Bijbel kan yepi yu fu abi wan moro bun trowlibi

TROWLIBI. Te son sma e yere a wortu disi, dan dati e meki den memre den moi sani fu a seti disi. Tra sma e firi sari. Wan wefi e kragi: „Mi nanga mi masra trow ete ma a gersi leki wi prati fu makandra. A no abi ten moro gi mi, èn ala ten mi e firi leki mi de mi wawan.”

San e meki taki tu sma di ben pramisi fu lobi èn fu warderi makandra e kon tron leki tu freimde sma gi makandra? Wán fu den sani di e meki taki dati e pasa, na fu di den tu sma disi no sabi soifri san a trowlibi wani taki. Wan nyunsuman di e skrifi datra tori ben taki: „Wi e trow sondro taki wi kisi leri fu kon sabi san na den frantwortu fu a trowlibi.”

Na ondrosuku The National Marriage Project fu a Rutgers Universiteit na ini a foto New Jersey, na Amerkankondre, e sori taki wan pikin grupu fu sma nomo sabi san na den frantwortu fu a trowlibi. Den sma di du na ondrosuku disi e taki: „Furu fu den sma di wi gebroiki fu du na ondrosuku disi, gro kon bigi nanga papa nanga mama di no ben abi wan koloku trowlibi, noso den papa nanga mama fu den broko trow. Den sortu sma disi sabi krin san na wan trowlibi di no e waka bun, ma den no sabi so bun san a wani taki te trowpatna e libi koloku nanga makandra. San wan tu fu den sma disi sabi nomo, na taki wan bun trowlibi, ’na wan trowlibi di de heri trafasi leki a di fu den papa nanga mama’.”

A de so taki Kresten no e kisi problema na ini a trowlibi fu den? Nôno. Fu taki en leti, a ben de fanowdu taki wan tu Kresten na ini a fosi yarihondro ben kisi krinkrin rai fu ’no suku fu kon fri’ fu a trowpatna fu den (1 Korentesma 7:27). A de krin fu si, taki te tu sondu sma e trow nanga makandra, dan den sa kisi problema na ini a trowlibi fu den, ma yepi de. A trowlibi fu masra nanga wefi kan kon moro bun te den e fiti Bijbel gronprakseri.

A tru taki Bijbel a no wan buku di skrifi soso fu sori sma fa den kan abi wan bun trowlibi. Ma a Sma di seti a trowlibi meki taki libisma skrifi Bijbel, èn fu dati ede wi kan fruwakti taki den gronprakseri fu en sa de wan yepi gi wi. Yehovah Gado ben taki nanga yepi fu a profeiti Yesaya: „Mi, Yehovah, na yu Gado, a Sma di e leri yu fu gi yusrefi wini, a Sma di e meki yu waka na tapu a pasi di yu musu waka. O efu yu trutru ben sa poti prakseri nomo na den komando fu mi! Dan a vrede fu yu ben sa tron leki wan liba, èn a regtfardikifasi fu yu leki den skwala fu se.”​—Yesaya 48:17, 18.

Yu nanga yu patna no lobi makandra moro leki fosi? Yu e si en leki wan hebi taki yu musu tan nanga yu trowpatna aladi un no lobi makandra moro? Wan wefi di trow 26 yari kaba, e taki: „Mi no man taigi yu o hebi a de gi mi fu de na ini so wan sortu trowlibi. A de wan firi di no e gowe èn a go na mi ati trutru.” We fu san ede yu no e bosroiti fu tyari wan kenki kon na ini a trowlibi fu yu, na presi taki yu e teki en leki fa a de? Na artikel di e kon sa sori masra nanga wefi fa Bijbel gronprakseri kan yepi den fu tyari wan bun kenki kon tapu wán spesrutu kontren na ini a trowlibi fu den. A sa yepi den fu abi a fasti bosroiti fu du ala san den man so taki a trowlibi fu den e waka bun.