Den sani di Yehovah meki, moi srefisrefi

„Den wroko fu yu furu srefisrefi, o Yehovah!”

AWINSI wi e libi na wan boitipresi noso na ini wan foto, awinsi wi e libi bun hei na tapu den bergi noso te na gron na sesyoro, toku na ala sei wi e si den kefalek moi sani di Gado meki èn di e meki wi fruwondru srefisrefi. Fu dati ede, a fiti taki a Kalender van Jehovah’s Getuigen 2004 abi wan moi prenki di e sori a kefalek koni fasi fa Yehovah Gado meki sani.

Libisma di abi warderi gi den sani di Gado meki, e poti prakseri na den sani dati ala ten. Fu eksempre, luku san Salomo ben taki, di ben abi koni di „ben bigi moro leki a koni fu ala den Owstusei sma”. Bijbel e fruteri: „A ben gwenti e taki fu den bon, fu a sedre di de na tapu a Libanon te nanga a hisop di e gro na tapu a skotu; èn a ben taki fu den meti di waka na tapu fo futu èn fu den mekisani di e frei èn fu ala den sani di man buweigi èn fu den fisi” (1 Kownu 4:30, 33). Kownu David, a papa fu Salomo, ben prakseri dipi fu den tumusi moi sani di Gado meki. Disi ben pusu en fu taigi en Mekiman: „Den wroko fu yu furu srefisrefi, o Yehovah! Yu meki den alamala na wan koni fasi. Grontapu furu nanga den sani di yu meki.”—Psalm 104:24. *

Wi sosrefi musu poti prakseri na den sani di Gado meki èn denki dipi fu den. Fu eksempre, a ben o bun fu „opo [wi] ai go na loktu”, èn aksi wisrefi: „Suma meki den sani disi?” We, na Yehovah Gado, di abi „bigi krakti pasa marki” èn di „tranga srefisrefi”!—Yesaya 40:26.

Te wi e prakseri dipi fu den sani di Yehovah meki, dan fa dati musu abi krakti na wi tapu? Fu taki en leti, dan na dri fasi a kan abi krakti na wi tapu. (1) A kan memre wi fu warderi a libi di wi abi, (2) a kan pusu wi fu yepi trawan fu teki leri fu den sani di Gado meki, èn (3) a kan gi wi deki-ati fu kon sabi wi Mekiman moro bun èn fu kisi moro warderi gi en.

Wi leki libisma, di hei moro „meti di no abi frustan”, man poti prakseri na den kefalek moi sani di Gado meki, èn wi man warderi den sosrefi (2 Petrus 2:12). Nanga wi ai wi kan si fa wan presi moi. Nanga wi yesi wi kan yere den moi singi fu den fowru. Èn fu di wi man sabi soifri o ten èn pe wi si den sortu sani disi, meki wi man memre den momenti disi baka. Aladi a libi di wi e libi now no de volmaakti, toku wi kan prisiri fu dati!

Papa nanga mama kan prisiri nanga a fasi fa den pikin fu den e fruwondru fu den sani di Gado meki. Pikin-nengre lobi fu suku skropu na sesyoro, den lobi fu prei nanga meti, den lobi fu kren wan bon! A no de fu taki dati papa nanga mama sa wani yepi den pikin fu kon frustan taki wan Mekiman de di meki ala den sani disi. A warderi nanga a lespeki di den pikin e kisi gi den sani di Yehovah meki, kan tan den heri libi langa.—Psalm 111:2, 10.

A no ben o de wan koni sani kwetikweti efu wi ben o fruwondru fu den sani di Gado meki, ma wi no e gi grani na en leki Mekiman. A profeititori  fu Yesaya e yepi wi fu prakseri dipi fu a tori disi, te a e taki: „Yu no kon sabi, noso yu no yere? Yehovah, a Mekiman fu den moro farawe presi fu grontapu, na wan Gado te ten di no skotu. A no e weri, noso en skin no e kon hebi. Sma no kan kon sabi a frustan fu en finifini.”—Yesaya 40:28.

Iya, den wroko fu Yehovah e sori taki nowan sma koni leki en, taki nowan sma abi so furu krakti leki en, èn den e sori tu taki a lobi wi srefisrefi. Te wi e si o moi den sani lontu wi de èn wi e si na ini den sani dati fa a Mekiman de, dan dati musu pusu wi fu taki den srefi wortu fu David: „Nowan sma de neleki yu . . . , o Yehovah, èn nowan sma e du den sani di yu e du.”—Psalm 86:8.

Wi kan de seiker taki libisma di e gi yesi na Gado, sa tan fruwondru fu den sani di Yehovah meki. Fu têgo wi sa tan abi bun furu okasi fu kon sabi moro fu Yehovah (Preikiman 3:11). Èn o moro wi e kon sabi fu wi Mekiman, o moro wi sa kon lobi en.

[Futuwortu]

[Faki na tapu bladzijde 9]

A Mekiman e kisi prèise

Furu sabiman di abi warderi gi den sani di de na hemel nanga grontapu, e si taki na Gado meki ala den sani disi. Wan tu eksempre e kon now:

„Den moro prenspari èn prisiri momenti na ini den ondrosuku di mi e du, na te mi e kon sabi wan nyun sani èn mi e taigi misrefi: ’Ooh, na so Gado meki a sani’. Mi e suku fu kon frustan pikinso san Gado abi na prakseri.”—Professor Henry Schaefer.

’Fa a du kon taki so furu stari nanga planeiti kon de? We, a leisiman kan bosroiti gi ensrefi fa a wani piki na aksi disi, ma wi no o man frustan a tori disi sondro fu bribi na ini En [Gado].’—Edward Milne, wan sabiman fu Ingrisikondre.

„Wi sabi taki den sani di wi e si na hemel èn na grontapu seti na a moro koni fasi, fu di na En [Gado] meki den sani dati.”—Alexander Polyakov, wan sabiman fu Rosiakondre.

„Te wi e ondrosuku den sani soleki meti nanga sani di e gro na grontapu, dan wi e kon si a fasi fa a Mekiman e denki, wi e kon sabi san a abi na prakseri, èn wi e pruberi fu fruklari wan sistema di no de fu wi, ma di de fu En.”—Louis Agassiz, wan sabiman fu Amerkankondre.

[Prenki na tapu bladzijde 8, 9]

Ezelspinguïn [Pygoscelis papua] na wan èilanti fu Antarktika

[Prenki na tapu bladzijde 9]

Grand Teton National Park, na ini Wyoming, Amerkankondre

[Sma di abi a reti fu a prenki]

Jack Hoehn/Index Stock Photography