’Sma fu ala kondre e yere a bun nyunsu’
’Sma fu ala kondre e yere a bun nyunsu’
„Unu sa de kotoigi fu mi . . . te na den moro farawe presi fu grontapu.” —TORI FU DEN APOSTEL 1:8.
1. O ten den disipel ben yere a profeititori na ini Mateyus 24:14 fu a fosi leisi, èn pe den ben de a pisi ten dati?
FURU fu wi sabi den wortu fu Yesus na ini Mateyus 24:14 heri bun. A no de fu taki dati a profeititori disi aparti trutru! Prakseri san den disipel ben musu denki di den yere a profeititori disi fu a fosi leisi! Yesus ben taki den wortu disi na ini a yari 33 G.T. Den disipel ben de nanga Yesus sowan 3 yari kaba, èn den ben kon na Yerusalem makandra nanga en. Den si den wondru di a du èn den yere den sani di a ben e leri sma. Den ben lobi den warti tru tori di Yesus ben leri den, ma den ben sabi tu taki a no ala sma ben e prisiri nanga den leri fu Yesus. Yesus ben abi feanti di ben abi furu makti èn di ben abi furu krakti tapu sma.
2. Sortu ogri nanga tyalensi ben o miti den disipel?
2 Na tapu na Olèifbergi, fo disipel ben e sidon nanga Yesus, èn den ben arki bun di a ben e taki fu den ogri nanga den tyalensi di ben o miti den. Yesus ben taigi den disipel wan leisi kaba taki sma ben o kiri en (Mateyus 16:21). Now a ben sori den krin taki den ben o kisi hebi frufolgu tu. „Sma o tyari banawtu kon na un tapu èn den o kiri unu”, na so a ben taki. „Na ini ala kondre den sma o teige unu fu mi nen ede.” Dati no ben de ala. Falsi profeiti ben o kori furu fu den. Trawan ben o naki futu, den ben o tori makandra, èn den ben o kisi bita-ati gi makandra. Boiti dati, yu ben o abi sma, iya „furu sma” srefi di no ben o abi lobi moro gi Gado èn gi a Wortu fu en.—Mateyus 24:9-12.
3. Fu san ede den wortu fu Yesus di skrifi na ini Mateyus 24:14 de so aparti?
3 Baka di Yesus fruteri den disipel taki den ben o kisi den tesi disi, dan a fruteri den wan sani di ben musu fu meki den fruwondru. A ben taki: „A bun nyunsu disi fu a kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon” (Mateyus 24:14). Iya, a wroko di Yesus bigin na ini Israel, namku a wroko fu „kotoigi fu a waarheid”, ben o go doro èn a ben o du na heri grontapu te fu kaba (Yohanes 18:37). Disi na trutru wan moi profeititori! A ben o de wan tyalensi gi den disipel fu du a wroko disi na mindri „sma fu ala kondre”. Ma efu den ben o du a wroko disi aladi ’sma na ini ala kondre ben o teige’, dan dati ben o de wan wondru trutru. A bigi wroko disi ben o de wan krin buweisi taki Yehovah na a Moro Hei Tiriman èn taki a abi furu makti. Ma boiti dati, a ben o de wan buweisi fu a lobi, a sari-ati, nanga a pasensi fu en. Disi ben o gi den futuboi fu en na okasi tu fu sori taki den abi bribi èn taki den lobi en.
4. Suma ben kisi a wroko fu gi kotoigi, èn fa Yesus ben trowstu den?
4 Yesus ben meki den disipel fu en frustan krin taki den ben abi wan tumusi prenspari wroko fu du. Bifo Yesus go na hemel, a go na den disipel èn a taigi den: „Unu sa kisi krakti te a santa yeye kon na un tapu, èn unu sa de kotoigi fu mi na ini Yerusalem, na ini heri Yudea nanga Samaria, èn te na den moro farawe presi fu grontapu” (Tori fu den Apostel 1:8). A no de fu taki, dati heri esi trawan ben o bigin du a wroko disi makandra nanga den. Ma toku, furu disipel no ben de. A ben de wan trowstu trutru gi den disipel fu sabi taki a makti santa yeye fu Gado ben o gi den a krakti fu du a wroko disi di den ben kisi fu Gado!
5. San den disipel no ben sabi fu a kotoigiwroko?
5 Den disipel ben sabi taki den ben musu preiki a bun nyunsu èn taki den ben musu ’meki sma fu ala kondre tron disipel’ (Mateyus 28:19, 20). Ma den no ben sabi te o fara a kotoigiwroko ben o du, èn den no ben sabi o ten a kaba ben o kon. Wi srefi no sabi dati. Na Yehovah wawan sabi (Mateyus 24:36). Efu Yehovah feni taki a kotoigiwroko du nofo kaba, dan a o tyari wan kaba kon na a ogri sistema disi. Dan fosi, ala tru Kresten o sabi taki a kotoigiwroko du soleki fa Yehovah ben abi na prakseri. Den fosi disipel no ben sabi taki na so wan bigi kotoigiwroko ben o du na ini a ten disi fu a kaba.
A kotoigiwroko na ini a fosi yarihondro
6. San ben pasa na a Pinksterfesa fu 33 G.T., èn san pasa syatu baka dati?
6 Na ini a fosi yarihondro, den disipel ben abi tumusi moi bakapisi na ini a wroko fu preiki a Kownukondre boskopu èn fu meki disipel. Na a Pinksterfesa fu 33 G.T., sowan 120 disipel ben de na ini wan sodrokamra fu wan oso na ini Yerusalem. Den ben kisi a santa yeye fu Gado èn na apostel Petrus ben hori wan moi takimakandra pe a ben fruteri den sma fu san ede a wondru dati pasa. Baka dati, sowan 3000 sma tron bribiman èn den teki dopu. Dati ben de soso a bigin. Aladi kerki fesiman ben e du ala muiti fu tapu sma fu preiki a bun nyunsu, toku ibri dei „Yehovah ben meki taki moro nanga moro sma ben e [tron disipel èn] kisi frulusu”. Heri esi, „a nomru fu den ben de sowan feifi dusun”. Baka dati, „moro nanga moro sma, iya, mansma nanga umasma, ben e tron bribiman fu Masra”.—Tori fu den Apostel 2:1-4, 8, 14, 41, 47; 4:4; 5:14.
7. Fu san ede a drai di Kornelius drai en libi, ben de wan prenspari sani?
7 Na ini a yari 36 G.T., wan tra prenspari sani ben pasa. Kornelius, wan man di no ben de wan Dyu, drai en libi èn a teki dopu. Na Yehovah ben seni na apostel Petrus fu go yepi a man disi di ben abi frede gi Gado. Na so fasi Yehovah sori taki a komando di Yesus ben gi fu ’meki sma fu ala kondre tron disipel’, no ben abi fu du wawan nanga Dyu di ben e libi na ini difrenti kondre (Tori fu den Apostel 10:44, 45). San den brada di ben e teki fesi, ben du? Di den apostel nanga den owruman na ini Yudea kon frustan taki a bun nyunsu ben musu preiki tu gi den sma fu tra kondre, noso sma di no de Dyu, dan den ben gi Gado glori (Tori fu den Apostel 11:1, 18). Na a srefi ten, den disipel ben tan abi bun bakapisi nanga a preiki di den ben e preiki gi den Dyu. Wan tu yari baka dati, kande na ini a yari 58 G.T., dan boiti den bribiman di no ben de Dyu, yu ben abi „dusundusun [Dyu] bribiman”.—Tori fu den Apostel 21:20.
8. Fa a bun nyunsu abi krakti tapu sma?
8 Aladi a moi fu si fa a nomru fu den Kresten na ini a fosi yarihondro ben kon moro bigi, toku wi no musu frigiti taki den nomru disi abi fu du nanga trutru sma. A Bijbel boskopu di den ben yere, ben abi furu krakti na den tapu (Hebrewsma 4:12). Den sma di gi yesi na a boskopu ben tyari bigi kenki kon na ini den libi. Sma bigin tyari densrefi na wan krin fasi, den tron nyun sma fu di den kenki a fasi fa den ben de fosi, èn den kon kisi wan bun banti nanga Gado (Efeisesma 4:22, 23). A srefi sani e pasa na ini a ten disi. Èn ala den sma di e gi yesi na a bun nyunsu abi a moi howpu fu libi fu têgo.—Yohanes 3:16.
Sma di e wroko makandra nanga Gado
9. Sortu grani nanga frantwortu den fosi Kresten ben abi, soleki fa den kon frustan?
9 Den fosi Kresten no ben taki dati na den ben meki a wroko waka so bun. Den ben frustan taki den ben kisi „krakti fu santa yeye” fu man du a preikiwroko (Romesma 15:13, 19). Na Yehovah ben meki taki a wroko ben e go na fesi na yeye fasi. Na a srefi ten, den Kresten dati ben sabi taki den ben abi a grani nanga a frantwortu fu „wroko makandra nanga Gado” (1 Korentesma 3:6-9). Fu dati ede den ben e meki furu muiti fu du a wroko di den kisi, soleki fa Yesus ben gi den deki-ati fu du.—Lukas 13:24.
10. Sortu tranga muiti son Kresten fu a fosi yarihondro ben e du fu gi kotoigi na sma fu ala kondre?
10 Leki „wan apostel gi den trakondre sma”, Paulus ben teki waka nanga futu èn nanga boto dusundusun kilometer, èn a ben seti furu gemeente na ini a distrikt Asia fu Rome, èn na ini Grikikondre (Romesma 11:13). A ben teki waka go na Rome sosrefi, èn kande a ben go srefi te na Spanyorokondre. Na a srefi ten, na apostel Petrus di ben abi a frantwortu fu preiki „a bun nyunsu na den wan di [ben] besnèi”, ben teki waka go na a tra sei fu dini na ini Babilon, wan prenspari presi pe furu Dyu ben e libi na a pisi ten dati (Galasiasma 2:7-9; 1 Petrus 5:13). Na mindri den furu tra sma di ben e du a wroko fu Masra, yu ben abi uma soleki Trifeina nanga Trifosa. Bijbel e taki fu wan tra uma di nen Persis, taki a ben „e wroko tranga gi Masra”.—Romesma 16:12.
11. Fa Yehovah blesi a muiti di den disipel ben meki?
11 Yehovah ben blesi a wroko fu den sma dati srefisrefi, èn sosrefi fu trawan di ben e wroko fayafaya tu. Pikinmoro 30 yari baka di Yesus ben taki na fesi dati a kotoigiwroko ben o du na mindri sma fu ala kondre, dan Paulus ben skrifi taki a „bun nyunsu” ben „preiki gi ala sma na grontapu” (Kolosesma 1:23). A de so taki a kaba ben kon na ini a ten dati? Te yu luku en bun, wan kaba ben kon trutru. Wan kaba ben kon na a Dyu sistema na ini a yari 70 G.T. di den legre fu Rome pori Yerusalem nanga a tempel fu en. Ma toku, Yehovah ben abi na prakseri taki wan moro bigi kotoigiwroko ben o du bifo a tyari wan kaba kon na a grontapu sistema fu Satan.
A kotoigiwroko na ini a ten disi
12. Fa den Bijbel Ondrosukuman ben frustan a komando fu preiki?
12 Na a kaba fu a di fu 19 yarihondro, baka wan heri pisi ten di wan lo sma ben fadon komoto na bribi, dan a soifri anbegi ben seti baka. Den Bijbel Ondrosukuman, soleki fa Yehovah Kotoigi ben nen na ini a ten dati, ben frustan a komando heri bun taki den ben musu meki disipel na heri grontapu (Mateyus 28:19, 20). Na ini a yari 1914, sowan 5100 sma ben de di ben e teki prati fayafaya na a preikiwroko, èn a bun nyunsu ben preiki na ini sowan 68 kondre. Ma den Bijbel Ondrosukuman dati no ben sabi krinkrin san Mateyus 24:14 ben wani taki. Na a kaba fu a di fu 19 yarihondro, wan tu Bijbel organisâsi ben poti a Bijbel abra na ini furu tongo. Den Bijbel disi di abi a bun nyunsu noso na evangelie na ini, ben prati na heri grontapu. Fu dati ede, te go miti a yari 1920, den Bijbel Ondrosukuman ben denki taki wan kotoigi ben gi kaba na sma fu tra kondre.
13, 14. Fa The Watch Tower fu a yari 1928 ben sori taki den Bijbel Ondrosukuman ben kon frustan moro bun san Gado wani èn san a abi na prakseri?
13 Safrisafri Yehovah ben meki taki a pipel fu en kon frustan moro bun san a wani èn san a abi na prakseri (Odo 4:18). Na ini The Watch Tower fu 1 december 1928 ben skrifi: „A de so taki a preikiwroko fu a kownukondre bun nyunsu klari kaba fu di so furu Bijbel prati? Kwetikweti! Aladi so furu Bijbel prati, toku a de fanowdu taki a pikin grupu kotoigi fu Gado na grontapu musu meki buku di e fruklari san Gado [abi na prakseri], èn a de fanowdu tu taki den go na den sma di abi den Bijbel disi. Bika efu wi no du dati, dan den sma no o kon sabi taki a Mesias Kownukondre seti kaba na ini a ten fu wi.”
14 A tijdschrift dati fu 1 december 1928 ben taki moro fara: „Na ini 1920, . . . den Bijbel Ondrosukuman ben kon frustan krin san a profeititori fu Masra na ini Mateyus 24:14 wani taki. Den ben kon sabi taki ’na evangelie disi’ di ben musu preiki na heri grontapu leki wan kotoigi gi sma di no de Dyu noso sma fu ala kondre, no ben abi fu du nanga na evangelie fu wan kownukondre di ben musu kon ete. A abi fu du nanga na evangelie di e sori taki a Mesias Kownu bigin tiri grontapu kaba.”
15. Fa a kotoigiwroko go na fesi na ini den yari baka 1920?
15 A „pikin grupu kotoigi” dati di ben de na ini den yari baka 1920, no ben tan wan pikin grupu nomo. Na ini den someni tenti yari baka dati, den ben kon si taki „wan bigi grupu” fu „tra skapu” ben de, èn den bigin tyari den kon na wán (Openbaring 7:9; Yohanes 10:16). Na ini a ten disi, yu abi sowan 6.613.829 preikiman fu a bun nyunsu na ini 235 kondre na grontapu. Disi na trutru wan moi fasi fa a profeititori kon tru! Noiti ete „a bun nyunsu fu a kownukondre” preiki na so furu presi. Èn noiti ete yu ben abi so furu getrow futuboi fu Yehovah na grontapu.
16. San Yehovah Kotoigi du na ini a dienstyari di pasa? (Luku a raportu fu den difrenti kondre na tapu bladzijde 27-30.)
16 A bigi grupu disi fu Kotoigi ben span anu makandra èn den du furu na ini a dienstyari fu 2005. Den wroko moro leki wan milyard yuru fu preiki a bun nyunsu na ini 235 kondre. Den tyari milyunmilyun gobaka, èn den studeri Bijbel nanga milyunmilyun sma. Na Yehovah Kotoigi du a wroko disi, èn den ben de klariklari fu gebroiki den ten nanga den gudu fu den fu prati Gado Wortu nanga trawan (Mateyus 10:8). Yehovah e gebroiki a makti santa yeye fu en fu tan gi krakti na den futuboi fu en, so taki den kan klari a wroko di a gi den fu du.—Sakaria 4:6.
Den e wroko fayafaya fu gi kotoigi
17. Fa a pipel fu Yehovah e gi yesi na Yesus komando fu preiki a bun nyunsu?
17 Aladi pikinmoro 2000 yari pasa sensi Yesus ben taki dati a bun nyunsu ben o preiki, toku a pipel fu Gado e tan du a wroko disi fayafaya. Wi sabi taki te wi e horidoro fu du san bun, dan na so fasi wi e sori lobi, sari-ati, nanga pasensi neleki Yehovah. Neleki en, wi no wani nowan sma fu kisi pori, ma wi wani taki sma musu abi berow èn taki den kon kisi wan bun banti nanga Yehovah (2 Korentesma 5:18-20; 2 Petrus 3:9). Nanga yepi fu a yeye fu Gado, Yehovah Kotoigi e tan preiki a bun nyunsu fayafaya te na den moro farawe presi fu grontapu (Romesma 12:11). Leki bakapisi fu dati, sma na ala sei e kon na ini a waarheid èn den e saka densrefi ondro a tiri di Yehovah e gi na wan lobi-ati fasi. Luku wan tu eksempre.
18, 19. Sortu ondrofenitori yu kan fruteri fu wan tu sma di gi yesi na a bun nyunsu?
18 Charles ben de wan gronman di ben e libi na a west-sei fu Kenia. Na ini 1998 a ben seri moro leki 8000 kilo tabaka, èn fu dati ede a ben kisi wan papira di e sori taki en ben de a moro bun gronman di ben prani tabaka. Na a ten dati, a bigin studeri Bijbel. Heri esi a kon frustan taki wan sma di e prani tabaka, e pasa a komando fu Yesus di e taki dati wi musu lobi tra sma (Mateyus 22:39). Charles ben kon frustan taki a sma di ben de ’a moro bun gronman di e prani tabaka’, na trutru ’a moro bun kiriman’. Dati meki a spoiti den tabaka wiwiri fu en nanga vergif, so taki den dede. Charles tan go na fesi na yeye fasi teleki a gi ensrefi abra na Gado èn teki dopu. Now a de wan gewoon pionier èn wan dinari ini a diniwroko.
19 A no de fu tweifri taki Yehovah e seki den nâsi nanga yepi fu a kotoigiwroko di e du na heri grontapu, èn den warti sani, namku den sma, e kon na ini na organisâsi fu en (Hagai 2:7). Pedro di e libi na ini Potogisikondre, ben abi 13 yari di a go na wan skoro pe sma e kisi leri fu tron priester. A ben wani tron wan zendeling èn a ben wani leri sma a Bijbel. Ma baka wan syatu pisi ten, a gowe libi a skoro dati fu di den no ben poti so furu prakseri na Bijbel na ini den klas. Siksi yari baka dati, a bigin studeri psychologie na wan universiteit na ini Lisabon. A ben e tan na en tanta, di de wan Kotoigi fu Yehovah. A tanta fu en ben gi en deki-ati fu studeri Bijbel. Na a ten dati, Pedro ben e tweifri efu Gado de trutru, èn a no ben man bosroiti efu a musu studeri Bijbel. A go na a professor di ben e gi en leri, èn a aksi en fa a de nanga sma di e tweifri fu teki bosroiti. A professor ben taigi en taki wan fu den sani di psychologie e leri sma, na taki sma di no man teki bosroiti, nofo tron e du sani di e pori den eigi libi. A sani dati meki taki Pedro bosroiti fu studeri Bijbel. No so langa pasa, a teki dopu èn now a e studeri Bijbel nanga tra sma tu.
20. Fu san ede wi kan breiti taki a kotoigiwroko e du na so furu presi na grontapu?
20 Te nanga now wi no sabi o furu wi abi fu du ete fu gi kotoigi na sma fu tra kondre, èn wi no sabi a dei noso a yuru te a kaba o kon. A wan-enkri sani di wi sabi na taki a o kon heri esi. Wi breiti taki a preiki di a bun nyunsu e preiki na so furu presi, na soso wán fu den someni buweisi di e sori taki heri esi a Kownukondre fu Gado sa teki abra èn puru den libisma tirimakti (Danièl 2:44). Ibri yari, milyunmilyun sma e kisi na okasi fu yere a bun nyunsu, èn disi e gi glori na Yehovah wi Gado. Meki a de wi fasti bosroiti fu tan getrow èn fu tan wroko fayafaya makandra nanga wi brada nanga sisa na heri grontapu, fu gi kotoigi na sma fu ala kondre. Te wi e du dati, dan wi sa frulusu wisrefi èn sosrefi den sma di e arki wi.—1 Timoteyus 4:16.
Yu e memre disi ete?
• Fu san ede wi kan taki dati a profeititori na Mateyus 24:14 de so aparti?
• Sortu muiti den fosi Kresten ben meki fu preiki, èn sortu bakapisi den ben abi?
• Fa den Bijbel Ondrosukuman kon frustan taki a de tumusi prenspari fu gi kotoigi na sma fu ala kondre?
• Te yu e luku a wroko di a pipel fu Yehovah du na ini a dienstyari di pasa, dan san yu feni so moi?
[Aksi fu a tori disi]
[Raportu na tapu bladzijde 27-30]
2005 DINIWROKO RAPORTU FU YEHOVAH KOTOIGI NA HERI GRONTAPU
(Luku a tijdschrift)
[Karta/Prenki na tapu bladzijde 25]
Paulus ben teki waka nanga futu èn nanga boto dusundusun kilometer, fu preiki a bun nyunsu
[Prenki na tapu bladzijde 24]
Yehovah ben seni Petrus fu gi kotoigi na Kornelius nanga en osofamiri