Kownukondre preikiman e fruteri

Yepi di gi fu tan hori a santafasi fu brudu

DEN futuboi fu Yehovah na heri grontapu sori taki den de getrow na Gado te a abi fu du nanga a santafasi fu brudu (Tori fu den Apostel 15:28, 29). A getrow èn koni srafu e yepi den Kresten brada fu tan getrow na ini a tori disi (Mateyus 24:45-47). Meki wi luku sortu bakapisi den ben abi na den Filippijnen.

A bijkantoro fu den Filippijnen e fruteri: „Na ini 1990 wi ben kisi fu yere taki wan tu brada fu Brooklyn Bethel ben o kon dyaso fu hori wan skoro na den Filippijnen. Brada fu difrenti bijkantoro na ini Asia soleki brada fu Korea, Taiwan, nanga Hong Kong ben kisi wan kari fu kon na a skoro disi. A marki fu a skoro ben de fu seti a Ziekenhuisinformatiedienst (na afdeling di e gi bodoi te wan sma de na ati-oso) nanga na Ati-oso Kontakti Komte na den bijkantoro. Na a bigin, den Ati-oso Kontakti Komte na den Filippijnen ben seti na ini fo fu den moro prenspari foto.” Den komte ben musu meki muiti fu feni datra di wani yepi wi fu di wi leki Kresten no e teki brudu. Te problema e kon di abi fu du nanga brudu, dan den komte musu gi yepi na den brada sosrefi.

Remegio na wan fu den brada di e dini na a Ati-oso Kontakti Komte na ini Baguio. Baka wan pisi ten, den datra bigin si den bun bakapisi fu den sani di a komte disi ben du. Remegio e memre taki wan fu den leisi wan tu datra ben miti nanga na Ati-oso Kontakti Komte fu di den ben wani sabi fa den ben musu yepi siki Kotoigi sondro fu gebroiki brudu. Remegio ben taki: „Den datra bigin poti aksi gi mi, ma mi ben bruya bika den ben aksi mi sani di abi fu du nanga dipi datratori.” A ben begi Yehovah fu kon sabi san a ben musu du na ini a situwâsi disi. Remegio e taki moro fara: „Te wan aksi ben poti, dan tra datra ben sutu den anu èn den ben fruteri san den ben du na ini den srefi sortu situwâsi dati.” Remegio ben breiti fu kisi yepi na so wan fasi fu di na aksi-nanga-piki takimakandra disi ben hori tu yuru langa.

Now 77 brada e dini na ini den 21 komte di de na ini a heri kondre. Danilo na wan Kotoigi di de wan datra. A e taki: „Den datra kon si taki wan organisâsi de di e horibaka gi den siki Kotoigi na wan lobi-ati fasi.” Biginbigin wan datra ben de di no ben wani koti wan brada sondro fu gebroiki brudu. Ma a brada no ben degedege na ini a bosroiti di a teki. Den ben koti a brada disi èn ala sani ben waka bun nanga en. A Ziekenhuisinformatiedienst na ini den Filippijnen e taki: „A datra ben fruwondru fu si taki a brada ben kon betre so gaw. A datra ben taki: ’Te mi e luku san pasa dyaso, dan efu iniwan fu den memre fu na organisâsi fu yu abi fu du so wan oparâsi sondro brudu, mi sa du disi nanga ala prisiri.’”