Yonguwan​—Meki yu papa nanga yu mama yepi yu fu kibri yu ati!

SAN yu denki na a moro muilek sani di wan kapten fu wan sipi musu du? Na te a musu abra wan bigi se sondro taki wan sani pasa nanga a sipi? Dati no abi fu de so ala ten. Furu tron wan sipi no e broko na mindri se, ma krosibei fu a syoro. Fu taki en leti, dan a moro makriki fu saka wan opolani, leki fu tyari wan sipi kon na wan lanpresi. Fu san ede dati de so?

Bifo wan kapten kan tyari en sipi kon na wan lanpresi sondro taki wan sani pasa, dan a musu wai pasi gi ala den sani di kan meki taki a sipi e broko, noso e sungu. A musu kon sabi fa a watra na ini a se e lon, èn a musu luku bun taki a no e tuka nanga tra sipi. A musu wai pasi tu gi ibri santi bangi, bigi ston, noso sipi di sungu èn sosrefi gi tra broko sani di de na ondro watra. Wan tra sani di kan meki en moro muilek gi a kapten, na te a e kon na a lanpresi fu a fosi leisi.

Fu man pasa den problema disi nanga bun bakapisi, dan wan koni kapten sa suku yepi na wan sma di sabi heri bun fa a watra na ini a kontren fu a lanpresi tan. A man disi di e yepi a kapten e tanapu leti na sei a kapten te a e tyari a sipi, so taki a kan gi a kapten koni rai. Den e luku makandra nanga sortu sani den musu luku bun èn den e tyari a boto pasa ibri smara kanari go na a lanpresi.

A tumusi warti rai di a man disi e gi a kapten, e prenki a yepi di Kresten yonguwan kan kisi. Den abi a yepi disi fanowdu te den wani kon sabi fa fu handri te problema miti den na ini a libi. San na a yepi disi? Fu san ede tini abi a yepi disi fanowdu?

Meki wi taki moro fara fu na agersitori fu a sipi. Efu yu na wan tini, dan yu de pikinmoro a srefi leki wan kapten fu wan sipi, fu di te fu kaba yu sa abi a frantwortu fu tiri yu eigi libi. Èn yu papa nanga yu mama de neleki a man di e yepi a kapten fu tyari a sipi, fu di den e pruberi fu yepi yu pasa wan tu fu den moro muilek situwâsi di yu sa miti na ini yu libi. Ma kande yu no sa feni en makriki na ini den tini yari fu yu fu teki a rai di yu papa nanga yu mama e gi yu. Fu san ede dati de so?

Furu tron a problema abi fu du nanga na ati. Na agersi ati fu yu kan pusu yu fu wani du sani di yu no mag du, noso a kan meki taki yu e atibron te yu no mag du san yu wani. „Den firi di libisma abi na ini en ati, takru fu sensi en yongu yari”, na so Bijbel e taki (Genesis 8:21). Yehovah e sori yu taki yu kan fruwakti trutru tesi na ini a ten di de na yu fesi. A e warskow: „Da hati de bedriegi moro leki alasani, en a de toemoesi takroe” (Yeremia 17:9, Da Bijbel na ini Sranantongo). Boiti taki wan yonguwan kan kweki takru firi na ini en ati, dan na ati kan kori wan yonguwan tu fu di a e denki taki a sabi sani moro bun leki en papa nanga en mama, awansi en papa nanga mama abi moro ondrofeni leki en. Ma nofo reide de fu san ede yu musu suku yepi na yu papa nanga yu mama, spesrutu te yu wani kon sabi sortu pasi yu musu waka na ini den muilek tini yari.

 Fu san ede yu musu gi yesi na yu papa nanga yu mama?

San moro prenspari na taki Yehovah, a Sma di seti na osofamiri libi, e taigi yu taki yu musu gi yesi na a rai fu yu papa nanga yu mama (Efeisesma 3:15). Fu di Gado gi yu papa nanga yu mama a frantwortu fu sorgu yu, meki a e gi yu a rai disi: „Pikin, gi yesi na yu papa nanga yu mama èn na den wan di Masra poti fu tiri yu, fu di dati de a yoisti sani fu du” (Efeisesma 6:1-3, Phillips; Psalm 78:5). Aladi yu de now na ini den tini yari fu yu, toku yu papa nanga yu mama abi a frantwortu ete fu tiri yu, èn yu musu arki den. Di na apostel Paulus ben skrifi taki pikin musu gi yesi na den papa nanga mama, dan a ben gebroiki wan Griki wortu di e sori taki ala pikin musu gi yesi na den papa nanga mama, awansi omeni yari den abi. Fu eksempre, soleki fa skrifi na ini Mateyus 23:37, dan Yesus ben taki fu den sma di ben e tan na ini Yerusalem leki den „pikin” fu Yerusalem, aladi a moro bigi pisi fu a pipel ben de bigisma.

Furu getrow man fu owruten ben tan gi yesi na den papa nanga mama baka di den ben kon bigi kaba. Aladi Yakob ben de wan bigisma kaba, toku a ben frustan taki a ben musu gi yesi na a komando di en papa ben gi en fu no trow nanga wan uma di no e anbegi Yehovah (Genesis 28:1, 2). A no de fu taki dati Yakob ben si fa en papa nanga en mama ben sari trutru di en brada ben trow nanga heiden uma fu Kanan.—Genesis 27:46.

Boiti taki Gado gi yu papa nanga yu mama a frantwortu fu tiri yu, dan den kan de den moro bun sma fu gi yu rai. Disi de so, spesrutu fu di den sabi yu heri bun èn a no de fu taki dati na ini den furu yari di pasa, den sori taki den lobi yu sondro fu prakseri densrefi nomo. Neleki a man di e yepi a kapten fu tyari a sipi, na so yu papa nanga yu mama e taki nanga yu fu di den abi ondrofeni. Densrefi ben abi „den lostu di yongu sma abi”. Èn neleki tru Kresten, den si nanga den eigi ai o warti a de te wan sma e hori ensrefi na Bijbel gronprakseri.—2 Timoteyus 2:22.

Te yu abi den sma disi na yu sei di abi furu ondrofeni, dan den sa man yepi yu fu pasa den moro muilek situwâsi nanga bun bakapisi. Luku fu eksempre den firi di wan boi kan abi gi wan meisje, noso di wan meisje kan abi gi wan boi. Fa Kresten papa nanga mama kan yepi yu te yu e kisi den firi disi?

Den firi di wan boi kan abi gi wan meisje, noso di wan meisje kan abi gi wan boi

A man di e yepi a kapten fu tyari a sipi, e gi a kapten a rai fu tan farawe fu santi bangi di de na ondro a watra. Santi bangi safu, ma den kan kori yu tu fu di den e dribi go na tra presi ibri tron baka. Na a srefi fasi yu papa nanga yu mama ben sa wani taki yu e tan farawe fu situwâsi di kan hati den firi fu yu. Fu eksempre, papa nanga mama sabi taki wan boi kan abi tranga firi gi wan meisje, èn wan meisje kan abi tranga firi gi wan boi. Den sabi tu taki a no makriki fu taki soifri fa yu e firi te yu de na ini a situwâsi disi. Ma te den firi disi kon tranga kaba, dan den kan meki yu brokosaka trutru.

Na eksempre fu Dina e sori taki yu kan kisi problema te yu e go tumusi krosibei fu sani di kan du yu ogri. A kan taki Dina ben wani sabi sani èn a kan taki a ben wani abi prisiriten. Kande dati meki taki a go suku mati na mindri den umapikin fu Kanan. Den umapikin disi no ben hori densrefi na hei markitiki èn den no ben abi bun gwenti. Na a fosi presi a ben gersi leki a ben prisiri na wan fasi di no ben o du en ogri, ma heri esi a ondrofeni wan tumusi takru sani; wan yongu man, „a moro lespekiwan” fu a foto, ben abi seks nanga en nanga tranga.—Genesis 34:1, 2, 19.

Na ini a ten san wi e libi now, den sortu ogri disi e kon moro furu fu di sma e poti tumusi furu prakseri na seks (Hosea 5:4). Furu yonguwan kan meki yu prakseri taki a moro switi sani di wan boi kan du, na fu meki prisiri nanga wan meisje, noso efu yu na wan meisje, fu meki prisiri nanga wan boi. Kande yu ati e bigin naki moro esi te yu e  sidon prakseri fa yu nanga wan sma di yu feni moi de unu wawan na wan presi. Ma papa nanga mama di lobi yu sa kibri yu, fu di den o yepi yu fu no abi demakandra nanga yonguwan di no e lespeki den markitiki fu Gado.

Laura e agri taki te tini wani kon sabi sani nomonomo, dan den no man si sani krin moro. „Te den meisje fu mi klas e fruteri mi fa den dansi te lati neti nanga wan tu boi di den lobi, dan den e taki neleki a de wan sani di den no man frigiti noiti moro. Mi sabi taki furu tron den e meki bigi fu a tori moro leki fa a de trutru, ma toku mi ben sa wani sabi fa a de fu du a sani dati èn mi e prakseri taki kande mi e misi furu prisiri. Aladi mi sabi taki mi papa nanga mi mama abi leti fu no seni mi go na den sortu presi dati, toku a e hari mi fu go.”

Wan sipi no abi rem, sobun a e teki wan langa pisi ten fosi a kan tan tanapu. Papa nanga mama sabi taki te yu abi tranga seks firi gi wan tra sma, dan a srefi sani kan pasa nanga yu tu. A buku Odo e taki dati wan man di abi tranga seks firi èn di no man hori ensrefi, de neleki wan mankaw di sma e tyari go srakti (Odo 7:21-23). Yu no wani taki so wan sani pasa nanga yu, a no so? Yu no wani meki wan sani hati yu firi na so wan fasi taki yu e brokosaka èn taki yu e kon swaki na yeye fasi. A kan taki yu papa nanga yu mama e si taki yu ati e bigin kori yu ini a tori disi, èn den kan gi yu rai fu yepi yu nanga a problema disi. Yu sa handri na wan koni fasi èn gi yesi na den, so taki yu kan wai pasi gi rampu?—Odo 1:8; 27:12.

Te tra yonguwan e dwengi yu fu du den srefi sani di den e du, dan yu abi a yepi fu yu papa nanga yu mama fanowdu sosrefi. Fa den kan yepi yu?

Yu speri kan abi wan tumusi tranga krakti na yu tapu

Te a watra na ini a se e lon bun tranga, dan a kan hari a sipi so taki a e lasi pasi. Fu man feti teige a krakti dati, dan a kapten musu tyari a sipi go na wan tra sei. Na a srefi fasi yu kan lasi pasi na yeye fasi, efu yu no e kakafutu gi a krakti di tra yonguwan abi na yu tapu.

Soleki fa na ondrofenitori fu Dina e sori, dan „yu sa kisi pori te yu de wan mati fu don sma” (Odo 13:20, Today’s English Version). Memre taki te Bijbel e taki fu „don sma”, dan a e sori go na sma di no sabi Yehovah, noso sma di no wani waka den pasi fu en.

Ma kande a no makriki fu no teki a denki fu den pikin fu yu klas, noso fu no handri neleki den.  María José e fruklari: „Mi ben wani taki tra yonguwan teki mi leki den mati. Fu di mi no ben wani meki den denki taki mi de tra fasi leki den, meki mi ben du furu muiti fu de neleki den.” Den speri fu yu kan abi krakti na yu tapu sondro taki yu sabi dati. Disi kan de fu si na den poku di yu e arki, den krosi di yu e weri, èn sosrefi a fasi fa yu e taki. Kande yu e firi bun te yu de nanga yonguwan di abi a srefi yari leki yu. Dati no fowtu, ma na wan makriki fasi den kan abi furu krakti na yu tapu, èn dati kan abi tumusi takru bakapisi gi yu.—Odo 1:10-16.

Caroline e memre a problema di a ben abi wan tu yari pasa: „Furu meisje nanga suma mi ben e waka ben hori nanga boi kaba, srefi den wan di ben abi 13 yari. Furu yari langa mi ben abi a firi fu du a srefi sani leki den. Ma mi mama yepi mi fu pasa a muilek ten dati. A teki en ten fu sidon arki san mi ben abi fu taki; a taki-go-taki-kon nanga mi, èn a yepi mi fu si fu san ede a de fanowdu fu wakti teleki mi kon moro bigi, fosi mi bigin hori nanga wan boi.”

Neleki a mama fu Caroline, dan yu papa nanga yu mama kan feni taki a de fanowdu fu warskow yu gi den speri fu yu, bika den kan abi krakti na yu tapu. Noso den kan tapu yu fu du son sani, noso fu de mati nanga son sma. Nathan e memre fa a ben e haritaki furu tron nanga en papa nanga en mama fu den sortu tori disi. „Furu tron, den mati fu mi ben aksi mi fu go koiri nanga den”, Nathan e taki, „ma mi papa nanga mi mama no ben wani taki mi go koiri nanga bigi grupu, noso taki mi ben e go na bigi fesa pe nowan bigisma de fu luku wi. Na a ten dati, mi no ben man frustan fu san ede mi papa nanga mi mama no ben seni mi go na den presi dati, aladi tra papa nanga mama ben gi den pikin fu den primisi fu go.”

Ma bakaten, Nathan ben kon frustan fu san ede en papa nanga en mama ben du dati. „Mi sabi taki na ini a situwâsi fu mi, ’lawfasi ben tai na a ati fu wan boi’”, na so a e taki. „A gersi leki boi kan du lawlaw sani moro makriki te den e koiri nanga makandra na ini grupu. A kan taki wan fu den e bigin du wan ogri sani, wan trawan kan go du wan moro ogri sani, èn ete wan tra boi kan du wan moro ogri sani leki den trawan srefi. Fosi yu denki, dan ala den boi e go du a srefi sani. Srefi den yonguwan di e taki dati den e dini Yehovah kan fadon na ini a trapu disi.”—Odo 22:15.

Nathan nanga María José ben musu feti fu no du san na ati fu den ben taigi den, di den papa nanga mama no ben wani taki den ben musu du sani di den speri fu den ben aksi fu den. Ma den ben arki den papa nanga mama, èn bakaten den ben breiti taki den du dati. Na odo e taki: „Poti yu yesi èn yere den wortu fu den koniwan, so taki yu ati kan gi yesi na a sabi fu mi.”—Odo 22:17.

Yu sa de warti fu kisi prèise

A no makriki fu tyari wan sipi di e anga go na wan sei, èn efu a e anga tumusi furu go na wan sei, dan a kan kanti makriki. Wi na sondusma, èn dati meki wi alamala e anga go na wan sei, fu taki en so; wi alamala abi a firi fu plisi wisrefi èn fu du sani di wi no musu du. Aladi yonguwan abi den firi disi, toku den kan abi bun bakapisi na ini den  libi efu den e arki bun sortu rai den papa nanga mama e gi den.

Fu eksempre, yu papa nanga yu mama kan yepi yu fu kon si taki wan tra pasi no de di e waka na mindri a smara pasi di e tyari wi go na libi, èn a bradi pasi di e tyari wi go pori (Mateyus 7:13, 14). Yu no musu denki taki yu kan du pikinso ogri nomo, sondro taki yu e pasa den wet fu Yehovah. A ben o de neleki yu e taki dati yu kan „tesi” wan switi sani, sondro fu swari a sani dati. Den wan di e handri na a fasi disi e „tingatinga na tapu tu difrenti prakseri”. Den e dini Yehovah, ma na a srefi ten den lobi grontapu nanga den sani fu grontapu, èn dati kan meki taki den kan kanti, noso a yeye fasi fu den kan pori, neleki fa wan sipi di anga go na wan sei kan kanti makriki (1 Kownu 18:21; 1 Yohanes 2:15). Fu san ede dati e pasa? Fu di wi abi sondu firi.

Den sondu firi fu wi e kon moro tranga efu wi no e kakafutu gi den. Te wi e ’tesi’ sondu, dan na ’ati fu wi di e kori wi’ no sa prisiri nanga pikinso nomo. A sa wani moro leki dati (Yeremia 17:9). Te wi bigin drifi gowe na yeye fasi, dan a grontapu sa abi krakti na wi tapu moro nanga moro (Hebrewsma 2:1). Kande yu no man si taki yu e anga go na wan sei na yeye fasi, ma yu Kresten papa nanga mama kan si dati. Fu tru, kande den no man wroko so makriki nanga wan computer soleki fa yu kan du dati, ma den sabi moro furu leki yu fu na ati di kan kori yu. Èn den wani yepi yu fu „tyari yu ati go na tapu a pasi”, so taki yu kan kisi libi.—Odo 23:19.

A no de fu taki dati yu no musu fruwakti dati yu papa nanga yu mama no sa meki fowtu te den e krutu sani, spesrutu te den musu gi yu rai na ini muilek afersi soleki poku, prisiriten, nanga a fasi fa yu e moi yusrefi. A kan taki yu papa nanga yu mama no abi a koni di Salomo ben abi, noso a pasensi di Yob ben abi. Neleki a man di e yepi a kapten fu tyari a sipi, na so yu papa nanga yu mama kan broko den ede tumusi nanga yu fu di den no wani taki wan ogri sani musu miti yu. Ma te yu e poti prakseri na ’a trangaleri fu yu papa, èn te yu no gowe libi a wet fu yu mama’, dan yu sa si taki a rai di den e gi warti trutru.—Odo 1:8, 9.

Kande tra yonguwan e wisiwasi den papa nanga mama. Ma efu yu papa nanga yu mama e meki muiti fu du san Bijbel e taki, dan den sa tanapu na yu sei, neleki a man di e tanapu sei a kapten fu wan sipi fu yepi en. Ala ten den sa yepi yu fu pasa iniwan sortu situwâsi, awinsi sortu gens yu e kisi. Neleki fa wan kapten fu wan sipi abi yepi fanowdu fu wan man di abi ondrofeni, na so yu abi a yepi fu yu papa nanga yu mama fanowdu fu tiri yu nanga koni. Yu kan kisi furu blesi trutru.

„Te koni e kon na ini yu ati èn sabi srefi e tron wan prisiri sani gi yu eigi sili, dan yu frustan srefi sa hori wakti gi yu, a koni fu si sani krin srefi sa kibri yu, fu frulusu yu fu a takru pasi, fu a sma di e taki takru sani, fu den sma di gowe libi den pasi fu opregtifasi fu go waka na tapu den pasi fu dungru . . . Bika den opregti sma na den wan di sa libi na grontapu, èn den wan sondro fowtu na den wan di sa tan abra na en tapu.”—Odo 2:10-13, 21.

[Prenki na tapu bladzijde 22]

A krakti di tra yonguwan abi na yu tapu kan meki yu lasi pasi na yeye fasi

[Prenki na tapu bladzijde 23]

Hori na prakseri san ben pasa nanga Dina

[Prenki na tapu bladzijde 24]

Neleki fa wan kapten fu wan sipi e aksi rai na wan man di abi ondrofeni, na so yonguwan musu suku yepi na den papa nanga den mama

[Sma di abi a reti fu a prenki na tapu bladzijde 24]

Photo: www.comstock.com