A fasi fa Bijbel e si sani

Wan sma kan tapu nanga takru gwenti?

SKRIFIMAN Mark Twain ben taki a lafutori disi wan leisi: „Fu tapu nanga smoko na a moro makriki sani fu du. Mi sabi dati, bika mi du dati dusundusun tron kaba.” A sani disi di Twain ben taki e sori taki a e sari taki a no man tapu nanga smoko, èn a no de fu taki dati a de wan sani di furu sma sabi heri bun. Aladi den sabi heri bun kande taki son gwenti no fiti kwetikweti èn taki den gwenti disi kan abi takru bakapisi srefi, toku den sabi tu taki a muilek fu feti nanga den gwenti dati èn fu tapu nanga den. Gwenti di sma abi yari go yari kon kan rutu dipi na ini wan sma èn a kan muilek srefisrefi fu tapu nanga den, aladi a sma e du tranga muiti fu tapu. A kan weri wan sma srefisrefi èn a kan pina en tu, te a e pruberi fu dwengi den tranga lostu disi.

Anthony Daniels, di de wan datra na wan strafu-oso, si taki nofo tron den strafuman e taki dati den no man tapu nanga den takru denki èn nanga den takru lostu fu den kwetikweti. Te wan sma no man tapu nanga wan gwenti, na so den e taki, dan „a de na ini a makti fu wan tranga firi gi san a no man kakafutu srefisrefi”. Efu so wan denki ben tru, dan sma no ben sa musu aksi wi frantwortu te wi ben sa du wan sani fu di wi no man dwengi wisrefi. Ma a de so trutru, taki wi no man du notinoti te den tranga firi disi e basi wi? Noso a de so taki wi kan tapu trutru nanga den takru gwenti fu wi? Fu man kisi wan  trutru bun piki tapu na aksi disi, dan meki wi go luku san Bijbel e taki.

Den tranga lostu di wan sma abi, èn den sani di a sma e du fu feti teige den

Bijbel e sori krin taki Gado e aksi fu wi taki wi musu gi frantwortu gi den sani di wi e du (Romesma 14:12). A e aksi fu wi tu taki wi musu libi akruderi den regtfardiki markitiki fu en (1 Petrus 1:15). Fu di en na wi Mekiman, meki a sabi san bun gi wi, èn den gronprakseri fu en e krutu furu fu den gwenti di lai na ini a grontapu disi (1 Korentesma 6:9, 10; Galasiasma 5:19-21). Ma Gado no e aksi tumusi furu fu wi èn a e hori na prakseri taki wi na sondu libisma.​—Psalm 78:38; 103:13, 14.

Dati meki a psalm skrifiman ben skrifi: „Efu na fowtu yu ben musu luku, o Yah, o Yehovah, dan suma ben kan tan tanapu?” (Psalm 130:3) Iya, Yehovah sabi heri bun taki „den firi di libisma abi na ini en ati, takru fu sensi en yongu yari” (Genesis 8:21). Wi gebore nanga swakifasi, èn den sani di wi ben ondrofeni na ini wi libi, e meki taki wi no man wai pasi gi ala takru prakseri nanga takru lostu. Sobun, Yehovah lobi wi fu di a no e aksi fu wi taki wi musu de volmaakti.​—Deuteronomium 10:12; 1 Yohanes 5:3.

Ma a hori di Gado e hori den sani disi na prakseri, no wani taki dati wi no abi fu basi den takru lostu fu wi. Aladi na apostel Paulus ben agri taki ensrefi ben e feti nanga takru lostu, toku a no ben tapu fu feti teige a sani disi (Romesma 7:21-24). „Mi e kofu mi skin”, na so a ben taki, „èn mi e basi en neleki a de wan srafu.” Nanga sortu marki? ’So taki a no sa de so, taki na wan noso tra fasi, Gado no feni mi bun’ (1 Korentesma 9:27). Iya, a de prenspari fu dwengi wisrefi efu wi wani feti nanga den takru firi nanga den gwenti fu wi, so taki wi kan wini den te fu kaba.

A de trutru so, taki wan sma kan tapu nanga den takru gwenti

Sabiman di e ondrosuku a fasi fa sma e tyari densrefi, e taki dati takru gwenti èn sosrefi bun gwenti na sani di sma e leri baka wan pisi ten. Efu dati de so, dan a musu de so tu taki sma kan leri fu no abi den takru gwenti disi moro! Fa a kan du dati? „Prakseri den winimarki di yu sa abi te yu e tapu nanga na owru gwenti”, na so den skrifiman fu wan buku e taki, di e sori fa sma kan du te den abi broko-ede. Baka dati, „yu musu skrifi ala den fasi fa yu libi sa kon moro bun te yu kenki yu libi”. Iya, a kan pusu wi fu tyari kenki kon te wi e prakseri den winimarki di wi sa abi te wi e tapu nanga den takru gwenti.

Prakseri fu a rai di na apostel Paulus ben gi wi taki wi musu ’kon nyun na ini a krakti di e pusu a prakseri fu wi’ (Efeisesma 4:22, 23). A krakti dati na a fasi fa wi e denki. Yu kan kenki a fasi dati fa yu e denki, te yu e kon moro krosibei na Gado èn te yu e leri fu kisi warderi gi den markitiki fu en. Te yu sabi taki yu e plisi Yehovah, dan dati sa pusu yu fu tyari den kenki kon di de fanowdu.​—Psalm 69:30-33; Odo 27:11; Kolosesma 1:9, 10.

A no de fu taki dati a muilek fu puru den takru gwenti di ben basi wi libi furu yari langa. Wi no musu si a feti disi leki wan pikin sani. Son leisi a kan taki yu e go du a takru gwenti disi baka. Ma yu kan de seiker taki, baka wan pisi ten, sani sa go moro makriki. O moro muiti yu e du, o moro yu sa tyari yusrefi na wan moro bun fasi, èn dati sa tron wan sani di yu gwenti fu du.

Wan sma di lobi Gado kan de seiker tu, taki a kan kisi a yepi nanga a blesi fu en. Paulus e pramisi wi taki: „Gado de getrow, èn a no sa gi pasi dati unu kisi tesi pasa a sani di unu man tyari, ma . . . a sa opo a pasi tu fu komoto so taki unu man frudrage en” (1 Korentesma 10:13). Heri esi Yehovah Gado sa pori na ogri seti fu sani disi, makandra nanga ala den takru lostu nanga den tranga firi di de leki wan tesi gi wi (2 Petrus 3:9-13; 1 Yohanes 2:16, 17). Ala sondu libisma di sa pasa a pisi ten dati libilibi, sa kon fri fu têgo, fu ala den pina di den e ondrofeni na skin sei, na frustan sei, èn na ini a fasi fa den e firi. Gado e pramisi taki „sma no sa memre den sani fu fositen moro, èn den no sa kon na ini na ati tu” (Yesaya 65:17). Wan fu den „sani fu fositen”, seiker sa de den takru lostu di sma abi. Disi na wan moi sani fu san ede wi musu du ala muiti fu kakafutu gi takru gwenti èn fu feti teige den, a no so?