Ondrofenitori

Yehovah sorgu mi na wan lobi-ati fasi

SOLEKI FA FAY KING FRUTERI

Mi papa nanga mi mama ben de sma di ben abi switifasi. Ma soleki fa a de nanga furu sma, den no ben lobi kerki afersi kwetikweti. Mi mama ben gwenti fu taki: „Wan Gado musu fu de, bika efu Gado no de, dan suma meki den bromki, èn suma meki den bon?” Te a ben abi fu du nanga Gado tori, dan dati ben de a wan-enkri sani di a ben taki.

MI PAPA dede na ini 1939, di mi ben abi 11 yari. Na a pisi ten dati, mi ben e libi nanga mi mama na ini a foto Stockport, pikinso go na a zuidsei fu a foto Manchester na ini Ingrisikondre. Ala ten mi ben wani sabi moro fu a Mekiman fu mi èn aladi mi no ben sabi notinoti fu Bijbel, toku mi ben e lespeki a buku disi. Fu dati ede, mi bosroiti fu go na a Kerki fu Ingrisikondre fu si san mi ben o leri drape.

Den kerki seremonia no ben abi nowan krakti tapu mi, ma te den ben e leisi den Evangelietori, dan mi no sabi fa, ma den wortu fu Yesus overtoigi mi taki san skrifi na ini Bijbel musu fu de tru tori. Te mi e prakseri a ten dati, dan mi e aksi misrefi fu san ede mi no ben leisi a Bijbel. Bakaten srefi di wan mati fu wi famiri ben gi mi wan „Nyun Testamenti” di skrifi na ini a tongo fu a ten disi, dan noiti mi ben teki ten fu leisi en.

Di feti broko na ini Korea na ini 1950, dan a sani dati poti mi na prakseri-broki trutru. A feti disi ben o panya go na tra kondre, soleki fa dati ben pasa nanga a di fu Tu Grontapufeti? Efu dati ben o pasa, dan fa mi ben o man gi yesi na a komando fu Yesus di e taki dati mi musu lobi mi feanti? Ma na a tra sei, mi ben musu tanapu e luku nomo fa sma ben e broko kon na ini a kondre fu  mi, sondro taki mi ben e du wan sani fu tapu den? Efu mi ben o du dati, dan a ben o wani taki dati mi no ben e teki mi frantwortu na mi tapu. Aladi mi ben e bruya, toku mi ben tan abi na overtoigi taki Bijbel ben abi piki tapu ala den aksi di mi ben abi. Ma mi no ben sabi fa, noso pe mi ben musu feni den piki dati.

Mi e suku a waarheid na ini Australia

Na ini 1954, mi nanga mi mama teki a bosroiti fu froisi go na Australia, pe mi sisa Jean ben e libi. Baka wan tu yari, dan Jean taigi mi taki a ben aksi Yehovah Kotoigi fu kon na mi fu di a ben sabi taki mi ben wani sabi moro fu Bijbel èn taki mi ben e go na kerki. A ben wani sabi san mi ben prakseri fu den Yehovah Kotoigi. A taigi mi: „Mi no sabi efu den e fruklari sani na yoisti fasi, ma awansi fa no fa den e fruklari sani, èn dati na wan sani di den tra kerki no e du.”

Bill nanga Linda Schneider, a trowpaar di ben e kon na mi, ben de sma di ben abi switifasi trutru. Den tu sma disi ben abi pikinmoro 70 yari èn den ben de Kotoigi furu yari kaba. Den ben wroko na wan radio station di Yehovah Kotoigi ben e drai na ini a foto Adelaide. Di a preikiwroko ben tapu na ini Australia na a ten fu a di fu Tu Grontapufeti, dan den tron furuten preikiman fu a bun nyunsu. Aladi Bill nanga Linda ben e yepi mi, toku mi ben e go fu a wan kerki na a trawan.

Wan dei, wan uma na mi wrokope tyari mi go na wan konmakandra fu na evangelie preikiman Billy Graham. Baka a konmakandra, dan wan tu fu wi miti nanga wan kerki fesiman di taigi wi taki wi ben kan poti aksi gi en. Mi poti na aksi nanga san mi ben e broko mi ede ete. Na aksi dati ben de: „Fa wan Kresten kan lobi en feanti, te a e go kiri den na ini wan feti?” Wantewante ala den sma na ini a grupu bigin takitaki fu a sani disi, so taki wan babari ben kon de. Soleki fa a ben sori, dan ala den sma ben e broko den ede nanga na aksi dati! Te fu kaba, a kerki fesiman taki: „Mi no sabi a piki tapu na aksi dati. Mi e broko mi ede te now ete nanga dati.”

Na a srefi ten, Bill nanga Linda ben e go doro fu studeri Bijbel nanga mi, èn na ini september 1958, mi teki dopu. Mi bosroiti fu teki na eksempre fu den sma di studeri Bijbel nanga mi. Sobun, na ini augustus fu a tra yari mi go na ini a gewoon pionierwroko, èn mi tron wan furuten preikiman fu a bun nyunsu. Baka aiti mun mi kisi a kari fu go na ini a spesrutu pionierwroko. Mi ben prisiri trutru di mi yere taki mi sisa Jean ben go na fesi sosrefi nanga a studie fu en, èn taki a teki dopu!

Mi kisi na okasi fu du moro

Mi ben e dini na ini wan fu den gemeente na ini a foto Sydney èn mi ben e studeri Bijbel nanga wan tu sma. Wan dei mi miti wan man di ben de kerki fesiman fosi na ini a Kerki fu Ingrisikondre, ma now a ben de nanga pensyun. Mi aksi en san a kerki fu en e leri fu a kaba fu grontapu. A taigi mi taki a ben gi leri na kerki sowan 50 yari langa, ma toku mi ben fruwondru di a piki mi: „Mi ben sa musu teki ten fu go ondrosuku dati, fu di mi no sabi Bijbel so bun leki den Yehovah Kotoigi.”

Syatu baka dati, dan den brada ben e suku sma di ben wani go dini na ini Pakistan. Mi gi mi nen, aladi mi no ben sabi taki den no e seni umasma di no trow. Den e seni soso mansma di no trow, nanga trowpaar. Soleki fa a ben sori, dan den ben seni den papira fu mi go na a edekantoro fu wi na ini Brooklyn, bika heri esi baka dati mi kisi wan brifi. A brifi disi ben sori taki efu mi ben wani, dan mi ben kan go na a foto Bombay (now a nen Mumbai), na ini India, fu di wan sma ben de fanowdu fu dini drape. Dati ben de na ini 1962. Mi teki a kari disi èn mi tan 18 mun na ini Bombay, èn baka dati mi froisi go na a foto Allahabad.

 Heri esi mi bigin du ala muiti fu leri Hindi. A tongo disi di den sma fu India e taki, e skrifi na a srefi fasi leki fa sma e taki en, èn fu dati ede a no de so muilek fu leri. Ma furu tron mi ben e lasi-ati te den ososma ben e aksi mi fu taki Ingrisitongo, na presi taki mi ben e feti fu taki a tongo fu den! Ma na ini a nyun kondre disi mi ben e kisi moi tyalensi di ben e gi mi deki-ati. Boiti dati, mi ben e prisiri fu abi demakandra nanga den tra Kotoigi di ben komoto fu Australia.

Di mi ben moro yongu dan mi ben wani trow, ma baka di mi teki dopu, mi ben abi so furu fu du na ini a diniwroko fu Yehovah, taki mi no ben e denki a sani disi moro. Ma now mi ben e bigin firi baka taki mi abi wan patna fanowdu na ini mi libi. A no de fu taki dati mi no ben wani gowe libi a kondre pe mi ben e dini. Fu dati ede mi taki nanga Yehovah fu a tori disi na ini begi, èn mi no prakseri moro fu a sani dati.

Mi kisi wan blesi di mi no ben fruwakti

Na a ten dati, Edwin Skinner ben e teki fesi na ini a wroko na a bijkantoro fu India. A ben go na a Waktitoren Bijbelskoro Gilead na ini 1946 makandra nanga furu tra getrow brada, soleki Harold King nanga Stanley Jones di den ben seni go na China. * Na ini 1958, den poti Harold nanga Stanley na strafu-oso pe ala den tu brada disi ben musu tan den wawan na ini wan aparti kamra, fu di den ben du preikiwroko na ini Shanghai. Di Harold komoto na strafu-oso na ini 1963, dan Edwin skrifi en wan brifi. Harold ben go na Amerkankondre èn na Ingrisikondre, èn baka di a drai go baka na Hong Kong, dan a skrifi Edwin baka èn a taigi en taki a ben wani trow. A taigi Edwin taki di a ben de na strafu-oso dan a ben taki nanga Yehovah na ini begi fu a tori disi. A aksi Edwin sosrefi efu a ben sabi wan Kotoigi di ben o man tron wan bun wefi gi en.

Na ini India, a gwenti de taki sma e suku trowpatna gi trawan, èn sma ben e aksi Edwin ibri tron baka fu suku wan trowpatna gi wan sma, ma a no ben wani du dati noiti. Fu dati ede a gi Ruth McKay a brifi fu Harold. Homer, a masra fu Ruth, ben de wan kringopziener. Te fu kaba, Ruth skrifi mi wan brifi fu taigi mi taki wan zendeling di ben de furu yari langa kaba na ini a waarheid, ben e suku wan sma di ben wani trow nanga en. Ruth aksi mi efu mi ben wani skrifi a brada disi. A no taigi mi suma na a brada disi èn a no taigi mi noti moro fu en tu.

A no de fu taki dati nowan sma, boiti Yehovah, ben sabi taki mi ben begi fu abi wan patna. A fosi prakseri di mi kisi ben de fu no skrifi a brada disi. Ma o moro mi ben e prakseri fu a sani disi, o moro mi ben e si taki furu tron Yehovah no e piki den begi fu wi na wan fasi fa wi e fruwakti dati. Sobun, mi skrifi wan brifi baka gi Ruth èn mi taigi en taki a ben kan aksi a brada disi fu skrifi mi,  ma dati no ben wani taki dati mi ben o trow nanga en. A di fu tu brifi di Harold King seni, ben de gi mi.

Baka di Harold King ben komoto na strafu-oso na ini China, dan difrenti koranti nanga tijdschrift ben sori fowtow fu en èn den ben fruteri a tori fu en. Na a pisi ten dati, sma na ala sei fu grontapu ben sabi a brada disi, ma san ben naki mi ati, na a getrow fasi fa a ben du a theokrasia diniwroko fu en. Fu dati ede, wi skrifi brifi gi makandra feifi mun langa, èn baka dati mi go na Hong Kong. Wi trow tapu 5 oktober 1965.

Wi ala tu ben wani trow èn wi ben wani tan na ini a furuten diniwroko, ma o moro wi ben e kon owru o moro wi ben e firi taki wi abi wan patna fanowdu. Mi kon lobi Harold, èn mi kisi dipi lespeki gi en di mi si fa a ben e sori switifasi gi sma èn fa a ben hori den firi fu trawan na prakseri te problema ben opo kon na ini a diniwroko fu wi. Wi ben abi wan trutru koloku trowlibi 27 yari langa, èn wi kisi furu blesi fu Yehovah.

Den Sneisi na sma di lobi wroko èn mi lobi den trutru. Na ini Hong Kong sma e taki a tongo di den e kari Kantonees, wan sortu Sneisitongo. Te wan sma e taki a tongo dati, dan a musu saka, noso opo en sten na wan spesrutu fasi, èn a sani disi e meki taki a moro muilek fu leri leki a Mandarijntongo. Baka di mi nanga Harold trow, dan wi go tan na ini a zendeling-oso di de na a bijkantoro  fu Yehovah Kotoigi, èn wi ben e dini na ini difrenti kontren fu Hong Kong. Wi ben koloku trutru, ma na ini 1976 mi kon siki seryusu.

San wi du di mi kon siki

Wan tu mun langa mi ben e lasi furu brudu, èn mi ben kon swaki seryusu. Fu dati ede mi ben musu du wan oparâsi. Ma den datra fu na ati-oso taigi mi taki den no ben o man koti mi sondro fu gebroiki brudu, bika efu den ben o du dati dan kande mi ben o dede. Wan dei, di den datra ben e taki fu a situwâsi fu mi, dan wan tu fu den ati-oso wrokoman pruberi fu meki mi kenki mi prakseri. Den taigi mi taki a no ben bun kwetikweti fu dede fu soso. Na a dei dati 12 sma ben o du oparâsi, èn 10 fu den sma dati ben o puru bere. Ma san mi si, na taki den ati-oso wrokoman no taigi den uma di ben de nanga bere notinoti fu tapu den fu no kiri den beibi fu den.

Te fu kaba, Harold skrifi wan brifi gi den datra fu sori den taki efu mi ben o dede, dan na ati-oso no ben o de frantwortu gi dati. Na so den datra agri fu du na oparâsi di ben de fanowdu. Den tyari mi go na ini na oparâsi kamra èn den sreka sani fu gi mi dresi di ben o meki mi sribi so taki mi no ben o firi noti. Ma na a lasti momenti, dan a datra di ben o gi mi a dresi dati no ben wani du dati moro èn den seni mi go baka na oso.

Baka dati wi go na wan datra di e dresi umasma siki èn di ben e wroko aparti fu na ati-oso. Di a si taki mi ben e siki seryusu, dan a ben wani du na oparâsi gi mi sondro taki mi ben abi fu pai furu moni, ma mi no ben musu taigi nowan sma omeni a ben aksi wi. Na oparâsi waka bun, aladi a datra no ben gebroiki brudu srefisrefi. Na a pisi ten disi mi nanga Harold si krinkrin taki Yehovah e sorgu wi na wan lobi-ati fasi.

Na ini 1992 Harold kon siki seryusu. Wi ben froisi go na a bijkantoro pe den sorgu wi ala tu na wan lobi-ati fasi. Na ini 1993, mi lobi masra en libi na grontapu kon na wan kaba di a ben abi 81 yari.

Mi e drai go baka na Ingrisikondre

Mi ben prisiri fu de wan memre fu a Bethelfamiri na ini Hong Kong. Ma moro nanga moro mi ben abi muiti nanga a waran weer drape. Mi fruwondru di mi kisi wan brifi fu na edekantoro na ini Brooklyn. Na ini a brifi disi den brada aksi mi efu mi ben wani froisi go na wan bijkantoro pe den ben kan yepi mi moro bun nanga a gosontu fu mi. Sobun, na ini a yari 2000 mi froisi go baka na Ingrisikondre èn mi tron wan memre fu a Bethelfamiri na ini Londen. Disi ben de wan lobi-ati seti trutru! A Bethelfamiri drape gi mi wan switikon èn mi e kisi prisiri fu den difrenti wroko di mi e du. Wan fu den wroko disi, na taki mi e yepi fu krin èn fu seti a bibliotheek fu a Bethelfamiri, di abi 2000 buku na ini.

Mi e dini sosrefi na ini a Sneisi gemeente di de na ini Londen, ma sani kenki drape. Na ini a ten disi wan tu fu den Sneisi drape nomo e komoto fu Hong Kong, ma moro furu fu den e komoto fu China. Den Sneisi disi e taki Mandarijntongo èn dati na wan nyun tyalensi na ini a preikiwroko. Moi ondrofenitori de fu bijbelstudie di e hori na ala sei fu Ingrisikondre. Den bijbelstudie disi e hori nanga studenti di komoto fu China kon drape fu studeri moro fara. Den e wroko tranga èn den e prisiri fu leri a waarheid fu Bijbel. A e gi mi prisiri fu yepi den sma disi.

Te mi de mi wawan na ini mi nyun oso, dan furu tron mi e prakseri a koloku libi di mi abi èn mi e tan fruwondru fu a lobi-ati fasi fu Yehovah. A lobi-ati fasi fu en abi krakti tapu ala sani di a abi na prakseri fu du èn a de krin fu si taki a e sorgu gi ibriwan fu den dinari fu en. Mi abi ala reide fu de nanga tangi gi a lobi-ati fasi fa a e sorgu gi mi.—1 Petrus 5:6, 7.

[Futuwortu]

[Prenki na tapu bladzijde 24]

Di mi ben e dini na ini India

[Prenki na tapu bladzijde 25]

Harold King na ini 1963 èn di a ben dini na ini China na ini den yari baka 1950

[Prenki na tapu bladzijde 26]

A trowdei fu wi na ini Hong Kong, tapu 5 oktober 1965

[Prenki na tapu bladzijde 26]

Mi nanga wan tu memre fu a Bethelfamiri na ini Hong Kong, a famiri Liang na mindrisei, a famiri Gannaways na a reti-anusei