Wi e kisi frufolgu, ma toku wi de koloku
Wi e kisi frufolgu, ma toku wi de koloku
„Koloku fu unu te sma e gi unu porinen èn te den e frufolgu unu aladi den e lei èn e taki ala sortu ogri fu unu, fu mi ede.”—MATEYUS 5:11.
1. Sortu dyaranti Yesus ben gi den bakaman fu en di a ben taki fu koloku èn fu frufolgu?
A FOSI leisi di Yesus seni den apostel fu en fu go preiki a Kownukondre, dan a warskow den taki sma ben o frufolgu den. A taigi den: „Nowan sma no sa wani si unu na ai fu mi nen ede” (Mateyus 10:5-18, 22). Ma wan pisi ten na fesi, di a hori a Bergitaki fu en, a ben gi den apostel fu en nanga den tra sma di ben drape, a dyaranti taki a frufolgu dati no ben abi fu pori a koloku fu den. Fu taki en leti, Yesus ben sori srefi taki wan Kresten ben o de koloku efu a ben kisi frufolgu! Fa wan sma ben kan de koloku efu trawan frufolgu en?
Wi e nyan pina fu di wi e du san regtfardiki
2. Te wi e prakseri san Yesus nanga na apostel Petrus ben taki, dan sortu pina e meki sma firi koloku?
2 Yesus ben sori san na a di fu aiti sani di e meki taki sma kan de koloku. A ben taki: „Koloku fu den sma di kisi frufolgu fu di den regtfardiki, bika den o kisi a kownukondre fu hemel” (Mateyus 5:10). Te wan sma e nyan pina, dan dati wawan no o meki taki a o kisi prèise. Na apostel Petrus ben skrifi: „Bika sortu winimarki a abi efu unu e horidoro te unu e sondu èn e kisi fonfon? Ma efu unu e horidoro te unu e pina aladi unu e du bun, dan dati na wan bun sani na Gado.” A ben taki tu: „Ma no meki nowan fu unu pina leki wan kiriman noso wan fufuruman noso wan ogriman noso leki wan sma di e bumui nanga tra sma tori. Ma efu wan sma e nyan pina fu di a de wan Kresten, dan meki a no firi syen, ma meki a tan gi Gado glori leki wan Kresten” (1 Petrus 2:20; 4:15, 16). Soleki fa den wortu fu Yesus e sori, dan wan sma di e nyan pina sa firi koloku te a e ondrofeni a pina dati, fu di a e du san regtfardiki.
3. (a) San a wani taki te wan sma e kisi frufolgu fu di a de regtfardiki? (b) Sortu krakti a ben abi tapu den fositen Kresten te sma ben frufolgu den?
3 Wan sma de regtfardiki trutru te a e du a wani fu Gado èn te a e gi yesi na den komando fu en. Fu dati ede, te wan sma e nyan pina fu di a e du san regtfardiki, dan dati wani taki dati a e pina fu di a e kakafutu gi sma di e dwengi en fu no hori ensrefi na den gronprakseri noso markitiki fu Gado. Den Dyu tiriman ben frufolgu den apostel fu di den no ben wani tapu fu preiki na ini a nen fu Yesus (Tori fu den Apostel 4:18-20; 5:27-29, 40). Disi ben meki taki den no ben abi prisiri moro, noso taki den ben tapu nanga a preikiwroko fu den? Kwetikweti! „[Den] ben gowe libi a Sanhedrin, èn den ben prisiri taki den ben feni den warti fu kisi syen fu en nen ede. Ibri dei den ben tan gi sma leri na ini a tempel èn sosrefi na ibri oso, aladi den ben fruteri sma a bun nyunsu fu Yesus, a Krestes” (Tori fu den Apostel 5:41, 42). A frufolgu di den ben kisi ben gi den prisiri, èn a ben gi den krakti baka fu du a preikiwroko fayafaya. Bakaten, den Romesma frufolgu den fositen Kresten fu di den no ben wani anbegi a kèiser.
4. San na wan tu sani di e meki taki sma e frufolgu Kresten?
4 Na ini a ten disi, sma frufolgu Yehovah Kotoigi fu di den no ben wani tapu fu preiki „a bun nyunsu disi fu a kownukondre” (Mateyus 24:14). Te lanti e tapu den Kresten fu hori konmakandra, dan soleki fa Bijbel e taigi den fu du, den de srekasreka fu nyan pina na presi taki den tapu fu hori konmakandra (Hebrewsma 10:24, 25). Sma frufolgu den fu di den no ben wani teki sei na ini orloku, noso fu di den no ben wani gebroiki brudu na wan fasi di no fiti (Yohanes 17:14; Tori fu den Apostel 15:28, 29). Ma toku, a bosroiti di a pipel fu Gado na ini a ten disi teki fu horibaka gi san regtfardiki, e meki taki den no e bruya èn taki den de koloku.—1 Petrus 3:14.
Sma e gi wi porinen fu Krestes ede
5. San na a moro prenspari sani di e meki taki sma e frufolgu a pipel fu Yehovah na ini a ten disi?
5 Di Yesus ben taki na ini a Bergitaki fu a di fu neigi sani di e meki taki sma kan de koloku, dan a ben taki fu frufolgu sosrefi. A ben taki: „Koloku fu unu te sma e gi unu porinen èn te den e frufolgu unu aladi den e lei èn e taki ala sortu ogri fu unu, fu mi ede” (Mateyus 5:11). A moro prenspari sani di e meki taki sma e frufolgu a pipel fu Yehovah, na taki den no de wan pisi fu na ogri sistema disi. Yesus ben taigi den disipel fu en: „Efu unu ben de wan pisi fu grontapu, dan grontapu ben sa lobi srefisrefi san na fu en. Now fu di unu no de wan pisi fu grontapu, ma mi frukisi unu puru na grontapu, meki grontapu no wani si unu na ai” (Yohanes 15:19). Na apostel Petrus ben taki wan srefi sortu sani: „Fu di unu no e waka nanga den moro na a fasi disi na a srefi lagi peti fu yayolibi, meki den e fruwondru èn e tan kosi unu.”—1 Petrus 4:4.
6. (a) Fu san ede sma e gi a fikapisi nanga den mati fu den porinen, èn fu san ede den e frufolgu den? (b) Te sma e gi wi porinen na a fasi disi, dan a de so taki disi e pori a koloku fu wi?
6 Wi si kaba taki den fositen Kresten ben kisi frufolgu fu di den no ben wani tapu fu preiki na ini a nen fu Yesus. Krestes ben gi den bakaman fu en a komando: „Unu sa de kotoigi fu mi . . . te na a moro farawe presi fu grontapu” (Tori fu den Apostel 1:8). A getrow fikapisi fu den salfu brada fu Krestes di e kisi yepi fu den loyaal mati fu den, namku a „bigi ipi”, du a wroko dati fayafaya (Openbaring 7:9). Fu dati ede, Satan e feti „nanga den wan di tan abra fu a siri fu na uma [na „uma” na a pisi fu Gado en organisâsi na hemel], di e hori den komando fu Gado èn abi a wroko fu gi kotoigi fu Yesus” (Openbaring 12:9, 17). Wi leki Yehovah Kotoigi, e gi kotoigi fu Yesus di de Kownu now fu a Kownukondre tiri. A tiri disi sa pori libisma tirimakti di e tapu a pasi gi Gado en regtfardiki nyun grontapu (Danièl 2:44; 2 Petrus 3:13). Na fu dati ede sma e gi wi porinen èn e frufolgu wi, ma wi de koloku fu di wi e nyan pina fu Krestes nen ede.—1 Petrus 4:14.
7, 8. San na wan tu lei di gensman ben taki fu den fositen Kresten?
7 Yesus ben taki dati den bakaman fu en musu prisiri, awinsi trawan „e lei èn e taki ala sortu ogri” fu den fu Krestes ede (Mateyus 5:11). Disi ben pasa tu nanga den fositen Kresten. Di den poti na apostel Paulus na ini strafu-oso na Rome na a ten fu 59-61 G.T., dan den Dyu tiriman drape ben taki fu den Kresten: „Fu tru, fu a sekte disi wi kon sabi taki na ala presi sma e taki sani teige den” (Tori fu den Apostel 28:22). Sma ben taki dati Paulus nanga Silas ben ’seki a heri grontapu pe sma e libi’ èn taki „den ben e pasa den wet fu Kèiser”.—Tori fu den Apostel 17:6, 7.
8 Historia skrifiman K. S. Latourette ben skrifi fu den Kresten di ben libi na ini a ten fu a Gran Kownukondre Rome, taki: „Sma ben taki difrenti ogri sani fu den. Fu di den Kresten no ben wani teki prati na den heiden fesa nanga gwenti, meki sma ben taki fu den taki den no ben bribi na ini Gado. Fu di den no ben teki prati na furu sani di sma na ini a libimakandra dati ben e du, soleki den heiden fesa nanga a fasi fa sma ben e meki prisiri . . . , meki trawan ben si den leki sma di no lobi libisma. . . . Sma ben taki fu den taki mansma nanga umasma ben e miti makandra te neti, . . . dan den ben abi seks nanga makandra. . . . Fu di den Kresten ben hori [a Memrefesa fu Krestes dede] soso nanga bribiman, meki sma ben e fruteri taki den Kresten ben abi a gwenti fu tyari wan beibi leki ofrandi, èn taki den ben dringi a brudu fu a beibi èn ben nyan a meti fu en skin.” Boiti dati, fu di fositen Kresten no ben wani anbegi a kèiser, meki sma ben taki fu den taki den ben de feanti fu a tirimakti.
9. San den fosi yarihondro Kresten du di sma ben fruteri lei fu den, èn fa a de na ini a ten disi?
9 Den lei disi no ben tapu den fositen Kresten fu tan du a wroko di den ben kisi fu du, namku fu preiki a bun nyunsu fu a Kownukondre. Na ini 60-61 G.T., Paulus ben man taki fu a „bun nyunsu” di ben ’e tyari froktu èn ben e gro na heri grontapu’ èn di ben „preiki gi ala sma na ondro hemel” (Kolosesma 1:5, 6, 23). A srefi sani e pasa na ini a ten disi. Sma e fruteri lei fu Yehovah Kotoigi, neleki fa sma ben e du dati nanga den fosi yarihondro Kresten. Ma toku, a wroko fu preiki a Kownukondre boskopu e go heri bun na ini a ten disi, èn a e gi den sma di e du a wroko disi furu prisiri.
Den breiti fu kisi frufolgu neleki den profeiti
10, 11. (a) San Yesus ben taki di a kaba taki fu a di fu neigi sani di kan meki sma de koloku? (b) Fu san ede sma ben frufolgu den profeiti? Gi wan tu eksempre.
10 Baka di Yesus taki fu a di fu neigi sani di e meki taki sma kan de koloku, dan a taki: „Un musu breiti . . . , bika na so sma ben frufolgu den profeiti di ben de fosi unu” (Mateyus 5:12). Di Yehovah ben seni den profeiti fu go warskow Israel di no ben de getrow, dan sma ben handri takru nanga den èn nofo tron den ben frufolgu den profeiti (Yeremia 7:25, 26). Na apostel Paulus ben taki fu a sani disi di a skrifi: „San mi sa taki moro fara? Bika ten no de fu taki fu . . . den tra profeiti, di nanga yepi fu bribi . . . ben kisi tesi fu di sma ben spotu den èn ben krawasi den, iya, moro leki dati, fu di den ben poti den na bui èn na ini strafu-oso”.—Hebrewsma 11:32-38.
11 Na a pisi ten di na ogri Kownu Akab nanga en wefi Iseibel ben e tiri, dan den ben kiri furu fu den profeiti fu Yehovah nanga feti-owru (1 Kownu 18:4, 13; 19:10). Sma ben sroto a profeiti Yeremia, èn den ben fasi en anu nanga futu na ini wan pisi udu, èn bakaten den trowe en go na ini wan watrapeti di ben lai nanga tokotoko (Yeremia 20:1, 2; 38:6). Den ben trowe a profeiti Danièl go na ini wan olo pe lew ben e tan (Danièl 6:16, 17). Ala den profeiti disi di ben e libi bifo a ten fu den Kresten, ben kisi frufolgu fu di den ben e horibaka gi a soifri anbegi fu Yehovah. Den Dyu kerki tiriman frufolgu furu profeiti. Yesus ben kari den sabiman fu Wet nanga den Fariseiman, „manpikin fu den sma di kiri den profeiti”.—Mateyus 23:31.
12. Fu san ede wi leki Yehovah Kotoigi e si en leki wan grani taki sma e frufolgu wi neleki fa den ben frufolgu den owruten profeiti?
12 Na ini a ten disi, wi leki Yehovah Kotoigi e kisi frufolgu nofo tron, fu di wi e preiki a bun nyunsu fu a Kownukondre fayafaya. Den feanti fu wi e taki dati wi e „dwengi sma fu teki a bribi fu den”, ma wi sabi taki sma ben taki den srefi sani fu den getrow anbegiman fu Yehovah di ben libi fosi wi (Yeremia 11:21; 20:8, 11). Wi e si en leki wan grani fu nyan pina fu a srefi sani di ben meki taki den getrow profeiti fu owruten ben e pina. A disipel Yakobus ben skrifi: ’Brada, teki na eksempre fu den profeiti di ben taki na ini a nen fu Yehovah; den ben e pina fu den ogri di ben miti den, èn den ben abi pasensi. Luku! Wi e taki dati den sma di horidoro, na koloku sma.’—Yakobus 5:10, 11.
Wan tu bun reide fu de koloku
13. (a) Fu san ede wi no e lasi-ati te sma e frufolgu wi? (b) San e meki taki wi man tanapu kánkan, èn san disi e buweisi?
13 Frufolgu no e meki wi lasi-ati, ma na presi fu dati, wi e kisi trowstu fu di wi sabi taki wi e waka baka na eksempre fu den profeiti, fu den fositen Kresten, èn fu Krestes Yesus srefi (1 Petrus 2:21). Wi e firi koloku te wi e leisi sani na ini den Buku fu Bijbel, soleki san na apostel Petrus ben skrifi: „Lobiwan, no fruwondru fu a faya di e bron na un mindri, di e miti unu leki wan tesi, neleki wan freimde sani miti unu. Efu sma e gi unu porinen fu Krestes nen ede, dan unu de koloku, bika a yeye di e gi sma glori, iya, a yeye fu Gado, de na un tapu” (1 Petrus 4:12, 14). Ondrofeni leri wi taki te sma e frufolgu wi, dan wi man horidoro soso fu di a yeye fu Yehovah de na wi tapu èn e tranga wi. A krakti di a santa yeye e gi wi na wan buweisi taki Yehovah e blesi wi, èn disi e meki wi firi koloku trutru.—Psalm 5:12; Filipisma 1:27-29.
14. Fu san ede wi breiti te sma e frufolgu wi fu di wi e du san regtfardiki?
14 Sosrefi, te sma e gens wi èn den e frufolgu wi fu di wi e du san regtfardiki, dan dati e meki wi firi koloku tu bika disi na wan buweisi taki wi e libi leki tru Kresten di e dini Gado fayafaya. Na apostel Paulus ben skrifi: „Ala sma di wani dini Gado na wan getrow fasi na ini wánfasi nanga Krestes Yesus, sa kisi frufolgu tu” (2 Timoteyus 3:12). A e gi wi prisiri srefisrefi te wi e prakseri taki efu wi e tan getrow awansi sortu tesi wi e kisi, dan wi e sori taki Satan ben lei di a taki dati ala libisma e dini Yehovah fu di den e prakseri den eigi wini nomo (Yob 1:9-11; 2:3, 4). Wi breiti taki wi sosrefi kan abi wan prati, awinsi na wan pikin prati nomo, fu sori taki Yehovah abi a reti fu tiri leki a regtfardiki tiriman.—Odo 27:11.
Wi e prisiri pasa marki fu di wi o kisi wan pai
15, 16. (a) Fu san ede Yesus ben taki dati wi musu „breiti èn prisiri pasa marki”? (b) Sortu pai e wakti den salfu Kresten na ini hemel, èn fa den „tra skapu” di e wroko makandra nanga den, o kisi wan pai tu?
15 Yesus ben kari ete wan reide di e meki taki wi e prisiri te sma e du wi ogri èn e frufolgu wi neleki fa den ben du dati nanga den owruten profeiti. Di a kaba fruteri san na a di fu neigi sani di kan meki taki sma kan de koloku, dan a taki: „Un musu breiti èn prisiri pasa marki, fu di unu o kisi wan bigi pai na hemel” (Mateyus 5:12). Na apostel Paulus ben skrifi: „Sondu e pai nanga dede, ma a presenti di Gado e gi, na têgo libi nanga yepi fu Krestes Yesus, wi Masra” (Romesma 6:23). Iya, a ’bigi pai’ di wi o kisi, na libi. A no wan sani di wi abi reti na tapu, neleki wan moni di wi wroko fu en. A de wan fri presenti. Yesus ben taki dati a pai de „na hemel” fu di wi e kisi en fu Yehovah.
16 Den salfuwan e kisi „a kownu-ati fu libi”. Dati wani taki dati den o libi nanga Krestes na ini hemel sondro fu man dede (Yakobus 1:12, 17). Den „tra skapu” na den sma di abi a howpu fu libi na grontapu, èn den e fruwakti fu libi fu têgo na ini wan grontapu di o de wan paradijs (Yohanes 10:16; Openbaring 21:3-5). Nowan fu den tu grupu e kisi a „pai” disi leki na wan sani di den abi reti na tapu. Den salfuwan èn sosrefi den „tra skapu” e kisi a pai fu den, fu di Yehovah e sori den „a bun-ati fu [en] di pasa ala sani”. Fu dati ede Paulus ben taki: ’Tangi fu Gado taki a gi a fri presenti di warti moro ala tra sani.’—2 Korentesma 9:14, 15.
17. Fu san ede wi kan firi koloku te sma e frufolgu wi èn fu san ede wi kan „prisiri pasa marki”?
17 Kèiser Nero ben frufolgu son Kresten na wan ogri-ati fasi, èn dati meki na apostel Paulus ben skrifi den Kresten: „Meki wi prisiri aladi wi de na ini banawtu, fu di wi sabi taki banawtu e meki wi horidoro, horidoro e meki Gado feni wi bun, a feni di Gado feni wi bun e meki wi kisi howpu, èn a howpu no e meki wi lasi-ati.” A ben taki tu: „Prisiri ini a howpu. Tan frudrage banawtu” (Romesma 5:3-5; 12:12). Awansi wi abi a howpu fu libi na ini hemel noso na grontapu, efu wi e tan getrow te wi e kisi tesi, dan wi o kisi wan pai di bigi moro iniwan sani di wi abi reti na tapu. Nowan tra sani kan gi wi moro prisiri leki a howpu di wi abi fu libi fu têgo so taki wi kan dini èn prèise wi lobi Tata, Yehovah, aladi wi abi wi Kownu Yesus Krestes leki tiriman. Fu tru wi kan taki dati wi e „prisiri pasa marki”.
18. San wi kan fruwakti taki den kondre o du, now di wi e doro a kaba, èn san Yehovah sa du?
18 Na ini son kondre, sma ben frufolgu Yehovah Kotoigi, èn te now ete den e du dati. Na ini a profeititori di e taki fu a kaba fu a sistema disi, Yesus ben warskow tru Kresten: „Na a ten dati sma o tyari banawtu kon na un tapu èn den o kiri unu; na ini ala kondre, sma o teige unu fu mi nen ede” (Mateyus 24:9). Now di wi e doro a kaba, dan Satan o meki den kondre du sani fu sori taki den teige a pipel fu Yehovah (Esekièl 38:10-12, 14-16). Te disi o pasa, dan Yehovah sa handri. „Trutru mi sa meki misrefi kon bigi èn santa misrefi èn meki sma kon sabi mi na fesi fu furu nâsi; èn den sa musu sabi taki mi na Yehovah” (Esekièl 38:23). Na so fasi Yehovah o santa en bigi nen èn a o sorgu taki sma no frufolgu en pipel moro. Fu dati ede „koloku fu a sma di e tan horidoro”.—Yakobus 1:12.
19. San wi musu du, aladi di wi e wakti a bigi „dei fu Yehovah”?
19 Now di a bigi „dei fu Yehovah” e kon moro krosibei, meki wi prisiri fu di wi na sma di „warti fu kisi syen” fu Yesus nen ede (2 Petrus 3:10-13; Tori fu den Apostel 5:41). Neleki den fositen Kresten, meki wi go doro fu ’gi sma leri èn fu fruteri den a bun nyunsu fu a Krestes’ èn sosrefi fu en Kownukondre tiri, aladi wi e wakti a pai fu wi na ini Yehovah en regtfardiki nyun grontapu.—Tori fu den Apostel 5:42; Yakobus 5:11.
Luku baka san wi leri
• San a wani taki fu nyan pina fu di wi e du san regtfardiki?
• Sortu krakti a ben abi tapu den fositen Kresten te sma ben frufolgu den?
• Fu san ede wi kan taki dati Yehovah Kotoigi e kisi frufolgu neleki den profeiti fu owruten?
• Fu san ede wi kan „breiti èn prisiri pasa marki” te sma e frufolgu wi?
[Aksi fu a tori disi]
[Prenki na tapu bladzijde 16, 17]
„Koloku fu unu te sma e gi unu porinen èn te den e frufolgu unu”
[Sma di abi a reti fu den prenki]
Group in prison: Chicago Herald-American