Ondrofenitori

A grani di mi ben abi baka a grontapufeti

SOLEKI FA FILIP S. HOFFMANN FRUTERI

Na ini mei 1945, a di fu Tu Grontapufeti ben kon na wan kaba. Na ini december fu a yari dati, Nathan H. Knorr, kon na Deinsikondre. Na a ten dati a brada disi ben e tiri a preikiwroko di Yehovah Kotoigi e du na heri grontapu. A ben kon makandra nanga a sekretarsi fu en, Milton G. Henschel, di ben abi 25 yari. Den brada ben yuru wan bigi zaal gi na okasi disi di den ben e fruwakti fayafaya. Wi leki yonguwan ben e prisiri spesrutu nanga a taki fu Brada Henschel, fu di a brada dati ben de wi speri èn fu di a lezing fu en ben nen: „Joe moe membre da Soema disi ben meki joe na joe jongoe tem.”—Preikiman 12:1, Da Bijbel na ini Sranantongo.

NA A ten di Brada Knorr ben kon fu de nanga wi, dan wi kon sabi taki tumusi moi sani ben o pasa fu meki a preikiwroko di e du na heri grontapu go na fesi. Wi kon sabi sosrefi taki wi ben kan abi wan prati na den tumusi moi sani disi (Mateyus 24:14). Fu gi wan eksempre, wan nyun skoro ben opo na ini Amerkankondre, èn a skoro disi ben de fu gi yonkuman nanga yongu uma leri so taki den ben kan go du zendelingwroko. Brada Knorr ben poti krakti na tapu taki efu wi ben o kisi kari fu go na a skoro dati, dan wi ben o kisi wan ticket soso fu go drape, ma wi no ben o kisi wan fu drai kon baka. Boiti dati, wi no ben o sabi na fesi pe den ben o seni wi go fu go dini leki zendeling. Toku wan tu fu unu gi wi nen fu go na a skoro dati.

Bifo mi e fruteri unu sortu sani mi ondrofeni baka a di fu Tu Grontapufeti, dan meki mi bigin fruteri unu taki mi gebore na ini 1919. Wan tu tra sani ben pasa bifo a feti ben broko èn sosrefi na a ten fu a feti, èn den sani dati ben abi bigi krakti tapu mi libi.

A blaka skapu fu a famiri e yepi wi fu kon sabi Bijbel waarheid

Di mi mama ben de nanga bere fu mi, dan a begi Gado fu mi tron wan zendeling, efu mi ben de wan boi. Mi ben de a fosi pikin fu mi mama. A brada fu en ben de wan Bijbel Ondrosukuman, soleki fa sma ben e kari Yehovah Kotoigi na a ten dati, ma den famiriman fu en ben si en leki wan blaka  skapu fu a famiri. Wi ben e libi krosibei fu a foto Kopenhagen, èn te den Bijbel Ondrosukuman ben e hori na alayari kongres drape, dan mi mama ben gwenti fu taigi mi omu Thomas fu kon tan nanga wi. Omu Thomas no ben e libi farawe fu wi oso. Fu di a ben sabi Bijbel heri bun, èn fu di a ben man rideneri bun nanga sma, meki a ben abi so wan krakti na mi mama tapu, taki mi mama tron wan Bijbel Ondrosukuman na ini 1930.

Mi mama ben lobi Bijbel. Fu di a ben e gi yesi na a komando na Deuteronomium 6:7, dan a gi mi nanga mi sisa leri ’te a ben e sidon na ini en oso, te a ben e waka na pasi, èn te a ben e opo’. Baka wan pisi ten, mi bigin teki prati na a oso-fu-oso preikiwroko. Mi ben lobi fu taki fu tori di ben abi fu du nanga a sili di no man dede èn nanga helfaya, di den kerki ben e leri sma. Mi ben man gebroiki Bijbel bun fu sori sma taki den sortu leri dati no ben tru.—Psalm 146:3, 4; Preikiman 9:5, 10; Esekièl 18:4.

Wi famiri kon de na ini wánfasi

Baka a kongres fu 1937 na ini Kopenhagen, dan a bijkantoro fu Yehovah Kotoigi na ini Deinsikondre ben abi wan sma fanowdu fu yepi wan pisi ten nanga a wroko na ini a presi pe den ben poti ala den publikâsi di den gemeente ben musu kisi. Wan syatu pisi ten bifo, mi ben kaba teki leri na a universiteit pe mi ben e studeri fu tron wan bisnisman. Mi no ben abi tra fruplekti, èn fu dati ede mi bosroiti fu yepi nanga a wroko disi. Di den no ben abi wan sma fanowdu moro fu du a wroko dati, dan den brada aksi mi fu yepi nanga a wroko na a bijkantoro. Wan syatu pisi ten baka dati, mi gowe libi oso èn mi froisi go tan na a bijkantoro na ini Kopenhagen, aladi mi no ben teki dopu ete. Fu di mi ben abi demakandra nanga lepi Kresten ibri dei, meki mi ben man go na fesi na yeye fasi. A yari baka dati, tapu 1 yanuari 1938, mi teki dopu na ini watra fu sori taki mi ben gi misrefi abra na Yehovah Gado.

Na ini september 1939, a di fu Tu Grontapufeti bigin. Ne, Doisri srudati grupu teki Deinsikondre abra tapu 9 april 1940. Ma fu di den ben gi pasi na a pipel fu Deinsikondre fu libi na a fasi fa densrefi ben wani, meki wi ben man go doro nanga a preikiwroko fu wi.

Ne wan tumusi moi sani pasa. Mi papa tron wan getrow Kotoigi di ben e teki prati sosrefi na a preikiwroko, èn a sani dati trutru gi wi famiri furu prisiri. Fu dati ede, di mi nanga fo tra brada fu Deinsikondre kisi a kari fu go na a di fu aiti klas fu Gileadskoro, dan mi heri famiri gi mi deki-ati fu go. Wi ben o bigin nanga a skoro na ini september  1946, èn wi ben o de drape feifi mun langa. A skoro disi ben hori na a moi presi di no ben de so fara fu South Lansing na ini a distrikt New York.

Gileadskoro èn a leri di mi kisi baka a skoro disi

Na Gilead mi kisi okasi fu meki nyun mati di mi ben lobi srefisrefi. Wan neti di mi ben e waka tapu a skoro dyari nanga Harold King fu Ingrisikondre, dan wi taki fu pe den ben o seni wi go kande, baka te wi ben klari a Gileadskoro. „Mi no denki taki mi si den weti klepston fu Dover fu a lasti leisi”, na so Harold ben taki. A ben abi leti, ma a ben teki 17 yari bifo a ben si den klepston dati baka. Fo nanga afu fu den yari dati a koti strafu na ini wan strafu-oso na China, èn a heri pisi ten dati den ben sroto en wawan na ini wan strafu-oso kamra. *

Baka di wi klari a Gileadskoro nanga bun bakapisi, dan mi ben musu go dini leki opziener di e reis na ini a distrikt Texas, na Amerkankondre. Mi ben musu go luku den gemeente fu Yehovah Kotoigi, fu yepi den na yeye fasi. Den brada nanga sisa ben gi mi wan waran switikon. Den brada na ini Texas ben lobi en taki wan yonkuman fu Europa di ben klari a Gileadskoro no so langa ete, ben kon fu yepi den. Ma baka di mi ben de seibi mun nomo na ini Texas, dan mi kisi wan kari fu go na a edekantoro fu Yehovah Kotoigi na ini Brooklyn, New York. Drape Brada Knorr gi mi kantorowroko fu du, èn mi ben musu leri fa a wroko ben e du na ini heri Bethel. Baka dati, di mi go baka na Deinsikondre, dan mi ben musu gebroiki den sani di mi ben leri, èn mi ben musu sorgu taki ala sani ben e du na a srefi fasi leki fa sani ben e du na ini Brooklyn. Fu taki en leti, den brada ben wani taki ala den bijkantoro na heri grontapu ben musu wroko makandra na ini wánfasi, so taki sani ben e waka moro bun. Bakaten, Brada Knorr seni mi fu go dini na ini Doisrikondre.

Mi e gebroiki den sani di mi leri fu a bun fu den bijkantoro

Di mi doro na ini a foto Wiesbaden, na Doisrikondre, na ini yuli 1949, dan furu foto na ini Doisrikondre ben de brokopresi ete. Den sma di ben e teki fesi na ini a preikiwroko ben de mansma di ben kisi frufolgu fu sensi a ten di Hitler ben teki a makti abra na ini 1933. Wan tu fu den ben de sowan aiti te kon miti tin yari langa na strafu-oso noso na ini strafuman kampu, èn sonwan fu den moro langa leki dati srefi. Mi wroko dri nanga afu yari langa makandra nanga den futuboi dati fu Yehovah. A tumusi bun eksempre fu den e memre mi fu wan sani di a historia sabiman fu Doisrikondre, Gabriele Yonan ben skrifi. Disi na san a ben skrifi: „Efu a Kresten grupu disi di ben tanapu kánkan, no ben tyari densrefi na so wan bun fasi na a ten di den Nazi ben e kwinsi sma, dan wi no ben o man bribi taki wi kan du ala den sani di Yesus leri sma, spesrutu te wi e luku den ogri-ati sani di pasa na ini a strafuman kampu Auschwitz èn leki bakapisi fu a Holocaust.”

Na a bijkantoro mi ben du a srefi wroko di mi ben e du na ini Deinsikondre. Mi ben musu leri den brada drape fu seti den afersi fu na organisâsi na a srefi fasi leki fa tra bijkantoro ben e du dati. Den kenki di ben kon na ini a wroko no ben wani taki dati den brada no ben du a wroko fu den bun, ma den ben kon fu di a ben de fanowdu taki den difrenti bijkantoro ben musu wroko makandra nanga na edekantoro. Di den brada fu Doisrikondre kon frustan dati, dan den ben breiti èn den alamala ben de klariklari fu yepi fu seti a wroko moro bun.

Na ini 1952, mi kisi wan brifi fu a kantoro fu Brada Knorr, èn a brifi ben taki dati mi ben musu go dini na a bijkantoro na ini a foto Bern, na Switserland. Mi ben kisi a wroko fu dini leki bijkantoro  opziener drape, èn mi ben musu bigin nanga a wroko dati tapu 1 yanuari 1953.

Mi e ondrofeni tra prisiri sani na ini Switserland

Syatu baka di mi ben doro na ini Switserland, dan mi miti Esther na wan kongres, èn a no ben teki langa baka dati di wi meki mofo fu trow. Na ini augustus 1954, Brada Knorr taigi mi fu kon na Brooklyn, èn drape mi kon yere fu wan nyun wroko di ben e gi prisiri. Fu di moro bijkantoro ben de now na heri grontapu, èn fu di den bijkantoro disi ben kon moro bigi, dan den brada ben kon nanga wan nyun seti. Den ben prati a wroko di ben musu du na heri grontapu na ini difrenti zone (bigi pisi kontren), èn ibri zoneopziener ben o dini wan fu den kontren disi. Mi ben musu dini tu fu den kontren disi, namku Europa nanga a kontren fu a Mindrikondre Se.

Mi ben tan wan syatu pisi ten na ini Brooklyn, èn baka dati mi drai go baka na Switserland fu sreka sani gi a wroko di mi ben musu go du leki zoneopziener. Mi nanga Esther trow, èn a go dini makandra nanga mi na a bijkantoro na ini Switserland. A fosi leisi di mi go dini leki zoneopziener, dan mi go na den zendeling-oso èn na den bijkantoro na ini Italiakondre, Grikikondre, Siprus, den kondre na a Mindri Owstusei èn na a lanki fu Noord-Afrika. Mi go sosrefi na Spanyorokondre èn na Potogisikondre. Ala nanga ala mi go na 13 kondre. Di mi ben doro baka na ini a foto Bern, dan mi tan drape wan syatu pisi ten nomo, èn baka dati mi go na ala den tra kondre fu Europa di ben de na a westsei fu Sovjet Unie. Na ini a fosi yari di wi ben trow, dan mi gowe fu oso siksi mun langa fu dini den Kresten brada nanga sisa fu wi.

Situwâsi e kenki

Na ini 1957, Esther kon sabi taki a ben de nanga bere, èn fu di a bijkantoro no ben meki nanga a marki fu gi papa nanga mama di ben abi pikin wan tanpresi, meki wi bosroiti fu go tan baka na ini Deinsikondre. Drape mi papa gi wi okasi fu tan nanga en. Esther ben sorgu gi wi umapikin, Rakel, èn sosrefi gi mi papa. Na a ten dati, mi ben e yepi nanga a wroko di ben de fu du na a nyun bijkantoro. Mi ben e dini leki wan leriman na a Kownukondre Diniwroko-skoro gi gemeente owruman, èn mi tan dini sosrefi leki zoneopziener.

Fu di mi ben musu reis furu di mi ben de zoneopziener, meki mi no ben e si mi umapikin langa pisi ten baka makandra. A sani dati ben fruferi son leisi. Wan leisi mi ben de na ini Parijs fu wan pisi ten, fu di wi ben opo wan pikin drukkerij drape. Esther nanga Rakel ben kon nanga loko fu si mi, èn den doro na a loko station Gare du Nord. Mi  nanga Léopold Jontès di ben e dini tu na a bijkantoro gowe go miti den drape. Rakel ben tanapu na tapu a trapu fu a loko, èn a luku Léopold fosi, ne a luku mi, ne a luku Léopold baka, èn dan a brasa Leopold!

Wan tra bigi kenki ben kon di mi ben abi 45 yari. Na a ten dati mi tapu nanga a furuten diniwroko fu go wroko moni, so taki mi ben man sorgu mi osofamiri. Fu di mi ben abi ondrofeni leki wan Kotoigi fu Yehovah, meki mi ben man feni wan wroko leki basi fu wan bisnis di ben e seri sani gi tra kondre. Baka di mi ben wroko sowan neigi yari gi a srefi bisnis dati, èn baka di Rakel ben klari skoro, dan wi bosroiti fu gi yesi na a kari di ben gi fu froisi go tan na wan kontren pe moro Kownukondre preikiman ben de fanowdu.

Fu di mi ben wani luku efu wi ben o man tan na ini Noorwegen, meki mi aksi wan kantoro di e yepi sma fu feni wroko efu den ben abi wan wroko gi mi. Den no ben man yepi mi. A no ben makriki gi wan man di ben abi 55 yari fu feni wan wroko. Ma toku mi seni wan boskopu gi a bijkantoro na ini a foto Oslo, èn mi yuru wan oso krosibei fu a foto Drøbak, aladi mi ben e frutrow na tapu taki wi ben o feni wan wroko. Mi feni wan wroko, èn baka dati wi kisi bun furu prisiri na ini a Kownukondre diniwroko na ini Noorwegen.

Den ten di ben gi wi moro bigi prisiri, na di furu sma na ini wi gemeente ben e go na a noordsei fu a kondre fu wroko na ini kontren pe preikiman no ben de. Wi ben e yuru pikin oso na wan presi pe sma ben kan seti tenti, èn ibri dei wi ben e go na den burugron di ben panya na ala sei na mindri den moi bergi. A ben de wan prisiri trutru fu fruteri den sma disi di abi switifasi, fu a Kownukondre fu Gado. Wi ben prati furu publikâsi, ma wi ben musu wakti teleki a yari baka dati bifo wi ben kan go baka na den sma dati. Toku den sma no ben frigiti wi! Esther nanga Rakel e memre a leisi ete di wi go luku den sma disi baka, èn di den brasa wi neleki wi ben de famiriman fu den di den no ben si wan langa pisi ten. Baka di wi ben tan dri yari na ini Noorwegen, dan wi drai go baka na Deinsikondre.

Den prisiri di wan oso-famiri e gi

Te fu kaba Rakel meki mofo nanga Niels Højer, wan fayafaya pionier di ben e du furuten wroko. Baka di Rakel nanga Niels trow, dan den tan dini leki pionier, teleki den kisi pikin. Niels na wan bun masra, èn a ben de wan bun papa sosrefi fu di a ben e du muiti fu sorgu en osofamiri. Wan mamanten fruku, a teki a boi fu en tapu baisigri èn den go na a sekanti fu luku fa a son ben e opo. Wan birtisma fu en aksi a boi san den ben du drape. A boi piki en: „Wi ben e begi Yehovah.”

Wan tu yari baka dati, dan mi nanga Esther ben de na a dopu fu den tu moro bigi granpikin fu wi, namku Benjamin nanga Nadja. Niels ben de drape tu, èn wantronso a ben tanapu leti na mi fesi. A luku mi èn a taki: „Tru mansma no e krei.” Ma fosi yu denki, wi ala tu brasa makandra èn wi krei. Mi breiti trutru taki mi umapikin abi so wan masra di mi kan krei èn lafu nanga en!

Mi e fiti misrefi ete na a fasi fa sani e waka

Mi nanga Esther ben kisi wan tra blesi di mi kisi a kari fu go dini baka na a bijkantoro fu Deinsikondre. Ma na a ten dati, den brada ben e sreka sani kaba fu bow wan moro bigi bijkantoro na ini Holbæk. Mi ben abi a grani fu teki fesi na ini a bow-wroko makandra nanga tra brada, èn nowan fu den wrokoman di ben de klariklari fu du a wroko disi ben e kisi pai. Aladi a ben de wan bun kowru winter na a kaba fu 1982, toku a moro bigi pisi fu a wroko ben klari na a ten dati. Wi alamala ben breiti fu go tan na ini wan moro bigi, èn wan moro bun bijkantoro!

Wan syatu pisi ten baka dati mi ben e du kantorowroko, èn mi ben lobi a wroko dati srefisrefi. Esther ben abi a wroko fu yepi den sma di ben e bel kon na a bijkantoro. Ma baka wan pisi ten a ben musu du oparâsi na en dyonku, èn wán nanga afu yari baka dati a du wan oparâsi na en galblaas. Aladi a Bethel-osofamiri ben yepi wi na wan lobi-ati fasi, toku wi bosroiti taki a ben o moro bun efu wi ben gowe libi a bijkantoro. Wi froisi go fu dini na ini a gemeente pe na umapikin fu wi nanga en osofamiri ben e dini.

Esther e sikisiki now. Toku mi kan taki trutru taki a horibaka gi mi trutru na ini ala den yari di wi ben e du diniwroko makandra, aladi so furu kenki kon, èn aladi furu difrenti situwâsi miti wi. Boiti dati, a ben de wan bun trowpatna gi mi sosrefi. Aladi wi e kon moro swaki, toku wi ala tu e du muiti ete na ini a preikiwroko. Te mi e prakseri fa wi libi waka, dan mi e memre den wortu fu a psalm skrifiman nanga warderi: „O Gado, yu leri mi fu sensi mi yongu yari.”—Psalm 71:17.

[Futuwortu]

[Prenki na tapu bladzijde 24]

Wi e puru publikâsi di komoto fu dorosei kondre kon na a bijkantoro fu Doisrikondre, na a ten di a bijkantoro disi ben e bow na ini 1949

[Prenki na tapu bladzijde 25]

Mi ben e wroko makandra sosrefi nanga den Kotoigi disi di ben drai kon baka fu den strafuman kampu

[Prenki na tapu bladzijde 26]

Mi nanga Esther now èn tapu a dei di wi trow na Bethel, na ini a foto Bern, oktober 1955