„Mi sa kisi yepi fu Yehovah”

Yehovah e blesi den wan di e gi densrefi gi a bun fu trawan

WAN man e rèi na tapu en baisigri na ini a busi fu a kondre Kamerun. A e rèi omeni yuru na tapu pasi di sungu èn pasi di lai nanga tokotoko. A e kisi fu du nanga den tyalensi disi soso fu man go gi trawan deki-ati. Tu brada na ini Zimbabwe e waka 15 kilometer èn den e koti liba abra di span nanga watra, aladi den e meki muiti fu hori den krosi nanga den susu na tapu den ede so taki den no nati. Den e du disi fu gi leri na wan grupu di e libi na wan farawe presi. Na wan tra presi, wan uma e opo fo yuru mamanten fu go na wan ati-oso zuster di man studeri Bijbel wán yuru nomo fruku mamanten.

Suma na ala den sma disi, di e meki so furu muiti? Den alamala na Kotoigi fu Yehovah di e du furuten diniwroko fu leri sma a waarheid fu Bijbel. Den furuten dinari disi na gewoon pionier, spesrutu pionier, zendeling, opziener di e reis, nanga dusundusun friwani-wrokoman di de na den Bethel-oso na heri grontapu. A fasi fa den e gi densrefi fu yepi trawan, na wan prenspari sani di de fu si na ala den sma disi. *

Fu san ede wi musu yepi trawan?

Yehovah Kotoigi e poti prakseri na a frumane di na apostel Paulus ben gi Timoteyus, namku: „Du ala san yu man fu gi yusrefi na Gado leki wan sma di a feni bun, wan wrokoman di no abi fu syen fu noti èn di e gebroiki a wortu fu waarheid na wan reti fasi” (2 Timoteyus 2:15). Ma san e gi den hondro dusundusun Kotoigi a deki-ati fu dini leki furuten dinari?

Te sma e aksi furuten dinari fu san ede den e wroko so tranga na ini a diniwroko fu Yehovah, dan a piki di den e gi abi fu du nanga a lobi di den abi gi Gado nanga tra libisma (Mateyus 22:37-39). Disi fiti srefisrefi, fu di efu den no abi lobi, dan ala muiti di den e du na fu soso.​—1 Korentesma 13:1-3.

Diniwroko di yu e du gi a bun fu trawan

Ala Kresten di gi densrefi abra na Gado teki a kari fu Yesus: „Efu wan sma wani kon na mi baka, dan a no musu teri ensrefi moro, ma meki a teki en pina-postu èn tan waka na mi baka” (Mateyus 16:24). Wan sma di no e teri ensrefi moro, e saka ensrefi sondro dwengi na Yehovah Gado èn na Yesus Krestes èn a e libi akruderi a tiri fu den. Furu sma di abi a denki disi, go na ini a furuten diniwroko pe den e wroko gi a bun fu trawan.

Furu Kotoigi e du furu muiti fu du moro na ini a diniwroko di den e du gi Yehovah. Luku Júlia di abi 56 yari, èn di de wan gewoon pionier na ini São Paulo, Brasyonkondre. „Wan Sneisi brada ben aksi mi efu mi ben wani leri a Sneisitongo”, a e memre. „Ma fu di mi grani kaba, mi no ben prakseri fu leri wan nyun tongo. Ma baka wan tu dei mi agri fu teki a tyalensi disi. Now mi man hori wan Bijbel takimakandra na ini Sneisitongo.”

A bijkantoro fu Yehovah Kotoigi na ini Peru e fruteri disi: „Na ini den lasti yari di pasa, hondrohondro gewoon pionier froisi go na kontren pe nowan enkri gemeente e wroko. Nanga disi  den e sori taki den abi deki-ati èn taki den de klariklari fu du a diniwroko fu den gi a bun fu trawan. Den froisi go na foto di de farawe èn pe nyunmodo sani no de, èn pe wroko no de fu feni so makriki. Den brada nanga sisa disi de klariklari fu du ala san de fanowdu fu man tan du a diniwroko fu den. Ma san moro prenspari, na taki a wroko di den e du na ini a diniwroko e tyari bun bakapisi kon na ini furu presi. Opziener di e reis e taki dati nyun grupu seti nanga yepi fu den gewoon pionier disi di no e prakseri densrefi.”

Son Kresten poti den eigi libi na ini kefar soso fu yepi tra brada nanga sisa (Romesma 16:3, 4). Wan kring-opziener, di e dini na ini wan kontren na ini Afrika pe hebi feti e feti, ben taki: „Fosi wi doro a lasti presi pe sma ben tapu a pasi, wan presi di de na mindri a kontren di opruruman ben teki abra, èn a kontren di ben de na ini anu fu lanti, dan fo komandanti fu den opruruman, makandra nanga den bodyguard, lontu wi mi nanga mi wefi, èn den ben wani sabi suma na wi. Di den luku den identiteit-karta fu wi, dan den si taki wi ben de fu wan kontren di ben de na ini anu fu lanti, èn den no ben frutrow wi. Den ben feni taki mi na wan spion. Fu dati ede, den ben teki a bosroiti fu trowe mi na ini wan peti. Mi fruteri den suma wi de, èn te fu kaba den lusu wi.” Den gemeente ben prisiri srefisrefi taki a trowpaar disi, di no ben e prakseri densrefi, ben kisi na okasi fu kon na den!

Aladi den furuten dinari disi e kisi fu du nanga problema, toku a grupu fu den e kon bigi moro nanga moro na heri grontapu (Yesaya 6:8). Den wrokoman disi di e wroko fayafaya, e warderi a grani di den abi fu dini Yehovah. Na ini a ten disi, milyunmilyun tra sma e prèise Yehovah na a srefi fasi, sondro fu prakseri densrefi. Yehovah fu en sei, e blesi den pasa marki (Odo 10:22). Fu di den e frutrow taki Gado sa blesi den èn e yepi den, meki den fayafaya wrokoman disi, abi a srefi denki leki a psalm skrifiman, di ben singi: „Mi sa kisi yepi fu Yehovah.”​—Psalm 121:2.

[Futuwortu]

[Prenspari pisi na tapu bladzijde 9]

„A pipel fu yu sa de klariklari fu gi densrefi tapu a dei te yu sa tyari yu srudati legre fu go feti.”​—PSALM 110:3

[Faki na tapu bladzijde 8]

YEHOVAH LOBI DEN GETROW FUTUBOI FU EN

„Tanapu kánkan, no degedege, èn ala ten abi furu fu du na ini a wroko fu Masra, fu di unu sabi taki a wroko di unu e du gi Masra no de fu soso.” —1 Korentesma 15:58.

„Gado no de onregtfardiki taki a sa frigiti den wroko fu unu èn taki a sa frigiti a lobi di unu sori gi a nen fu en.”​—Hebrewsma 6:10.