A tru taki Satan tiri a di fu 20 yarihondro?

„TE WI e luku ala den ogri di pasa na ini a yarihondro disi, dan wi kan taki dati na Satan tiri a yarihondro disi. Na ini nowan enkri pisi ten bifo libisma ben angri so fu kiri milyunmilyun trawan fu di den sma dati ben de fu wan tra ras, wan tra bribi, noso fu di den no ben abi a srefi posisi na ini a libimakandra.”

A tijdschrift The New York Times fu 26 yanuari 1995, ben taki a sani disi fu di 50 yari ben pasa sensi strafuman di no ben du nowan enkri ogri ben komoto na ini den Nazi strafuman kampu. Furu sma sabi a Holocaust leki wan fu den pisi ten na ini a historia pe bun furu sma lasi den libi; na ini a pisi ten dati sma kiri sowan siksi milyun Dyu. Pikinmoro dri milyun sma fu Polen di no ben de Dyu dede na ini a pisi ten di sma e kari a „Forgotten Holocaust” (A Holocaust di sma frigiti).

Soleki fa Jonathan Glover e taki na ini a buku fu en di nen Humanity—A Moral History of the Twentieth Century, dan „sma e bribi taki sowan 86 milyun sma dede leki bakapisi fu orloku na ini den yari na mindri 1900 te go miti 1989”. A man disi e taki moro fara: „A nomru fu sma di dede na ini a di fu twenti yarihondro bigi so te, taki wan sma no man frustan fa dati kan. Te wi e luku a nomru fu sma di dede ala nanga ala na ini a pisi ten dati, dan wi no kon sabi soifri ete omeni sma dede trutru, fu di sowan 58 milyun sma lasi den libi soso na ini den tu grontapu feti wawan. Ma te wi sa luku finifini omeni sma dede na ini a heri pisi ten fu a di fu twenti yarihondro, dan wi ben o si taki na ini a pisi ten dati orloku kiri sowan 2500 sma ibri dei. Dati na moro leki 100 sma ini wán yuru, ibri dei, neigitenti yari langa.”

Fu dati ede, sma kari a di fu 20 yarihondro wán fu den moro ogri-ati yarihondro di libisma oiti ben sabi. Na ini a buku fu en di nen Hope Against Hope, na uma Nadezhda Mandelstam skrifi: „Wi si fa ogridu teki abra, baka di a kon na krin taki gronprakseri fu libisma no man tiri wi kwetikweti.” Ma a ogridu di de na heri grontapu e sori taki Satan wini a strei?

 [Sma di abi a reti fu a prenki na tapu bladzijde 2]

KAFTI: Mother and daughter: J.R. Ripper/SocialPhotos

[Sma di abi a reti fu a prenki na tapu bladzijde 3]

U.S. Department of Energy photograph