Yu e kisi wan switi kari

NA Avondmaal fu Masra, di Masra Yesus Krestes seti pikinmoro 2000 yari pasa kaba, a no soso wan prenspari sani di pasa na ini historia. Sensi di na Avondmaal fu Masra seti, a abi furu krakti tapu furu sma. Di den leisi den Evangelietori fu san ben pasa na a neti dati, dan dati naki den ati na so wan fasi taki den du muiti fu memre na Avondmaal fu Masra na difrenti fasi.

Wi kan frustan taki furu sma e si na Avondmaal fu Masra leki wan tumusi prenspari tori, fu di na Yesus Krestes srefi gi a komando taki den bakaman fu en musu memre na okasi disi doronomo. A taigi den krinkrin: „Tan du disi fu memre mi.”—Lukas 22:19; 1 Korentesma 11:23-25.

A no de fu taki dati efu wan sma wani si na Avondmaal fu Masra leki wan trutru warti sani, dan a musu sabi fosi san a wani taki. Gado Wortu, Bijbel, e sori san na Avondmaal fu Masra wani taki. Boiti dati, a de prenspari fu sabi san Bijbel e taki fu a fasi fa na Avondmaal musu hori èn o ten a musu hori.

Fu gi yesi na a komando fu Yesus, meki Yehovah Kotoigi sa kon makandra na heri grontapu, tapu dridewroko 16 april 2003, na netiyuru, fu memre a dede fu Yesus. Disi sa de wan okasi gi den fu ondrosuku den Buku fu Bijbel èn fu sori baka taki den e bribi na ini Masra Yesus Krestes. Na Avondmaal de wan okasi tu fu sori taki den lobi Masra Yesus Krestes, di taki: „Gado ben lobi grontapu so te, taki a ben gi en wan-enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi” (Yohanes 3:16). Yu e kisi wan switi kari fu kon makandra nanga Yehovah Kotoigi tapu a neti dati, so taki yu tu kan tranga a bribi fu yu na ini Yesus Krestes nanga a Tata na hemel, Yehovah Gado. Na so wan fasi yu kan sori tu taki yu lobi Yesus nanga Yehovah.