Pe wi kan feni den soifri markitiki fu Gado?

„EFU yu abi na prakseri fu teki a bribi di yu famiri abi, soso fu di dati na a gwenti na ini yu famiri, dan fu san ede yu no e teki a bribi fu den Keltsma, wan bribi di den afo fu wi ben abi sowan 2000 yari pasa?” Dati na san Rodolphe ben aksi wan yongu boi na wan fasi di ben e sori taki a e spotu nanga en pikinso. A pisi tori dati ben meki a yongu boi lafu.

Rodolphe e taki: „Mi matifasi nanga Gado na wan tumusi prenspari sani gi mi. Mi no e agri kwetikweti nanga a prakseri taki mi musu teki wan spesrutu fasi fu anbegi abra soso fu di dati na a gwenti, soso fu di sma na ini mi famiri di ben libi someni tenti yari, noso someni hondro yari pasa, ben e anbegi Gado na a fasi dati.” Rodolphe ben prakseri bun fu a pisi tori disi; a no ben si a fasi fa en musu anbegi Gado leki wan sani di a musu teki abra fu den afo fu en fu di dati na a gwenti.

Na ini a ten disi a no e pasa so furu moro taki sma e teki a bribi fu den afo fu den. Toku a de so taki furu sma wani tan hori densrefi na a bribi fu na osofamiri fu den. Ma yu denki taki a bun ala ten fu tan hori yusrefi na den markitiki di yu papa nanga mama e hori densrefi na dati? San Bijbel e taki fu a pisi tori disi?

Baka di den Israelsma ben waka lontu na ini a gran sabana sowan 40 yari langa, dan Yosua, di ben teki a wroko fu Moses abra, ben taigi den taki den ben musu teki wan bosroiti. A ben taki: „Ma now efu a no bun na un ai fu dini Yehovah, dan bosroiti gi unsrefi tide suma unu sa dini, efu a sa de den gado di un fositen tata ben e dini di den ben de na a tra sei fu a Liba, noso den gado fu den Amorietsma na ini suma kondre unu e tan. Ma mi nanga mi osofamiri, wi sa dini Yehovah.”​—Yosua 24:15.

Wan fu den fositen tata di Yosua ben e taki fu en ben de Tera, a papa fu Abraham, di ben e libi na ini a foto Ur. Na a ten dati a foto ben de na a owstusei fu na Eufraatliba. Bijbel no e taki finifini suma Tera ben de, boiti taki a e fruteri wi taki a ben e anbegi tra gado (Yosua 24:2). Abraham, a manpikin fu Tera, no ben sabi soifri san Gado ben abi na prakseri. Ma di Yehovah ben gi en a komando fu gowe libi a foto pe a ben e libi, dan a ben de klariklari fu du dati. Iya, Abraham teki wan fasi fu anbegi di ben e difrenti fu a di fu en papa. Fu di Abraham du dati meki a ben kisi den blesi di Gado ben pramisi en. Na a fasi dati a ben tron a sma di furu bribiman e si leki „da tata foe ala soema disi de bribi”.​—Romesma 4:11, Da Bijbel na ini Sranantongo.

Bijbel e taki bun sosrefi fu na eksempre fu Rut, wan fu den afo fu Yesus Krestes. Rut ben de wan uma fu Moab di ben trow nanga wan man fu Israel. Di a masra fu en ben kon lasi libi, dan a ben musu teki wan bosroiti: a ben o tan na ini en eigi kondre, noso a ben o drai go baka na Israel nanga a mama fu a masra fu en. Di Rut ben kon si taki na anbegi fu Yehovah ben warti moro leki a fasi fu anbegi fu en papa nanga mama, di ben de afkodrei, dan a ben taigi a mama fu a masra fu en: „Yu pipel sa de mi pipel, èn yu Gado mi Gado.”​—Rut 1:16, 17.

Wan wortubuku di  nen Dictionnaire de la Bible e taki fu a waarde di a tori disi abi na ini a Bijbel. A wortubuku disi e tyari kon na krin „fa wan uma di ben gebore na wan tra kondre; wan uma di ben gebore na mindri heiden di ben e du ogri nanga den Israelsma èn di den Israelsma no ben lobi kwetikweti, . . . ben tron wan afo fu a santa Kownu David, fu di a ben sori lobi gi a pipel nanga na anbegi fu Yehovah”. Rut no ben frede fu teki wan fasi fu anbegi di ben e difrenti fu a di fu en papa nanga mama. A bakapisi fu dati ben de taki Gado ben blesi en.

A pisi fu Bijbel di e fruteri fa a tru Kresten bribi bigin, e sori moro krin srefi fu san ede den disipel fu Yesus ben gowe libi na anbegi fu den afo fu den. Na apostel Petrus ben hori wan fayafaya takimakandra pe a ben gi den arkiman fu en deki-ati fu suku fu „kisi frulusu [fu di den ben o] komoto na mindri a kruktu geslakti disi”. Den ben kan du dati te den ben o gowe libi den sondu libi fu den èn te den ben o teki dopu na ini a nen fu Yesus Krestes (Tori fu den Apostel 2:37-41). Wán fu den moro bun eksempre na a di fu Saulus, wan Dyu di ben e frufolgu den Kresten. Di a ben de na pasi fu go na Damaskus, dan a si wan fisyun fu Krestes. Baka dati Saulus tron wan Kresten, di sma ben kon sabi bakaten leki na apostel Paulus.​—Tori fu den Apostel 9:1-9.

Moro furu fu den fosi Kresten, no ondrofeni so wan aparti sani leki san Paulus ben ondrofeni. Ma toku den alamala ben musu gowe libi a Dyu bribi, noso na anbegi fu difrenti heiden gado. Den sma di ben e teki a tru Kresten bribi, ben e du dati baka te den ben kon sabi finifini san a fasi fu anbegi disi ben e aksi fu den. Furu tron dati ben de baka te den ben taki finifini nanga trawan o prenspari a ben de fu bribi na ini Yesus leki a Mesias di Gado seni kon (Tori fu den Apostel 8:26-40; 13:16-43; 17:22-34). Den fosi Kresten dati ben sabi heri bun taki den ben abi fu tyari kenki kon na ini den libi. Ala sma, Dyu nanga sma di no ben de Dyu, ben kisi a kari fu du dati. Ma a boskopu ben tan a srefi. Fu meki Gado firi prisiri, dan a ben de fanowdu fu teki wan nyun fasi fu anbegi, namku a tru Kresten fasi fu anbegi.

Wan bosroiti di prenspari gi wi

Na ini a fosi yarihondro sma ben abi difrenti fasi fu anbegi soleki a Dyu fasi fu anbegi, a Kèiser anbegi, nanga na anbegi fu heiden gado. A no de fu taki dati den sma na ini a ten dati ben musu abi deki-ati fu kan trowe den fasi fu anbegi dati. A no ben makriki gi den fu trowe na anbegi di ben de na ini den famiri fu den someni yari kaba, fu go teki wan fasi fu anbegi di Dyu nanga sma fu Rome ben e spotu nanga dati. Heri esi a bosroiti dati ben o meki taki den kisi hebi frufolgu. Tide na a dei, wan sma musu abi deki-ati sosrefi fu weigri fu „teki a fasi fu denki abra di furu sma abi taki den wani abi wan bribi di furu sma na ini a libimakandra abi”. Disi na san Hippolyte Simon, wan Lomsu beskopu fu a foto Clermont-Ferrand, ben taki na ini en buku Vers une France païenne? (Fransikondre kon tron wan heiden kondre?) Wan sma musu abi deki-ati fu bigin abi demakandra nanga wan kerki grupu di sma e krutu so furu, soleki Yehovah Kotoigi.

Paul na wan yonkuman fu Bastia, na Korsika. A ben kweki na ini wan kontren pe furu sma ben de Lomsu. Ten na ten, a ben e yepi te a kerki fu en ben e orga sani, soleki te den ben e seri kuku fu meki moni gi wan Lomsu organisâsi di ben e yepi sma di de na ini nowtu. Ma a ben wani kon sabi moro fu Bijbel. Fu dati ede a ben meki mofo nanga Yehovah Kotoigi fu kon na en doronomo, so taki a ben kan taki nanga den. Te fu kaba, a ben kon frustan taki den sani di a ben e leri ben o tyari têgo blesi kon gi en. Dati meki Paul ben hori ensrefi na den markitiki fu Bijbel èn a ben tron wan Kotoigi fu Yehovah. A papa nanga a mama fu Paul ben lespeki a bosroiti di a ben teki, dati meki a tan abi wan bun banti nanga den.

Amélie na wan uma di e libi na a zuidsei fu Fransikondre. Fu sensi a ten fu en afo a ben abi famiri di de Yehovah Kotoigi. Fu san ede a ben bosroiti fu teki na anbegi fu en papa nanga mama? Na uma disi e taki: „Yu no e tron wan Kotoigi fu Yehovah fu di yu  papa nanga mama, noso yu granpapa nanga granmama na Yehovah Kotoigi, noso fu di den ben de Yehovah Kotoigi. Ma wan dei yu e taigi yusrefi: ’Disi na a fasi fu anbegi di mi wani, bika disi na san mi e bribi.’” Amélie na wan fu den furu yongu Kotoigi fu Yehovah di sabi taki a bribi di a e bribi den sani di a e leri fu Gado, e meki taki a abi wan marki na ini en libi èn taki a kan kisi têgo koloku.

Fu san ede wi musu hori wisrefi na den markitiki fu Gado

Odo kapitel 6, vers 20, e taigi den wan di wani prisiri na ati fu Gado: „Mi manpikin, arki den komando fu yu tata èn no poti den wet fu yu mama na wan sei.” A tekst disi no e gi pikin deki-ati fu du wan sani nomo fu di a papa nanga mama fu den taigi den fu du dati. Ma a rai di skrifi drape e gi yongusma a deki-ati fu hori densrefi na den markitiki fu Gado fu di den o suku fu meki a bribi fu den kon moro tranga èn fu di densrefi e teki a bosroiti fu du a wani fu Gado. Na apostel Paulus ben gi den kompe fu en a kari fu ’overtoigi densrefi fu ala sani’. Den ben musu ondrosuku efu den sani di sma ben e leri den, ben e kruderi nanga a Wortu fu Gado èn nanga a wani fu En, aladi densrefi e libi akruderi san den ben leri.​—1 Tesalonikasma 5:21.

Ibriwan fu den moro leki siksi milyun Kotoigi fu Yehovah, yonguwan nanga owruwan, ben musu teki so wan bosroiti. A no abi trobi efu den ben kweki na ini wan Kresten osofamiri, noso efu dati no ben de so. Di den ondrosuku Bijbel finifini, dan den kisi soifri piki tapu aksi di ben abi fu du nanga a marki fu a libi èn den ben kon frustan san na a wani fu Gado gi a libisma famiri. Baka di den ben kon sabi den sani disi, dan den bigin hori densrefi na den markitiki fu Gado èn den e tan du muiti fu du a wani fu Gado.

Kande yu na wan sma di e leisi a tijdschrift disi doronomo, noso kande yu no e leisi en so furu. Ma fu san ede yu no ben sa ondrosuku Bijbel makandra nanga Yehovah Kotoigi te den e aksi yu fu du dati? Disi sa yepi yu fu kon sabi moro bun san na den markitiki fu Gado. Na a fasi disi yu sa man „tesi èn si taki Yehovah bun”, aladi yu sa kon kisi sabi di kan meki yu kisi têgo libi, efu yu libi akruderi dati.​—Psalm 34:8; Yohanes 17:3.

[Prenki na tapu bladzijde 5]

Afo te go miti bakapikin di de Kotoigi fu Yehovah, na ini Fransikondre

[Prenki na tapu bladzijde 7]

Rut ben bosroiti fu dini Yehovah na presi fu den gado fu den afo fu en