Wi sa waka na ini a nen fu Yehovah fu têgo!

„Wi . . . sa waka na ini a nen fu Yehovah, wi Gado, te ten di no skotu, iya fu têgo.”​—MIKA 4:5.

1. Sortu boskopu skrifi na ini Mika kapitel 3 te go miti kapitel 5?

YEHOVAH abi wan sani fu taigi a pipel fu en, èn a e gebroiki Mika leki en profeiti. Gado abi na prakseri fu strafu sma di e du ogri. A o strafu Israel, fu di Israel fadon komoto fu a tru anbegi. Ma koloku, Yehovah sa blesi den wan di e waka na ini a nen fu en. Den boskopu disi skrifi krinkrin na ini kapitel 3 te go miti kapitel 5 fu a profeititori fu Mika.

2, 3. (a) Sortu sma den fesiman fu Israel musu de, ma san den e du na presi fu dati? (b) Fa yu ben o fruteri san na agersitori fu Mika 3:2, 3 wani taki?

² A profeiti fu Gado e taki: „Grantangi, arki, un edeman fu Yakob nanga komandanti fu na oso fu Israel. A no unu musu sabi retidu?” Iya, na den ben musu sabi retidu, ma san den e du na presi fu dati? Mika e taki: „Unu di no lobi san bun èn di lobi ogridu, di e hari sma buba puru na den skin èn di e hari a meti puru na den bonyo fu den; unu di nyan a meti fu mi pipel tu, èn di hari a buba puru na den skin srefi, èn unu naki den bonyo fu den na pisipisi srefi, èn unu masi den leki san de na ini wan bradi-mofo patu èn leki meti di de na ini wan patu fu bori.”​—Mika 3:1-3.

³ Iya, den fesiman e kwinsi den pôtisma di no man yepi densrefi! Den sma di e arki Mika man frustan den agersitori fu Mika heri bun. Te den sma e srakti wan skapu fu bori en, dan den e hari a buba fu a skapu puru, èn baka dati den e koti a meti na pisipisi. Son leisi den e broko den bonyo fu puru a fatu na ini. Den e bori a meti makandra nanga den bonyo na ini wan bigi patu, neleki a wan di Mika ben taki fu en (Esekièl 24:3-5, 10). Disi na wan moi agersitori fu sori sortu ogri-ati sani den ogri tiriman e du nanga a pipel na ini a ten fu Mika!

Yehovah wani taki wi musu du retidu

4. Sortu bigi difrenti de na mindri Yehovah nanga den fesiman fu Israel?

⁴ Wan bigi difrenti de na mindri a lobi-ati Skapuman, Yehovah, nanga den fesiman fu Israel. Den fesiman disi no e du retidu, èn na so fasi den no e du a wroko di den abi fu kibri den skapu. Na presi fu dati, den e du ogri-ati sani nanga den agersi skapu soso fu kisi wini gi densrefi. Den no e krutu na wan reti fasi, èn na so den e „du sani di e meki brudu fadon”, soleki fa skrifi na Mika 3:10. San wi kan leri fu a situwâsi disi?

5. San Yehovah e fruwakti fu den sma di e teki fesi na mindri en pipel?

⁵ Gado e fruwakti fu den sma di e teki fesi na mindri en pipel, taki den du retidu. Den futuboi fu Yehovah e du dati na ini a ten disi. Boiti dati, a de soleki fa skrifi na ini Yesaya 32:1, pe wi e leisi: „Luku! Wan kownu sa tiri na ini regtfardikifasi srefi; èn den granman sa tiri leki granman gi retidu srefi.” Ma fa a de na ini a ten fu Mika? ’Sma di no lobi san bun èn di lobi ogridu’, e tan du kruktudu na presi fu retidu.

Den begi fu suma Yehovah e piki?

6, 7. Tapu sortu prenspari sani Mika 3:4 e poti krakti?

⁶ Den ogrisma fu a ten fu Mika kan fruwakti taki Gado sa feni den bun? Kwetikweti! Mika 3:4 e taki: „Den o bari kari Yehovah fu yepi den, ma a no o piki den. Èn a o kibri en fesi gi den na a ten dati, akruderi den ogri di den du.”  A tekst disi e poti krakti tapu wan prenspari sani.

⁷ Yehovah no sa piki den begi fu wi te wi e tan du sondu fu espresi. A no sa piki den begi fu wi kwetikweti efu wi e libi wan dobru libi fu di wi e kibri den sondu fu wi, aladi wi e du neleki wi e dini Gado getrow. Soleki fa skrifi na ini Psalm 26:4, David ben singi: „Mi no sidon nanga den man di no lobi waarheid; èn den wan di e kibri san den de trutru, mi no e kon na pe den de.” Efu David srefi no ben feni den sma disi bun, dan o moro Yehovah no sa piki den begi fu den sma di e trangayesi a Wortu fu en fu espresi!

Wi e kisi krakti fu a yeye fu Gado

8. Sortu warskow den profeiti fu a ten fu Mika ben kisi?

⁸ A tron wan aladei sani gi den fesiman fu Israel fu du tumusi ogri-ati sani! Falsi profeiti e meki taki a pipel fu Gado no man anbegi en na wan yoisti fasi. Den gridi fesiman e bari „Vrede!”, ma fu taki en leti, den e blesi a feti teige iniwan sma di no e gi den nyanyan. „Fu dati ede,”, na so Yehovah e taki, „unu sa abi neti, so taki unu no sa man si fisyun; èn unu sa abi dungru, so taki unu no man du lukuman-wroko. Èn fu tru, a son sa saka gi den profeiti, èn a dei musu kon dungru gi den. Èn den sma di e si fisyun sa musu fu kisi syen, èn den lukuman sa lasi-ati trutru. Èn den sa abi fu tapu a snor fu den.”​—Mika 3:5-7a.

9, 10. San a wani taki fu ’tapu a snor’, èn fu san ede Mika no abi fu du so wan sani?

⁹ Fu san ede den „abi fu tapu a snor fu den”? Den sma na ini a ten fu Mika gwenti fu du a sani disi te den e firi syen. Èn den ogriman disi musu fu firi syen. Den ogri man disi e si taki „Gado no e piki den” (Mika 3:7b). Yehovah no e poti prakseri na den begi fu nowan ogrisma di abi heimemre.

¹⁰ A no de fanowdu taki Mika e „tapu a snor fu en”. A no e syen. Yehovah e piki den begi fu en. Luku Mika 3:8, pe a getrow profeiti e taki: „Na a tra sei, misrefi kon de nanga furu krakti, nanga yepi fu a yeye fu Yehovah, èn sosrefi nanga retidu èn nanga makti.” Mika de nanga tangi na ati trutru, bika na ini a langa pisi ten di a du diniwroko na wan getrow fasi, dan a ben de nanga „furu krakti, nanga a yeye fu Yehovah” ala ten! Disi gi en a krakti fu „taigi Yakob fu a opo di a opo ensrefi, èn Israel fu a sondu fu en”.

11. Fa libisma kan kisi krakti fu meki den boskopu fu Gado bekènti?

¹¹ Mika abi moro leki en eigi krakti fanowdu fu man meki a krutu boskopu fu Gado bekènti di sa tyari takru bakapisi kon gi den. A abi a santa yeye fu Yehovah, noso en wroko krakti, tranga fanowdu. Fa a de nanga wi? Wi sa man du a preikiwroko di wi kisi fu du, soso te Yehovah e gi wi krakti nanga yepi fu en santa yeye. A preikiwroko fu wi no sa abi bun bakapisi kwetikweti efu wi e tan du sondu fu espresi. Efu wi e tan du dati, dan Gado no o man piki wi te wi e begi en fu gi wi krakti fu du a wroko fu en. Solanga „a yeye fu Yehovah” no de na wi tapu, dan wi no man meki den krutu boskopu fu wi hemel Tata bekènti kwetikweti. Fu di Yehovah e arki den begi fu wi èn fu di wi e kisi yepi fu a santa yeye, meki wi man taki a wortu fu Gado nanga deki-ati, soleki fa Mika ben man du dati.

12. Fu san ede den disipel fu Yesus ben man ’tan taki a wortu fu Gado sondro frede’?

 ¹² Kande yu e memre a tori di skrifi na ini Tori fu den Apostel 4:23-31. Prakseri taki yu na wan fu den disipel fu Yesus na ini a fosi yarihondro. Frufolguman e suku fayafaya fu tapu a preikiwroko fu den bakaman fu Krestes. Ma den getrow Kresten disi e begi a Moro Hei Masra fu den, èn den e taki: „Yehovah, poti prakseri na a pramisi di den pramisi fu du wi ogri, èn meki den srafu fu yu tan taki a wortu fu yu sondro frede.” San na a bakapisi? Te den e begi, dan a konmakandra presi e seki, èn den alamala e kisi a santa yeye èn den e taki a wortu fu Gado sondro frede. Fu dati ede, meki wi begi Yehovah èn meki wi frutrow tapu a yepi di a e gi wi nanga yepi fu santa yeye te wi e du a diniwroko fu wi.

13. San o pasa nanga Yerusalem èn nanga Samaria, èn fu san ede?

¹³ Prakseri a ten fu Mika baka. Soleki fa Mika 3:9-12 e sori, dan den tiriman di abi brudu-paiman e aksi tyuku te den musu koti krutu, den priester e aksi pai gi a leri di den e gi, èn den falsi profeiti e du lukuman-wroko gi moni. Fu dati ede, a no e fruwondru wi taki Gado gi a komando taki Yerusalem, a mamafoto fu Yuda, „sa tron soso ipi-ipi broko ston”! Gado e meki Mika warskow den sma taki A sa meki Samaria tron „wan ipi fu broko ston” fu di falsi anbegi nanga krukafasi lai na ini Israel tu (Mika 1:6). Fu taki en leti, a profeiti de na libi ete te den legre fu Asiria e pori Samaria na ini 740 b.G.T., soleki fa a ben taki dati na fesi (2 Kownu 17:5, 6; 25:1-21). A de krin fu si taki Mika ben man taki  den krakti boskopu disi teige Yerusalem nanga Samaria, soso fu di Yehovah ben gi en a krakti fu du dati.

14. Fa a profeititori fu Mika 3:12 kon tru, èn sortu krakti disi musu abi na wi tapu?

¹⁴ Yuda no man wai pasi gi a krutustrafu fu Yehovah. Soleki fa a profeititori e taki na ini Mika 3:12, dan den sa „plugu Sion neleki wan gron”. Wi di e libi na ini a di fu 21 yarihondro, sabi taki a profeititori disi kon tru di den Babilonsma pori Yuda nanga Yerusalem na ini 607 b.G.T. A sani disi pasa furu yari baka di Mika ben taki a profeititori disi, ma a ben abi na overtoigi taki den sani disi ben o pasa trutru. A no de fu taki dati wi musu abi a srefi overtoigi taki a disiten ogri seti fu sani sa kon na wan kaba na a „dei fu Yehovah” soleki fa Bijbel taki na fesi.​—2 Petrus 3:11, 12.

Yehovah e poti sani kon reti

15. Fa yu ben o fruteri a profeititori na ini Mika 4:1-4 nanga yu eigi wortu?

¹⁵ Te wi e luku a profeititori fu Mika baka, dan wi e si taki a e meki wan tumusi moi boskopu fu howpu bekènti now. Den wortu di skrifi na Mika 4:1-4 e gi wi deki-ati trutru! Disi na wan tu fu den wortu di Mika e taki: „A musu pasa na ini a lasti pisi fu den dei, taki a bergi fu na oso fu Yehovah sa poti steifi na tapu na ede fu den bergi, èn trutru a sa opo hei na tapu den pikin bergi; èn na drape ipi-ipi sma musu go. . . . A sa hori krutu na mindri furu pipel, èn a sa poti sani reti ini a tori fu makti nâsi di de farawe. Èn den sa abi fu naki den feti-owru fu den kon tron plugu èn den lansri fu den kon tron grasinefi. Nâsi teige nâsi, den no sa opo feti-owru moro, èn den no sa leri feti moro. Èn den sa sidon trutru, ibriwan na ondro en droifibon èn na ondro en figabon, èn nowan sma sa de di e meki den beifi; bika na a mofo fu Yehovah fu den legre srefi di taki disi.”

16, 17. Fa Mika 4:1-4 e kon tru na ini a ten disi?

¹⁶ Suma na den „ipi-ipi sma” nanga den „makti nâsi” fu suma a tekst e taki dyaso? A no den nâsi nanga den tirimakti fu a grontapu disi. Na presi fu dati, a profeititori e taki fu sma komoto fu ala kondre di kon na wán fu du santa diniwroko na tapu a bergi fu a tru anbegi fu Yehovah.

¹⁷ Soleki fa a profeititori fu Mika e sori, dan heri esi ala sma na heri grontapu sa anbegi Yehovah na wan krin èn soifri fasi. Na ini a ten disi, sma di abi „a yoisti denki fu têgo libi” e kisi leri fa fu waka a pasi fu Yehovah (Tori fu den Apostel 13:48). Yehovah e koti krutu èn a e poti sani kon reti na yeye fasi gi den bribiman fu en di e horibaka gi a Kownukondre. Den sma disi sa pasa „a bigi banawtu” leki wan pisi fu a „bigi ipi” (Openbaring 7:9, 14). Fu di den naki den feti-owru fu den kon tron plugu èn den lansri fu den kon tron grasinefi, meki nownow kaba den e libi na ini vrede nanga tra Kotoigi fu Yehovah èn nanga tra sma sosrefi. A de wan prisiri sani fu de wan fu den sma disi!

Tan abi a fasti bosroiti fu waka na ini a nen fu Yehovah

18. San a wani taki te wan sma e ’sidon na ondro en eigi droifibon nanga figabon’?

¹⁸ Na ini a ten disi, sma na heri grontapu e frede srefisrefi, ma wi e prisiri fu si taki furu sma e kon sabi den pasi fu Yehovah. Wi e angri fu si a ten pe ala den sma di lobi Gado no sa feti moro, ma sa sidon na ondro den eigi droifibon nanga figabon. Furu tron sma e prani figabon na ini droifidyari (Lukas 13:6). Te wan sma e sidon na ondro en eigi droifibon nanga figabon, dan disi wani taki dati a sma dati de na ini wan situwâsi fu vrede, sani e waka bun gi en, èn a no abi fu frede noti. Nownow kaba, a banti di wi abi nanga Yehovah e meki taki wi e firi korostu èn taki wi no abi fu frede noti na yeye fasi. Te den situwâsi dati sa de na ondro a Kownukondre tiri, dan wi no sa frede èn nowan ogri sa miti wi.

19. San a wani taki fu waka na ini a nen fu Yehovah?

¹⁹ Efu wi wani taki Yehovah feni wi bun èn efu wi wani taki a blesi wi, dan wi musu waka na ini a nen fu en. Mika 4:5 e tyari disi kon na krin na wan krakti fasi. Drape a profeiti e taki: „Ala pipel, fu den sei, sa waka ibriwan fu den na  ini a nen fu en gado; ma wi, fu wi sei, sa waka na ini a nen fu Yehovah, wi Gado, te ten di no skotu, iya fu têgo.” Fu waka na ini a nen fu Yehovah no wani taki nomo dati wi musu taki nanga mofo dati En na wi Gado. A wani taki moro leki fu teki prati na den Kresten konmakandra èn na a Kownukondre preikiwroko. Efu wi e waka na ini a nen fu Yehovah, dan wi gi wi libi abra na en; èn fu di wi lobi en, meki wi e du muiti fu dini en na wan getrow fasi èn nanga wi heri ati (Mateyus 22:37). Èn leki anbegiman fu en, wi abi a fasti bosroiti fu waka na ini a nen fu Yehovah wi Gado fu têgo.

20. San Mika 4:6-13 ben taki na fesi?

²⁰ Luku den profeiti wortu na ini Mika 4:6-13 now. „Na umapikin fu Sion” musu go na ini katibo „te na Babilon”. Dati na soifri san ben pasa nanga den sma di ben e libi na Yerusalem na ini a di fu seibi yarihondro b.G.T. Ma toku, a profeititori fu Mika e sori taki wan fikapisi sa drai kon baka na Yuda, èn te Sion kon bun baka, dan Yehovah sa sorgu taki den feanti fu Sion e kisi pori dorodoro.

21, 22. Fa Mika 5:2 kon tru?

²¹ Mika kapitel 5 e taki na fesi sortu tra bigi kenki o kon. Fu eksempre, luku san Mika 5:2-4 e taki. Mika e taki na fesi dati wan Tiriman di Gado poti, wan sma di „a bigin fu en de fu sensi owruten”, sa komoto fu Betlehem. A sa tiri leki wan skapuman „na ini a krakti fu Yehovah”. Boiti dati, a Tiriman disi sa de wan bigi tiriman di no sa tiri na ini Israel wawan, ma sosrefi „te na den kaba-pisi fu grontapu”. Kande den sma na grontapu no sabi suma na a tiriman disi, ma wi sabi krin suma na en.

²² Suma ben de a moro prenspari sma di ben gebore na ini Betlehem? Èn suma sa „bigi te na den kaba-pisi fu grontapu”? Nowan tra sma leki a Mesias, Yesus Krestes! Di Herodes a Bigiwan ben aksi den granpriester nanga den leriman fu Wet pe a Mesias ben o gebore, dan den piki en: „Na Betlehem na ini Yudea”. Den gebroiki den srefi wortu di skrifi na ini Mika 5:2 (Mateyus 2:3-6). Wan tu sma fu a pipel ben sabi disi tu, bika Yohanes 7:42 e sori taki den sma dati ben e taki: „Buku no taki dati Krestes o komopo fu a famiri fu David, èn fu Betlehem, a foto pe David ben libi?”

Trutru krakti gi a pipel

23. San e pasa na ini a ten disi leki wan kontru fu Mika 5:7?

²³ Mika 5:5-15 e taki dati den Asiriasma o broko kon na ini a kondre fu teki en abra, ma disi no o de fu wan langa pisi ten. Mika e sori tu taki Gado sa puru atibron tapu den nâsi di no e gi yesi na en. Mika 5:7 e pramisi taki wan fikapisi fu den Dyu di sori berow sa drai go baka na a mamakondre fu den, ma den wortu disi abi fu du nanga a ten fu wi tu. Mika e taki: „Den wan di tan abra fu Yakob musu tron na mindri furu pipel leki dow fu Yehovah, èn leki alen di e fadon bogobogo na tapu a grasi.” Mika e gebroiki a moi agersitori disi fu sori taki den sma di tan abra fu Yakob, noso Israel na yeye fasi, sa de wan blesi di Gado gi libisma. Den „tra skapu” fu Yesus, di abi a howpu fu libi fu têgo na grontapu, e prisiri trutru fu wroko skinskin nanga a disiten fikapisi fu „na Israel fu Gado”, fu gi sma krakti na yeye fasi (Yohanes 10:16; Galasiasma 6:16; Sefanya 3:9). A tori disi e meki wi prakseri wan prenspari sani. Leki Kownukondre preikiman, wi alamala musu warderi a grani di wi abi fu gi trawan trutru krakti baka.

24. Sortu pisi fu Mika kapitel 3 te go miti kapitel 5 naki yu ati?

²⁴ San yu leri fu a profeititori na ini Mika kapitel 3 te go miti kapitel 5? Kande yu leri den sani disi: (1) Gado wani taki den sma di e teki fesi na mindri a pipel fu en musu du retidu.  (2) Yehovah no o piki den begi fu wi te wi e du sondu fu espresi. (3) Wi sa man du a preikiwroko di wi kisi fu du, soso te Gado e gi wi krakti nanga yepi fu en santa yeye. (4) Efu wi wani taki Yehovah feni wi bun, dan wi musu waka na ini a nen fu en. (5) Leki Kownukondre preikiman, wi musu warderi a grani di wi abi fu gi sma trutru krakti. Kande tra sani na ini a profeititori naki yu ati. San moro wi kan leri fu a Bijbel buku disi di abi profeititori? A tra artikel sa sori wi san wi kan leri fu den lasti tu kapitel fu a profeititori fu Mika di e tranga a bribi fu wi.

San yu ben sa piki?

• San Gado wani fu den sma di e teki fesi na mindri a pipel fu en?

• Fu san ede begi nanga santa yeye na prenspari sani di abi fu du nanga a diniwroko di wi e du gi Yehovah?

• Fa sma kan ’waka na ini a nen fu Yehovah’?

[Aksi fu a tori disi]

[Prenki na tapu bladzijde 15]

Yu man fruteri san a patu na ini na agersitori fu Mika wani taki?

[Prenki na tapu bladzijde 16]

Neleki Mika, wi e du wi diniwroko nanga deki-ati tu