Kownukondre preikiman e fruteri

Wan medari fu sori warderi gi wan Kownukondre zaal

A MINISTERIA na ini Fensikondre di e luku a fasi fa sma e sorgu a presi pe den e libi, ben poti a yari 2000 leki a „Yari fu poti prakseri na moi dyari”. Wan fu den sma di ben e yepi fu orga a sani disi ben taki dati „den ben kari a yari dati a yari fu poti prakseri na moi dyari, fu memre wi alamala taki sani soleki moi grun grasi, moi bon nanga bromki, abi krakti tapu wi aladei libi èn tapu a gosontu fu wi”.

Tapu 12 yanuari 2001, a bijkantoro fu Yehovah Kotoigi na ini Fensikondre ben kisi wan brifi fu wan organisâsi na ini Fensikondre di e poti prakseri na a fasi fa sma e moi a dyari fu den. A brifi e sori taki a yari 2000 ben de wan spesrutu yari fu poti prakseri na moi dyari, èn taki na organisâsi disi ben bosroiti fu gi a Kownukondre zaal fu Yehovah Kotoigi di de na ini Tikkurila, wan fu den medari. Den ben du dati fu di a dyari fu a Kownukondre zaal dati ben seti kefalek moi èn fu di den brada ben e sorgu en na wan tumusi bun fasi. A brifi ben e taki moro fara dati „a dyari e tan moi na ini den zomer mun, èn sosrefi na ini a pisi ten te snew e fadon èn taki a moi srefisrefi fu si”.

Yehovah Kotoigi ben kisi a medari disi na a Rosendahl Hotel na Tampere na ini Fensikondre, pe moro leki 400 sma di sabi seti moi dyari èn bisnisman sosrefi ben kon makandra. Den sma fu na organisâsi disi di e poti prakseri na a fasi fa sma e moi den dyari na ini Fensikondre, ben skrifi wan fruklari di den seni go gi nyunsuman. A fruklari dati e taki: „Te wi e luku na difrenti presi na ini a kondre, dan wi e si taki pikinmoro ala den dyari fu den Kownukondre zaal fu Yehovah Kotoigi seti na wan tumusi moi fasi. A fasi fa Kotoigi e sorgu a dyari lontu den presi pe den e kon makandra, e hari a prakseri fu ibriwan sma di e waka pasa. A Kownukondre zaal na Tikkurila abi wan dyari di de wan moi eksempre fu a fasi fa sma kan seti dyari na wan kefalek moi fasi. A Kownukondre zaal srefi, makandra nanga a bigi dyari di e lontu en èn di seti so moi, e meki sma firi prisiri èn e gi den kowru-ati.”

Na ini Fensikondre yu abi sowan 233 Kownukondre zaal, èn furu fu den abi moi dyari di abi moi bromki. Ma a sani di e meki taki den presi disi moi trutru, na taki den na presi pe sma e kon makandra gi a tru anbegi èn fu teki leri komoto fu Bijbel. Den moro leki siksi milyun Kotoigi fu Yehovah na heri grontapu, e si den Kownukondre zaal fu den leki presi di den lobi srefisrefi fu de drape, awinsi fa den konmakandra presi disi tan. Fu dati ede den wani sorgu den presi disi bun èn na wan lobi-ati fasi. Den doro fu den Kownukondre zaal opo gi iniwan sma di e libi na ini a birti fu yu!