Yonguwan​—Yehovah no sa frigiti a wroko fu unu!

„Gado no de onregtfardiki, so taki a sa frigiti a wroko fu unu èn a lobi di unu ben sori gi a nen fu en, fu di unu ben dini den santawan èn e tan dini den.”​—HEBREWSMA 6:10.

1. Fa den Bijbel buku Hebrewsma nanga Maleaki e sori taki Yehovah e warderi a wroko di yu e du gi en?

YU DU wan sani gi wan mati fu yu wanten, dan a no taki yu tangi fu a sani dati? A kan de wan hati sani te yu e du bun gi wan sma, dan a sma no e taki yu tangi fu dati. Ma wan moro hati sani na te a sma e frigiti srefi taki yu ben du wan bun gi en. Ma a de heri tra fasi te wi e dini Yehovah nanga wi heri ati! Bijbel e taki: „Gado no de onregtfardiki, so taki a sa frigiti a wroko fu unu èn a lobi di unu ben sori gi a nen fu en, fu di unu ben dini den santawan èn e tan dini den” (Hebrewsma 6:10). Prakseri san disi wani taki. Yehovah ben o si en leki wan onregtfardiki sani, wan sondu srefi, efu a ben o frigiti san yu ben du èn san yu e tan du na ini a diniwroko fu en. Fu tru, dati na wan Gado di e warderi a wroko fu yu trutru!​—Maleaki 3:10.

2. Fu san ede a de wan spesrutu grani fu dini Yehovah?

 ² Yu abi wan spesrutu grani fu anbegi èn dini a Gado disi di abi warderi. Te yu e teki den siksi milyun tra bribiman fu yu gersi nanga sowan siksitenti milyard libisma di de na grontapu, dan yu e si taki yu abi wan bigi grani trutru. Boiti dati, a gi di yu e gi yesi na a boskopu fu a bun nyunsu wawan, e sori kaba taki yu warti na ini Yehovah ai. Te yu luku en bun, dan Yesus taki: „Nowan sma kan kon na mi, boiti efu a Tata, di ben seni mi kon, e hari en kon” (Yohanes 6:44). Iya, Yehovah e yepi ibriwan sma fu kisi wini fu a srakti-ofrandi fu Krestes.

De nanga tangi fu a spesrutu grani di yu kisi

3. Fa den manpikin fu Korak ben sori warderi gi a grani di den ben abi fu dini Yehovah?

³ Leki fa wi ben taki kaba na ini a fosi artikel, dan yu abi wan spesrutu okasi fu prisiri na ati fu Yehovah (Odo 27:11). Noiti yu musu si a sani disi leki wan sani di no de so prenspari. Na ini wan fu den psalm fu den manpikin fu Korak, Yehovah meki den skrifi fa den ben e warderi a grani di den ben abi fu dini en. Drape wi e leisi: „Wán dei na ini yu fesidyari moro bun leki dusun dei na wan tra presi. Mi teki a bosroiti fu tanapu na a mofodoro fu na oso fu mi Gado na presi fu waka lontu na ini den tenti fu ogridu.”​—Psalm 84:10.

4. (a) San kan meki son sma si a dini di den e dini Yehovah leki wan sani di e skotu den fu du san den wani? (b) Na sortu fasi Yehovah e sori fu de klariklari fu si san den futuboi fu en e du so taki a kan blesi den?

⁴ Na so yu e firi tu fu a grani di yu abi fu dini yu hemel Tata? A de so trutru taki son leisi a dini di yu e dini Yehovah, e skotu yu fu du san yu wani. A tru taki te yu e libi akruderi den gronprakseri fu Bijbel, dan yu no man du ala san yu ben sa wani fu du. Ma te fu kaba, yu e kisi wini te yu e du den sani di Yehovah e aksi fu yu (Psalm 1:1-3). Boiti dati, Yehovah e si den muiti di yu e meki èn a e sori warderi gi a getrowfasi fu yu. Iya, Paulus ben skrifi taki Yehovah „e tron a sma di e pai den wan di e suku en seryusu” (Hebrewsma 11:6). Yehovah e suku okasi fu du disi. Wan regtfardiki profeiti fu owruten Israel ben taki: „Bika Yehovah fu en sei, den ai fu en e luku a heri grontapu lontu fu gebroiki a krakti fu en fu a bun fu den sma di lobi en nanga den heri ati.”​—2 Kroniki 16:9.

5. (a) San na wan fu den moro moi fasi fa yu kan sori taki yu lobi Yehovah nanga yu heri ati? (b) Fu san ede a kan gersi wan muilek sani fu taki nanga trawan fu a bribi fu yu?

⁵ Wan fu den moro moi fasi fa yu kan sori taki yu lobi Yehovah nanga yu heri ati, na fu taki nanga trawan fu en. Yu ben kisi na okasi wanten fu taki nanga wan tu skoromati fu a bribi fu yu? Biginbigin, yu kan prakseri taki dati na wan sani di yu no man du, èn a prakseri dati wawan kan meki yu frede pikinso.  Kande yu e aksi yusrefi: ’Fa mi o du efu den e lafu mi? San mi o du efu den e denki taki a bribi fu mi de heri tra fasi leki a di fu trawan?’ Yesus ben sabi taki a no ibri sma ben o arki a Kownukondre boskopu (Yohanes 15:20). Ma disi no wani taki dati yu heri libi langa sma o spotu yu noso den no o lobi yu. Na presi fu dati, furu yongu Kotoigi feni wan sma di ben arki den èn den speri fu den ben kisi moro lespeki gi den, baka di den opo taki gi a bribi fu den.

„Yehovah sa yepi yu”

6, 7. (a) Fa wan meisje fu 17 yari ben man gi kotoigi na den skoromati fu en? (b) San yu leri fu na ondrofenitori fu Jennifer?

⁶ Ma fa yu kan kisi deki-ati fu opo taki gi a bribi fu yu? Fu san ede yu no e pruberi fu gi sma wan soifri piki te den e aksi yu sani fu a bribi fu yu? Luku na ondrofenitori fu Jennifer di abi 17 yari. A e taki: „A ben de pauze na mi skoro. Den meisje na a tafra pe mi ben e sidon, ben e taki fu kerkitori èn wan fu den aksi mi sortu bribi mi abi.” Jennifer ben frede fu piki? „Iya”, a e taki, „bika mi no ben sabi fa den ben o teki a tori disi.” Sobun, san Jennifer du? A e taki moro fara: „Mi taigi den meisje taki mi de wan Kotoigi fu Yehovah. Biginbigin, den ben fruwondru fu dati. Soleki fa a sori, den ben abi a prakseri taki Yehovah Kotoigi na sma di e hori densrefi aparti fu trawan noso den no de leki ala tra sma. Dati meki den bigin poti aksi gi mi, èn mi ben man sori den taki wan lo fu den sani di sma e taki fu Kotoigi no de so trutru. Srefi baka a dei dati, wan tu meisje ben e kon na mi son leisi fu aksi mi son sani.”

⁷ A e hati Jennifer taki a ben teki na okasi fu opo taki gi a bribi fu en? Nôno, kwetikweti! A e taki: „Baka a pauze, mi ben prisiri trutru. Now den meisje dati abi wan moro bun prakseri fu suma Yehovah Kotoigi de trutru.” A rai di Jennifer e gi now, no muilek srefisrefi: „Efu a muilek gi yu fu gi kotoigi na yu skoromati, yu skoromisi noso yu skoromeester, dan taki syatu nanga Yehovah na ini begi. Yehovah sa yepi yu. Yu o breiti taki yu ben gebroiki na okasi fu gi kotoigi.”​—1 Petrus 3:15.

8. (a) Fa begi ben yepi Nehemia di a kon na ini wan situwâsi di a no ben fruwakti? (b) Na ini sortu situwâsi na skoro yu kan kon, pe a kan de fanowdu fu taki syatu nanga Yehovah na ini begi sondro taki tra sma yere yu?

⁸ Luku taki Jennifer e gi a rai fu ’taki syatu nanga Yehovah na ini begi’ te yu e kisi wan okasi fu gi kotoigi fu a bribi fu yu. Disi na soifri san Nehemia, di ben e kanti win gi Kownu Artakserkses fu Persia, ben du di a kon na ini wan situwâsi di a no ben fruwakti. A ben de fu si na en fesi taki Nehemia ben abi broko-ede fu di a ben yere taki den Dyu ben abi problema èn a kon sabi taki a skotu nanga den portu fu Yerusalem no ben meki ete. A kownu ben si taki Nehemia ben abi broko-ede, sobun a aksi Nehemia sortu problema a ben abi. Fosi a piki, Nehemia aksi Yehovah na ini begi fu yepi en. Baka dati, sondro frede a aksi primisi fu drai go baka na Yerusalem fu yepi fu bow a broko foto disi baka. Artakserkses gi Nehemia primisi fu go (Nehemia 2:1-8). San yu kan leri fu a tori disi? Efu yu e frede fu gi kotoigi fu a bribi fu yu te yu e kisi na okasi fu du dati, dan no draidrai fu taki nanga Yehovah na ini begi sondro taki tra sma kan yere yu. „Trowe ala un broko-ede na [Yehovah] tapu”, na so Petrus skrifi, „bika a e sorgu gi unu.”​—1 Petrus 5:7; Psalm 55:22.

„De klariklari ala ten fu opo taki gi unsrefi”

9. Fa Leah di abi 13 yari, ben man prati 23 Jonge mensen vragen-buku?

⁹ Luku wan tra ondrofenitori. Leah di abi 13 yari, ben e leisi a buku Wat jonge mensen vragen​—Praktische antwoorden * na ini a pauze na skoro. A e taki: „Den tra skoro pikin ben e luku mi èn heri esi wan lo fu den ben lontu mi fu luku a buku. Den bigin aksi mi fu san a buku e taki.” Di skoro kaba, dan fo meisje aksi Leah fu tyari wan Jonge mensen vragen-buku gi den. Syatu na baka, den meisje disi leni trawan den buku èn den trawan ben wani a buku disi  tu. Na ini den wiki baka dati, Leah prati 23 Jonge mensen vragen-buku gi den skoromati fu en nanga den mati fu den. A ben makriki gi Leah fu opo taki gi a bribi fu en, di trawan bigin aksi en fu a buku di a ben e leisi? Kwetikweti! A e taki: „Biginbigin, mi ben e frede. Ma mi begi, èn mi ben sabi taki Yehovah de nanga mi.”

10, 11. Fa wan yongu meisje fu Israel ben man yepi wan legre edeman fu Siria fu kon leri sabi Yehovah, èn sortu kenki a legre edeman tyari kon na ini en libi bakaten?

¹⁰ Na ondrofenitori fu Leah kan meki yu memre wan srefi sortu situwâsi di miti wan yongu meisje fu Israel di den tyari go na ini katibo na Siria. Na-aman, a legre edeman fu Siria, ben abi gwasi. A kan taki a wefi fu en bigin wan takimakandra di ben gi a meisje deki-ati fu opo taki gi a bribi fu en. A taki: „Efu mi masra ben de nomo na fesi a profeiti di de na ini Samaria! Dan a ben o dresi en fu a gwasi fu en.”​—2 Kownu 5:1-3.

¹¹ Fu di a yongu meisje disi no ben frede fu taki, meki Na-aman kon sabi dati „nowan presi na grontapu wan Gado de, boiti na ini Israel”. A teki a fasti bosroiti srefi, taki noiti a „no sa tyari wan bron-ofrandi noso wan srakti-ofrandi moro gi nowan enkri tra Gado, boiti  Yehovah” (2 Kownu 5:15, 17). Yehovah blesi a deki-ati fu a meisje disi trutru. A man du èn a sa du a srefi gi yonguwan na ini a ten disi. Leah ondrofeni taki a de so trutru. Baka wan pisi ten, sonwan fu den skoromati fu en kon taigi en taki a Jonge mensen vragen-buku ben e yepi den fu kenki a fasi fa den ben e tyari densrefi. „Mi ben breiti”, Leah taki, „fu di mi sabi taki mi ben e yepi trawan fu kon leri sabi moro fu Yehovah èn mi ben e yepi den fu kenki den libi.”

12. Fa yu kan kisi deki-ati fu opo taki gi a bribi fu yu?

¹² Yu kan abi den srefi ondrofeni neleki den di fu Jennifer nanga Leah. Teki a rai fu Petrus, di skrifi taki yu leki Kresten musu de „klariklari ala ten fu opo taki gi unsrefi na fesi ibriwan sma di e aksi unu fu a howpu di de na ini unu, ma du dati na wan safri fasi èn nanga bigi lespeki” (1 Petrus 3:15). Fa yu kan du dati? Teki na eksempre fu den Kresten fu a fosi yarihondro di ben e aksi Yehovah na ini begi fu yepi den fu preiki „sondro frede” (Tori fu den Apostel 4:29). Baka dati, teki deki-ati fu taki nanga trawan fu a bribi fu yu. Yu o fruwondru fu si den bakapisi fu disi. Boiti dati, yu sa prisiri na ati fu Yehovah.

Gebroiki video nanga tra sani fu gi kotoigi

13. Sortu okasi son yonguwan gebroiki fu gi kotoigi? (Luku den boksu tapu bladzijde 20 nanga 21).

¹³ Furu yonguwan ben man taki fu a bribi fu den nanga skoromati, skoromisi, noso skoromeester fu di den gebroiki video. Sontron, te trawan ben musu du wan sani gi skoro, dan dati ben gi den wan okasi tu fu prèise Yehovah. Fu eksempre, tu boi fu 15 yari di de Yehovah Kotoigi, ben kisi a wroko fu skrifi fu a historia fu wán fu den kerkigrupu di de na grontapu. Den tu boi disi agri fu skrifi fu a historia fu Yehovah Kotoigi, èn den gebroiki a buku Jehovah’s Getuigen – Verkondigers van Gods Koninkrijk fu du disi. * Den ben abi fu taki fu  a tori disi tu na fesi a klas, feifi miniti langa. Baka dati, a skoromeester nanga den tra pikin fu a klas ben abi so furu aksi, taki den tu boi disi ben abi fu tan na fesi a klas ete 20 miniti. Wan tu wiki langa den skoromati fu den tan aksi den sani di abi fu du nanga Yehovah Kotoigi!

14, 15. (a) Fu san ede a frede gi libisma de wan trapu? (b) Fu san ede yu no musu frede fu taki fu a bribi fu yu nanga trawan?

¹⁴ Soleki fa den ondrofenitori disi e sori, dan yu kan kisi furu blesi te yu e fruteri trawan fu a bribi fu yu leki wan Kotoigi fu Yehovah. No meki a frede gi libisma meki yu lasi a grani nanga a prisiri fu yepi trawan fu kon leri sabi Yehovah. Bijbel e taki: „A frede gi libisma, na dati e seti wan trapu, ma a sma di e frutrow tapu Yehovah, sa kisi kibri.”​—Odo 29:25.

¹⁵ Hori na prakseri taki yu leki wan Kresten yonguwan, abi wan sani di yu speri abi fanowdu trutru. Yu abi a moro bun fasi fu libi na ini a ten disi èn yu abi a howpu fu libi fu têgo na ini a ten di e kon (1 Timoteyus 4:8). Kande yu e prakseri taki moro furu fu den sma na ini Amerkankondre no wani sabi noti fu kerkitori. Ma a de wan moi sani fu si, taki wan ondrosuku sori taki sowan afu fu den yonguwan drape e si a bribi fu den leki wan prenspari sani èn wan di fu dri pisi fu den e taki dati a bribi fu den na „a moro prenspari sani” na ini den libi. A no de fu taki, dati a de so tu na furu tra presi fu grontapu. Fu dati ede, a kan taki den speri fu yu na skoro sa wani arki san yu abi fu taki fu Bijbel.

Leki yonguwan, kon krosibei na Yehovah

16. San yu musu du fu prisiri na ati fu Yehovah, boiti taki yu e taki fu en nanga trawan?

¹⁶ A no de fu taki dati yu musu du moro fu prisiri na ati fu Yehovah, boiti taki yu e taki fu en. Yu musu libi akruderi den markitiki fu en sosrefi. Na apostel Yohanes skrifi: „Disi na san a lobi fu Gado wani taki, dati wi e du san den komando fu en e taki; ma toku den wet fu en no de wan hebi” (1 Yohanes 5:3). Te yu e kon krosibei na Yehovah, dan yu o si taki disi de so trutru. Fa yu kan du dati?

17. Fa yu kan kon krosibei na Yehovah?

¹⁷ Meki ten fu leisi Bijbel nanga den Bijbel publikâsi. O moro yu e leri fu Yehovah, o moro makriki a sa de gi yu fu gi yesi na en èn fu taki nanga trawan fu en. „Wan bun sma e meki bun sani kon fu a bun gudu fu en ati”, na so Yesus ben taki, „bika na san furu na ati pasa marki, na fu dati a mofo e taki” (Lukas 6:45). Sobun, furu yu ati nanga bun sani. Fu san ede yu no e poti marki gi yusrefi di abi fu du nanga a tori disi? Kande yu kan bigin nanga a sreka di yu o sreka yusrefi moro bun gi den gemeente konmakandra fu a wiki di e kon. Baka dati, yu kan poti leki marki fu teki prati na den konmakandra fu di yu o gi piki di e komoto fu yu ati. A no de fu taki dati a de prenspari sosrefi fu du san yu e leri.​—Filipisma 4:9.

18. Sortu dyaranti yu kan abi, awinsi sma e gens yu?

¹⁸ Den blesi di yu sa kisi te yu e dini Yehovah, sa de fu wan langa pisi ten, iya, fu têgo. A tru taki ten na ten sma o gens noso spotu yu fu di yu de wan Kotoigi fu Yehovah. Ma prakseri Moses. Bijbel e taki dati „a ben poti ala en prakseri na a pai di a ben sa kisi” (Hebrewsma 11:24-26). Yu tu kan abi a dyaranti taki Yehovah sa blesi yu te yu e du muiti fu leri sabi en èn fu taki fu en nanga trawan. Fu tru, noiti a no sa ’frigiti a wroko fu yu èn a lobi di yu sori gi a nen fu en’.​—Hebrewsma 6:10.

[Futuwortu]

Yu e memre disi ete?

• Fu san ede yu kan abi a dyaranti taki Yehovah e si a diniwroko fu yu leki wan warti sani?

• Sortu fasi fu gi kotoigi na skoro ben abi bun bakapisi gi son Kresten yonguwan?

• Fa yu kan kisi deki-ati fu gi kotoigi na yu skoromati?

• Fa yu kan kon krosibei na Yehovah?

[Aksi fu a tori disi]

[Faki/Preki na tapu bladzijde 20]

Srefi den moro yongu pikin e prèise Yehovah!

Srefi den pikin di no abi 13 yari ete, ben man gi wan kotoigi na skoro. Luku den ondrofenitori disi.

Amber di abi 10 yari, e sidon na ini a di fu feifi klas fu skoro. A ben e leisi wan buku di ben e fruteri fa den Nazi ben e frufolgu den Dyu na ini a di fu Tu Grontapufeti. Amber bosroiti fu tyari a video De paarse driehoek gi en skoromisi. A skoromisi ben fruwondru di a kon sabi taki Yehovah Kotoigi sosrefi ben e kisi frufolgu na a ten di den Nazi ben e tiri Doisrikondre. A skoromisi drai a video disi na ini a klas so taki ala den pikin ben kan si en.

Di Alexa ben abi aiti yari, dan a skrifi wan brifi gi den pikin fu en klas. Na ini a brifi disi a ben fruteri fu san ede a no ben man hori Kresneti nanga den. A skoromisi ben feni en so wan moi brifi taki a meki Alexa leisi a brifi na fesi en klas, èn na fesi tu tra klas sosrefi! Na a kaba fu a brifi, Alexa taki: „Mi leri fu lespeki tra sma di no abi a srefi bribi leki mi èn mi e taki unu tangi taki unu e lespeki a bosroiti di mi teki fu no hori Kresneti.”

Syatu baka di Eric bigin go na a fosi klas fu skoro, a tyari Mi boekoe nanga bijbel tori go na skoro èn a aksi a skoromisi efu a ben kan sori a buku disi na den tra pikin fu a klas. „Mi denki taki a moro bun efu yu leisi wan tori fu a buku gi a heri klas”, na so a skoromisi taki. Sobun, Eric leisi wan fu den tori fu a buku. Baka dati, a taki dati ibriwan sma di ben sa wani a buku disi, ben musu sutu den anu go na loktu. Tin-na aiti sma, a skoromisi sosrefi, ben sutu den anu go na loktu! Now, Eric e firi leki a abi en eigi spesrutu preikiwroko kontren.

Whitney di abi neigi yari, e prisiri nanga a brochure Jehovah’s Getuigen en het onderwijs. * A taki: „Ala yari mi mama ben e gi den skoromisi noso skoromeester a brochure disi. Ma a yari disi, misrefi gi a skoromisi. Fu di mi gi en a brochure disi, meki a poti mi nen fu tron ’a spesrutu studenti fu a wiki’ dati.”

[Futuwortu]

[Faki/Prenki na tapu bladzijde 21]

Okasi di son yonguwan gebroiki fu taki fu a bribi fu den

Te sonwan kisi leki wroko fu taki noso skrifi fu wan spesrutu tori, dan den ben suku wan tori di gi den na okasi fu gi kotoigi

Wan tu yonguwan ben gi a skoromisi noso a skoromeester fu den wan video noso wan publikâsi di e taki fu wan tori di ben taki na ini a klas

Na ini den fri ten na skoro, son yonguwan ben leisi Bijbel noso wan Bijbel publikâsi èn disi ben hari a prakseri fu tra yonguwan di bigin poti aksi gi den

[Prenki na tapu bladzijde 18]

Den wan nanga ondrofeni kan yepi fu leri yonguwan fu dini Yehovah