„Wi musu poti moro prakseri leki san wi gwenti”

„Fu dati ede wi musu poti moro prakseri leki san wi gwenti, na den sani di wi ben yere, so taki wi noiti no drifi gowe.”​—HEBREWSMA 2:1.

1. Sori fa bigi problema kan kon te sma e meki tra sani puru a prakseri fu den.

IBRI yari sowan 37.000 sma dede na ini ongoloku nanga wagi na ini Amerkankondre wawan. Sabiman e taki dati furu fu den sma disi no ben abi fu dede efu den ben poti moro prakseri na a fasi fa den e rei. Son leisi sma di rei wagi no e luku pe den e rei fu di den e poti prakseri na den bigi prenki nanga tra bigi bord di de na sei pasi, noso fu di den e taki na a cellulair telefon fu den. Tra sma de tu di e nyan aladi den e rei wagi. Na ini ala den situwâsi disi, bigi problema kan kon te sma e meki tra sani puru a prakseri fu den.

2, 3. Sortu frumane Paulus ben gi den Hebrew Kresten, èn fu san ede a rai dati ben fiti?

² Pikinmoro 2000 yari bifo sma bigin meki wagi, dan na apostel Paulus ben taki fu wan sani di ben e puru a prakseri fu son Hebrew Kresten, èn di ben abi tumusi takru bakapisi gi den. Paulus ben e sori krin taki Yesus Krestes di ben kisi wan opobaka, ben kisi wan posisi di hei moro leki di fu den engel, fu di a ben go sidon na a reti-anu sei fu Gado. Baka dati, na apostel ben taki: „Fu dati ede wi musu poti moro prakseri leki san wi gwenti, na den sani di wi ben yere, so taki wi noiti no drifi gowe.”—Hebrewsma 2:1.

³ Fu san ede den Hebrew Kresten ben musu „poti moro prakseri leki san [den ben] gwenti, na den sani di [den] ben yere” fu Yesus? Den ben musu du dati fu di pikinmoro 30 yari ben pasa kaba sensi Yesus ben komoto na grontapu. Fu di a Masra fu den no ben de na den mindri moro, meki son Hebrew Kresten ben bigin drifi gowe fu a tru anbegi. Den ben e gi pasi taki a Dyu bribi, dati wani taki a fasi fu anbegi di den ben abi fosi, ben e puru den prakseri na san den ben leri.

Den ben abi fu poti moro prakseri

4. Fu san ede son Hebrew Kresten ben wani drai go baka na a Dyu bribi?

⁴ Fu san ede wan Kresten ben sa wani drai go baka na a Dyu bribi? We, a fasi fa den ben musu anbegi Gado soleki fa a Wet ben sori dati, ben abi fu du nanga sani di sma ben kan si. Sma ben kan si den priester èn den ben kan smeri den ofrandi di den ben e bron. Ma a tru Kresten bribi ben de heri tra fasi. Den Kresten ben abi wan Granpriester, Yesus Krestes, ma sowan 30 yari kaba, sma no ben si en (Hebrewsma 4:14). Den Kresten ben abi wan tempel sosrefi, ma a santa presi fu a tempel dati ben de hemel srefi (Hebrewsma 9:24). Na ondro a Wet sistema sma ben musu besnij na skin fasi, ma Kresten ben e besnij ’na den ati, nanga  yepi fu a yeye’ (Romesma 2:29). A kan fu dati ede, taki den Hebrew Kresten ben bigin si a tru Kresten fasi fu anbegi leki wan sani di no ben e gi den na okasi fu si san den ben e du.

5. Fa Paulus ben sori taki a fasi fa Yesus ben leri den Dyu fu anbegi Gado ben moro bun leki a fasi fa a Wet ben leri den fu du dati?

⁵ Ma den Hebrew Kresten ben musu frustan taki a fasi fu anbegi di Krestes ben seti, ben abi fu du nanga wan sani di prenspari srefisrefi. Aladi a ben abi fu du moro nanga bribi leki nanga sani di sma kan si, toku a fasi fu anbegi disi ben hei moro leki a Wet di den Dyu ben kisi nanga yepi fu a profeiti Moses. „Efu a brudu fu bokoboko èn fu mankaw èn na asisi fu wan yongu uma-kaw, di den e gebroiki fu trowe dati na tapu den wan di ben kon doti, e meki sani kon santa na so wan fasi taki a e krin a skin”, Paulus ben skrifi, „dan o moro betre a brudu fu Krestes, di ben òfer ensrefi sondro fowtu na Gado nanga yepi fu wan têgo yeye, sa krin wi konsensi fu dede wroko so taki wi kan du santa diniwroko gi a libilibi Gado?” (Hebrewsma 9:13, 14) Iya, a pardon fu sondu di sma kan kisi te den e sori bribi na ini a frulusu-ofrandi fu Yesus Krestes, prenspari moro leki a pardon di sma ben kan kisi nanga yepi fu den srakti-ofrandi di den ben tyari na ondro a Wet sistema.—Hebrewsma 7:26-28.

6, 7. (a) San meki taki den Hebrew Kresten ben musu „poti moro prakseri leki san [den ben] gwenti, na den sani di [den] ben yere”? (b) Di Paulus skrifi a brifi gi den Hebrewsma, dan omeni ten ben libi ete fosi Yerusalem ben o kisi pori? (Luku a futuwortu.)

⁶ Wan tra sani de di ben meki taki den Hebrew Kresten ben abi fu poti prakseri dorodoro na den sani di den ben yere fu Yesus. Yesus ben taki na fesi taki Yerusalem ben o kisi pori. A ben taki: „Den dei sa kon na yu tapu te den feanti fu yu sa bow wan skotu fu postu nanga srapu ede na yu lontu èn den sa lontu yu èn sa banawtu yu na ala sei, èn den sa masi yu nanga den pikin fu yu na ini yu te na gron, èn na ini yu den no sa libi nowan ston na tapu wan trawan, bika yu no ben kon sabi a ten di Gado ben kon fu ondrosuku yu.”—Lukas 19:43, 44.

⁷ O ten a sani disi ben o pasa? Yesus no ben gi sma a dei nanga a yuru. Na presi fu dati a ben taki: „Te unu e si taki legre kampu lontu Yerusalem, sabi dan taki a pori fu en kon krosibei. Dan meki den wan di de na Yudea, bigin lon gowe na den bergi, èn meki den wan di de na en mindri, hari gowe fu drape, èn meki den wan di de na den boiti presi, no go na en ini” (Lukas 21:20, 21). Na ini den 30 yari baka di Yesus taki den wortu disi, son Kresten na ini Yerusalem frigiti taki den ben e libi na ini wan prenspari pisi ten, èn den bigin poti prakseri na tra sani. A ben de neleki den ben e rei wagi sondro fu luku a pasi pe den e rei. Efu den no ben o kenki a fasi fa den ben e denki, dan rampu ben o miti den nomonomo. Awinsi fa den ben prakseri fu a tori, toku a pori fu  Yerusalem ben de na pasi e kon! * Wi howpu taki a frumane di Paulus ben gi den Kresten na ini Yerusalem ben wiki den wan di ben fadon na sribi na yeye fasi.

Fa fu „poti moro prakseri leki san wi gwenti” na ini a ten disi

8. Fu san ede a de fanowdu fu „poti moro prakseri leki san wi gwenti” na den tru tori fu a Wortu fu Gado?

⁸ Neleki den fosi yarihondro Kresten, wi tu musu „poti moro prakseri leki san wi gwenti” na den tru tori fu a Wortu fu Gado. Fu san ede? Fu di wan bigi pori e kon miti wi tu, pe a no wán spesrutu kondre nomo sa kisi pori, ma wan heri seti fu sani (Openbaring 11:18; 16:14, 16). A no de fu taki dati wi no sabi a dei nanga a yuru di Yehovah sa du a sani disi (Mateyus 24:36). Ma toku wi e si now nanga wi eigi ai fa Bijbel profeititori e kon tru èn dati e sori krin taki wi e libi na ini „den lasti dei” (2 Timoteyus 3:1-5). Sobun wi musu luku bun nanga iniwan sani di kan puru wi prakseri. Wi musu poti prakseri na a Wortu fu Gado èn wi musu tan memre wisrefi na ini sortu ten wi e libi. Soso te wi tan du dati, wi sa man ’pasa ala den sani disi di sa feni presi nomonomo’.—Lukas 21:36.

9, 10. (a) Fa wi kan sori taki wi na sma di e poti prakseri na yeye afersi? (b) Na sortu fasi a Wortu fu Gado na ’wan lampu gi wi futu’ èn ’wan leti na tapu wi pasi’?

⁹ Fa wi kan sori taki wi e „poti moro prakseri leki san wi gwenti” na yeye afersi, na ini den tumusi prenspari ten disi? Wan fasi na fu de doronomo na den Kresten konmakandra, na den kring konmakandra, èn na den kongres. Sosrefi wi musu studeri Bijbel fayafaya so taki wi kan tron moro bun mati fu Yehovah, a Gran Skrifiman fu Bijbel (Yakobus 4:8). Efu wisrefi e teki sabi fu Yehovah fu di wi e teki ten fu studeri èn fu go na den konmakandra, dan wi sa de leki a psalm skrifiman di ben taigi Gado: „Yu wortu na wan lampu gi mi futu, èn wan leti na tapu mi pasi.”—Psalm 119:105.

¹⁰ Bijbel de leki wan ’leti na tapu wi pasi’ fu di a e sori wi san Gado o du na ini a ten di e kon. A de ’wan lampu gi wi futu’ sosrefi. Dati wani taki dati a kan sori wi krin san wi musu du te wi e miti nanga den problema fu na aladei libi, di kan de leki wan tesi gi wi. Dati meki a de tumusi prenspari fu „poti moro prakseri leki san wi gwenti” te wi e kon makandra nanga wi brada nanga sisa fu teki leri, èn te wisrefi e leisi a Wortu fu Gado. Den sani di wi e leri sa yepi wi fu teki koni bosroiti di sa tyari wini kon gi wi èn di sa prisiri na ati fu Yehovah (Odo 27:11; Yesaya 48:17). Wi kan kisi moro wini fu san Gado seti gi wi na yeye fasi, te wi e tan du muiti fu poti prakseri moro langa na san wi e leri na den konmakandra èn te wisrefi e studeri. Fa wi kan du dati?

Fa fu poti moro prakseri na den konmakandra

11. Fu san ede a no makriki son leisi fu tan poti prakseri na den Kresten konmakandra?

¹¹ Son leisi a no makriki fu tan poti prakseri na san wi e yere na den konmakandra. Efu wan pikin-nengre bigin krei kande, noso wan sma di kon lati e waka e suku wan sidonpresi, dan den sani disi kan meki taki wi no e arki nanga ala wi prakseri moro. A kan sosrefi taki wi weri srefisrefi fu di wi ben wroko a heri dei. Kande a takiman no e taki na wan fasi di e hari wi prakseri trutru. Dati kan meki taki wantronso, wi e bigin prakseri tra prisiri sani, noso taki wi e bigin dyonko srefi! Ma fu di den sani di wi e yere na den gemeente konmakandra de tumusi prenspari gi wi, meki wi musu du muiti fu poti moro prakseri na den sani dati. Ma fa wi kan du dati?

12. San kan yepi wi fu poti prakseri na san wi e yere na den konmakandra?

¹² Furu tron a moro makriki fu poti prakseri na den konmakandra efu wi sreka wisrefi bun. Sobun, fu san ede yu no ben sa poti ten na wan sei fu luku gi yusrefi san na den tori di sa tyari kon na fesi na den konmakandra? Soso wan tu miniti de fanowdu ibri dei, fu leisi wan pisi fu den kapitel fu Bijbel di wi musu leisi a wiki dati èn fu denki  dipi fu san wi e leisi. Efu wi seti sani bun, dan wi musu man feni ten tu fu sreka wisrefi gi a Gemeente Bukustudie èn gi a Waktitoren-studie. Awinsi fa wi o seti sani fu man du dati, wán sani wi sabi: Te wi sreka wisrefi, dan dati sa yepi wi fu poti prakseri na san wi e yere na den gemeente konmakandra.

13. San kan yepi wi fu tan poti prakseri moro bun na san wi e yere na den konmakandra?

¹³ Sonwan feni taki boiti fu de srekasreka, a de wan yepi gi den sosrefi fu sidon krosibei fu a podium na ini a Kownukondre zaal. Dati e yepi den fu tan poti prakseri moro bun na san den e yere drape. Wan tu tra fasi fa wi kan sorgu taki sani no puru wi prakseri, na te wi e tan luku a takiman, te wi e leisi makandra nanga en te a e leisi wan bijbeltekst, èn te wi e skrifi wan tu sani di a e tyari kon na fesi. Ma a sreka di wi sreka wi ati prenspari moro leki ala den sani disi di kan yepi wi fu tan poti prakseri na san wi e yere. Wi musu frustan fu san ede wi e kon makandra. Na a fosi presi wi e kon makandra nanga wi brada nanga sisa fu anbegi Yehovah (Psalm 26:12; Lukas 2:36, 37). Wi e kon makandra sosrefi fu di dati na wan prenspari fasi fa wi e kisi yeye nyanyan (Mateyus 24:45-47). Moro fara, den e gi wi na okasi fu „tranga makandra fu sori lobi èn fu du bun wroko”.—Hebrewsma 10:24, 25.

14. San e meki taki wan konmakandra bun noso taki a no bun?

¹⁴ Kande son sma e luku a fasi fa den takiman e gi leri na a konmakandra fu taki efu a konmakandra ben bun. Efu den takiman na bun leriman, dan wi e taki kande taki a konmakandra ben moi srefisrefi. Ma efu wi feni taki den no ben gi leri na wan bun fasi, dan wi e taki kande taki a konmakandra no ben de so moi. A tru taki den wan di abi wan prati na a programa musu du ala san den man fu gebroiki a koni fu man gi leri, spesrutu fu doro na ati fu den arkiman (1 Timoteyus 4:16). Ma toku wi leki arkiman no musu krutu den fu di wi e luku sani tumusi fini. Aladi a tru taki a fasi fa wan sma e gi leri de prenspari, toku dati a no a  wan-enkri sani di e meki taki wan konmakandra bun. Yu no e agri taki na a fosi presi wi no musu luku o bun a takiman e hori a lezing, ma o bun wi e arki a takiman? Te wi de na den konmakandra èn e poti prakseri na den sani di e kon na fesi, dan wi e anbegi Gado akruderi a wani fu en. Dati na san e meki taki wan konmakandra bun. Efu wi e angri fu kisi a sabi fu Gado, dan wi sa kisi wini fu den konmakandra, awinsi fa den takiman e gi leri (Odo 2:1-5). Fu dati ede, meki wi teki a fasti bosroiti fu tan „poti moro prakseri leki san wi gwenti” na san wi e yere na den konmakandra fu wi.

Kisi wini dorodoro fu a studeri di yusrefi e studeri

15. Fa wi kan kisi wini te wisrefi e studeri èn te wi e prakseri dipi fu san wi e leri?

¹⁵ Wi e kisi furu wini te wi e „poti moro prakseri leki san wi gwenti” te wisrefi e studeri èn te wi e denki dipi fu san wi e leri. Te wi e leisi Bijbel nanga den tra Kresten publikâsi èn te wi e denki dipi fu san wi e leisi, dan dati sa yepi wi fu meki den tru tori fu a Wortu fu Gado teki rutu na ini wi ati. Disi sa abi bigi krakti tapu a fasi fa wi e denki èn a fasi fa wi e tyari wisrefi. Fu tru, a sa yepi wi fu du a wani fu Yehovah nanga prisiri (Psalm 1:2; 40:8). Fu dati ede, wi musu du muiti fu poti moro prakseri na ala san wi e du, so taki wi sa man du dati tu te wi e studeri. A makriki fu meki tra sani puru wi prakseri fu san wi e du! Pikinpikin sani soleki telefon, noso wan pikin babari, nofo kaba fu puru wi prakseri. Noso a kan taki wi no man sidon tumusi langa fu poti prakseri na wan sani dorodoro. A kan taki wi e go sidon fu studeri Gado Wortu, ma kande baka wan syatu pisi ten nomo wi e bigin prakseri tra sani. Ma fa wi kan „poti moro prakseri leki san wi gwenti” te wisrefi e studeri a Wortu fu Gado?

16. (a) Fu san ede a de prenspari fu poti ten na wan sei so taki wisrefi kan studeri? (b) San yu du fu poti ten na wan sei fu studeri Gado Wortu?

¹⁶ A bun fu bosroiti na fesi o ten wi wani studeri èn fu suku a yoisti presi fu du dati. Furu fu wi no abi furu ten fu man du sani gi wisrefi. Kande wi e firi taki den sorgu fu na aladei libi e tyari wi gowe neleki wi na wan pikin tiki na ini watra di e lon esi-esi. Na wan agersi fasi, wi musu feti nanga a tranga watra disi, èn wi musu go suku wan pikin tabiki pe wi kan de wi wawan fu man studeri. Wi no musu wakti teleki wi kisi na okasi fu studeri. Na presi fu dati, wisrefi musu sorgu taki wi e meki ten fu studeri (Efeisesma 5:15, 16). Son sma e poti ten na wan sei fu studeri na den mamanten yuru te furu sani no de di kan puru a prakseri fu den. Trawan feni taki a moro bun gi den fu studeri na den neti yuru. Awinsi fa a no fa, wi no musu frigiti taki soifri sabi fu Gado èn fu a Manpikin fu en, na wan sani di wi abi tranga fanowdu (Yohanes 17:3). Fu dati ede, meki wi poti ten na wan sei so taki wisrefi kan studeri èn meki wi hori wisrefi na a dei nanga a yuru di wi poti fu du dati.

17. San a wani taki fu denki dipi fu san wi e leri, èn sortu wini wi e kisi fu dati?

¹⁷ Baka te wi studeri, dan a de tumusi prenspari taki wi teki ten fu denki dipi fu san wi e leri, fu di dati e yepi wi fu meki den prakseri fu Gado teki rutu na ini wi ati. A e yepi wi tu fu kon si fa wi kan gebroiki den rai di Bijbel e gi wi, so taki wi kan tron „duman fu a wortu, èn no soso sma di e yere nomo” (Yakobus 1:22-25). Boiti dati, a e yepi wi fu tron moro bun mati fu Yehovah fu di dati e gi wi na okasi fu denki fu a fasi fa Yehovah de èn fa den fasi fu en e kon moi na fesi na ini a pisi tori di wi ben studeri.

18. San wi musu du efu wi wani kisi wini fu a denki di wi e denki dipi fu san wi e leri?

¹⁸ Efu wi wani kisi wini trutru te wi e studeri èn te wi e denki dipi fu san wi e leri, dan wi musu sorgu taki wi no go prakseri tra sani. Efu wi wani meki den nyun sani di wi e leri teki rutu na ini wi ati te wi denki dipi fu den, dan wi no musu meki sani fu na aladei libi puru wi prakseri. Te wi wani prakseri dipi fu san wi e leri, dan wi musu  teki ten fu de wi wawan. A switi srefisrefi te wi man nyan bun fu yeye nyanyan èn fu watra fu waarheid di de fu feni na ini a Wortu fu Gado!

19. (a) San yepi son sma fu tan poti prakseri moro langa na den sani di den e studeri? (b) Fa wi musu si a studeri di wi musu studeri, èn sortu wini wi kan kisi te wi e du a prenspari sani disi?

¹⁹ Ma san wi musu du efu wi no man tan poti prakseri na wan sani tumusi langa èn efu wi e bigin prakseri tra sani aladi wi no studeri langa srefi? Son sma si taki den man poti prakseri moro langa na den sani di den e studeri, te den e bigin studeri wan syatu pisi ten fosi èn te den e du muiti ibri leisi baka fu studeri moro langa. A marki fu wi musu de fu teki nofo ten fu studeri, na presi fu wani kaba studeri esi-esi. Wi musu kweki wan tranga lostu fu kon sabi a tori di wi e studeri. Wi kan go ondrosuku sani moro fini gi wisrefi tu nanga yepi fu den furu publikâsi di a getrow èn koni srafu gi wi. A warti srefisrefi fu go ondrosuku „den dipi sani fu Gado” (1 Korentesma 2:10). Te wi e du dati, dan dati e yepi wi fu kon kisi moro sabi fu Gado èn fu kon kisi a koni fu man si sani krin (Hebrewsma 5:14). Efu wi na sma di e studeri a Wortu fu Gado fayafaya, dan wi sa „de koni nofo fu leri tra sma”.—2 Timoteyus 2:2.

20. Fa wi kan kon kisi wan tranga banti nanga Yehovah Gado èn tan abi a banti dati nanga en?

²⁰ Te wi e tan go na den Kresten konmakandra èn te wisrefi e studeri, dan dati sa de wan bigi yepi gi wi fu kon kisi wan tranga banti nanga Yehovah èn fu tan abi a banti dati nanga en. Soleki fa a sori, dan dati ben de a sani di yepi a psalm skrifiman di ben taigi Gado: „Fa mi lobi yu wet! Heri dei mi wani poti prakseri na en” (Psalm 119:97). Meki wi du ala san wi man fu dati ede, fu de doronomo na den alawiki konmakandra, den kring konmakandra, nanga den kongres. Meki wi bai ten gi wisrefi fu studeri Bijbel èn fu denki dipi fu den sani di wi e leri. Na so fasi wi sa kisi bigi blesi te wi tan „poti moro prakseri leki san wi gwenti” na a Wortu fu Gado.

[Futuwortu]

Yu e memre disi ete?

• Fu san ede son Hebrew Kresten ben drifi gowe fu a tru anbegi?

• San kan yepi wi fu tan poti prakseri dorodoro na san wi e leri na den Kresten konmakandra?

• San sa yepi wi fu feni wini te wisrefi e studeri Bijbel èn te wi e denki dipi fu den sani di wi e leri?

[Aksi fu a tori disi]

[Prenki na tapu bladzijde 11]

Den Hebrew Kresten ben musu de na ai fu di a pori fu Yerusalem ben de tumusi krosibei

[Prenki na tapu bladzijde 13]

Papa nanga mama kan yepi den pikin fu den fu kisi wini fu den Kresten konmakandra