Fa son sma kisi piki tapu den aksi fu den?

MILYUNMILYUN sma abi a gwenti fu begi. Sonwan fu den no e tweifri taki Gado e arki a begi fu den. Ma trawan e aksi densrefi efu Gado e yere den te den e begi. Wan tra grupu fu sma de tu di wani fu kon sabi sani, ma di no e prakseri fu begi Gado fu a yepi den nanga a pisi tori disi.

Bijbel e kari a tru Gado a „Yereman fu begi” (Psalm 65:2). Ma fa yu sabi taki yu e taki nanga a tru Gado te yu e begi? Den begi fu yu na den sortu begi di a tru Gado ben sa wani gi piki na tapu?

Furu sma na ala sei fu grontapu e taki dati gi den a piki tapu na aksi disi na, iya! Fa den kisi piki tapu den begi fu den? San den leri?

Suma na Gado?

Wan skoromisi fu Potogisikondre di ben kisi leri fu den non nanga den priester ben de wan trutru kerki sma. Di a kerki pe na uma ben e go kenki wan tu sani fu di den tapu nanga wan tu gwenti di na uma disi ben e si leki prenspari sani, dan a ben kon bruya. Di a teki waka go na tra kondre, dan a si fa den sma na den owstusei kondre e anbegi Gado. Ne a bigin aksi ensrefi efu a kan taki wán tru Gado nomo de. Fa ensrefi ben musu anbegi Gado? Te a ben e aksi a priester fu en sani fu Bijbel, dan a priester no ben e piki den aksi fu en, èn dati ben meki a lasi-ati.

A Lomsu kerki ben seni wan pamflet go na doro na ini a kontren pe a skoromisi disi ben e wroko. Na ini a pamflet dati den ben e warskow sma fu a kerki fu den fu no taki nanga Yehovah Kotoigi. Ma toku na uma ben tan nanga den aksi di a ben abi. Wan dei di den Kotoigi naki na en doro, dan a arki den èn a ben lobi den sani di a ben yere. Dati ben de a fosi leisi di a taki nanga den.

Fu kisi piki tapu den furu aksi fu en, dan na uma disi bigin studeri Bijbel nanga den Kotoigi. Ibri wiki a ben e sidon wakti den nanga wan heri ipi aksi. A ben wani sabi san na a nen fu Gado, efu wán tru Gado nomo de, efu a feni en bun taki sma e gebroiki popki na ini na anbegi fu den, èn furu tra sani ete. A ben kon si taki den piki di a ben e kisi no ben de san den Kotoigi srefi ben e denki, ma taki den ben teki puru na ini Bijbel. Dati meki a ben fruwondru èn a ben prisiri srefisrefi nanga san a ben e leri. Safrisafri a kisi piki  tapu ala den aksi fu en. Tide na a dei, a e anbegi Yehovah na ini yeye nanga waarheid, soleki fa Yesus Krestes ben taki dati „tru anbegiman” ben o anbegi Gado.​—Yohanes 4:23.

Wan osofamiri na ini Sri Lanka ben abi a gwenti fu leisi Bijbel makandra, ma toku den no ben man kisi piki tapu furu sani di den ben wani kon sabi. Den ben abi yepi fanowdu, ma a priester fu den no ben man gi den a yepi dati. Ma dan Yehovah Kotoigi kon na a osofamiri disi. Den Kotoigi libi buku gi den di ben kan yepi den fu kon frustan furu Bijbel tori. Bakaten, Yehovah Kotoigi ben man gi na osofamiri disi bun piki tapu den aksi di den ben abi fu sani fu Bijbel, èn te fu kaba den teki wan oso-bijbelstudie. Den ben lobi den sani di den ben e leri na a studie.

Toku a ben de so taki sani di a wefi ben leri sensi pikin-nengre ten, ben meki taki a no ben man frustan taki a Tata fu Yesus Krestes na „a wan-enkri tru Gado”, soleki fa Yesus srefi ben taki (Yohanes 17:1, 3). Sma ben leri en taki Yesus nanga a Tata de a srefi, èn taki a no ben bun fu tweifri na a bigi „kibritori” disi. A ben bruya, ma nanga wan krin ati a taki nanga Yehovah na ini begi. A kari a nen fu Gado èn a aksi en fu yepi en fu kon frustan suma na Yesus. Dan a teki ten ete wan leisi fu ondrosuku den bijbeltekst di e taki fu a pisi tori dati (Yohanes 14:28; 17:21; 1 Korentesma 8:5, 6). Now fosi en ai ben kon opo, now fosi a ben man si krin taki Yehovah, a Mekiman fu hemel nanga grontapu èn a Tata fu Yesus Krestes, na a tru Gado.​—Yesaya 42:8; Yeremia 10:10-12.

Fu san ede sma e pina?

A man Yob ben pina na wan tumusi ogri-ati fasi. Boiti taki ala den pikin fu en lasi libi na ini wan bigi winti, dan a lasi ala en gudu tu. A ben kisi wan siki di ben gi en furu skin-ati èn a ben horidoro di a ben kisi kwinsi fu wan tu falsi mati fu. Na a ten dati Yob taki wan tu dondon sani (Yob 6:3). Ma Gado ben e hori na prakseri na ini sortu situwâsi Yob ben de (Yob 35:15). Fu di Gado ben sabi san ben de na ini na ati fu Yob, meki a ben gi Yob den rai di a ben abi fanowdu. A srefi sani disi Gado e du gi sma na ini a ten disi tu.

Castro di e libi na ini Mosambik ben abi tin yari nomo di en mama dede. Castro ben bruya srefisrefi. „Fu san ede meki a ben musu dede gowe libi wi”, na so a ben aksi. A papa nanga mama fu en ben de sma di abi frede gi Gado, ma now a ben bruya srefisrefi. San ben o man kowru en ati nanga frustan? A kisi trowstu di a taki nanga den bigi brada fu en, fu den sani di a ben leisi na ini wan pikin Bijbel na ini Tyityewatongo.

Safrisafri Castro ben kon frustan taki a no Gado ben meki taki en mama kon dede, ma taki en mama dede fu di a ben kisi sondu fu den fosi tata fu en (Romesma 5:12; 6:23). A pramisi di de na ini Bijbel taki sma sa kisi wan opobaka, ben de wan tumusi bigi trowstu gi en, bika dati ben sori en krin fu san ede a kan bribi taki a o si en mama baka (Yohanes 5:28, 29; Tori fu den Apostel 24:15). A sari fu taki dati soso fo yari baka dati, en papa kon dede tu. Ma disi leisi a ben moro makriki gi Castro fu leri libi nanga a dede fu en papa. Tide na a dei a de wan sma di lobi Yehovah èn na wan getrow fasi a e gebroiki a libi fu en na ini a diniwroko fu Gado. Ala sma di sabi en e si taki a abi bigi prisiri.

Furu sma di lasi lobiwan na ini dede e feni trowstu na ini den srefi tru tori fu Bijbel di ben de wan trowstu gi Castro. Son sma ondrofeni hebi tesi fu di ogri-ati sma du takru sani nanga den. Neleki Yob den e aksi: „Fu san ede den takruwan e tan libi go doro?” (Yob 21:7) Te sma e arki trutru na den piki di Gado e gi den nanga yepi fu a Wortu fu en, dan den e kon frustan taki a fasi fa Gado e du sani abi wini gi den.​—2 Petrus 3:9.

Barbara na wan uma di kweki na ini Amerkankondre. Ensrefi noiti no ondrofeni den takru bakapisi fu orloku. Ma a kweki na ini wan ten pe furu kondre na grontapu ben e feti nanga makandra. Ibri dei yu ben kan yere na a nyunsu fa sma ben e dede wan ogri-ati dede na ini orloku. Na skoro a leri difrenti sani fu a historia. Ma di a kon si fa ala ten baka a historia waka na wan fasi di sma no ben fruwakti, dan dati ben bruya en pikinso. Fa dati ben du kon? Gado ben e broko en ede nanga den sani di ben e pasa? A ben e bribi taki Gado de trutru, ma a no ben man frustan fa Gado ben kan wroko na so wan fasi.

Ma di Barbara kon abi demakandra nanga Yehovah Kotoigi, dan a fasi fa a ben e prakseri fu libi, bigin kenki safrisafri. A arki den èn a studeri Bijbel nanga den. A bigin go na den  konmakandra na ini a Kownukondre zaal. A ben go srefi na wan fu den bigi kongres fu Kotoigi. Moro fara a ben kon si tu taki a no ben de so taki den difrenti Kotoigi ben e gi en difrenti piki tapu den aksi di a ben e poti gi den. Na presi fu dati, den piki fu den Kotoigi ben e kruderi nanga makandra fu di a fasi fa den ben e prakseri e kruderi nanga san Bijbel e taki.

Den Kotoigi ben gebroiki Bijbel fu sori en san Satan Didibri e du nanga grontapu. Den sori en taki Didibri na a tiriman fu grontapu, èn taki dati na fu san ede furu sma e denki leki Didibri tu (Yohanes 14:30; 2 Korentesma 4:4; Efeisesma 2:1-3; 1 Yohanes 5:19). Den Kotoigi fruteri Barbara taki den sani di ben e bruya en, ben de sani di Bijbel ben taki na fesi kaba (Danièl, kapitel 2, 7, nanga 8). Gado ben taki na fesi fu den pisi tori dati, bika efu a wani a kan luku go na fesi fu sabi fa sani o waka. Sonwan fu den sani dati na sani di Gado srefi ben meki taki den pasa. Trawan ben pasa fu di Gado gi pasi taki den pasa. Den Kotoigi sori Barbara taki Bijbel e taki na fesi sosrefi fu den bun nanga den takru sani di pasa na ini a ten fu wi, èn taki Bijbel e sori tu san den sani dati wani taki (Mateyus 24:3-14). Den sori en taki Bijbel e pramisi taki wan nyun grontapu sa kon pe soso regtfardiki fasi sa de, èn pe pina no sa de moro kwetikweti.​—2 Petrus 3:13; Openbaring 21:3, 4.

Safrisafri, Barbara kon frustan taki a no Yehovah Gado e meki libisma pina. A no de so tu taki a e pruberi fu tapu a pina disi fu di a e dwengi libisma fu gi yesi na den komando fu en, te den no wani du dati (Deuteronomium 30:19, 20). Gado seti sani gi wi so taki wi kan libi fu têgo na ini koloku, ma nownow kaba a e gi wi na okasi fu sori efu wi sa libi akruderi den regtfardiki markitiki fu en (Openbaring 14:6, 7). Barbara ben teki a bosroiti fu leri sabi den markitiki fu Gado èn fu libi akruderi den markitiki dati. A ben kon si sosrefi taki a lobi di Yehovah Kotoigi e sori na a sortu lobi di Yesus ben taki dati den tru bakaman fu en ben o abi.​—Yohanes 13:34, 35.

Yusrefi kan nyan bun tu fu den sani di ben seti fu yepi Barbara.

Wan libi di no de fu soso

Sontron a kan gersi leki son sma abi wan bun libi. Ma srefi den sortu sma dati e suku piki tapu aksi di e dangra den frustan. Prakseri Matthew, wan yonkuman fu Ingrisikondre. Ala ten a ben angri fu kon sabi suma na a tru Gado èn san na a marki fu a libi. A papa fu Matthew dede di a ben abi 17 yari. Baka dati Matthew go studeri poku na a universiteit, èn a ben kisi papira fu dati. Ma dan a ben kon si moro nanga moro taki a feti di a ben e feti na baka gudu ben de fu soso. A ben froisi go tan na a foto Londen pe a ben bigin gebroiki drugs. A ben e go na presi pe sma kan go dansi te neti. A ben bigin moksi ensrefi tu nanga astrologia, afkodrei, a Zen Buda bribi nanga tra filosofia. Fu san ede? Soso fu di a ben e suku wan fasi fu libi di ben kan gi en prisiri. Di a no ben sabi moro san fu du, dan a begi Gado fu yepi en fu feni a waarheid.

Tu dei na baka, dan Matthew miti wan owru mati fu en. Ne a bigin fruteri a mati dati fu a situwâsi fu en. A man disi ben studeri nanga Yehovah Kotoigi wan pisi ten. Di Matthew leisi san skrifi na ini 2 Timoteyus 3:1-5, dan a ben fruwondru srefisrefi fu si o soifri Bijbel e taki fu den sani di e pasa lontu wi na ini a ten disi. Di a leisi a Bergitaki, dan a sani dati naki en ati (Mateyus, kapitel 5-7). Biginbigin, a ben e tweifri pikinso fu di a ben leisi buku di ben e taki takru fu Yehovah Kotoigi, ma te fu kaba a teki a bosroiti fu go na den konmakandra na ini wan Kownukondre zaal di ben de krosibei fu en.

Matthew ben prisiri srefisrefi nanga den sani di a yere, dati meki a bigin studeri Bijbel nanga wan fu den gemeente owruman. A ben kon frustan taki den sani di a ben e leri, ben de soifri den sani di a ben wani sabi, èn taki den ben de a piki tapu a yepi di a ben begi Gado wan pisi ten pasa. A kisi wini di a tapu fu tyari ensrefi na wan fasi di Yehovah no e feni bun. O moro a ben e suku fu kon kisi a yoisti frede gi Gado, o moro dati ben e pusu en fu go libi akruderi den komando fu Gado. Matthew leri taki so wan libi na wan libi di no de fu soso kwetikweti.​—Preikiman 12:13.

A no de so taki Gado ben taki na fesi kaba dati Matthew noso den tra sma di kari na ini na artikel disi, ben musu abi wan libi di e waka bun. Toku den ben kon frustan taki Yehovah Gado lobi ala den sma di e gi yesi na den komando fu en, èn taki a abi tumusi moi sani na prakseri gi den fu a  ten di e kon (Tori fu den Apostel 10:34, 35). Wan tu fu den sani di a o du, na fu gi den têgo libi na ini wan grontapu pe feti, siki nanga angribere, èn srefi dede no sa de moro (Yesaya 2:4; 25:6-8; 33:24; Yohanes 3:16). Yu wani a sortu libi dati tu? Efu dati de so, dan yu kan leri moro fu a fasi fa yu kan kisi so wan prisiri libi, te yu o go na den konmakandra na ini den Kownukondre zaal fu Yehovah Kotoigi. Na den konmakandra disi den e taki fu den Bijbel tori disi. Wi e gi yu wan switi kari fu du dati.

[Prenki na tapu bladzijde 7]

Begi Gado fayafaya, aladi yu e gebroiki a nen fu en

[Prenki na tapu bladzijde 7]

Studeri Bijbel nanga sma di e leri yu san skrifi na ini trutru

[Prenki na tapu bladzijde 7]

Go na den konmakandra na ini a Kownukondre zaal

[Sma di abi a reti fu a prenki na tapu bladzijde 4]

Hiker: Chad Ehlers/Index Stock Photography