Yonguwan—Unu e go na fesi na yeye fasi?

„ALADI mi ben e go na den Kresten konmakandra, toku mi no ben wani fu dini Yehovah trutru”, na so Hideo e taki te a e memre a pisi ten di a ben de na skoro ete. „Furu tron mi ben e dren fu tron wan pôpi sma na mindri den pikin fu mi klas èn mi ben e dren fu koiri na strati leki wan prenspari sma nanga wan meisje nanga suma mi e hori. Mi no ben abi spesrutu marki di mi ben wani doro, èn mi no ben wani srefisrefi fu go na fesi na yeye fasi.” Neleki Hideo, a e sori taki furu yongusma e libi somarso sondro taki den abi wan marki na ini den libi noso den no e suku fu doro wan marki na ini den libi.

Efu yu yongu, dan kande yu e prisiri te yu e du sport noso te yu e du wan tra sani di yu lobi. Ma efu a abi fu du nanga yeye afersi, dan kande yu no e prisiri so fu du dati. Yu kan prisiri nanga den marki di yu poti na yeye fasi? Poti prakseri na den wortu disi fu a psalm skrifiman: „A frumane fu Yehovah de getrow, a e meki a sma di no abi ondrofeni kon koni. . . . A komando fu Yehovah krin, a e meki den ai brenki” (Psalm 19:7, 8). A Wortu fu Gado kan tiri „a sma di no abi ondrofeni” fu du sani na wan koni fasi, ’a e meki den ai fu en brenki’. Iya, yu kan kisi prisiri te yu e du sani di abi fu du nanga yeye afersi. Ma san de fanowdu fu kisi a firi dati? Fa yu musu bigin?

Kisi deki-ati fu dini Gado

Na a fosi presi, yu musu kisi deki-ati. Luku a kefal fu yongu kownu Yosia fu Yuda. Di den feni a Wet fu Yehovah na ini a tempel, dan Yosia meki sma leisi a Wet gi en èn den sani di a yere naki en ati trutru. Leki baka pisi fu dati, „Yosia ben puru ala den tegu sani na ini ala den presi di ben de fu den manpikin fu Israel” (2 Kroniki 34:14-21, 33). Fu di Yosia ben e leisi Gado Wortu, meki a ben du moro fu meki a tru anbegi go na fesi.

Yu kan kweki a firi fu wani dini Yehovah te yu e leisi Bijbel doronomo èn te yu e denki dipi fu den sani di yu leisi. Den sani disi ben gi Hideo deki-ati. A bigin abi krosibei demakandra nanga wan pionier di ben de moro owru, wan furuten dinari fu Yehovah Kotoigi. A pionier ben e studeri Bijbel fayafaya èn a ben e meki muiti fu du den sani di a ben leri. Na eksempre fu a pionier, gi Hideo furu deki-ati so taki ensrefi bigin du a srefi sani tu èn a kon kisi a firi fu wani dini Gado èn fu dini tra sma. Fu di a go na fesi na yeye fasi meki a libi fu en abi wan marki.

 Te yongusma e leisi Bijbel ala dei dan disi kan gi den deki-ati. Takahiro e fruteri: „Ala ten te mi ben go na bedi èn mi kisi mi srefi taki mi no leisi Bijbel ete fu a dei dati, dan mi ben opo èn leisi Bijbel. A bakapisi ben de taki mi firi dati Yehovah e tiri mi. Fu di mi ben e leisi Bijbel ala dei meki mi ben go na fesi na yeye fasi. Mi ben abi a fasti bosroiti fu du moro na ini a diniwroko fu Yehovah. Dati meki syatu baka di mi ben kaba nanga mi skoro, mi ben go na ini a gewoon pionierwroko. Èn mi e prisiri trutru fu de na ini a pionierwroko.”

Boiti taki yu e leisi Bijbel, dan san na wan tu tra sani di kan tranga yu so taki yu e kisi a deki-ati fu prèise Yehovah? A mama fu Tomohiro ben leri en den tru tori fu Bijbel. A e taki: „Di mi ben abi 19 yari dan mi ben studeri a buku, Het leven heeft wel degelijk een doel (A libi abi wan marki trutru). Baka di mi studeri a buku disi finifini, ne mi ati ben naki mi trutru fu a lobi fu Yehovah, nanga a frulusu-ofrandi fu Yesus. A warderi di mi kisi gi a lobi fu Gado, ben gi mi deki-ati fu du moro na ini a diniwroko fu Yehovah” (2 Korentesma 5:14, 15). Neleki Tomohiro, na so furu yonguwan e kisi deki-ati fu go na fesi na yeye fasi fu di den e meki muiti fu studeri Bijbel fayafaya.

Ma san yu kan du efu toku yu no abi a tranga winsi fu dini Yehovah? Yu kan aksi wan sma fu yepi yu? Na apostel Paulus ben skrifi: „Bika Gado na a wan di . . . e wroko ini unu, so taki unu wani èn e wroko tu” (Filipisma 2:13). Efu yu e aksi Yehovah na ini begi fu yepi yu, dan a sa gi yu en santa yeye na wan fri fasi, èn disi sa yepi yu no wawan „ fu wroko” ma sosrefi „fu wani”. Disi wani taki dati a santa yeye fu Gado sa yepi yu fu kisi a firi fu du ala san yu man na ini a diniwroko fu Yehovah èn a sa yepi yu fu gro na yeye fasi. Awansi san e pasa, frutrow tapu a krakti fu Yehovah èn meki yu ati kon tranga!

Poti marki gi yusrefi

Te yu teki a fasti bosroiti fu dini Yehovah moro bun, dan yu musu poti marki gi yusrefi so taki yu kan go na fesi na yeye fasi. Wan yongu Kresten umapikin di nen Mana e taki: „A ben de wan bigi yepi gi mi fu poti marki gi misrefi. Na presi fu go na baka, mi ben kan go na fesi nanga deki-ati. Mi ben tan poti prakseri na den marki fu mi èn mi ben aksi Yehovah fu tiri mi. Na so wan fasi mi ben man go na fesi sondro taki wan sani ben puru mi prakseri fu dati.”

Yu musu poti marki di yu sa man doro trutru. Wan marki di yu kan doro na fu leisi wan kapitel na ini Bijbel ibri dei. Kande yu kan bigin ondrosuku sani moro dipi. Fu gi wan eksempre, yu kan ondrosuku den fasi di Yehovah abi na a pisi fu „Hoedanigheden” di de fu feni na a edeprakseri „Jehovah” na ini na Index van Wachttoren-publikaties. Sowan 40 difrenti fasi fu Yehovah de di yu kan luku. A no de fu taki dati na ondrosuku sa meki yu kon krosibei na Yehovah èn disi sa gi yu deki-ati fu du moro gi en. Tra marki di yu kan doro na fu gi piki na ibri Kresten konmakandra pe den arkiman kan teki prati, fu kon leri sabi no moro mendri leki wán sma na ibri gemeente konmakandra, èn fu no meki nowan dei pasa sondro fu taki nanga Yehovah na ini begi èn sondro fu taki fu en nanga trawan.

Efu yu no poti yu nen na a Theokrasia Diniwroko-skoro ete, dan dati ben o de wan bun marki gi yu. Yu e teki prati na a preikiwroko kaba? Efu dati no de so, dan kande yu sa wani wroko na yusrefi fu tron wan preikiman di no dopu ete. A no de fu taki dati baka dati yu sa poti seryusu prakseri na a matifasi di yu abi nanga Yehovah èn yu sa wani gi yusrefi abra na en. Furu yonguwan ben meki muiti fu libi akruderi  a gi di den gi densrefi abra fu di den e go na ini a furuten diniwroko.

Aladi a bun fu abi marki na ini yu libi, toku yu musu luku bun fu no abi a firi fu strei nanga trawan. Yu sa abi moro prisiri na ini den sani di yu e du te yu no e teki yusrefi gersi nanga trawan.—Galasiasma 5:26; 6:4.

Kande yu e firi taki yu no abi nofo ondrofeni èn taki a muilek fu poti marki di yu kan doro gi yusrefi. Waka baka a rai di Bijbel e gi: „Poti yu yesi èn yere den wortu fu den koni wan” (Odo 22:17). Suku yepi na yu papa nanga mama noso na tra lepi Kresten. A no de fu taki dati papa nanga mama èn trawan, no musu fruwakti tumusi furu ma den musu gi deki-ati ini a tori disi. Yonguwan kan firi brokosaka noso den no sa si fu san ede a de prenspari fu poti marki te trawan e dwengi den fu doro wan marki. Dati ben pasa nanga wan meisje. A e taki: „Mi papa nanga mama ben poti furu marki gi mi fu doro. Marki soleki fu gi mi nen na a Theokrasia Diniwroko-skoro, teki prati na ini a preikiwroko, teki dopu, èn fu tron wan pionier. Mi ben meki tranga muiti fu doro ibriwan fu den marki disi. Te mi ben doro wan marki, dan mi papa nanga mama no ben e prèise mi, ma na presi fu dati den ben e poti wan tra marki gi mi fu doro. Leki bakapisi fu dati, mi ben e firi leki den ben e dwengi mi fu doro den marki. Mi ben weri trutru èn mi no ben si fu san ede mi musu doro den marki.” San ben de a fowtu? Ala den marki ben fiti, ma den no ben de marki di ensrefi ben poti. Efu yu wani abi bun bakapisi, dan yu musu kisi deki-ati fu poti marki gi yusrefi!

Prakseri na eksempre fu Yesus Krestes. Di a ben kon na grontapu, a ben sabi san en Tata, Yehovah, ben fruwakti fu en. Fu du a wani fu Yehovah no ben de wan marki gi Yesus nomo, ma a ben de wan sani di a ben musu fu meki kon tru. Fa Yesus ben si a wroko di a kisi fu du? A ben taki: „Mi nyanyan de, fu mi du a wani fu en di ben seni mi kon èn fu kaba a wroko fu en” (Yohanes 4:34). Yesus ben prisiri fu du a wani fu Yehovah èn a ben du den sani di en Tata ben fruwakti fu en. Fu du a wani fu Yehovah ben de leki nyanyan gi Yesus. A ben prisiri fu kaba a wroko di Yehovah ben fruwakti fu en (Hebrewsma 10:5-10). Yu kan feni prisiri sosrefi te yu e kisi a yoisti sortu deki-ati fu du den sani di yu papa nanga mama e fruwakti fu yu.

No tapu fu du san bun

Te yu poti wan marki na yu fesi, dan meki tranga muiti fu doro a marki dati. Galasiasma 6:9 e taki: „No meki wi tapu fu du san bun, bika na a reti ten wi sa koti efu wi no e kon weri.” No frutrow tapu yu eigi krakti noso koni wawan. Kande yu sa kisi fu du nanga problema. Ten na ten yu sa firi kande taki yu no man doro a marki. Ma Bijbel e gi wi a dyaranti: „Poti prakseri na [Gado] na ini ala yu pasi, èn ensrefi sa meki yu pasi kon reti” (Odo 3:6). Yehovah sa horibaka gi yu aladi yu e meki tranga muiti fu doro den marki di yu poti na yeye fasi.

Iya, te yu e kweki a firi fu dini Yehovah èn te yu e meki muiti fu doro den marki na yeye fasi, dan yu sa man ’sori ala sma taki yu e go na fesi’ (1 Timoteyus 4:15). Dan yu sa abi wan marki na ini yu libi aladi yu e dini Gado.

[Prenki na tapu bladzijde 9]

A sa gi yu deki-ati fu dini Yehovah te yu e leisi Bijbel èn e denki dipi fu den sani di yu leisi

[Prenki na tapu bladzijde 10]

Yesus ben du san en Tata ben fruwakti fu en