Ondrofenitori

Mi kisi ’san na ati fu mi ben wani’

SOLEKI FA DOMINIQUE MORGOU FRUTERI

Mi ben wakti bun langa fu go na Afrika, èn te fu kaba, na ini december 1998, mi ben de na ini a kondre disi! Wan winsi di mi ben abi sensi mi pikin-nengreten, ben kon tru now. Ala ten mi ben e firi prisiri srefisrefi te mi ben e prakseri den bigi opo-presi fu Afrika nanga den moi werdri meti. Now mi ben de drape trutru! Na a srefi ten, wan tra winsi fu mi ben kon tru. Mi ben de wan preikiman na ini a furuten diniwroko, èn mi ben e dini na ini wan tra kondre. Furu sma ben denki kande taki mi no ben o man du disi. Mi no man si bun srefisrefi, èn mi e waka na tapu den santi strati fu den Afrikan dorpu nanga yepi fu wan dagu di leri fa fu sori wan breni sma a pasi. Ma a dagu disi ben leri fu sabi den strati na ini den foto fu Europa. Meki mi taigi yu fa a du kon taki mi ben man dini na ini Afrika èn fa Yehovah gi mi ’san na ati fu mi ben wani’.​—Psalm 37:4.

MI GEBORE tapu 9 yuni 1966, na a zuidsei fu Fransikondre. Mi ben de a moro yonguwan fu seibi pikin, namku tu boi nanga feifi umapikin, èn wi papa nanga mama sorgu gi wi alamala na wan lobi-ati fasi. Ma wan sari sani miti mi na ini mi yongu yari. Neleki mi granmama, mi mama, nanga wan fu den sisa fu mi, mi abi wan siki di de na ini a famiri, èn a siki disi e meki taki te fu kaba yu e kon breni krinkrin.

Di mi ben de wan tini, dan sma desko mi fu di mi na fu wan tra ras, sma ben denki takru fu mi sondro fu sabi mi bun, èn sma ben e handri na wan hoigrifasi nanga mi. Den sani disi meki taki mi bigin tyari misrefi tra fasi leki fa sma ben e fruwakti fu mi. A ben de na ini a muilek ten disi taki wi froisi go tan na ini a kontren fu Hérault. Drape wan tumusi moi sani pasa.

Wan sonde mamanten, tu Kotoigi fu Yehovah  kon na wi oso. Mi mama ben sabi den èn a kari den kon na inisei. Wan fu den uma aksi mi mama efu a ben kan memre ete taki a ben pramisi en taki wan dei a ben o teki wan bijbelstudie. Mi mama memre a sani dati, èn a aksi: „O ten wi o bigin?” Den meki mofo taki den ben o miti ibri sonde mamanten, èn na so mi mama bigin leri „a waarheid fu a bun nyunsu”.​—Galasiasma 2:14.

Mi e kon sabi sani moro bun

Mi mama ben meki ala muiti fu frustan èn fu memre san a ben e leri. Fu di a ben breni, meki a ben musu leri fu hori ala sani na ede. Den Kotoigi ben abi furu pasensi nanga en. Mi fu mi sei, mi ben e kibri na ini mi kamra te den Kotoigi ben e kon, èn solanga den no ben gowe, mi no ben e kon na doro. Ma wan bakadina, Eugenie, wan fu den Kotoigi, miti mi èn a taki nanga mi. A taigi mi taki Gado en Kownukondre ben o tyari wan kaba kon na ala hoigrifasi, ala bita-ati, nanga ala pratifasi na grontapu. „Na Gado wawan man tyari wan lusu kon”, na so a ben taki. A aksi mi efu mi ben wani kon sabi moro. A dei baka dati, mi bigin studeri Bijbel.

Ala sani di mi ben e leri ben nyun gi mi. Mi ben kon frustan now taki Gado e gi pasi fu wan pisi ten taki ogridu de na grontapu, èn taki a abi leti fu du dati (Genesis 3:15; Yohanes 3:16; Romesma 9:17). Mi ben kon sabi tu taki Yehovah no e libi wi sondro howpu. A gi wi a tumusi moi pramisi taki wi sa man libi fu têgo na ini wan paradijs grontapu (Psalm 37:29; 96:11, 12; Yesaya 35:1, 2; 45:18). Na ini a Paradijs dati, mi ben o man si baka, bika mi ben e kon breni safrisafri.​—Yesaya 35:5.

Mi e go na ini a furuten diniwroko

Tapu 12 december 1985, mi teki dopu na ini watra fu sori taki mi ben gi misrefi abra na Yehovah, èn na so mi ben teki na eksempre fu mi sisa Marie-Claire, di ben dopu kaba. Syatu baka dati, mi brada Jean-Pierre nanga mi lobi mama teki dopu tu.

Na ini a gemeente pe mi ben de, wan tu gewoon pionier, noso furuten preikiman ben de. A ben e gi mi deki-ati fu si fa den ben e prisiri èn fa den ben de fayafaya fu du a diniwroko. Srefi Marie-Claire go na ini a furuten diniwroko, aladi a ben e siki na en ai èn aladi a ben e weri wan sani na en wan sei futu fu man waka bun. Te na a dei fu tide, na eksempre fu en e gi mi deki-ati fu horidoro na ini a diniwroko fu Yehovah. Fu di mi ben abi demakandra nanga so furu pionier na ini a gemeente èn na ini mi famiri, meki dati yepi mi fu kon kisi a tranga winsi fu teki prati tu na a furuten diniwroko. Sobun, na ini november 1990, mi bigin dini leki pionier na ini a foto Béziers.​—Psalm 94:17-19.

Mi kisi yepi di mi ben e firi brokosaka

Na ini a diniwroko, mi kisi yepi fu tra pionier di ben e broko den ede nanga mi. Aladi dati ben de so, toku mi ben e firi brokosaka ten na ten fu di mi no ben man du ala san mi ben wani du, èn mi ben winsi taki mi ben man du moro. Ma Yehovah yepi mi fu pasa den pisi ten dati di mi ben e firi brokosaka. Nanga yepi fu na Index van Wachttoren-publikaties, mi ben suku ondrofenitori fu pionier di ben e siki na den ai, neleki mi. A fruwondru mi fu si omeni fu den sortu sma disi ben de! Den tori disi gi mi bun rai nanga deki-ati sosrefi, èn den leri mi fu warderi san mi ben man du, èn fu frustan taki mi no ben man du moro leki dati.

Fu man sorgu misrefi, mi ben e krin bigi wenkri makandra nanga tra Kotoigi. Wan dei mi si taki wan fu den wrokoman ben e krin den presi baka di mi ben krin wan syatu pisi ten bifo. A ben de krin taki mi no ben e krin a presi bun. Mi go na Valérie, a pionier di ben e teki fesi fu a grupu wrokoman pe mi ben de na ini, èn mi aksi en fu taigi mi krin efu mi ben e meki a wroko kon moro hebi gi ala tra sma. Na wan lobi-ati fasi, a no taigi mi noti, ma a meki misrefi bosroiti o ten mi ben wani tapu nanga a wroko. Na ini maart 1994, mi tapu nanga a wroko di mi ben e du fu krin wenkri.

Agen mi ben e firi brokosaka, fu di mi ben feni taki mi no bun gi noti. Mi begi Yehovah fayafaya, èn mi sabi taki a yere den begi fu mi. A ben de wan bigi yepi baka gi mi taki mi ben e studeri Bijbel nanga den Kresten publikâsi. Ma aladi mi ai ben e kon moro swaki, toku mi ben e kisi wan  moro bigi angri fu dini Yehovah. San mi ben kan du?

Mi ben musu wakti fosi, ma wantronso mi teki wan bosroiti

Mi skrifi wan brifi go na a kantoro na ini a foto Nimes, pe brenisma kan kisi leri fa fu yepi densrefi, èn te fu kaba mi ben mag go teki leri drape dri mun langa. A ten dati no ben de lasi-ten. Mi kon frustan san ben o de den bakapisi fu a siki fu mi, èn mi leri fu fiti misrefi na dati. Mi ben e miti sma di ben abi ala sortu siki, èn a sani dati yepi mi fu frustan o warti a Kresten howpu fu mi de. Awansi fa a no fa, mi ben abi wan marki na ini a libi, èn mi ben kan du wan bun sani. Boiti dati, mi leri fu leisi na a fasi fa brenisma e leisi, èn mi du dati na ini Fransitongo.

Di mi drai go baka na oso, dan mi famiri kon si taki a leri di mi ben kisi ben de wan bigi yepi gi mi. Ma wan sani di mi no ben lobi kwetikweti, na a weti tiki di mi ben musu gebroiki. Mi no ben wani waka nanga a tiki dati. A ben o bun efu mi ben kan abi wan tra yepisani, wan dagu kande di ben leri fu sori breniwan a pasi.

Mi skrifi wan brifi go na a kantoro di e seti den tori disi, fu aksi den wan dagu, ma den sma taigi mi taki wan lo sma ben de na mi fesi. Boiti dati, den sma fu a kantoro ben o abi fu ondrosuku efu trutru mi ben abi wan dagu fanowdu. A no ala brenisma e kisi wan dagu di e sori den a pasi. Wan dei, wan uma di e yepi fu tiri wan organisâsi di e wroko fu a bun fu brenisma, taigi mi taki wan tennis-grupu na ini a kontren fu wi ben o gi wan brenisma di ben e libi drape, noso wan sma di no man si so bun, wan dagu di leri fu sori den sortu sma dati a pasi. A taki dati a ben denki mi. Mi ben o wani a dagu disi? Mi si Yehovah anu ini a tori disi èn mi taigi den taki mi ben wani a dagu di den ben wani gi mi. Ma toku mi ben musu wakti fosi mi kisi a dagu.

Mi ben e prakseri Afrika ete

Aladi mi ben e wakti, mi poti mi prakseri na wan tra sani. Soleki fa mi ben taki na a bigin, dan  sensi mi pikin-nengreten mi ben abi a winsi fu go na Afrika. Aladi mi ai ben e kon swaki, toku a winsi dati ben tranga moro leki oiti bifo, spesrutu fu di mi yere taki bun furu sma na ini Afrika wani kon sabi Bijbel èn wani dini Yehovah. Wan pisi ten na fesi, mi ben taki frafra nanga Valérie fu a winsi di mi abi fu go na Afrika. Mi aksi en efu a ben o wani kon nanga mi. A ben feni en bun, èn wi skrifi wan brifi go na difrenti fu den Fransitongo bijkantoro fu Yehovah Kotoigi na ini Afrika.

Wi kisi piki komoto fu Togo. Mi ben e prisiri srefisrefi, èn mi aksi Valérie fu leisi a brifi gi mi. A brifi ben abi bun nyunsu, èn fu dati ede Valérie taki: „We, san e tapu wi fu go?” Baka di wi nanga den brada na a bijkantoro skrifi brifi gi makandra, dan den taigi wi fu kontakti Sandra, wan pionier na ini Lomé, a mamafoto fu Togo. Wi bosroiti fu go drape tapu 1 december 1998.

A kondre ben e difrenti srefisrefi fu a kondre fu mi, ma a ben e gi mi bigi prisiri! Baka di na opolani saka na ini Lomé, dan wi komoto na ini a opolani, èn wantewante wi firi fa a faya weer fu Afrika tapu wi heri skin neleki wan bedikrosi. Sandra kon teki wi. Disi ben de a fosi leisi taki wi ben e miti makandra, ma wantewante wi ben e firi neleki wi na bun mati. Syatu bifo wi doro na ini a kondre, Sandra nanga en pionier patna Christine ben kisi a grani fu go dini leki spesrutu pionier na ini Tabligbo, wan pikin foto na mindrisei fu a kondre. Now wi ben abi a grani fu go makandra nanga den na a kontren pe den ben o dini. Wi tan drape sowan tu mun, èn di wi gowe fu drape, mi ben sabi taki wan dei mi ben o drai go baka.

Mi e prisiri fu de baka na ini Togo

Di mi ben doro baka na ini Fransikondre, dan wantewante mi bigin sreka sani fu go baka na Togo. Fu di mi famiri yepi mi, meki mi ben man seti sani fu tan drape siksi mun. Sobun, na ini september 1999, mi ben de baka na ini wan opolani di ben e frei go na Togo. Ma disi leisi, mi ben de mi wawan. Prakseri fa mi famiri ben e firi di den si fa mi ben e gowe mi wawan aladi mi ai no bun! Ma den no ben abi fu broko den ede. Mi gi mi papa nanga mama a dyaranti taki den mati fu mi di ben kon de leki famiri gi mi, ben o wakti mi na ini Lomé.

Mi ben e prisiri trutru di mi ben de baka na ini wan kontren pe so furu sma wani kon sabi Bijbel! A de wan aladei sani fu si sma e leisi Bijbel na strati. Na ini Tabligbo sma e kari yu kon fu taki nanga den fu Bijbel. Èn a ben de wan grani trutru fu tan makandra nanga tu spesrutu pionier sisa di ben libi na ini wan oso di no ben abi tumusi furu pranpran! Mi kon leri sabi wan tra kulturu, èn mi kon leri si sani na wan tra fasi. A moro prenspari sani di mi kon si, na taki wi Kresten brada nanga sisa na ini Afrika e poti Kownukondre afersi na a fosi presi na ini den libi. Fu gi wan eksempre, aladi den musu waka bun furu kilometer fu doro a Kownukondre zaal, toku dati no e tapu den fu go na den konmakandra. Mi leri bun furu sosrefi fu a lobi nanga a switifasi fu den.

Wan dei di mi ben e komoto fu a preikiwroko, dan mi fruteri Sandra taki mi ben frede fu go baka na Fransikondre. Mi ai ben kon moro takru. Mi ben e prakseri den strati na ini Béziers di lai nanga sma èn nanga oto, mi prakseri den trapu na ini den hei gebow drape, èn mi prakseri furu  tra sani di e meki a libi muilek gi wan sma di no e si so bun. Ma na ini Tabligbo a ben de tra fasi. Aladi den strati ben de santi pasi, toku den ben tiri, fu di bigi ipi sma, noso furu oto nanga tra sani no ben de. Fa mi ben o du na ini Fransikondre, now di mi ben kon gwenti a libi na ini Tabligbo?

Tu dei baka dati mi mama bel mi fu taigi mi taki a skoro pe sma ben e leri dagu fa fu sori brenisma a pasi, ben e wakti mi. Wan yongu dagu di nen Océane ben kisi leri fu sori mi a pasi, iya, yu kan taki dati a ben o tron mi ai. Agen mi kisi san mi ben abi fanowdu, so taki mi no ben abi fu broko mi ede nanga noti. Baka di mi wroko switi na ini Tabligbo siksi mun langa, dan mi drai go baka na Fransikondre fu go miti Océane.

Baka di Océane kisi leri wan tu mun fu kon sabi fa fu sori mi a pasi, dan den sma libi en gi mi. Na ini a bigin a no ben makriki. Wi ben musu leri fu frustan makandra. Ma safrisafri mi kon frustan o tranga mi ben abi Océane fanowdu. Fu taki en leti, mi no man libi sondro Océane now. Fa sma na ini Béziers ben feni en te den ben e si mi e kon na den oso nanga wan dagu? Den sori bun furu lespeki nanga switifasi gi mi. Ala sma na ini a birti kon lobi Océane so te. Fu di furu sma no e firi switi te den de makandra nanga wan sma di malengri, noso di abi wan siki, meki a dagu yepi mi fu taki fu a siki fu mi sondro fu syen. Den sma ben e firi moro bun, èn den ben e arki mi. Iya, fu di mi ben abi Océane, meki mi ben man bigin wan takimakandra moro bun leki oiti bifo.

Mi de na ini Afrika makandra nanga Océane

Mi no ben frigiti Afrika, èn now mi ben e seti sani fu go drape fu a di fu dri leisi. Disi leisi Océane ben e go makandra nanga mi. Wan tra yongu trowpaar, namku Anthony nanga Aurore, èn sosrefi mi mati Caroline, ben e go tu nanga mi. Den alamala ben de pionier, neleki mi. Tapu 10 september 2000, wi doro na ini Lomé.

Na ini a bigin, furu sma ben frede Océane. Wan tu sma nomo na ini Lomé oiti ben si so wan bigi dagu, fu di furu dagu na in Togo na pikin dagu. Te den ben e si a dyakti di a ben e weri, dan sonwan fu den sma ben e denki taki a ben musu weri en fu di a ben de wan krasi dagu. Océane fu en sei leri fu kibri mi ibri leisi te a ben denki taki ogri ben o miti mi. Toku a no teki langa fosi Océane fiti ensrefi na a nyun kontren. Te a e weri a dyakti fu en, dan a sabi taki a musu du san mi e fruwakti fu en, iya, a sabi taki a musu tyari ensrefi na wan yoisti fasi èn na wan frantwortu fasi, èn a e tan na mi sei. Te mi e puru a dyakti na en skin, dan a lobi prei, èn son leisi a e du ogri sani. Mi nanga en abi furu prisiri nanga makandra.

Wi alamala ben kisi kari fu go tan nanga Sandra nanga Christine na ini Tabligbo. Fu yepi den brada nanga sisa fu a kontren dati fu kon gwenti Océane, meki wi kari den kon na wi oso, èn wi sori den san a dagu disi e du. Wi sori den fu san ede mi abi a dagu disi fanowdu, èn fa den musu tyari densrefi te den de na ini en birti. Den owruman ben agri nanga makandra taki Océane ben musu kon nanga mi na a Kownukondre zaal. Fu di den sma na ini Togo no ben gwenti a sani disi, meki den brada taki fu a sani disi na ini a gemeente, so taki den sma ben kan frustan sani moro bun. Te mi ben e du a diniwroko fu mi, dan Océane ben e kon nanga mi soso te mi ben e tyari gobaka èn te mi ben e go hori bijbelstudie. Na ini den situwâsi dati sma ben o frustan moro bun fu san ede a ben de nanga mi.

Mi e tan feni en wan prisiri fu preiki na ini a kontren disi. Ala ten a ben naki mi ati fu si fa den lobi-ati sma drape ben e hori trawan na prakseri, fu di den ben e du sani fu yepi trawan. Wan fu den sani dati, na taki den no ben e draidrai fu poti wan sturu gi mi fu sidon. Na ini oktober 2001, mi mama kon nanga mi na Togo, di mi ben e go drape fu a di fu fo leisi. Baka dri wiki a drai go baka na Fransikondre. A ben abi a dyaranti taki sani ben e go bun nanga mi, èn a ben e firi prisiri.

Mi e taki Yehovah tangi trutru taki mi ben man dini na ini Togo. Mi no e tweifri taki Yehovah sa tan gi mi ’san mi ati wani’, aladi mi e tan gebroiki ala san mi abi na ini a diniwroko fu en. *

[Futuwortu]

[Prenki na tapu bladzijde 10]

Ala ten mi ben e prisiri te mi ben e prakseri den bigi opo presi fu Afrika nanga den moi werdri meti

[Prenki na tapu bladzijde 10]

Océane ben e kon nanga mi te mi ben e go tyari gobaka

[Prenki na tapu bladzijde 11]

Den owruman ben agri nanga makandra taki mi ben musu tyari Océane kon na den konmakandra