Wan wet di abi fu du nanga lobi, skrifi na tapu na ati

„Mi wani poti mi wet na den inisei, èn na ini den ati mi sa skrifi en.”​—YEREMIA 31:33.

1, 2. (a) San wi o go luku now? (b) Fa Yehovah ben sori ensrefi na Sinaibergi?

NA INI den fosi tu artikel, wi ben kon si taki di Moses saka komoto fu Sinaibergi, a glori fu Yehovah ben meki taki en fesi ben e brenki. Wi ben taki tu fu a duku di Moses ben gebroiki fu tapu en fesi. We, kon meki wi go luku wan tra sani di abi fu du nanga a tori disi èn di de prenspari gi Kresten na ini a ten disi.

² Di Moses ben de na tapu a bergi, Yehovah ben taigi en san a ben musu du. Di den Israelsma kon makandra na Sinaibergi, den si fa Gado sori ensrefi na wan tumusi aparti fasi. „A ben pasa so na a di fu dri dei, di dei ben opo, taki dondru nanga koti-faya ben bigin kon, èn wan hebi wolku ben de na tapu a bergi nanga wan kefalek tranga babari fu wan tutu, so taki ala sma di ben de na ini a kampu ben bigin beifi. . . . Èn a heri Sinaibergi ben puru smoko, fu di Yehovah ben saka kon na en tapu na ini faya; èn a smoko fu en ben tan go na loktu neleki a smoko fu wan onfu pe den e bron karkiston, èn a heri bergi ben seki srefisrefi.”​—Exodus 19:16-18.

3. Sortu sani Yehovah gebroiki fu gi Israel den Tin Komando, èn san a pipel disi ben kon frustan?

³ Yehovah ben gebroiki wan engel fu fruteri a pipel den wet di wi sabi now leki den Tin Komando (Exodus 20:1-17). Fu dati ede, sma no ben abi fu tweifri taki den wet disi ben kon fu na Almaktiwan. Yehovah ben skrifi den komando disi na tapu tu plata ston. Na den ston disi Moses ben naki broko di a si taki den Israelsma ben e anbegi wan gowtu pikin kaw. Ete wan leisi Yehovah skrifi den komando na tapu ston. Disi leisi, di Moses saka komoto fu a bergi nanga den plata ston na ini en anu, en fesi ben e brenki. Now ala sma ben kon frustan taki den wet disi ben de tumusi prenspari.​—Exodus 32:15-19; 34:1, 4, 29, 30.

4. Fu san ede den Tin Komando ben de tumusi prenspari?

 ⁴ Den ben poti den tu plata ston pe den Tin Komando ben skrifi na tapu, na ini na ark fu a frubontu di ben de na ini a Moro Santa pisi fu a tabernakel; bakaten, na ark ben de na ini a tempel. Den wet di ben skrifi na tapu den plata ston disi ben e sori sma san na den moro prenspari gronprakseri fu a Wetfrubontu fu Moses, èn den ben e sori tu fa Gado ben o tiri a kondre. Den wet ben buweisi taki Yehovah ben e wroko nanga wán spesrutu pipel, wan pipel di ensrefi ben teki.

5. Fa den wet di Gado gi Israel, ben sori taki a ben lobi den?

⁵ Den wet disi ben leri sma furu sani fu Yehovah, spesrutu taki a ben lobi a pipel fu en. Den wet disi ben de wan tumusi warti presenti gi den sma di ben e gi yesi na en! Wan sabiman ben taki dati den Tin Komando ben hei moro iniwan libisma wet di abi fu du nanga bun gwenti nanga gronprakseri. Yehovah ben taki fu a heri Wet fu Moses: „Efu unu sa gi yesi soifri na mi sten èn trutru sa hori mi frubontu, dan seiker unu sa tron mi spesrutu gudu na mindri fu ala tra pipel, bika heri grontapu na fu mi. Èn unsrefi sa tron wan kownukondre fu priester èn wan santa pipel gi mi.”​—Exodus 19:5, 6.

Wan wet di skrifi na tapu na ati

6. Soleki fa a sori, dan sortu wet warti moro leki den wet di ben skrifi na tapu ston?

⁶ Iya, den wet disi fu Gado ben warti srefisrefi. Ma yu ben sabi taki salfu Kresten abi wan sani di warti moro leki wet di skrifi na tapu ston? Yehovah ben taki na fesi dati wan nyun frubontu ben o meki. A frubontu disi ben o de tra fasi leki a Wetfrubontu di a ben meki nanga a pipel fu Israel. „Mi wani poti mi wet na den inisei, èn na ini den ati mi sa skrifi en” (Yeremia 31:31-34). A no ben de so taki Yesus srefi, a Mindriman fu a nyun frubontu, ben skrifi wan wet sistema gi den bakaman fu en. Ma nanga den sani di a ben e taki èn ben e du, a ben meki a wet fu Yehovah doro a frustan nanga na ati fu den disipel fu en.

7. Suma na den fosi sma di kisi „a wet fu Krestes”, èn suma na den sma di saka densrefi na ondro a wet disi bakaten?

⁷ Bijbel e kari a wet disi „a wet fu Krestes”. Den fosi sma di kisi a wet disi no ben de a pipel fu a trutru Israel di ben de bakapikin fu Yakob. Ma den sma di kisi a wet ben de „na Israel fu Gado”, wan pipel na yeye fasi (Galasiasma 6:2, 16; Romesma 2:28, 29). Na Israel fu Gado na den Kresten di salfu nanga santa yeye. Baka wan pisi ten, „wan bigi ipi” di komoto fu ala kondre èn di wani anbegi Yehovah tu, kon moksi densrefi nanga den salfu Kresten (Openbaring 7:9, 10; Sakaria 8:23). Den tu grupu disi di de „wán ipi” fu „wán skapuman”, saka densrefi na ondro „a wet fu Krestes”, èn den e meki a wet disi tiri den na ini ala san den e du.​—Yohanes 10:16.

8. Sortu sani na ini a Wet fu Moses ben de tra fasi leki a wet fu Krestes?

 ⁸ Den trutru Israelsma ben musu hori densrefi na a Wet fu Moses fu di den ben gebore leki Israelsma, ma Kresten e hori densrefi na a wet fu Krestes fu di densrefi e teki a bosroiti fu du dati, awansi fu sortu ras den de noso na sortu presi den gebore. Den e leri suma na Yehovah èn san na den pasi fu en, èn den e angri fu du a wani fu en. A wet fu Gado de ’na inisei’ fu den salfu Kresten, iya, na wan agersi fasi a skrifi „na ini den ati”, èn fu dati ede den no e gi yesi na Gado nomo fu di a kan strafu sma di e trangayesi en; sosrefi, den no e gi yesi na en soso fu di a de a plekti fu den. Den e gi yesi na Gado, fu di wan moro prenspari sani di abi moro krakti, e pusu den; a srefi sani disi e meki taki den tra skapu e gi yesi na Gado fu di a wet fu en de na ini den ati.

Wet di sori taki lobi de a moro prenspari sani

9. Fa Yesus ben sori taki lobi ben de a moro prenspari sani na ini den wet fu Yehovah?

⁹ A moro prenspari sani na ini ala den wet nanga komando fu Yehovah, na a wán sani disi: lobi. Lobi ben de wan prenspari sani fu a tru anbegi ala ten, èn dati sa tan so ala ten tu. Di wan sma aksi Yesus san na a moro bigi komando na ini a Wet, dan Yesus piki en: „Yu musu lobi Yehovah yu Gado nanga yu heri ati, nanga yu heri sili, èn nanga yu heri frustan.” A di fu tu komando ben de: „Yu musu lobi tra sma leki fa yu lobi yusrefi.” Baka dati a taki: „A heri Wet nanga den leri fu den Profeiti e anga na den tu komando disi” (Mateyus 22:35-40). Na a fasi disi, Yesus ben sori taki lobi ben de a moro prenspari sani na ini a Wet nanga den Tin komando, ma sosrefi na ini ala den Hebrew Buku fu Bijbel

10. Fa wi sabi taki lobi na a moro prenspari sani na ini a wet fu Krestes?

 ¹⁰ A de so tu taki lobi gi Gado èn gi tra sma na a moro prenspari sani fu a wet di de na ini na ati fu Kresten? Na so a de! A wet fu Krestes abi fu du nanga trutru lobi gi Gado èn a e taki tu fu wan nyun komando, namku taki Kresten musu lobi makandra sondro fu prakseri den eigi bun nomo. Den musu lobi makandra leki fa Yesus ben lobi den disipel fu en; a ben de klariklari fu dede srefi gi den mati fu en. A ben leri den disipel fu en fu lobi Gado èn fu lobi makandra, neleki fa a ben lobi den. A tumusi aparti fasi fa tru Kresten e sori lobi gi makandra, na a moro prenspari fasi fa sma kan kon sabi suma na den tru Kresten (Yohanes 13:34, 35; 15:12, 13). Yesus ben leri den srefi fu lobi den feanti fu den.​—Mateyus 5:44.

11. Fa Yesus ben sori taki a ben lobi Gado èn a libisma famiri sosrefi?

¹¹ Yesus ben sori wi na wan volmaakti fasi fa wi musu lobi makandra. Na ini hemel, a ben de wan yeye di ben abi furu makti èn a ben prisiri di a kisi na okasi fu horibaka gi den afersi fu en Tata dyaso na grontapu. Boiti taki a gi en libisma libi so taki tra sma kan libi fu têgo, a ben sori sma tu fa den musu libi. A ben abi sakafasi nanga bunfasi, èn a ben hori den firi fu tra sma na prakseri, aladi a ben e yepi sma di ben brokosaka èn di ben kisi kwinsi. A ben taki sosrefi fu „wortu di e gi sma têgo libi”, èn sondro fu kon weri a ben e yepi tra sma fu kon sabi Yehovah.​—Yohanes 6:68.

12. Fu san ede wi kan taki dati lobi gi Gado èn gi tra sma abi furu fu du nanga makandra?

¹² Fu taki en leti, lobi gi Gado èn gi tra sma abi furu fu du nanga makandra. Na apostel Yohanes ben taki: „Lobi e kon fu Gado . . . Efu wan sma e taki: ’Mi lobi Gado’, ma toku a e teige en brada, dan a sma dati na wan leiman. Bika a sma di no lobi en brada di a man si, no man lobi Gado di a no man si” (1 Yohanes 4:7, 20). Yehovah na a Sma fu pe lobi e komoto, iya, ensrefi na lobi. Ala sani di a e du, a e du fu di a abi lobi. Wi man sori trawan taki wi lobi den fu di Gado meki wi akruderi a prenki fu en (Genesis 1:27). Te wi lobi tra sma, dan wi e sori taki wi lobi Gado.

Sma di lobi Gado, e gi yesi na en

13. San na a fosi sani di wi musu du efu wi wani lobi Gado?

¹³ Fa wi kan lobi Gado di wi no man si? Wan tumusi prenspari sani di wi musu du fosi, na taki wi musu kon sabi en. Wi no man lobi wan sma trutru noso frutrow en efu wi no sabi a sma disi. Sobun, Gado Wortu e gi wi deki-ati fu kon sabi Gado, èn disi wi kan du te wi e leisi Bijbel, te wi e begi, èn te wi abi demakandra nanga den sma di sabi en kaba èn di lobi en (Psalm 1:1, 2; Filipisma 4:6; Hebrewsma 10:25). Den fo Evangelietori warti srefisrefi, fu di den e sori wi sortu sma Yehovah de soleki fa dati de fu si na a libi nanga a diniwroko fu Yesus Krestes. Te wi kon sabi Gado èn te wi e warderi a lobi di a sori wi, dan wi sa angri fu gi yesi na en moro nanga moro èn wi sa wani de leki en. Iya, te wi lobi Gado, dan wi musu gi yesi na en.

14. Fu san ede wi kan taki dati den wet fu Gado no de wan hebi?

¹⁴ Te wi lobi trawan, dan wi sabi san den lobi èn san den no lobi, èn disi sa yepi wi fu hori den firi fu den na prakseri. Wi no wani du sani di e meki den lobiwan fu wi firi sari. Na apostel Yohanes ben skrifi: „Disi na san a lobi fu Gado wani taki, dati wi e hori wisrefi na den komando fu en; ma toku den komando fu en no de wan hebi” (1 Yohanes 5:3). Den komando no de wan hebi èn den no furu tumusi. Lobi e tiri wi na ini a fasi fa wi musu tyari wisrefi. Wi no abi fu leri ala sortu wet di e sori wi ibri tron baka san wi musu du; na a lobi di wi abi gi Gado, e meki taki wi e du den sani dati. Efu wi lobi Gado, dan wi e prisiri fu du a wani fu en. Na so fasi Gado sa feni wi bun, èn wisrefi sa kisi wini tu, fu di a tiri fu en de fu a bun fu wi ala ten.​—Yesaya 48:17.

15. San sa yepi wi fu de leki Yehovah? Tyari disi kon na krin.

¹⁵ Lobi gi Gado e meki taki wi wani kisi den  eigifasi fu en. Te wi lobi wan sma, dan wi lobi den eigifasi fu en èn wi e pruberi fu de leki a sma disi. Luku sortu banti Yehovah nanga Yesus abi. Den ben de nanga makandra na ini hemel kande milyardmilyard yari langa. Den ben lobi makandra trutru, nanga den heri ati. Yesus ben gersi en hemel Tata so te, taki a ben kan taigi den disipel fu en: „A sma di si mi, si a Tata tu” (Yohanes 14:9). Te wi e kisi moro sabi èn wi e kisi moro warderi gi Yehovah nanga en Manpikin, dan wi sa wani de leki den. A lobi di wi abi gi Yehovah, èn a yepi di wi e kisi fu a santa yeye fu en, sa meki taki wi man ’kenki a fasi fa wi ben de fosi, èn tapu nanga den sani di wi ben e du, èn wi sa kon tron nyun sma’.​—Kolosesma 3:9, 10; Galasiasma 5:22, 23.

A fasi fa lobi e wroko

16. Fa a lobi di wi abi gi Gado èn gi tra sma de fu si na ini a preikiwroko èn a wroko di wi e du fu gi sma leri?

¹⁶ Wi leki Kresten e teki prati na a wroko fu preiki a Kownukondre èn fu meki disipel, fu di wi lobi Gado nanga tra sma. Te wi e du disi, dan wi e plisi Yehovah Gado di „wani taki ala sortu sma musu kisi frulusu èn taki den musu kon sabi a waarheid soifri” (1 Timoteyus 2:3, 4). Na so fasi wi kan prisiri fu di wi e yepi trawan fu skrifi a wet fu Krestes na tapu den ati. Wi e prisiri tu fu si fa den e kenki den fasi fu den èn fa den e tron nyun sma di e sori den eigifasi fu Yehovah na ini den libi (2 Korentesma 3:18). Fu tru, te wi e yepi trawan fu kon sabi Gado, dan dati na a moro warti presenti di wi kan gi den. Den sma di wani tron mati fu Yehovah kan prisiri fu a matifasi disi fu têgo.

17. Fu san ede a de wan koni sani fu abi lobi gi Gado èn gi tra sma, na presi fu abi lobi gi gudu?

¹⁷ Wi e libi na ini wan grontapu pe sma e si gudu leki a moro prenspari sani, iya, den lobi  den sani disi srefi. Ma gudu a no sani di e tan fu têgo. Sma kan fufuru den gudu disi, noso den kan pori (Mateyus 6:19). Bijbel e warskow wi: „Grontapu e pasa gowe nanga den lostu fu en, ma a sma di e du a wani fu Gado sa tan fu têgo” (1 Yohanes 2:16, 17). Iya, Yehovah sa tan fu têgo, èn na so a sa de tu nanga den sma di lobi en èn di e dini en. Sobun, yu no denki taki a ben o moro bun fu abi lobi gi Gado èn gi libisma, na presi fu feti baka grontapu sani di e tan fu wan syatu pisi ten nomo?

18. Fa wan zendeling ben sori lobi sondro fu prakseri en eigi bun nomo?

¹⁸ Den sma di e du muiti fu sori lobi, e meki Yehovah kisi glori. Luku na eksempre fu Sonia, wan zendeling na ini Senegal. A ben e studeri Bijbel nanga Heidi, wan uma di ben kisi HIV fu en masra di no de na bribi. Baka di a masra fu Heidi dede, a teki dopu, ma baka wan syatu pisi ten a kon siki, èn a ben musu go didon na ati-oso fu di a ben abi AIDS. Sonia e fruteri: „Den sma di ben e wroko na a ati-oso ben e du ala san den man, ma den no ben de nanga furu. Den brada aksi efu sma fu a gemeente ben wani sorgu gi Heidi na ini na ati-oso. A di fu tu neti di Heidi ben de na ati-oso, mi go didon na tapu wan matamata na sei a bedi fu en èn mi yepi fu sorgu en teleki a dede. A datra di ben e teki fesi drape, taki: ’A moro bigi problema di wi abi, na taki srefi famiriman no e luku den famiri fu den moro te den sabi taki den abi AIDS. Fu san ede yu di no de wan famiriman, yu di no de fu a kondre disi, èn di abi wan tra skin kloru srefi, wani du so wan sani aladi yu kan kon siki tu?’ Mi taigi en taki Heidi ben de wan sisa gi mi trutru, èn taki wi ben abi so wan tranga banti taki a ben gersi leki wi ben abi a srefi mama nanga papa. Fu di Heidi ben de leki wan sisa gi mi, meki mi ben sorgu en nanga prisiri.” We, a de so tu taki a muiti di Sonia du fu sorgu Heidi na wan lobi-ati fasi, no meki taki Sonia kon siki.

19. Fa wi musu gebroiki ibri okasi efu wi na sma di abi a wet fu Gado na ini wi ati?

¹⁹ Wi abi furu eksempre di e sori fa futuboi fu Yehovah e sori lobi sondro fu prakseri den eigi bun nomo. Nowan wet sistema de di e sori sma suma na a pipel fu Gado na ini a ten disi. Na presi fu dati, wi e si a kontru fu san skrifi na ini Hebrewsma 8:10, namku: „’Disi na a frubontu di mi o sroto nanga na oso fu Israel na baka a ten dati’, na so Yehovah taki. ’Mi o poti den wet fu mi na ini den frustan èn mi o skrifi den na ini den ati. Mi o tron den Gado èn den o tron mi pipel.’” Meki a de so, taki a wet di abi fu du nanga lobi èn di Yehovah skrifi na tapu wi ati, de leki wan warti sani gi wi ala ten, èn meki wi gebroiki ibri okasi fu sori lobi.

20. Fu san ede a wet fu Krestes na wan warti gudu?

²⁰ A de wan prisiri sani trutru fu dini Gado makandra nanga den brada nanga sisa fu wi di de na heri grontapu èn di e sori a lobi disi! Den sma di abi a wet fu Krestes na ini den ati, abi wan warti gudu na ini a grontapu disi pe sma no e sori lobi. Boiti taki Yehovah lobi den, den e prisiri tu fu a tranga lobi di de na mindri den brada fu den. „Luku! O bun èn o switi a de te brada e libi nanga makandra na ini wánfasi!” Yehovah Kotoigi e libi na ini furu kondre, den e taki furu tongo, èn den de fu someni difrenti kulturu, ma toku den e anbegi Gado na ini wánfasi di no de fu feni na nowan enkri tra presi. Yehovah e prisiri nanga a wánfasi disi. A psalm skrifiman ben taki: „Drape [na mindri wan pipel di lobi makandra] Yehovah ben gi a komando taki a blesi musu de, iya, libi te ten di no skotu.”​—Psalm 133:1-3.

Yu kan gi piki?

• O prenspari den Tin Komando ben de?

• San na a wet di skrifi na ini sma ati?

• O prenspari lobi de na ini „a wet fu Krestes”?

• Na sortu fasi wi kan sori taki wi lobi Gado nanga tra sma?

[Aksi fu a tori disi]

[Prenki na tapu bladzijde 25]

Den Israelsma ben abi wet di ben skrifi na tapu plata ston

[Prenki na tapu bladzijde 26]

Kresten abi a wet fu Gado na ini den ati

[Prenki na tapu bladzijde 28]

Sonia nanga wan meisje fu Senegal na tapu wan kongres di ben hori na ini 2004