Wan ten sa kon pe nowan sma sa pôti moro?

„LUKU! den watra-ai fu den wan di ben e kisi kwinsi, ma den no ben abi nowan sma fu trowstu den; èn na a sei fu den wan di ben kwinsi den, makti ben de, so taki den ben abi nowan sma fu trowstu den”, na so a koni Kownu Salomo fu Israel fu owruten ben taki (Preikiman 4:1). A no de fu taki dati di Salomo ben taki fu den sma di e kisi kwinsi, dan a ben abi den pôtiwan na prakseri tu.

Te wan sma pôti dan a no wani taki nomo dati a sma no abi moni. A Wereldbank, wan bangi di e leni moni na kondre di de na nowtu, e sori wi nanga den ondrosuku di den meki na ini yuni 2002 fa a tori de trutru. „Na ini 1998 a ben sori taki 1,2 milyard sma na heri grontapu e gebroiki moro mendri leki wán Amerkan dala fu bai nyanyan nanga tra sani di den abi fanowdu ibri dei . . . èn 2,8 milyard sma e gebroiki moro mendri leki 2 Amerkan dala fu bai nyanyan nanga tra sani di den abi fanowdu ibri dei.” Den ben sori taki aladi den nomru no de so bigi leki na ini den yari na fesi, toku „tumusi furu sma e pina na so wan fasi fu di den pôti”.

Wan ten sa kon pe nowan sma sa pôti moro? Yesus Krestes ben taigi den disipel fu en: „Unu abi den pôtisma na unu ala ten” (Yohanes 12:8). Ma disi wani taki dati pôti fasi fu libi nanga den takru bakapisi fu dati sa tan fu ala ten? Nôno, aladi Yesus no ben pramisi den bakaman fu en taki den sa kon gudu, toku den wortu disi no musu meki wi denki taki howpu no de gi pôtisma.

Libisma e du muiti fu man puru pôtifasi, èn den e pramisi fu tyari wan kaba kon na dati, ma den no abi bun bakapisi. Toku Gado Wortu, Bijbel, e gi wi a dyaranti taki heri esi sma no sa pina moro. Fu taki en leti, Yesus ben „meki bun nyunsu bekènti gi den mofinawan” (Lukas 4:18). A bun nyunsu disi abi fu du sosrefi nanga a rutu di pôtifasi sa rutu puru. Disi sa pasa te a Kownukondre fu Gado sa tyari wan regtfardiki situwâsi kon na grontapu.

Grontapu sa de heri tra fasi na ini a ten dati! Kownu Yesus Krestes di de na hemel „sa firi sari gi a mofinawan èn gi a pôtiwan, èn a sa frulusu den sili fu den pôtiwan”. Fu tru, „fu kwinsi èn fu ogri di e du nanga tranga a sa frulusu a sili fu den”.​—Psalm 72:13, 14.

Mika 4:4 e taki fu a ten dati: „Èn den sa sidon trutru, ibriwan na ondro en droifibon èn na ondro en figabon, èn nowan sma sa de di e meki den beifi; bika na a mofo fu Yehovah fu den legre srefi di taki disi.” A Kownukondre fu Gado sa tyari wan lusu kon na ala den problema fu libisma, a sa puru siki nanga dede srefi. Gado „sa swari dede trutru fu têgo, èn a Soeverein Masra Yehovah trutru sa figi den watra-ai puru fu ala den fesi”.​—Yesaya 25:8.

Yu kan frutrow den pramisi disi trutru, fu di na Gado srefi meki sma skrifi den wortu disi. Fu san ede yu no e ondrosuku Bijbel fu si den buweisi di e sori taki Bijbel profeititori na tori di wi kan frutrow?

[Sma di abi a reti fu a prenki na tapu bladzijde 32]

FAO photo/M. Marzot