Opregtifasi de fanowdu, ma a nofo fu plisi Gado?

YU DENKI taki opregtifasi de trutru fanowdu na ini wi aladei libi? Wan wortubuku e taki dati „opregtifasi” wani taki dati „wan sma no e handri na wan bedrigifasi noso na wan hoigrifasi; wan sma e taki sani leki fa den de; a no e kibri noti; a e taki san de tru”. Fu tru, a fasi disi bun fu yepi sma fu abi wan moro bun banti nanga trawan. Na apostel Paulus ben gi a frumane: „Gi yesi na ala fasi na den sma di de masra fu unu na grontapu; unu no musu de sma di e du sani soso fu sma kan si; unu no musu de leki sma di wani plisi trawan, ma unu musu du sani nanga wan opregti ati èn nanga frede gi Yehovah” (Kolosesma 3:22). Suma no sa prisiri fu abi so wan opregti wrokoman di e wroko gi en? Na ini a ten disi, a moro makriki gi opregti sma fu feni wroko èn fu tan hori a wroko fu den.

Ma a moro prenspari sani di e meki taki wi musu de opregti, na a krakti di a fasi disi abi tapu a banti di wi abi nanga Gado. Den Israelsma fu owruten ben kisi blesi fu Gado te den ben e hori den wet nanga den fesa doronomo. Di Paulus ben e taki fu a krinfasi fu a gemeente, dan a ben gi Kresten a deki-ati taki: „Meki wi hori a fesa, no nanga owru srudeki, èn no nanga srudeki fu ogridu nanga godelowsufasi, ma nanga brede sondro srudeki fu opregtifasi nanga waarheid” (1 Korentesma 5:8). Efu wi wani taki Gado feni na anbegi fu wi bun, dan wi no musu wani de opregti nomo, ma wi musu si a fasi disi leki wan sani di de tranga fanowdu tu. Ma luku taki opregtifasi wawan, no de nofo. Wi musu sori a fasi disi, aladi a musu kruderi nanga waarheid.

Den sma di ben de na ini a bigi sipi Titanic èn den sma di ben bow a sipi disi, ben abi na opregti bribi taki a kefalek bigi sipi disi no ben man sungu noiti. Ma a fosi leisi di a sipi go na se na ini 1912, a ben naki wan ijsbergi èn 1517 sma ben lasi den libi. A kan taki wan tu Dyu na ini a fosi yarihondro ben abi na opregti bribi taki a fasi fa den ben e anbegi Gado ben bun. Ma a faya di den ben abi „no ben de akruderi soifri sabi” (Romesma 10:2). Efu wi wani taki Gado feni wi bun, dan na opregti bribi di wi abi musu kruderi nanga soifri sabi. Yehovah Kotoigi na ini a birti pe yu e tan sa prisiri fu yepi yu ondrosuku san a wani taki fu dini Gado na ini opregtifasi èn na ini waarheid.