Wan buweisi taki wi abi lobi nanga bribi, èn taki wi e gi yesi na Gado

A MAMANTEN fu 16 mei 2005, ben de wan moi dei na a Waktitoren boerderij na Wallkill, New York. A prasi ben moi trutru, èn den bromki ben e brenki fu na alen di ben fadon fruku a mamanten dati. Wan doksi nanga aiti pikin doksi, ben e swen safrisafri krosibei na a lanki fu wan watra-olo. Den sma di ben de drape ben fruwondru fu den moi sani di den ben si. Den ben e taki safri neleki den no ben wani taki tumusi tranga na a tiri mamanten dati.

Den sma di ben de drape ben de Yehovah Kotoigi di ben komoto fu 48 difrenti kondre. Ma den sma disi no ben kon nomo fu si a presi. Den ben wani sabi san ben e pasa na ini wan bun bigi redi ston gebow, a moro nyun gebow di bow na Bethel fu Amerkankondre na Wallkill. Na ini a gebow dati, den sma ben fruwondru baka, aladi a presi no ben de so tiri leki na dorosei.

Fu wan barkon, den sma ben kan si wan lo masyin. Feifi bun bigi drukpers ben de na ini wan bun bigi kamra di bigi moro leki siksi bigi voetbalveld. Dyaso den e druk Bijbel, buku, nanga tijdschrift. Bun bigi lolo papira, di e wegi 1700 kilo, e drai leki den banti fu wan truck di e rèi tranga. Ibriwan fu den lolo abi sowan 23 kilometer papira, èn a papira disi e drai komoto fu a lolo go na ini a drukpers, na ini 25 miniti nomo. Na ini den 25 miniti dati, a drukpers e poti inki na tapu a papira, a e drei en, èn a e kowru a papira so taki a papira kan fow kon tron tijdschrift, di de na tapu wan sani di e lolo na loktusei, fu poti na ini dosu èn fu seni go na den gemeente. Tra drukpers e druk den bladzijde fu buku na tapu bigi pisi papira, di den e fow bakaten kon tron buku. Den bigi papira disi e go na ini wan sortu kasi di hei te go miti a plafon, èn te fu kaba den e go na a presi pe sma e meki buku  fu den. Ala den masyin disi e wroko nanga makandra na a yoisti fasi, soleki fa wan computer e taigi den fu du.

Baka di den fisitiman gowe libi a kamra pe den drukpers de, dan den go na a presi pe buku e meki. Dyaso den masyin e meki 50.000 buku na ini wán dei; disi na buku di abi tranga kafti, nanga den luxe Bijbel. Dyaso den e seti ala den bladzijde fu den buku bun, den e tai den bladzijde kon na wán, èn den e koti den lanki. Baka dati den buku e kisi wan kafti. Den buku di klari, e go na ini dosu di den e plak tapu. Nanga masyin den e poti wan nen na tapu den dosu èn den e poti den dosu na tapu makandra. Boiti dati, yu abi masyin di e meki sowan 100.000 buku nanga wan safu kafti na ini wán dei, èn den e poti den na ini dosu. Na a presi disi yu abi furu masyin sosrefi, èn den alamala e wroko kefalek esi fu meki Bijbel publikâsi.

Den masyin e wroko soifri neleki wan diri oloisi; den masyin di e druk buku heri esi, na den moro nyun-modo wrokosani di de fu feni. Ma ala den sani disi na wan buweisi sosrefi taki a pipel fu Gado abi lobi, bribi, èn taki den e gi yesi na Gado. Ma fu san ede a drukkerij froisi fu Brooklyn, New York, go na Wallkill?

Wan prenspari reide ben de fu seti sani moro makriki, so taki a wroko fu druk buku èn fu seni publikâsi go na den gemeente ben du na wán presi nomo. Someni yari langa den buku ben e druk na Brooklyn èn ben e komoto fu Brooklyn, èn den tijdschrift ben e druk na Wallkill èn ben e komoto fu drape. Efu den buku nanga den tijdschrift ben o druk na wán presi nomo, dan disi ben o meki taki moro mendri sma ben o de fanowdu fu du a wroko, ma sosrefi den ben o man gebroiki a moni di sma e gi leki bijdrage, moro bun. Moro fara, fu di den drukpers na ini Brooklyn ben kon owru, meki tu nyun MAN Roland Lithoman drukpers ben bai na Doisrikondre. Den drukpers disi ben bigi tumusi gi a drukkerij fu Brooklyn.

Yehovah e horibaka gi a wroko

Ala ten a marki fu druk buku ben de fu prati a bun nyunsu fu Gado Kownukondre. A ben de krin fu si taki Yehovah ben e blesi a wroko fu sensi a bigin. Fu a yari 1879 te go miti 1922, wi ben pai tra drukkerij fu druk den buku gi wi. Na ini 1922, wi ben yuru wan gebow di abi siksi sodro, na 18 Concord Street, na ini Brooklyn, èn wi ben bai masyin fu bigin druk buku wisrefi. Na a ten dati son sma ben e tweifri efu den brada ben o man du a wroko dati.

Wán fu den sma di ben tweifri, ben de a presidenti fu a drukkerij di ben druk furu fu den buku fu wi. Di a go na Concord Street, a taki: „Dyaso unu abi wan nyun-modo wrokosani fu druk buku, ma unu no abi nowan sma di sabi wroko nanga den masyin disi. Baka siksi mun ala den masyin o broko; èn unu sa si taki den yoisti sma fu druk den buku fu unu na den sma di e du dati kaba, fu di dati na den wroko.”

Na opziener fu a drukkerij na a ten dati, Robert J. Martin, ben taki: „A gersi leki a man dati ben abi leti di a taki den sani disi, ma a ben frigiti Masra; ala ten a de nanga wi. . . . No langa baka dati, wi ben e meki buku.” Na ini den 80 yari baka dati, Yehovah Kotoigi druk milyardmilyard publikâsi nanga den eigi drukpers.

Tapu 5 oktober 2002, na a alayari konmakandra fu a Watch Tower Bible and Tract Society of Pennsylvania, (Waktitoren Bijbel nanga Traktaat Genootschap) a Tiri Skin ben meki bekènti taki den feni en bun fu froisi den drukkerij fu a bijkantoro fu Amerkankondre go na Wallkill. Den ben bai tu nyun drukpers, èn den ben o kisi den na ini februari 2004. A ben o de fanowdu taki den brada seti sani èn taki den ben o meki a drukkerij moro bigi, èn disi den ben musu du na ini 15 mun, fosi den kisi den nyun drukpers.  Baka dati, den brada ben abi neigi mun fu seti a nyun presi pe den ben o meki buku èn pe den ben o seti sani fu seni publikâsi go na den gemeente. A kan taki son sma bigin tweifri di den yere omeni ten den brada ben abi fu seti ala den sani disi, iya, a ben gersi leki a wroko no ben o man du. Ma den brada ben sabi taki den ben o man du a wroko disi nanga a blesi fu Yehovah.

„Sma e wroko makandra nanga prisiri”

Fu di den brada ben sabi taki a pipel fu Yehovah ben o de klariklari fu gi densrefi, meki den bigin nanga a wroko (Psalm 110:3). Fu di a wroko ben furu so, meki moro wrokoman ben de fanowdu leki san den ben abi na ini a Bethel bow-grupu. Moro leki 1000 brada nanga sisa di man du bow-wroko, ben kon leki friwani-wrokoman fu Amerkankondre nanga Kanada. Den ben kon yepi fu wan syatu pisi ten na ini a friwani bow programa disi; sonwan fu den ben kon yepi wán wiki, te go miti dri mun. Tra sma di e dini na tra kondre leki friwani wrokoman, ben kisi kari fu teki prati na a wroko disi. Difrenti Regionaal Bowkomte ben yepi srefisrefi tu fu du a wroko disi.

Gi furu sma, a wroko na Wallkill ben wani taki dati den ben musu reis fara, èn taki den ben musu teki fakansi fu den grontapuwroko. Ma nanga prisiri den ben tyari den òfer disi. A Bethelfamiri ben kisi na okasi fu du ala san den ben man fu seti sani, so taki den friwani wrokoman disi ben abi wan tanpresi èn taki den ben abi nyanyan. Moro leki 535 sma fu a Bethelfamiri fu Brooklyn, Patterson, nanga Wallkill ben yepi nanga a wroko tapu satra, aladi den ben e du a Bethelwroko fu den go doro na mindriwiki. A fasi fa a pipel fu Gado ben gi densrefi fu du na aparti wroko disi, ben kan pasa soso fu di Yehovah ben e horibaka gi a wroko disi.

Tra sma ben gi moni. Fu eksempre, den brada ben kisi wan brifi fu Abby, di abi 9 yari. A ben skrifi: „Mi breiti nanga ala a wroko di unu e du fu meki ala den moi buku. A kan taki mi e kon fisiti unu heri esi. Mi papa taki dati wi sa kon na unu tra yari! Mi sa weri wan lapelkarta so taki unu kan sabi suma na mi. Mi e seni 20 Amerkan dala gi a nyun drukpers! Disi na a moni di mi e kisi fu mi papa nanga mama, ma mi wani gi unu a moni.”

Wan sisa ben skrifi: „Grantangi, teki a kado fu mi; disi na wan tu ati di misrefi meki nanga mi eigi anu. Mi wani taki den wrokoman di e du a bow-wroko na Wallkill kisi den ati disi. Wan buku taki dati a winter disi o kowru srefisrefi. Efu a buku disi abi leti noso efu a no abi leti, mi no sabi. Ma mi sabi taki furu fu a wroko di e du na Wallkill, sa musu du na dorosei, èn mi wani sorgu taki na ede fu den brada nanga sisa fu mi e tan waran. Mi no sabi du bow-wroko, ma mi kan meki sani nanga mi anu dati meki mi teki a bosroiti fu yepi unu na a fasi disi.” A sisa disi seni 106 ati di ensrefi ben meki nanga anu!

A drukkerij ben kaba na a yoisti ten. John Larson, na opziener fu a drukkerij, ben taki: „Sma  ben wroko makandra nanga prisiri. A ben musu fu de Yehovah di ben e horibaka gi a wroko! A wroko ben kaba esi-esi. Mi kan memre ete fa na ini mei 2003, mi ben e tanapu na ini tokotoko fu luku fa den brada ben e poti a fondamenti fu a gebow. Wán yari no pasa ete, èn mi ben e tanapu na a srefi presi fu luku fa a drukkerij ben e wroko kaba.”

Na inwijding programa

Na inwijding programa fu a nyun drukkerij makandra nanga dri gebow pe Bethel wrokoman ben o tan, ben hori na Wallkill tapu munde 16 mei 2005. Sma na den Bethel-oso fu Patterson nanga Brooklyn, èn sosrefi a di fu Kanada ben kan si na tapu telefisi fa sani ben waka. Ala nanga ala, 6049 sma ben go na a programa. Theodore Jaracz, wan memre fu a Tiri Skin fu Yehovah Kotoigi, ben de fesiman fu a programa, èn a ben fruteri syatu fa a drukwroko ben du na ini a ten di pasa. John Larson nanga John Kikot, memre fu a Bijkantoro Komte, ben interview sma èn den ben gebroiki video fu taki fu a historia fu a bow-wroko èn fu a drukwroko na ini Amerkankondre. John Barr, wan memre fu a Tiri Skin, ben hori a lasti lezing, èn ben gi a nyun drukkerij nanga den dri gebow abra na Yehovah Gado.

A wiki na baka, den sma di e wroko na Bethel fu Patterson nanga Brooklyn ben kisi na okasi fu go luku den nyun gebow. Ala nanga ala, 5920 fu den ben go luku den nyun gebow na a ten dati.

Fa wi musu si a drukkerij?

Na ini na inwijding lezing, Brada Barr ben memre den arkiman taki a no den masyin di de na ini den drukkerij, awansi fa a bigi, de prenspari. Na den sma de prenspari. Den publikâsi di wi e druk abi furu krakti tapu a libi fu sma.

Ibriwan fu den nyun drukpers kan druk wán milyun traktaat na ini pikinmoro wán yuru! Ma wán traktaat kan abi bun furu  krakti tapu wan sma en libi. Fu eksempre, na ini 1921 wan grupu man na ini Zuid-Afrika, ben wroko na wan pasi pe loko e waka. Wan fu den man disi, di nen Christiaan, ben feni wan pisi papira na ondro na isri pe den loko e waka. A papira ben de wan fu den traktaat fu wi. Christiaan ben leisi en finifini. A lon go miti a masra fu en umapikin èn a bari nanga faya: „Tide mi feni a waarheid!” Syatu baka dati, den tu man disi skrifi go na a bijkantoro fu di den ben wani sabi moro. A bijkantoro fu Zuid-Afrika ben seni moro Bijbel publikâsi gi den. Den tu man studeri Bijbel, den teki dopu, èn den ben prati a waarheid fu Bijbel nanga trawan. Leki bakapisi fu dati, furu sma teki a waarheid. Te yu e luku en bun, dan na ini den fosi yari baka 1990, dan moro leki wán hondro fu den bakapikin fu den ben de Kotoigi fu Yehovah; disi ben de a bakapisi fu di wan man ben feni wán traktaat nomo na wan pasi pe loko e waka!

Brada Barr ben taki dati den publikâsi di wi e druk e tyari sma kon na ini waarheid, a e meki den tan na ini waarheid, a e gi den deki-ati fu kisi moro faya, èn a e meki taki wánfasi de na mindri brada nanga sisa. Ma san moro prenspari, na taki a lektuur di wi alamala e prati, e gi glori na a Gado fu wi, Yehovah!

Fa Yehovah e si a drukkerij?

Brada Barr aksi den arkiman fu poti prakseri na a fasi fa Yehovah e si a drukkerij. A no abi en fanowdu kwetikweti. A kan meki ston preiki a bun nyunsu! (Lukas 19:40) Boiti dati, den kefalek masyin, di bigi, di e wroko esi-esi, noso di man du kefalek sani, no e tyari Yehovah en ede gowe. Iya, na en meki hemel nanga grontapu! (Psalm 147:10, 11) Yehovah sabi moro bun fasi fu meki buku, fasi di libisma no sabi ete, iya, den no prakseri fu den srefisrefi ete. Sobun, san Yehovah e si leki trutru warti sani? A no de fu taki dati na ini a drukkerij disi a e si den tumusi moi fasi fu a pipel fu en, namku a lobi, a bribi, èn a fasi fa den e gi yesi na en.

Brada Barr gi wan eksempre fu sori san lobi abi fu du nanga a tori disi. Wan meisje e baka wan kuku gi en papa nanga mama. A no de fu taki dati a papa nanga a mama fu en sa prisiri fu a sani disi. Iya, efu a kuku fadon noso efu a no fadon, a sani di e naki na ati fu a papa nanga mama, na a lobi di a pikin e sori gi den, fu di a du so wan lobi-ati sani. Na a srefi fasi, te Yehovah e luku a nyun drukkerij disi, a no e luku a gebow nanga den masyin di de na ini. Na a fosi presi, a e si fa sma e sori lobi gi a nen fu en.​—Hebrewsma 6:10.

Moro fara, neleki fa Yehovah ben si na ark di Noa ben meki, leki wan fasi fa a ben e sori bribi, na so a e si a drukkerij disi leki wan krin buweisi fu a bribi fu wi. San wi e bribi? Noa ben bribi taki den sani di Yehovah ben taki na fesi ben o kon tru. Wi e bribi taki wi e libi na ini den lasti dei, taki a bun nyunsu na a moro prenspari boskopu di de fu yere na grontapu, èn taki a de prenspari taki sma yere a boskopu disi. Wi sabi taki a Bijbel boskopu kan kibri a libi fu sma.​—Romesma 10:13, 14.

A no de fu taki dati Yehovah e si a drukkerij disi tu leki wan buweisi taki wi e gi yesi na en. Soleki fa wi sabi, a de a wani fu en taki a bun nyunsu preiki na heri grontapu bifo a kaba kon (Mateyus 24:14). A drukkerij disi, makandra nanga tra drukkerij na tra presi na grontapu, sa yepi fu du a wroko disi.

Iya, a de fu si taki a pipel fu Yehovah abi lobi, bribi, èn taki den e gi yesi na Gado. Disi den e sori nanga a fasi fa den e tyari moni kon na wán fu meki den gebow disi, èn a fasi fa den e gebroiki den gebow. Yu kan si dati tu na ini a fasi fa den e wroko fayafaya na ala kondre, fu tan meki a bun nyunsu bekènti gi ala sma di wani arki.

[Faki/​Prenki na tapu bladzijde 11]

DEN DRUKKERIJ NA INI AMERKANKONDRE KON MORO BIGI

1920: Den tijdschrift ben druk nanga a fosi drukpers na 35 Myrtle Avenue, Brooklyn.

1922: A drukkerij froisi go na wan bigi gebow, di abi siksi sodro na 18 Concord Street. Na a ten dati den bigin druk buku drape.

1927: A drukkerij froisi go na wan nyun gebow di ben bow na 117 Adams Street.

1949: A drukkerij kon tu tron moro bigi, fu di a gebow kisi ete neigi sodro.

1956: A drukkerij na Adams Street kon tu tron moro bigi di den bow wan nyun gebow na 77 Sands Street.

1967: Wan gebow fu tin sodro ben bow. Disi ben meki taki den brada ben man meki wán bigi drukkerij, fu di den ben kan wroko makandra nanga den drukkerij di ben de na ini difrenti gebow. Disi ben de tin tron moro bigi leki a fosi gebow.

1973: Ete wan drukkerij ben bow na Wallkill, spesrutu fu druk tijdschrift.

2004: Ala a drukwroko gi Amerkankondre e du na Wallkill, èn fu drape den e seni den publikâsi go na den gemeente.