Yongusma di lobi a waarheid fu Bijbel

MORO leki 2400 yari pasa, wan Hebrew psalm skrifiman ben aksi: „Fa wan yonkuman sa krin en pasi?” (Psalm 119:9). Na aksi disi fiti ete na ini a ten disi, fu di yongu sma e kisi furu problema ini grontapu. Fu di furu yongu sma gi densrefi abra na seks hurudu, meki taki makriki den kan kisi AIDS. Pikinmoro afu fu den sma di abi a takru siki disi de mindri 15 nanga 24 yari. Te sma e gebroiki drugs, dan dati e meki furu problema kon, èn a e meki taki son yongu sma dede tumusi fruku. Doti poku; felem, telefisi programa, nanga video di lai ogridu nanga hurudu; èn doti seks tori di sma kan luku tapu Internet, na sani di abi wan takru bakapisi gi yongu sma. Fu dati ede, ini a ten disi furu papa nanga mama èn furu yongu sma e broko den ede srefisrefi nanga na aksi di a psalm skrifiman ben poti.

A srefi psalm skrifiman ben piki na aksi di ensrefi ben poti na a fasi disi: „Fu di a de na ai akruderi a wortu fu yu.” Iya, fu tru, Gado Wortu, Bijbel, abi bun rai na ini di kan tiri yongu sma, èn fu di furu yonguwan ben teki den rai dati, dati meki sani waka bun ini den libi (Psalm 119:105). Meki wi luku wan tu eksempre fu yonguwan di lobi Gado èn di e meki muiti fu tan tranga na yeye fasi ini wan grontapu pe sma lobi prisiri nanga materia sani nomo.

Den e warderi a tiri fu den papa nanga mama

Jacob Emmanuel ben de wan furuten pionier wan tu yari bifo a bigin dini na a bijkantoro fu Yehovah Kotoigi na ini Meksikow. A e memre nanga prisiri fa a ben kon kisi a lobi fu dini Gado: „Mi papa nanga mama ben abi furu krakti tapu mi. Ma son brada di abi ondrofeni èn di ben lobi yeye afersi, ben tron mati fu mi èn den ben yepi mi furu tu. Mi papa nanga mama èn den mati fu mi ben meki mi kon lobi a preikiwroko. Safrisafri den ben tyari mi tapu a yoisti pasi èn noiti mi ben kisi a firi taki den ben dwengi mi.”

David, di de ini a furuten diniwroko furu yari kaba, e memre fa a ben naki en ati trutru taki en papa nanga mama ben bigin dini leki spesrutu pionier di en nanga en brada ben de pikin ete. Di a papa fu David dede, dan en mama ben tan ini a spesrutu pionierwroko. Boiti taki a ben preiki a bun nyunsu, dan a ben sorgu David nanga en brada. „Den no dwengi mi noiti fu tron wan pionier”, na so David e taki, „ma fu di na osofamiri fu wi ben feni so furu prisiri ini a pionierwroko, meki mi ben wani go pionier tu.” David e fruteri o prenspari a de taki papa nanga mama e tiri den pikin fu den na wan yoisti fasi èn e poti prakseri na den. A e taki: „Ibri neti, mi mama ben e leisi tori gi wi komoto fu a buku Van het verloren naar het herwonnen Paradijs. * A fasi fa a ben e fruteri wi den tori disi ben yepi wi fu lobi yeye nyanyan.”

Den e warderi den konmakandra

Son yonguwan e feni en muilek fu warderi den Kresten konmakandra. Den e go na den konmakandra fu di den papa nanga mama e tyari den go. Toku, efu den tan go na den konmakandra, dan bakaten den kan bigin warderi den konmakandra. Luku na eksempre fu Alfredo, di bigin nanga a furuten diniwroko di a ben abi 11 yari. A e erken taki di a ben  abi sowan feifi yari, dan a no ben wani go na den konmakandra, fu di den konmakandra ben e meki a fadon na sribi. Ma a papa nanga mama fu en no ben wani taki a ben musu sribi na a ten di den konmakandra ben e hori. Alfredo e memre: „Di mi ben e gro kon moro bigi, dan safrisafri mi ben bigin lobi den konmakandra, spesrutu baka di mi ben leri leisi èn skrifi, fu di na a ten dati mi ben bigin gi komentaar nanga mi eigi wortu.”

Cintia na wan yongu uma di abi 17 yari èn di e dini leki gewoon pionier. A e fruteri taki fu di a ben abi bun demakandra nanga trawan, dati meki a ben bigin kisi a lobi fu dini Gado. Cintia e taki: „Mi ben abi bun matifasi nanga den brada nanga sisa èn mi ben e go na den konmakandra doronomo. Dati meki mi no ben abi a firi taki mi misi den grontapu mati fu mi noso taki mi misi den sani di yongusma lobi fu du, soleki fu go na dansi-oso. Te mi ben e arki den komentaar nanga ondrofenitori na den konmakandra, dan mi ben wani fu gi Yehovah ala san mi abi, èn mi feni taki a moro bun sani di mi abi, na den yongu yari fu mi. Sobun, mi teki a bosroiti fu gebroiki den yari dati fu dini Yehovah.”

Toku, Cintia e erken: „Wan ten ben de, bifo mi ben teki dopu, taki mi ben e misi den konmakandra sondro taki mi ben abi wan bun reide gi dati. Mi ben e feni taki mi abi skorowroko noso tra skoro sani fu du. Mi no ben go na wan tu fu den konmakandra, èn disi ben abi krakti tapu a yeye fasi fu mi. Mi bigin fu abi demakandra nanga wan boi di no ben e studeri Bijbel. Nanga yepi fu Yehovah, dan baka wan pisi ten mi ben man seti sani kon bun baka.”

Wan bosroiti di yusrefi musu teki

Pablo na wan yonguwan di e dini Yehovah ini a furuten diniwroko. Di den ben aksi en san na a prenspari sani di e yepi wan sma fu lobi den tru tori fu Gado Wortu, dan a ben taki: „Mi denki taki tu sani de prenspari: studeri doronomo èn de fayafaya ini a preikiwroko. Mi warderi en taki mi papa nanga mama ben leri mi a waarheid fu Yehovah, èn mi feni taki disi na a moro bun sani di den ben kan gi mi. Toku, misrefi musu de seiker fu san ede meki mi lobi Yehovah. Fu dati ede, a de prenspari fu sabi a ’bradi nanga a langa’ fu a waarheid fu Bijbel. Disi na a wan-enkri fasi fa wi kan bigin angri gi a Wortu fu Yehovah, so taki a sa tron leki ’wan faya di e leti’ na ini wi èn di e pusu wi fu fruteri trawan fu a Wortu dati. Te wi e du a preikiwroko fayafaya, dan dati sa meki taki a warderi di wi abi gi a waarheid o tan.”—Efeisesma 3:18; Yeremia 20:9.

Jacob Emmanuel, di wi ben kari kaba na ini na artikel disi, e memre tu o prenspari a de taki wan sma srefi teki a bosroiti fu dini Yehovah. A e taki dati en papa nanga mama noiti no ben dwengi en fu teki dopu. „Mi denki taki disi ben de heri bun, fu di mi si den bun bakapisi fu dati. Fu gi wan eksempre, son yonguwan nanga suma mi ben abi furu demakandra, ben meki mofo fu dopu na a srefi ten. Dati ben bun, ma mi ben man si taki sonwan ben teki dopu sondro fu denki bun fu a tori èn syatu baka dati, den no ben abi so furu faya moro gi Kownukondre afersi. Mi papa nanga mama no ben dwengi mi fu  teki a bosroiti fu gi misrefi abra na Yehovah. Dati ben de wan bosroiti di misrefi teki.”

San a gemeente kan du

Son yonguwan leri a waarheid fu Gado Wortu den wawan, sondro taki den papa nanga mama ben yepi den. Ini den sortu situwâsi dati a no makriki srefisrefi fu leri du san bun èn fu tan du dati.

Noé e memre fa a ben kisi furu wini fu a waarheid. Sensi a ben yongu, a ben e atibron gaw èn a ben lobi feti. Di a ben abi 14 yari, dan a bigin studeri Bijbel, èn a bigin tyari ensrefi na wan moro bun fasi. En papa nanga mama ben breiti srefisrefi nanga dati, aladi na a ten dati densrefi no ben wani sabi noti fu Bijbel. Di Noé ben go na fesi na yeye fasi, dan a ben wani gebroiki en libi fu dini Gado moro bun. Now a de ini a furuten diniwroko.

Na wan srefi sortu fasi, Alejandro ben wani kon sabi moro fu Kresten waarheid di a ben yongu srefisrefi, aladi en papa nanga mama no ben wani sabi noti fu waarheid. Te a e fruteri fa a e warderi a waarheid, dan a e taki: „Mi kweki ini wan Lomsu osofamiri. Ma moro nanga moro mi ben kon lobi a Komunistis leri taki Gado no de, fu di a kerki no ben man piki den aksi di ben e gi mi broko-ede sensi mi ben de wan pikin boi ete. Na organisâsi fu Yehovah ben yepi mi fu teki a sabi fu Gado. Dati ben kibri mi libi trutru. Efu mi no ben studeri Bijbel, dan kande mi ben fadon na ini hurudu, noso kande mi ben gebroiki sopi noso drugs na wan fowtu fasi. Kande mi ben o tron wan memre fu wan revo grupu srefi, èn dati ben o abi takru bakapisi gi mi.”

Fa wan yonguwan, di no kisi yepi fu en papa nanga mama, man tan go doro fu suku waarheid èn fu hori ensrefi na dati? A no de fu taki dati a yepi fu den owruman nanga den tra sma ini a gemeente, na wan prenspari sani srefisrefi. Noé e memre: „Noiti mi no ben firi taki mi de mi wawan, fu di ala ten mi ben abi wan heri bun matifasi nanga Yehovah. Furu lobi-ati brada nanga sisa ben yepi mi tu, èn na yeye fasi den tron papa, mama, nanga brada fu mi.” Noé e dini na Bethel now èn a e gebroiki en ten ini a diniwroko gi Gado. Alejandro e fruteri wan srefi sortu sani: „Mi sa de nanga tangi na ati ala ten taki mi kisi wini fu den owruman ini mi gemeente di ben poti prakseri na mi, na wan lobi-ati fasi. Mi taigi den grantangi srefisrefi fu dati, fu di na a ten di mi ben bigin studeri Bijbel, mi ben abi 16 yari, èn mi no ben sabi san mi ben wani trutru. Dati na wan problema di furu yongu sma abi, èn a ben abi krakti tapu mi tu. Den osofamiri ini a gemeente noiti no ben libi mi. Ala ten wan sma ben de di ben teki mi na oso èn boiti taki a ben e teki mi na oso èn ben e gi mi nyanyan, a ben lobi mi sosrefi.” Alejandro e dini now moro leki 13 yari kaba ini a furuten diniwroko.

Son sma feni taki kerki na wan sani di de soso gi owru sma. Toku, furu yongu sma leri a waarheid fu Bijbel di den ben yongu ete èn den kon lobi Yehovah èn e tan getrow na en. Den wortu fu David di skrifi na ini Psalm 110:3 fiti den yonguwan disi: „Yu pipel sa de klariklari fu gi densrefi na a dei fu yu srudati legre. Na ini a moi di a santafasi moi, fu a bere fu musudei, yu abi yongu man nanga yu neleki dowdropu.”

A de wan tyalensi gi yongu sma fu leri a waarheid èn fu tan getrow ini a waarheid nanga wan fasti overtoigi. Wi e prisiri srefisrefi taki furu yonguwan tan wroko skinskin nanga Yehovah organisâsi, e tan go na den konmakandra doronomo, èn e tan studeri Bijbel fayafaya. Fu di den e du dati, meki den ben man kweki trutru lobi gi Gado Wortu èn gi a diniwroko fu en!—Psalm 119:15, 16.

[Futuwortu]