Ondrofenitori

Wan sma di e yepi trawan e frigiti en eigi broko-ede

SOLEKI FA JULIÁN ARIAS FRUTERI

Na ini 1988 di mi ben abi 40 yari, a ben gersi leki mi heri libi ben seti kaba. Mi ben e wroko na wan presi di ben abi kantoro na ini furu kondre na grontapu èn mi ben de driktoro fu wan fu den kantoro disi na ini a pisi kontren pe mi ben e tan. Fu a wrokope mi ben kisi wan moi diri oto, den ben e pai mi bun, èn mi ben abi wan kefalek moi kantoro mindrisei fu a foto Madrid na Spanyorokondre. Na wrokope den ben e taki leki den ben o meki mi tron driktoro fu a heri kondre srefi. Na a ten dati mi no ben denki srefi taki mi libi ben o kenki dorodoro.

WAN dei na ini a yari dati, a datra fu mi taigi mi taki mi abi multiple sclerose, wan siki di no man dresi. A nyunsu disi seki mi trutru. Bakaten, di mi leisi san a siki disi kan du nanga wan sma, dan mi bigin frede srefisrefi. * A ben gersi leki mi heri libi langa mi ben o abi fu libi nanga a prakseri taki iniwan momenti wan ogri sani ben o pasa nanga mi. Fa mi ben o sorgu gi Milagros, a wefi fu mi, nanga Ismael, mi manpikin fu dri yari? Fa wi ben o du, now di mi kon siki? Aladi mi ben e denki fu den sani disi, wan tra sari sani pasa nanga mi.

Wan mun baka di a datra fu mi taigi mi taki mi siki, dan a basi fu mi kari mi kon na ini en kantoro èn a taigi mi taki den abi wan sma fanowdu di e gi a wrokope wan „bun nen”. Wan sma di abi wan siki di kan meki a dede te fu kaba, no ben o gi a wrokope wan bun nen, awinsi a siki fu en no ben de so takru ete. Sobun, wantewante èn leti  drape mi lasi mi wroko èn mi basi seni mi gowe. Wantronso mi ben de sondro wroko!

Te mi ben de nanga mi osofamiri, dan mi ben e pruberi fu du neleki mi no ben e broko mi ede. Ma mi ben wani fu de mi wawan, so taki mi ben man denki dipi fu a nyun situwâsi disi èn so taki mi ben kan denki fu a libi fu mi na ini a ten di de na mi fesi. Mi ben e feti nanga misrefi fu di moro nanga moro mi ben e lasi-ati. San hati mi moro na taki wantronso mi ben tron wan soso sani gi den sma na wrokope.

Mi e kisi krakti fu a swakifasi fu mi

Koloku taki na ini a tumusi muilek ten disi mi ben abi difrenti sani di ben e gi mi krakti. Sowan 20 yari na fesi, mi tron wan Kotoigi fu Yehovah. Sobun, mi begi Yehovah nanga mi heri ati èn mi fruteri en fa mi ben e firi èn fa mi ben e broko mi ede nanga sani di ben o pasa na ini a ten di de na mi fesi. A wefi fu mi, di abi a srefi bribi leki mi, ben de wan bigi deki-ati gi mi. Wan sani di mi warderi trutru ben de a switifasi nanga sari-ati di wan tu bun mati fu mi ben sori gi mi ​—Odo 17:17.

Wan tra sani di yepi mi na taki mi ben e firi taki mi ben abi wan frantwortu na trawan. Mi ben wani kweki mi boi na wan bun fasi, mi ben wani gi en leri, mi ben wani prei nanga en, èn mi ben wani leri en fu man preiki bun. Sobun, mi no ben kan lasi-ati. Boiti dati, mi ben de wan owruman na ini wan fu den gemeente fu Yehovah Kotoigi, èn den Kresten brada nanga sisa fu mi drape ben abi mi fanowdu. Efu mi ben o gi pasi taki a tesi disi meki mi lasi bribi, dan sortu eksempre mi ben o de gi trawan?

A no de fu taki, dati na gosuntu sei èn na moni sei, sonwan fu den kenki ben hebi srefisrefi, ma bun kenki ben de tu. Wan leisi mi yere wan datra taki: „Wan siki no e pori a libi fu wan sma, ma na presi fu dati a e kenki a libi fu a sma.” Èn misrefi kon si taki a no ala den sani di kenki ben takru.

A fosi sani na taki „a maka na ini mi skin” yepi mi fu frustan moro bun sortu problema tra siki sma abi èn mi man sori moro bun taki mi e frustan fa den e firi (2 Korentesma 12:7). Noiti ete mi ben frustan den wortu fu Odo 3:5 so bun leki now. Drape skrifi: „Frutrow tapu Yehovah nanga yu heri ati èn no frutrow tapu yu eigi frustan.” A moro prenspari sani na taki a nyun situwâsi disi leri mi san na den trutru prenspari sani na ini a libi, sortu sani e gi prisiri trutru, èn sortu sani e gi mi a firi taki mi de wan warti sma. Mi ben man du furu sani na ini na organisâsi fu Yehovah ete. Mi kon si san den wortu fu Yesus wani taki trutru di a taki: „Wan sma sa de moro koloku te a e gi sani, leki te a e kisi sani.”​—Tori fu den Apostel 20:35.

Wan nyun fasi fu libi

Syatu baka di datra si a siki fu mi, dan mi kisi wan kari fu go na wan konmakandra na ini Madrid pe Kresten friwani-wrokoman ben e kisi leri fa fu seti wan bun wrokomakandra na mindri Kotoigi di siki èn den datra di e dresi den. Bakaten, den friwani-wrokoman disi ben orga na ini difrenti Ati-oso Kontakti Komte. Gi mi, a konmakandra disi ben kon soifri na a yoisti ten. Mi kon si taki disi na wan moro bun wroko, wan wroko di e gi mi moro prisiri leki iniwan tra wroko di e pai furu moni.

Na a konmakandra wi leri taki den nyun Ati-oso Kontakti Komte ben abi leki marki fu seti wan bun wrokomakandra nanga den difrenti ati-oso, so taki den ben kan wai pasi gi problema di ben kan opo kon. Fu man doro a marki disi den sma na ini den komte ben abi fu go taki nanga den datra, èn sosrefi nanga tra sma di abi fu du nanga a gosuntu fu trawan. Den komte disi e yepi tra Kotoigi fu feni datra di wani fu dresi den sondro fu gebroiki brudu. Noiti mi no ben leri datra sani, sobun yu kan frustan taki now mi ben abi fu leri wan lo kefalek datra wortu nanga gwenti, èn mi ben musu sabi fa den ati-oso seti. Toku, a konmakandra dati kenki a fasi fa mi ben e denki èn nanga prisiri mi  drai go baka na oso, klariklari fu bigin nanga a nyun wroko disi.

Mi e prisiri fu go na den ati-oso

Aladi safrisafri a siki fu mi ben e meki mi kon lan, toku mi kisi moro frantwortu leki memre fu wan Ati-oso Kontakti Komte. Mi e kisi wan sortu pensyun fu di a siki fu mi meki taki mi no man wroko, sobun mi ben abi ten fu go na den ati-oso. Fu go na den ati-oso de moro makriki èn a e gi moro wini leki san mi ben fruwakti, aladi wawan leisi mi no abi so bun bakapisi. Aladi mi de na ini wan rolsturu now, toku a no de wan bigi problema gi mi fu go na den ati-oso. Wan tra memre fu a komte e go nanga mi ala ten. Boiti dati, datra gwenti fu taki nanga sma di de na ini rolsturu, èn son leisi a gersi leki den e arki mi nanga moro lespeki te den e si omeni muiti mi e du fu kon na den.

Na ini den lasti tin yari, mi go na hondrohondro datra kaba. Sonwan fu den ben de klariklari fu yepi wi na a bigin kaba. Datra Juan Duarte fu Madrid na wan ati-datra èn a e si en leki wan prenspari sani fu lespeki a bosroiti di siki sma e teki akruderi a konsensi fu den. Wantewante a datra disi pristeri ensrefi fu yepi wi. Sensi a ten dati a du moro leki 200 oparâsi sondro fu gebroiki brudu gi siki Kotoigi fu difrenti pisi fu Spanyorokondre. Na ini den yari di pasa, moro nanga moro datra bigin du oparâsi sondro fu gebroiki brudu. Wan fu den reide fu san ede den e du disi na fu di wi e tan go na den, ma wan tra reide na taki den datra e ondrosuku sani moro fini èn den kisi bun bakapisi di den du oparâsi sondro fu gebroiki brudu. Èn wi sabi seiker taki Yehovah blesi den muiti di wi meki.

Son ati-datra e du ati-oparâsi spesrutu gi pikin-nengre èn a fasi fa den tyari densrefi, gi mi deki-ati trutru. Tu yari langa wi ben e kon makandra nanga tu datra di e koti sma, èn nanga tra datra di e gi sma spoiti fu meki den sribi te den musu du wan oparâsi. Wi ben gi den wan tu publikâsi fu datra tori di ben e sori san tra datra nanga a srefi wroko e du. A muiti di wi ben meki ben abi leki bakapisi taki na ini 1999 wan konmakandra ben hori pe den ben taki spesrutu fu pikin-nengre di abi fu du wan ati-oparâsi. Ondro a tiri fu wan datra fu Ingrisikondre, den tu datra di e koti sma, ben man du wan tumusi muilek oparâsi gi wan beibi fu Kotoigi. Na ati-klèp fu a beibi disi no ben e wroko bun. * Mi ben breiti srefisrefi makandra nanga a papa nanga mama fu a beibi di wan fu den datra komoto na a oparâsi-kamra fu taki dati ala sani ben waka heri bun èn dati den ben lespeki a bosroiti di a papa nanga a mama fu a beibi ben meki akruderi a konsensi fu den! Now den tu datra disi e yepi siki Kotoigi fu heri Spanyorokondre doronomo.

A moro moi sani fu den sortu tori disi, na taki mi e si dati mi man yepi den Kresten brada fu mi. Nofo tron te den e meki kontakti nanga wan Ati-oso Kontakti Komte, dan den de na ini wan fu den moro muilek ten na ini den libi. Kande den abi fu du wan oparâsi, èn den datra fu na ati-oso drape, no wani noso no man yepi den sondro brudu. Ma te den brada kon sabi taki leti dyaso na ini Madrid difrenti tra datra de di e gi yepi sondro brudu, dan den e prisiri srefisrefi. Mi ben man si  na a fesi fu wan brada taki a ben abi broko-ede, ma baka dati a kon firi korostu soso fu di wi ben de drape nanga en na ati-oso.

Krutuman nanga datra gwenti

Na ini den lasti yari, den memre fu na Ati-oso Kontakti Komte go na krutuman sosrefi. Te den e go na den krutuman, dan den e gi den a publikâsi Family Care and Medical Management for Jehovah’s Witnesses (Fa datra kan sorgu èn dresi Kotoigi fu Yehovah di siki). A buku disi de spesrutu fu sori krutuman nanga trawan fa wi e denki fu a gebroiki fu brudu èn fa den kan yepi wi na wan tra fasi sondro fu gebroiki brudu. A ben de fanowdu trutru fu go na den sma disi fu di fosi, a ben pasa wan tu leisi kaba na ini Spanyorokondre taki krutuman ben gi datra primisi fu gi siki sma brudu aladi a siki sma no ben wani dati.

Den kantoro fu krutuman na kefalek moi kantoro èn a fosi leisi di mi ben go drape mi ben e fredefrede aladi mi ben e lolo nanga mi sturu go na a kantoro. Efu dati no ben sari ete, dan mi ben kisi wan pikin ongoloku èn mi ben fadon fu a sturu go na tapu mi kindi. Wan tu krutuman nanga afkati ben si san pasa, èn nanga switifasi den kon yepi mi, ma syen ben kisi mi trutru na fesi den.

Aladi den krutuman no ben sabi seiker fu san ede wi ben kon na den, toku furu fu den ben handri na wan switi fasi. A fosi krutuman pe mi ben go, ben prakseri kaba fu a fasi fa wi e si sani, èn a taki dati a ben wani taki finifini nanga wi fu a tori. A tra leisi di wi go na en, dan ensrefi lolo mi go na ini en kantoro èn a ben arki wi nanga ala prakseri. Wi ben kisi bun bakapisi fu a fosi fisiti dati èn disi ben gi den tra brada nanga mi deki-ati fu no frede moro, èn syatu baka dati wi kisi moro bun bakapisi.

Na ini a srefi yari dati, wi gi wan tra krutuman a Family Care buku tu. A arki wi nanga switifasi èn a taki dati a ben o leisi en. Mi gi en mi telefon-nomru so taki a ben sa man bel mi efu wan problema ben kon wantronso. Tu wiki na baka, a bel mi fu di wan datra na ini a birti ben aksi en fu gi primisi so taki a ben kan gi brudu na wan Kotoigi di ben musu du wan oparâsi. A krutuman taigi wi taki a ben wani dati wi ben musu yepi en fu feni wan lusu gi a problema disi, so taki den ben kan lespeki a winsi fu a Kotoigi fu no teki brudu. A no ben muilek gi wi fu feni wan tra ati-oso pe den datra ben du na oparâsi gi a Kotoigi sondro fu gebroiki brudu èn ala sani ben waka heri bun. A krutuman ben breiti fu yere disi èn a ben gi wi a dyaranti taki tra leisi a ben o pruberi fu lusu den sortu problema disi na a srefi fasi.

 Furu tron te mi ben e go na den ati-oso, dan wi ben e taki fu datra gwenti. Disi ben de so fu di wi ben wani taki den datra musu lespeki den reti fu a siki sma èn sosrefi bosroiti di a teki akruderi a konsensi fu en. Wan ati-oso di e wroko makandra nanga wi, ben gi mi wan kari fu abi wan prati na wan les di ben abi fu du nanga datra gwenti. A les disi ben gi mi na okasi fu sori den datra di ben abi fu du nanga oparâsi tori, fu san ede wi no e teki brudu èn san Bijbel e taki fu a tori disi. A les disi yepi mi sosrefi fu frustan den furu muilek bosroiti di datra abi fu teki.

Wan fu den leriman di e gi a les disi na Professor Diego Gracia. Doronomo a datra disi e gi wan barinen les spesrutu gi Spanyoro datra pe a e leri den na sortu gwenti den musu hori densrefi leki datra. Datra Gracia kon de wan fayafaya bakaman fu a reti di wi abi fu aksi wan datra fu dresi wi soleki fa wi wani dati, namku sondro brudu. * Wi e go na a datra disi ibri tron baka èn disi ben meki taki wan tu Kotoigi fu Yehovah na a bijkantoro fu Spanyorokondre kisi wan kari fu kon na wan les. Na a les disi den ben fruteri den datra di ben e kisi leri fu Professor Gracia, fa Kotoigi e denki fu a teki fu brudu. Sma sabi wan tu fu den datra disi leki den moro bun datra fu a kondre.

Fa mi e du nanga a siki fu mi

A no de fu taki dati a prisiri wroko di mi e du gi tra bribiman no lusu ala problema di mi abi. A siki fu mi e kon moro takru. Ma koloku mi frustan bun ete. Mi e warderi en trutru taki a wefi nanga a manpikin fu mi no e kragi noiti, so taki mi man du mi wroko ete. Mi no ben o man du disi efu den no ben e yepi mi èn efu den no ben e horibaka gi mi. Misrefi no man knopo mi eigi empi èn mi no man weri mi yakti tu. Spesrutu tapu satra mi e breiti fu go na a preikiwroko fu di mi manpikin, Ismael, e pusu mi na ini a sturu so taki mi man preiki gi den difrenti ososma. Boiti dati, mi man du mi wroko leki gemeente owruman ete.

Na ini den 12 yari di pasa, momenti ben de pe mi nyan furu pina èn mi ben e firi brokosaka trutru. Son tron te mi e si sortu krakti a siki fu mi abi tapu mi osofamiri, dan a e hati mi moro leki a heri siki fu mi srefi. Mi sabi taki a de wan hati sani gi den, awinsi den no e taki noti. No so langa pasa, na ini wán yari nomo, a mama fu mi wefi nanga a papa fu mi dede. Na ini a srefi yari dati mi kon si taki mi no ben man waka moro. Mi papa, di ben e libi na wi oso, dede fu di a ben abi wan tra srefi sortu siki di e meki taki wan sma dede safrisafri. Milagros, di ben e luku mi papa, ben firi leki a ben e si nanga en eigi ai san ben o pasa nanga mi na ini a ten di e kon.

Ma a bun sei fu a tori disi, na taki na osofamiri fu wi kon moro krosibei na makandra, èn leki wán man wi man pasa den problema di e miti wi. Fosi, mi ben de ini a sturu fu wan driktoro ma now mi de na ini wan rolsturu. Ma toku, a libi fu mi de moro bun now fu di mi gi mi heri libi fu dini trawan. Wan sma di e yepi trawan e frigiti en eigi broko-ede, èn soleki fa Yehovah pramisi, a e gi wi krakti trutru te wi de na ini nowtu. Neleki Paulus, mi kan taki fu tru: „Gi ala sani mi abi a tranga fu en di e gi mi krakti.”​—Filipisma 4:13

[Futuwortu]

[Faki na tapu bladzijde 24]

A fasi fa wan wefi e si sani

A de wan tumusi muilek sani gi wan wefi, fu abi wan masra di abi a siki multiple sclerose. A e go na mi skin èn a e gi mi furu broko-ede nanga lasi-ati. Mi abi fu hori mi masra na prakseri te mi e denki fu du wan sani èn mi abi fu meki muiti fu no broko mi ede fu soso, fu sani di o pasa na ini a ten di e kon (Mateyus 6:34). Ma toku, a pina di wan sma e pina kan meki taki a e sori den moro bun fasi fu en. Wi abi wan moro bun trowlibi leki bifo, èn a banti fu mi nanga Yehovah kon moro tranga. Den ondrofenitori fu trawan di de na ini wan srefi sortu situwâsi gi mi furu deki-ati tu. Mi breiti fu si fa Julián e prisiri fu di a man dini den brada fu en na wan warti fasi, èn mi kon si taki noiti Yehovah no drai baka gi wi, aladi ibri dei abi en eigi problema.

[Faki na tapu bladzijde 24]

A fasi fa wan manpikin e si sani

Mi papa na wan heri bun eksempre gi mi fu di ala ten a e tan horidoro èn ala ten a de nanga prisiri aladi a abi wan takru siki. Mi e prisiri fu pusu en na ini en sturu. Mi sabi taki a no ala ten mi man du san mi ben sa wani du. Now mi de wan tini ete, ma te mi kon bigi, mi wani dini leki wan memre fu wan Ati-oso Kontakti Komte. Mi sabi taki Bijbel pramisi taki a pina di libisma e pina de fu wan syatu pisi ten nomo èn mi sabi taki tra brada nanga sisa e pina moro wi.

[Prenki na tapu bladzijde 22]

Mi wefi e gi mi furu krakti

[Prenki na tapu bladzijde 23]

Mi e taki nanga na ati-datra Juan Duarte

[Prenki na tapu bladzijde 25]

Mi manpikin nanga mi e prisiri fu wroko makandra na ini a preikiwroko