„Kon tron koni sma na ini a ten di de na yu fesi”

„Furu libisma e gebroiki den yongu yari fu den na so wan fasi, taki den e pori den libi bakaten.” Dati na san Jean de La Bruyère, wan Fransi skrifiman fu a di fu 17 yarihondro ben taki. Iya, wan yongu sma di no sabi san a wani trutru, ben kan draidrai fu bosroiti san a o du nanga en libi, èn fu dati ede a no sa de tevrede, èn a sa firi sari. Na a tra sei, wan yonguwan di tranga-ede ben kan tan tyari ensrefi na wan fasi di no bun, èn fu dati ede a no sa prisiri moro nanga a libi te a kon moro owru. Awansi fa a no fa, te wi no e du san bun èn san fiti, noso te wi e du ogri, dan dati kan gi wi bun furu sari bakaten.

Fa wi kan sorgu taki den sani disi no e pasa nanga wi? Gado Wortu e warskow yongusma fu no draidrai fu bosroiti san den o du nanga den libi, èn fu dati ede a e gi den a rai disi: „Memre now yu Gran Mekiman na ini den dei fu yu yongu yari, bifo den muilek dei sa kon, noso den yari doro pe yu sa taki: ’Mi no e prisiri nanga den’” (Preikiman 12:1). Efu yu na wan yonguwan, dan teki a bosroiti fu leri sabi „yu Gran Mekiman”, now di yu yongu.

Ma fa Bijbel e yepi yongu sma fu no abi a mi-no-ke fasi di furu tra yongu sma abi? Bijbel e taki: „Arki rai èn teki trangaleri, so taki yu kan kon tron wan koni sma na ini a ten di de na yu fesi” (Odo 19:20). Bijbel e sori krin sosrefi taki te wan sma no e teki a koni fu Gado te a yongu, noso te a owru srefi, dan dati kan tyari takru bakapisi kon (Odo 13:18). Na a tra sei, a de so taki te wi e gi yesi na den rai fu Gado, dan wi „sa kisi furu dei nanga furu yari èn sosrefi vrede” (Odo 3:2). Sobun, wi sa prisiri nanga a libi, èn wi sa de koloku.