Okasi-preiki gi den sma di e taki Ingrisitongo na ini Meksikow

DI NA apostel Paulus ben wakti den brada na ini Ateine di ben o teki waka nanga en, dan a ben gebroiki na okasi fu gi kotoigi. Bijbel e fruteri: „A ben bigin taki-go-taki-kon . . . ibri dei na wowoyo nanga den sma di ben kon drape” (Tori fu den Apostel 17:17). Di Yesus ben de na pasi fu Yudea go na Galilea, dan a ben gebroiki na okasi fu preiki gi wan Samaria uma di ben de sei wan peti (Yohanes 4:3-26). Yu e gebroiki ibri okasi fu taki fu a bun nyunsu fu Gado Kownukondre?

Na ini Meksikow a makriki fu du okasi-preiki gi sma di e taki Ingrisitongo. Sma fu tra kondre lobi fu go koiri na Meksikow, difrenti universiteit studenti e go drape ala ten, èn sma fu tra kondre di de nanga pensyun lobi fu go na den presi pe sma e koiri èn na den nyanyan-presi. Furu Yehovah Kotoigi di sabi taki Ingrisitongo kon kisi a koni fu man bigin wan takimakandra nanga den sma disi. Fu taki en leti, ala ten den e suku wan okasi fu man taki nanga iniwan sma di gersi trakondre-sma, noso iniwan sma di e taki Ingrisitongo. Meki wi go luku fa den e bigin wan takimakandra.

Furu Kotoigi fu tra kondre di e dini na ini a Ingrisitongo grupu na ini Meksikow, e bigin wan takimakandra nanga sma di gersi wan trakondre-sma. Den Kotoigi e fruteri den sma suma na den èn den e aksi den sma fu sortu kondre den komoto. Furu tron disi e meki taki a sma e aksi a Kotoigi san a e du na ini Meksikow èn na so a Kotoigi e kisi na okasi fu taki fu a Kresten bribi fu en. Fu eksempre, Gloria e dini na ini na Ingrisitongo grupu na ini a foto Oaxaca pe moro preikiman de fanowdu. Gloria e feni en wan makriki sani fu bigin wan takimakandra na a fasi dati. Di a ben kaba du okasi-preikiwroko na ini a foto èn di a ben drai go baka na oso, dan wan trowpaar fu Ingrisikondre ben waka miti en. Na uma ben bari: „Mi no man bribi taki mi e si wan blaka uma dyaso na ini Oaxaca!” Na presi taki Gloria mandi, a bigin lafu èn a sori na uma fu san ede a de na ini Meksikow. Na uma ben kari Gloria fu kon dringi wan kopi kofi na en oso. Baka di den taki o ten den ben o miti baka, dan Gloria pristeri na uma a Waktitoren nanga Ontwaakt!, ma na uma no ben wani teki den tijdschrift, fu di a no ben bribi na ini Gado. Gloria ben sori en taki a lobi fu taki nanga sma di no e bribi na ini Gado, èn a ben wani sabi fa na uma e denki fu na artikel „Presi fu anbegi—Wi abi den fanowdu?” Na uma teki a tijdschrift èn a taki: „Efu yu man overtoigi mi taki wan Gado de trutru, dan dati ben o de wan kefalek sani.” Den ben taki wan tu leisi fu moi penti, aladi den ben e dringi kofi. Bakaten a trowpaar drai go baka na Ingrisikondre, ma na uma ben tan abi kontakti nanga Gloria nanga yepi fu brifi di den e seni gi makandra tapu Internet.

Gloria ben bigin wan takimakandra tu nanga Saron, wan studenti fu Washington, D.C.  Saron ben du friwani-wroko na ini a foto Oaxaca makandra nanga den Ingi-uma fu a kondre. A ben musu du dati fu ben man kisi na universiteit diploma fu en. Baka di Gloria prèise Saron gi a bun wroko di a ben e du, dan a fruteri Saron san a e du na ini Meksikow. Na so den bigin abi wan moi takimakandra fu Bijbel èn fu den sani di Gado no sa du gi pôtisma wawan, ma gi ala sma. Saron ben taki dati sani waka heri tra fasi leki fa a ben e denki. Noiti ete a ben taki nanga Kotoigi na ini Amerkankondre, ma wan fu den fosi sma di a miti na ini Meksikow ben de wan fu den Kotoigi fu Yehovah! Saron ben teki wan bijbelstudie èn wantewante a bigin go na den Kresten konmakandra.

Furu trakondre-sma wani libi na ini wan moi presi di gersi wan paradijs èn fu dati ede den e froisi go na den sekanti fu Meksikow. Fu di Laurel sabi dati, meki a e gebroiki a sani disi fu bigin wan takimakandra nanga sma na ini a foto Acapulco. A e aksi den sma efu den lobi Acapulco èn efu Acapulco de leki wan paradijs gi den te den e agersi dati nanga a presi pe den komoto. Baka dati a e fruteri den taki heri esi a heri grontapu sa tron wan trutru paradijs. Na so Laurel bigin wan takimakandra nanga wan uma fu Kanada di a ben miti na wan datra-oso pe den e luku siki meti. Disi ben meki taki na uma bigin studeri Bijbel. Yu denki taki yu kan abi bun bakapisi na ini a kontren fu yu, te yu ben o bigin wan takimakandra na so wan fasi?

’Na strati èn na den publiki pren’

Furu tron den preikiman e bigin wan takimakandra na strati èn na den publiki pren fu di den e aksi: „Yu e taki Ingrisitongo?” Furu Meksikowsma e taki Ingrisitongo fu di den e wroko na presi pe den musu taki Ingrisitongo èn fu di furu fu den ben e libi na ini Amerkankondre fosi.

Wan Kresten trowpaar ben taki nanga wan owru uma di ben sidon na ini wan rolsturu aladi wan uma di e sorgu sikisma ben e pusu en. Den ben aksi na owru uma efu a e taki Ingrisitongo. Na uma ben piki den taki a man taki Ingrisitongo fu di a ben e libi na ini Amerkankondre someni yari langa. Na uma teki A Waktitoren nanga Ontwaakt! aladi a no ben leisi den noiti ete. A taigi a trowpaar taki a nen Consuelo, èn a taigi den pe a e tan. Baka fo dei, di a trowpaar go luku pe na uma e tan, dan den kon si taki a e libi na wan presi pe Lomsu non e sorgu gi owrusma. A fosi leisi, a no ben de makriki fu miti Consuelo fu di den non no ben e frutrow den èn fu dati ede den taigi a trowpaar dati den no ben kan miti Consuelo. Ma a trowpaar ben tan aksi den non nomonomo fu taigi Consuelo taki den ben de drape èn taki den ben wani gi en odi. Wantewante Consuelo ben gi a trowpaar wan kari fu kon na inisei. Sensi a ten dati, na uma disi di abi 86 yari, ben prisiri fu studeri Bijbel doronomo, aladi den non ben taki takru fu a studie. A ben go na wan tu Kresten konmakandra sosrefi.

Odo 1:20 e taki: „A tru koni srefi e tan bari tranga na tapu strati srefi. Na den publiki pren a e meki sma yere en sten.” Luku fa dati feni presi na a pren fu a foto San Miguel de Allende. Fruku mamanten Ralph ben waka miti wan man di ben pasa 40 yari kaba; a man ben e sidon na tapu wan bangi. A man ben fruwondru srefisrefi di Ralph pristeri en A Waktitoren nanga Ontwaakt!, ne a bigin fruteri Ralph san miti en na ini en libi.

A ben de wan owru srudati di ben feti na ini Vietnam, èn fu di a ben si fa so furu sma ben e dede, meki hebi senwe naki en di a ben de na ini  a legre. Den ben puru en na ini a feti, èn den ben poti en na ini a legre kampu. Drape a ben musu wasi den skin fu dede srudati, fosi den ben seni den go na Amerkankondre. Aladi 30 yari pasa sensi a ten dati, toku a e kisi takru dren doronomo èn ala ten a e frede. A mamanten dati di a ben sidon na a pren, dan a begi na ini en ati meki Gado yepi en.

A man ben teki den tijdschrift èn a ben teki a kari fu go na a Kownukondre zaal. Baka a konmakandra, a man fruteri taki den tu yuru di a ben de na ini a Kownukondre zaal, ben de a fosi tron baka 30 yari di a ben e firi korostu. A man disi ben de na San Miguel de Allende fu wan tu wiki nomo, ma a ben kisi bijbelstudie wan tu leisi èn a ben go na ala den konmakandra teleki a drai go baka na a presi pe a e tan. Sani ben seti so taki a man disi ben kan tan kisi bijbelstudie.

Du okasi-preikiwroko na wrokope èn na skoro

Yu e meki den sma na wrokope sabi taki yu na wan Yehovah Kotoigi? Adrián, di e yuru kamra gi sma di e kon nyan fakansi na ini a foto Cape San Lucas, e du dati. Judy, wan uma di ben wroko makandra nanga Adrián e fruteri san ben de a bakapisi: „Efu wan sma ben o taigi mi sowan 3 yari na fesi taki mi ben o tron wan Yehovah Kotoigi, dan mi ben o taki, ’Noiti na ini mi libi!’ Ma mi ben bosroiti fu leisi Bijbel. Mi ben e prakseri: ’A no sa hebi so, bika mi lobi leisi’. We, mi no ben kaba leisi siksi bladzijde, ne mi kon si taki mi abi yepi fanowdu. Mi ben denki taki a wan-enkri sma di kan yepi mi, ben de Adrián di ben e wroko makandra nanga mi. Mi ben lobi fu taki nanga en, fu di a ben de a wan-enkri sma di mi ben kan frutrow na mi wrokope.” Wantewante Adrián aksi Judy efu a ben kan kon nanga Katie fu piki den aksi fu en. Ne Katie, na uma di ben o trow nanga Adrián, bigin studeri Bijbel nanga Judy, èn no solanga baka dati Judy tron wan dopu Kotoigi.

Yu kan du okasi-preikiwroko na skoro? Tu Kotoigi ben e leri Spanyorotongo na wan universiteit, ma wan dei den no ben go na skoro fu di den ben musu go na wan Kresten konmakandra. Di den ben go na skoro baka, dan den ben musu fruteri na ini Spanyorotongo pe den ben de èn san den ben e du. Den gebroiki na okasi èn den brokobroko na ini Spanyorotongo san ben pasa. Silvia, a skoromisi ben wani sabi moro fu Bijbel profeititori trutru. A bigin studeri Bijbel na ini Ingrisitongo èn now a de wan preikiman fu a bun nyunsu. Wan tu famiriman fu en e studeri Bijbel sosrefi. Silvia e fruteri: „Mi feni san mi ben e suku mi heri libi langa.” Iya, okasi-preikiwroko kan abi bun bakapisi.

Gebroiki tra okasi

Te yu e sori switifasi, dan dati kan gi yu na okasi fu gi kotoigi. Jim nanga Gail, di e dini na ini a foto San Carlos, Sonora, ondrofeni taki disi de tru. Siksi yuru mamanten, wan uma ben e waka na strati nanga den dagu fu en, di a tan tanapu fu luku fa a dyari fu den moi. Jim nanga Gail ben kari en kon na inisei fu dringi kofi nanga den. Fosi tron na ini ala den 60 yari di a de na libi, a ben yere fu Yehovah, nanga a pramisi fu têgo libi. Den bigin studeri Bijbel nanga en.

 Adrienne e sori freimdesma switifasi sosrefi. A ben nyan na ini wan nyanyan-presi na ini a foto Cancún, di wan yongu boi waka miti en èn aksi en efu a komoto fu Kanada. Di Adrienne piki en taki na so a de, dan a boi sori Adrienne taki en nanga en mama ben wani yepi en sisa fu skrifi wan sani gi skoro, di abi fu du nanga Kanadasma. A mama, di ben taki Ingrisitongo, ben kon sidon na a tafra fu Adrienne. Nanga pasensi, a ben piki den sani di a mama ben aksi en fu Kanadasma, èn baka dati Adrienne taigi en: „Ma mi komoto fu Kanada kon dyaso gi wan moro prenspari sani, namku fu yepi sma kon sabi moro fu Bijbel. Yu ben wani sabi moro fu a tori disi?” Na uma ben piki en taki a wani sabi moro. Tin yari na fesi, na uma ben gowe libi a kerki fu en èn ensrefi ben pruberi fu studeri Bijbel. Na uma ben gi Adrienne en telefon-nomru nanga en adres, èn den ben bigin wan bijbelstudie di ben abi bun bakapisi.

’Trowe yu brede na tapu a watra’

Te wi e gebroiki ibri okasi fu taki fu Bijbel waarheid, dan dati kan meki taki wi kan gi kotoigi na sma di ben yere a Kownukondre boskopu wanwan leisi nomo, noso sma di no ben yere a boskopu noiti ete. Na a sesyoro fu a foto Zihuatanejo, wan Kotoigi ben sidon na ini wan pikin wenkri pe den e seri kofi, di a si wan trowpaar fu wan tra kondre kon na inisei. Fu di a wenkri ben lai nanga sma, meki a kari den fu kon sidon na en tafra, bika tra presi no ben de moro. A trowpaar disi ben e seiri nanga sipi fu a wan presi go na a trawan sowan seibi yari langa. Den ben e sori en taki den no lobi Yehovah Kotoigi. Baka di den ben miti na ini a pikin wenkri, dan a Kotoigi ben go na a boto pe a trowpaar e tan, fu gi den wan kari fu kon na en oso. A trowpaar disi ben teki moro leki 20 tijdschrift nanga 5 buku èn den pramisi taki den ben o suku fu miti tra Kotoigi na a tra lanpe den ben o go.

Na wan nyanyan-presi na ini a foto Cancún, Jeff nanga Deb ben si wan osofamiri nanga wan moi pikin meisje. Di den ben prèise den fu a beibi fu den, dan a papa nanga mama ben aksi Jeff nanga Deb fu kon nyan wan pizza nanga den. A ben de so taki na osofamiri disi ben komoto na India. Noiti ete den ben yere fu Yehovah Kotoigi èn den no ben si den buku fu wi tu. Na osofamiri ben gowe nanga wan tu publikâsi fu Yehovah Kotoigi.

Na wan èilanti na a sesyoro fu Yucatán, Jeff ben ondrofeni wan srefi sortu sani tu. Wan Sneisi trowpaar di trow no solanga pasa, ben aksi Jeff fu meki wan fowtow gi den èn a ben du dati nanga prisiri. Di Jeff ben taki nanga den, dan a kon frustan taki den sma disi no ben miti Yehovah Kotoigi noiti ete. Aladi den ben e libi na Amerkankondre sowan 12 yari kaba, toku noiti den ben yere fu Yehovah Kotoigi srefi! Wantewante den ben abi wan switi takimakandra. Jeff ben gi den a deki-ati fu suku fu miti nanga Yehovah Kotoigi te den ben drai go baka na oso.

A kan taki wan spesrutu sani e pasa na ini a kontren fu yu, pe yu kan du okasi-preikiwroko. Di a presidenti fu Amerkankondre ben fisiti a presidenti fu Meksikow na en boitipresi krosibei fu a foto Guanajuato, dan nyunsuman fu heri grontapu ben de drape fu panya a nyunsu. Wan Kotoigi osofamiri ben gebroiki na okasi disi fu gi kotoigi na ini Ingrisitongo. Den ben abi bun bakapisi. Fu eksempre, wan nyunsuman ben de drape di ben gi nyunsu fu orloku, soleki den wan na ini Kosofo nanga Kuweit. Wan tra nyunsuman di ben e wroko makandra nanga en, ben dede leti na ini en anu baka di den sutu en nanga wan gon. Di a ben yere fu na opobaka howpu, dan nanga watra-ai a nyunsuman disi ben taki Gado tangi, fu di A meki en kon sabi taki a libi abi wan marki trutru. A ben taki dati aladi a no sa miti a Kotoigi trowpaar moro, toku noiti a no sa frigiti a howpu disi di komoto fu Bijbel.

Soleki fa den ondrofenitori disi e sori, dan furu tron wi no sabi san na den bakapisi fu okasi-preikiwroko. Ma a koni Kownu Salomo ben taki: „Trowe yu brede na tapu a watra, bika baka furu dei yu sa feni en baka.” A ben taki sosrefi: „Sai yu siri na mamanten èn no meki yu anu rostu teleki neti doro; bika yu no sabi pe disi sa abi bun bakapisi, a kan de dyaso noso a kan de drape, noso taki ala tu sa bun a srefi” (Preikiman 11:1, 6). Iya, „trowe yu brede” fayafaya na tapu furu watra èn „sai yu siri” so furu leki yu man, neleki fa Paulus nanga Yesus ben du dati èn neleki fa den Kotoigi na ini a ten disi e du gi den sma na ini Meksikow di e taki Ingrisitongo.