esi. Fa wi e kisi wini fu a pasensi fu Yehovah? San wi kan leri fu a fasi fa Yehovah nanga den getrow futuboi fu en e sori pasensi èn e horidoro? Fa wi du sabi taki Yehovah no sa sori pasensi fu têgo? Meki wi go luku a tori dati.
Poti prakseri na a fasi fa Yehovah e sori pasensi
4. San na apostel Petrus ben skrifi fu a pasensi fu Yehovah?
4 Na apostel Petrus ben taki disi fu a pasensi fu Yehovah: „No frigiti a sani disi, un lobiwan, taki wán dei de leki wan dusun yari gi Yehovah èn wan dusun yari de leki wán dei. Yehovah no e draidrai fu du san a pramisi, soleki fa son sma e prakseri, ma a abi pasensi nanga unu bika a no wani nowan sma fu lasi libi, ma a wani taki ala sma musu kisi berow” (2 Petrus 3:8, 9). Luku taki a tekst disi e kari tu sani di kan yepi wi fu frustan fa Yehovah e sori pasensi.
5. Fa Yehovah e si ten, èn fa dati abi krakti tapu a fasi fa a e du sani?
5 A fosi sani, na taki Yehovah no e si ten neleki fa wi e si ten. Gi a Sma di e libi fu têgo, dusun yari de leki wán dei nomo. A kan du sani o ten a wani èn a no abi fu hasti ensrefi, ma a no e draidrai fu tyari wan lusu kon. Fu di Yehovah abi koni pasa marki, meki a sabi soifri o ten a musu du wan sani di o abi wini gi ala sma, èn nanga pasensi a e wakti fu a ten dati doro. Ma wi no musu denki taki Yehovah no e broko en ede nanga a pina di den futuboi fu en e pina na ini a ten disi. A de wan Gado di abi „trutru sari-ati”, iya, en na lobi (Lukas 1:78; 1 Yohanes 4:8). A kan taki wi e ondrofeni takru bakapisi fu di Yehovah gi pasi taki sma e pina fu wan syatu pisi ten. Ma a abi a makti fu puru ala den takru bakapisi dati krinkrin èn fu ala ten.—Psalm 37:10.
6. San wi no musu denki fu Gado, èn fu san ede wi no musu abi a denki dati?
6 A no de fu taki dati a no makriki fu wakti tapu wan sani di yu wani trutru (Odo 13:12). Dati meki te sma no e du esi-esi san den pramisi, dan trawan kan bigin denki taki den no wani du san den pramisi. A no ben o de wan koni sani fu denki taki na so Gado de! Efu wi bigin denki taki Gado no abi pasensi, ma taki a e draidrai, dan safrisafri wi kan bigin tweifri èn wi kan firi brokosaka fu di wi musu wakti. Disi kan meki taki wi no de nanga faya moro gi yeye afersi. San moro takru srefi, na taki spotuman, sma di no abi bribi, kan kori wi. Petrus ben warskow wi fu luku bun nanga den sortu sma disi. Na wan spotu fasi den e taki: „Pe a denoya fu en de di Gado ben pramisi? We, sensi a dei di wi afo dede, ala sani tan soifri soleki fa den ben de sensi di Gado bigin meki sani.”—2 Petrus 3:4.
7. San a pasensi fu Yehovah abi fu du nanga a winsi fu en taki sma musu sori berow?
7 A di fu tu sani di wi kan leri fu den wortu fu Petrus, na taki Yehovah e sori pasensi fu di a wani taki ala sma musu kisi berow. Yehovah sa pori den wan di e tan weigri fu tapu nanga den ogri di den e du. Ma Gado no e prisiri te wan ogri sma dede. Na presi fu dati, a e prisiri srefisrefi te sma abi berow, èn te den e tapu nanga den ogri di den e du, so taki den kan tan libi (Esekièl 33:11). Dati meki, Yehovah e sori pasensi èn a e seni den futuboi fu en fu meki a bun nyunsu bekènti na heri grontapu, so taki sma kan kisi nofo okasi fu tan na libi.
8. San wi kan leri fu a fasi fa Gado sori pasensi gi a nâsi Israel?
8 Wi kan leri wan sani tu fu a fasi fa Gado sori pasensi nanga Israel fu owruten. Hondrohondro yari langa, a tan frudrage a trangayesi fu den. Ibri tron baka, a ben seni den profeiti fu en fu gi den a deki-ati disi: „Drai komoto fu den takru pasi fu yu èn hori den komando fu mi, den wet bosroiti fu mi, akruderi a heri wet di mi ben komanderi den afo fu unu èn di mi seni gi unu nanga yepi fu den futuboi fu mi, den profeiti.” San ben de a bakapisi? A de wan sari sani taki a pipel „no ben arki”.—2 Kownu 17:13, 14.
9. Fa Yesus ben sori pasensi neleki en Tata?
9 Te fu kaba, Yehovah seni en Manpikin, di ben e tan du ala muiti fu yepi den Dyu fu drai kon baka na Gado. Yesus ben sori pasensi soifri neleki en Tata. Di Yesus ben sabi taki heri esi a ben o dede, dan a taki nanga sari na ini en ati: „Yerusalem, Yerusalem, di e kiri den profeiti èn di e ston den sma kiri di ben seni kon na unu; someni leisi mi ben wani tyari den pikin fu yu kon na makandra, neleki fa wan umafowru e tyari den pikin fu en kon na makandra na ondro den frei fu en! Ma unu no ben wani” (Mateyus 23:37). Den wortu disi di e naki na ati, no e kon fu wan krutuman di no abi firi èn di wani strafu sma nomonomo, ma den e kon fu wan lobi-ati mati di abi pasensi nanga sma. Neleki en Tata na ini hemel, na so Yesus ben wani taki a pipel ben musu abi berow, so taki den no kisi hebi strafu. Wan tu fu den ben gi yesi na a warskow fu Yesus, èn den ben kan wai pasi gi a strafu di Yerusalem ben kisi na ini 70 G.T.—Lukas 21:20-22.
10. Na sortu fasi wi e kisi wini fu a pasensi fu Gado?
10 A pasensi fu Gado na wan tumusi moi fasi, a no so? Aladi libisma e trangayesi Yehovah so furu leisi, toku a gi ibriwan fu wi èn sosrefi milyunmilyun tra sma, na okasi fu kon sabi en èn fu kisi a howpu fu frulusu. Na apostel Petrus ben skrifi gi den Kresten brada nanga sisa fu en: „Un musu si a pasensi fu wi Masra leki frulusu” (2 Petrus 3:15). Wi no breiti taki Yehovah e sori pasensi, so taki wi kan kisi frulusu? A no de fu taki dati wi e begi Yehovah fu tan abi pasensi nanga wi, aladi wi e dini en ibri dei!—Mateyus 6:12.
11. San wi o du te wi kon frustan fu san ede Yehovah abi pasensi?
11 Te wi e frustan fu san ede Yehovah abi pasensi, dan dati e yepi wi fu wakti nanga pasensi tapu a frulusu di a sa tyari. Noiti wi o prakseri taki a e draidrai fu du san a pramisi (Kragisingi 3:26). Aladi wi e tan begi taki a Kownukondre fu Gado musu kon, toku wi abi a frutrow taki Gado sabi san na a moro bun ten fu gi piki tapu a begi dati. Wan tra sani, na taki wi e kisi deki-ati fu waka baka na eksempre fu Yehovah fu di wi abi pasensi nanga wi brada nanga sisa èn nanga den sma di wi e miti na ini a preikiwroko. Wi srefi no wani taki sma kisi pori, ma wi wani taki den kisi berow èn taki den kon kisi a srefi howpu di wi abi fu libi fu têgo.—1 Timoteyus 2:3, 4.
Poti prakseri na a fasi fa den profeiti sori pasensi
12, 13. Fa a profeiti Yesaya sori pasensi na wan bun fasi akruderi Yakobus 5:10?
12 Te wi e prakseri a fasi fa Yehovah e sori pasensi, dan wi e kisi moro warderi gi a fasi dati èn wi e kisi deki-ati fu leri abi pasensi tu. A no makriki gi onvolmaakti libisma fu leri abi pasensi, ma toku wi kan du dati. Wi kan leri fu den futuboi fu Gado di ben e libi na ini owruten. A disipel Yakobus ben skrifi: „Un brada, teki na eksempre fu den profeiti di ben taki na ini a nen fu Yehovah; den ben e pina fu den ogri di miti den, èn den ben abi pasensi” (Yakobus 5:10). A e gi wi trowstu nanga deki-ati fu sabi taki trawan pasa den srefi sortu problema di e miti wi.
13 Fu eksempre, a profeiti Yesaya ben musu abi pasensi trutru fu man du a wroko di a kisi. Disi de so fu di Yehovah ben taigi en: „Go, èn yu musu taigi a pipel disi: ’Yere ibri tron baka, ma no frustan nowan sani; èn si ibri tron baka, ma no kisi nowan sabi.’ Meki na ati fu a pipel disi kon tranga, èn meki srefi den yesi fu den no yere sani, èn tapu srefi den ai fu den makandra, so taki den no kan si nanga den ai fu den èn no kan yere nanga den yesi fu den, èn so taki den eigi ati no kan frustan sani èn so taki den no kan drai kon baka trutru èn kon kisi gosontu gi densrefi” (Yesaya 6:9, 10). Aladi a pipel no ben wani gi yesi na Yesaya, toku a sori pasensi èn a tan meki den warskow boskopu fu Yehovah bekènti sowan 46 yari langa! Na a srefi fasi, pasensi sa yepi wi fu horidoro na ini a wroko di wi abi fu preiki a bun nyunsu, awinsi furu sma no wani arki.
14, 15. San ben yepi Yeremia fu horidoro di a ben kisi tesi èn di a ben firi brokosaka?
14 A no de fu taki, dati te den profeiti ben e du a diniwroko fu den, dan den no ben kisi fu du nomo nanga sma di no ben wani arki den, ma den ben e kisi frufolgu tu. Den ben fasi Yeremia na ini udu, den ben sroto en na ini „na oso pe den e keti sma”, èn den ben trowe en na ini wan peti (Yeremia 20:2; 37:15; 38:6). Den srefi sma di a ben wani yepi trutru, ben e pina en na so wan fasi. Toku Yeremia no ben kisi bita-ati, èn a no ben pai ogri fu ogri. Nanga pasensi a horidoro someni tenti yari langa.
15 Aladi sma ben frufolgu èn spotu Yeremia, toku den sani dati no ben tapu en fu du a diniwroko fu en. Sosrefi na ini a ten disi, den srefi sani dati no e tapu wi fu du a diniwroko fu wi. A no de fu taki dati son leisi wi e firi brokosaka. Yeremia ben firi brokosaka. „Na fu a wortu fu Yehovah ede, meki mi e kisi porinen èn meki sma e spotu mi heri dei”, na so a ben skrifi. „Èn mi ben taki: ’Mi no e go taki moro fu en, èn mi no sa taki na ini en nen moro.’” San pasa baka dati? A de so taki Yeremia ben tapu fu preiki? A ben taki moro fara: „Na ini mi ati [a wortu fu Gado] ben de leki wan faya di leti na ini den bonyo fu mi; èn mi ben kon weri fu dwengi misrefi, èn mi no ben man frudrage en” (Yeremia 20:8, 9). Luku taki, di a ben e poti furu prakseri na a spotu di sma ben e spotu en, dan a no ben abi prisiri moro fu du a diniwroko. Ma di a bigin prakseri baka o moi èn o prenspari a boskopu srefi ben de, dan a ben kon abi prisiri baka na ini a diniwroko. Boiti dati, Yehovah ben de nanga Yeremia „neleki wan kefalek maktiwan”, èn A ben gi en krakti fu preiki a wortu fu Gado fayafaya èn nanga deki-ati.—Yeremia 20:11.
16. Fa wi kan tan abi prisiri na ini a wroko di wi abi fu preiki a bun nyunsu?
16 A profeiti Yeremia ben prisiri nanga a diniwroko fu en? Iya, seiker! A ben taigi Yehovah: „Yu wortu tron gi mi a prisiri sani èn a sani di e breiti mi ati; bika yu nen kari na mi tapu, o Yehovah, Gado fu den legre” (Yeremia 15:16). Yeremia ben prisiri nanga a grani di a ben abi fu de wan boskopuman fu a tru Gado èn fu preiki a wortu fu en. Wi kan abi a prisiri dati tu. Boiti dati, neleki den engel na ini hemel, wi e prisiri taki na heri grontapu furu sma e arki a Kownukondre boskopu, den e sori berow, èn den e kon na tapu a pasi di e tyari sma go na têgo libi.—Lukas 15:10.
A fasi „fa Yob ben horidoro”
17, 18. Na sortu fasi Yob ben horidoro, èn san ben de a bakapisi?
17 Baka di a disipel Yakobus taki fu den profeiti fu owruten, dan a ben skrifi: „Unu yere fa Yob ben horidoro èn unu si fa Yehovah meki sani waka; disi e sori taki Yehovah lobi sma trutru èn taki a abi sari-ati” (Yakobus 5:11). A Griki wortu di vertaal nanga „horidoro” na ini a tekst disi, wani taki wan srefi sortu sani leki a Griki wortu di Yakobus gebroiki gi „pasensi” na ini a vers na fesi. Wan sabiman ben sori san na a difrenti na mindri den tu Griki wortu disi: „A Griki wortu di vertaal nanga ’pasensi’ abi fu du nanga a hori di wi e hori pasensi te sma e pina wi. A Griki wortu di vertaal nanga ’horidoro’ e sori go na a tan di wi e tan horidoro na wan deki-ati fasi awinsi wi de na ini banawtu.”
18 Yob ben de na ini bigi banawtu. A ben lasi ala den gudu fu en, ala den pikin fu en dede, èn a ben abi wan siki di ben gi en furu skin-ati. Sma ben e lei gi en taki na Yehovah ben e strafu en, èn a ben e broko en ede nanga a prakseri dati. Di Yob ben e pina, dan a no ben tan tiri, ma a ben taki fa a ben e firi sari. A ben kragi fu a situwâsi fu en, èn a ben taki srefi dati a regtfardiki moro Gado (Yob 35:2). Ma toku a no lasi bribi, èn a no drai baka gi Gado. Aladi Satan ben taki dati Yob ben o fluku Gado, toku a no du dati (Yob 1:11, 21). San ben de a bakapisi? Yehovah „blesi a kaba fu Yob bakaten moro leki a bigin fu en” (Yob 42:12). Yehovah ben meki Yob kon gosontu baka, a ben kisi tu tron moro gudu leki san a ben abi, èn Gado ben blesi en nanga wan koloku libi, makandra nanga den lobiwan fu en. Fu di Yob horidoro na wan getrow fasi, meki a kon frustan moro bun tu fa Yehovah de.
19. San wi e leri fu a fasi fa Yob ben horidoro nanga pasensi?
19 San wi kan leri fu a fasi fa Yob ben e horidoro nanga pasensi? Neleki Yob, wi kan kon siki tu, noso wi kan kisi tra tesi. Kande wi no e frustan krin fu san ede Yehovah e gi pasi taki wan spesrutu tesi e miti wi. Toku, wi kan de seiker fu a sani disi: Efu wi tan getrow, wi sa kisi blesi. Ala ten Yehovah e blesi den wan di e suku en fayafaya (Hebrewsma 11:6). Yesus ben taki: „A sma di horidoro te na a kaba, sa feni frulusu.”—Mateyus 10:22; 24:13.
„A dei fu Yehovah o kon”
20. Fu san ede wi kan de seiker taki a dei fu Yehovah o kon?
20 Aladi Yehovah abi pasensi, a de regtfardiki tu èn a no sa gi pasi taki sma e tan du ogri dorodoro. A no sa sori pasensi fu têgo. Petrus ben skrifi: „[Gado] no ben hori ensrefi tu fu strafu wan libimakandra fu owruten.” Noa nanga en osofamiri ben tan na libi, ma wan bigi frudu ben pori na ogri grontapu dati. Yehovah ben pori Sodom nanga Gomora krinkrin tu. A strafu di den sma dati kisi, na „wan eksempre gi den ogri sma, fu sori den san o pasa nanga den”. Wi kan de seiker fu a sani disi: „A dei fu Yehovah o kon.”—2 Petrus 2:5, 6; 3:10.
21. Fa wi kan sori taki wi abi pasensi èn taki wi e horidoro, èn san wi sa go luku na ini a tra artikel?
21 Fu dati ede, meki wi abi pasensi neleki Yehovah, fu di wi e yepi trawan fu kisi berow so taki den kan kisi frulusu. Meki wi waka baka na eksempre fu den profeiti sosrefi, fu di wi e meki a bun nyunsu bekènti nanga pasensi, awinsi son sma no wani arki te wi e preiki gi den. Èn wi kan de seiker taki Yehovah sa blesi wi bogobogo, solanga wi e horidoro ondro tesi èn e tan getrow neleki Yob. Wi abi ala reide fu prisiri na ini a diniwroko fu wi, spesrutu te wi e si fa Yehovah e blesi a pipel fu en bogobogo fu a muiti di den e meki fu preiki a bun nyunsu na heri grontapu. Wi sa go luku a tori disi na ini a tra artikel.
Yu e memre disi ete?
• Fu san ede Yehovah e sori pasensi?
• San wi kan leri fu a fasi fa den profeiti ben sori pasensi?
• Fa Yob ben horidoro, èn san ben de a bakapisi?
• Fa wi du sabi taki Yehovah no sa sori pasensi fu têgo?
[Aksi fu a tori disi]
[Prenki na tapu bladzijde 18]
Yesus ben sori pasensi soifri neleki en Tata
[Prenki na tapu bladzijde 20]
Fa Yehovah blesi Yeremia gi a pasensi di a ben sori?
[Prenki na tapu bladzijde 21]
Fa Yehovah blesi Yob fu a tan di a tan horidoro?