Kisi wini fu a moro bun leri di de fu feni!

BIJBEL e sori taki Yehovah Gado na a Mekiman fu ala sani, sosrefi fu libisma (Genesis 1:27; Openbaring 4:11). Leki a Gran Leriman, a ben gi leri na den fosi tu libisma, Adam nanga Eva, èn a ben sreka den fu libi na ini a moi dyari fu Eden. A ben abi na prakseri fu tan gi den leri èn fu sorgu den fu têgo (Genesis 1:28, 29; 2:15-17; Yesaya 30:20, 21). Prakseri pikinso san disi ben o wani taki gi den!

Ma a de wan sari sani taki a fosi trowpaar ben handri na wan fasi di meki taki den lasi den moi sani disi di den ben kan fruwakti. A tranga-yesi fu den meki taki libisma bigin go na baka na skin fasi èn taki den no hori densrefi moro na bun gwenti nanga gronprakseri (Genesis 3:17-19; Romesma 5:12). Luku san Bijbel e taki fu den sma di ben e libi syatu baka di Gado meki libisma: „Yehovah ben si taki na ogridu fu libisma ben kon furu na grontapu èn taki ala prakseri di ben de na ini den ati, ben takru ala ten.”​—Genesis 6:5.

Pikinmoro 4500 yari pasa sensi Yehovah taki dati doronomo libisma abi a firi fu du ogri, èn a situwâsi pe libisma de na ini now kon ogri moro leki oiti bifo. Furu sma lobi lei, fufuru, noso feti nanga trawan. Ibri dei den problema e kon moro furu, èn moro nanga moro sma no e broko den ede nanga trawan. Furu tron wi e si taki a banti di libisma abi nanga makandra èn nanga famiriman, de fu broko, a no so? Ma toku a no Gado e meki taki a situwâsi de so na ini a ten disi, èn a no de so taki a no e broko en ede nanga den problema fu a ten disi. Ala ten Yehovah e broko en ede nanga a bun fu sma, èn a de klariklari fu leri den sma di e suku yepi na en fu kon sabi fa fu libi wan koloku libi. Sowan 2000 yari pasa, Yehovah seni en Manpikin Yesus Krestes kon na grontapu, èn Yehovah sori taki a wani gi leri na sma di wani meki a libi fu den waka bun. Yesus sori wi san na volmaakti leri, bika a ben kisi leri fu a Gran Leriman furu milyardmilyard yari langa.

A leri di a tru Kresten bribi e gi

Yesus Krestes seti a tru Kresten bribi, di de wan fasi fu libi di abi fu du nanga lobi. A tru Kresten bribi e leri wi taki den prakseri fu wi èn den sani di wi e du musu de akruderi a wani fu Gado, èn dati musu gi en nen grani nanga glori (Mateyus 22:37-39; Hebrewsma 10:7). Na Yehovah, a Tata fu Yesus, ben e horibaka gi Yesus di a ben e leri sma fa fu libi. Na ini Yohanes 8:29 wi e leisi fu a yepi di Yesus ben kisi fu Gado: „A sma di seni mi kon, de nanga mi; a no gowe libi mi fu mi tan mi wawan, fu di ala ten mi e du san e plisi en.” Iya, na ini a heri diniwroko fu Yesus, a ben kisi yepi èn tiri fu en Tata. Den fosi bakaman fu Yesus ben kisi yepi te den ben e kisi fu du nanga den problema fu a libi. Yehovah ben gi den leri nanga yepi fu en Manpikin. Fu di den du san Yesus leri den èn fu di den waka baka na eksempre fu en, meki den ben tron moro bun sma. Na so a de tu nanga den disipel fu en na ini a ten disi.​—Luku a faki di nen „A krakti di Yesus nanga den leri fu en abi tapu sma”, na tapu bladzijde 6.

Wan spesrutu sani di abi fu du nanga a tru Kresten bribi, na taki a e gi leri di abi krakti tapu a frustan èn tapu na ati, so taki a kan kenki a fasi fa wan sma de (Efeisesma 4:23, 24). Meki  wi kari wán eksempre nomo. Luku san Yesus ben leri den disipel fu en fu sori den taki den musu de getrow na den trowpatna: „Un yere taki den taki: ’No du sutadu.’ Ma mi e taigi unu taki iniwan sma di e tan luku wan uma fu kisi tranga lostu gi en, du sutadu nanga en kaba na ini en ati” (Mateyus 5:27, 28). Nanga den wortu disi Yesus ben leri en disipel taki den ati musu de krin, èn taki takru prakseri nanga takru lostu kan abi tumusi takru bakapisi, srefi te wan sma no du ete san a abi na prakseri. A tru taki takru prakseri kan meki wan sma du sani di Gado no feni bun èn di kan hati tra sma, a no so?

Dati meki Bijbel e gi a rai disi: „No libi moro leki fa a grontapu sistema disi wani taki un musu libi, ma un musu kenki fu di unu e teki wan nyun fasi fu denki, so taki unu kan kon sabi san na Gado en wani di bun, di e plisi en èn di de volmaakti” (Romesma 12:2). Ma kande yu e aksi yusrefi efu a de so trutru taki wan sma man kisi wan nyun fasi fu denki te a e teki leri. Efu wi wani abi wan nyun fasi fu denki, dan wi musu memre wisrefi doronomo fu san ede wi musu go denki tra fasi, èn disi wi kan du te wi e furu wi frustan nanga den gronprakseri èn nanga den leri di de na ini Gado Wortu. Wi kan du disi te wi e teki a leri di Gado e gi na ini en Wortu.

Wi musu wani kenki

„A wortu fu Gado de na libi, a abi krakti” (Hebrewsma 4:12). Te nanga now ete Bijbel abi krakti tapu sma, èn dati e buweisi taki awansi Bijbel na wan owru buku, toku wi kan gebroiki en na ini a ten disi. A kan meki taki wan sma wani kenki a fasi fa a e tyari ensrefi, sosrefi taki a sma teki a tru Kresten bribi èn taki a tron wan moro bun sma. Den eksempre di e kon now e sori o bun a leri fu Bijbel de.

Emilia, di wi ben taki fu en kaba na ini na artikel na fesi, e taki: „A no ben nofo taki mi wawan ben e du muiti fu meki a situwâsi na ini mi osofamiri kon moro bun. Di mi bigin studeri Bijbel nanga Yehovah Kotoigi, dan mi kon frustan taki howpu de ete, èn mi bigin si sani na wan tra fasi. Mi ben leri fu abi moro pasensi èn fu dwengi misrefi te mi e atibron. Baka wan pisi ten, mi masra bigin studeri tu. A no ben makriki gi en fu tapu dringi sopi pasa marki, ma toku a tapu nanga a sani dati. Disi gi wi wan nyun okasi fu meki sani waka bun na ini wi trowlibi. Now wi na koloku Kresten èn wi e leri wi pikin den bun gronprakseri fu Bijbel.”​—Deuteronomium 6:7.

A leri di a tru Kresten bribi e gi sma, kan meki wan sma tapu tu nanga den takru gwenti èn a yayo libi fu en. Manuel * ben ondrofeni taki disi tru. Di a ben abi 13 yari, dan a lowe gowe fu oso èn a bigin smoko marwana. Bakaten a bigin gebroiki heroine. A ben abi seks nanga mansma  èn nanga umasma, soso fu kan feni wan tanpresi èn fu feni moni. Son leisi a ben e ròs sma tu fu feni moni so taki a ben kan sorgu ensrefi. Pikinmoro ala ten a ben hei. Fu di a ben e du sani nanga tranga, meki a ben go na strafu-oso furu tron. Wan leisi a ben tan fo yari na strafu-oso, èn drape a ben bigin yepi seri feti-sani. Baka di Manuel trow, a tan ondrofeni den takru bakapisi fu na ogri libi fu en. A e taki: „Te fu kaba, a ben kon so fara srefi taki wi ben tan na ini wan koi pe oso-fowru ben e tan fosi. Mi e memre ete taki mi wefi ben e bori na tapu wan tu ston. A situwâsi di wi ben de na ini ben de so takru, taki mi eigi famiri gi mi wefi a deki-ati fu gowe libi mi.”

San ben kenki en libi? Manuel e piki: „Wan sma di wi ben sabi, kon na wi oso fu taki fu Bijbel nanga wi. Mi ben meki a kon na wi, soso fu sori en taki a no tru dati wan Gado de di e broko en ede nanga libisma. Mi ben feni taki mi eigi libi ben e buweisi dati. A ben fruwondru mi taki a Kotoigi ben abi pasensi èn switifasi; dati meki mi ben feni en bun fu go na den konmakandra na ini a Kownukondre zaal. Aladi wan tu sma drape ben sabi fa mi ben e libi, toku den gi mi odi na wan switi fasi. Den meki mi firi leki mi na wan fu den. Dati ben de wan bigi trowstu gi mi. A sani dati ben abi so wan krakti na mi tapu, taki mi teki a bosroiti fu no abi noti moro fu du nanga drugs, èn fu go suku wan wroko. Fo mun baka di mi bigin studeri Bijbel, mi ben doro den markitiki fu go na ini a preikiwroko, èn fo mun baka dati, mi teki dopu leki wan Kotoigi fu Yehovah.”

Sortu bun bakapisi a tru Kresten bribi ben abi gi Manuel nanga en osofamiri? „Sondro a leri fu Bijbel, mi ben o dede langa ten kaba. A fasi fa Yesus leri wi fu libi, meki taki mi de baka nanga mi osofamiri. Den tu pikin fu mi no abi fu miti den srefi sani di mi miti di mi ben yongu ete. Mi e prisiri èn mi e taki Yehovah tangi trutru taki mi abi wan bun banti now nanga mi wefi. Wan tu fu den fositen mati fu mi ben fristeri mi èn den taigi mi taki a pasi di mi e waka now, na a moro bun wan.”

 Boiti taki wan Kresten musu de krin na sei fu bun gwenti nanga gronprakseri, dan a musu de krin na skin fasi tu. John di e libi na ini wan pôti kontren na ini Zuid-Afrika, ben kon frustan dati. A e fruklari: „Son leisi na umapikin fu wi no ben e wasi wan heri wiki langa, èn nowan fu wi ben broko wi ede nanga dati.” En wefi e taki dati na oso fu den ben morsu srefisrefi. Ma sani kenki di den bigin kisi Kresten leri. John ben tapu fu abi demakandra nanga wan grupu man di ben e fufuru wagi, èn a bigin poti moro prakseri na en osofamiri. „Wi leri taki wi leki Kresten musu hori wi skin nanga wi krosi krin. Mi lobi den wortu na ini 1 Petrus 1:16, di e frumane wi taki wi musu de santa fu di Yehovah Gado de santa. Now wi e pruberi tu fu meki a pikin oso fu wi de moi.”

Yu kan kisi a moro bun leri di de

Den ondrofenitori di wi kari didyonsro, na soso wan tu eksempre nomo. Dusundusun sma ben kon sabi fa fu libi wan moro betre libi di den kisi leri fu Bijbel. Fu di den no e bedrigi sma èn fu di den e wroko tranga, meki a wrokobasi fu den e warderi den. Den tron bun birtisma èn bun mati; den na sma di leri fu broko den ede nanga a bun fu trawan. Den abi a fasti bosroiti fu no libi wan yayolibi èn fu no du sani di a sondu skin wani; dati meki den e poti moro prakseri na a gosontu fu den. Na presi taki den e lasi den moni na sani di no fiti, den e gebroiki a moni now gi a bun fu densrefi èn gi a bun fu den osofamiri (1 Korentesma 6:9-11; Kolosesma 3:18-23). Te wi e luku den blesi di sma e kisi te den e du san Yehovah taki na ini Bijbel, dan a no de fu taki dati a moro bun fasi fu libi abi fu du nanga a tru Kresten bribi, fu di a bribi dati e gi a moro bun leri di de. Bijbel e taki fu wan sma di e libi akruderi den wet fu Gado, taki: „Ala san a e du sa waka bun.”​—Psalm 1:3.

A e gi wi deki-ati fu sabi taki na Almakti Gado, Yehovah, de klariklari fu gi wi leri. A e taki fu ensrefi: „Mi, Yehovah, na yu Gado, a Sma di e leri yu fu gi yusrefi wini, a Sma di e meki yu waka na tapu a pasi di yu musu waka” (Yesaya 48:17). Iya, Yehovah sori wi a pasi nanga yepi fu na eksempre fu en Manpikin, Yesus Krestes, èn nanga den leri di Yesus gi sma. Den leri fu en kenki a libi fu wan lo sma di ben sabi en di a ben de na grontapu, èn na so a de tu nanga furu sma na ini a ten disi di e libi akruderi den leri fu en. Fu san ede yu no e teki ten fu kon sabi moro fu den sani di a leri sma? Yehovah Kotoigi na ini yu birti sa prisiri fu yepi yu fu kisi a prenspari leri disi.

[Futuwortu]

[Faki/​Prenki na tapu bladzijde 6]

A krakti di Yesus nanga den leri fu en abi tapu sma

Sakeyus ben gebroiki en posisi leki edeman fu den belastingman fu kon gudu, fu di a ben e bedrigi èn fufuru den sma. Ma a ben kenki a fasi fa a ben e libi, fu di a ben du san Yesus leri en.​—Lukas 19:1-10.

Saulus fu Tarsus ben tapu fu frufolgu den Kresten; a teki a Kresten bribi, èn a tron na apostel Paulus.​—Tori fu den Apostel 22:6-21; Filipisma 3:4-9.

Wan tu fu den Kresten na ini Korente ben de ’sma di ben e huru, sma di ben e anbegi kruktugado, sma di ben e du sutadu, sma di ben e libi wan homo sekslibi, fufuruman, gridiman, drunguman, sma di ben e kosi trawan, èn bedrigiman’. Ma di den kon sabi a tru Kresten bribi, dan den ’wasi kon krin, den kon santa, èn den kon regtfardiki na ini a nen fu den Masra Yesus Krestes’.​—1 Korentesma 6:9-11.

[Prenki na tapu bladzijde 7]

Bijbel kan sori yu fa yu kan meki yu libi waka bun