Yu kan du wan sani fu no sari moro taki yu de yu wawan

SUMA kan taki dati noiti a no sari taki a de en wawan? Te yu luku en bun, dan furu sani de di kan gi wi a firi dati. Spesrutu son umasma kan abi den sortu firi dati di de wan tumusi hebi sani gi den. Fu eksempre, den wan di noiti no trow, aladi den ben wani trow kande, noso den wan di brokotrow, noso den wan di de weduwe.

Fu eksempre, wan yongu Kresten uma di nen Frances e fruteri: „Di mi doro 23 yari, a ben gersi leki ala den mati fu mi ben trow kaba èn taki mi nomo no ben trow ete.” * Efu wan sma tan en wawan sondro fu trow, dan dati kan tron wan problema gi en. Spesrutu te a sma e kon moro owru, dan a kan gersi leki a no makriki gi en fu feni wan trowpatna. Sandra di pasa 45 yari kaba ben taki: „Noiti mi no ben wani tan sondro fu trow. Te now ete mi wani trow efu mi e kisi na okasi.” Angela na wan uma di pasa 50 yari. A e fruteri: „Mi no ben bosroiti na fesi taki mi no wani trow, ma dati na a fasi fa sani waka gi mi. A kontren pe den ben seni mi fu go wroko leki spesrutu pionier, no ben abi furu brada di no trow ete.”

A moi srefisrefi taki son Kresten uma e teki a bosroiti fu no trow ete, fu di den wani tan hori densrefi na a rai fu Yehovah fu trow „soso na ini Masra” (1 Korentesma 7:39). Son sma man libi sondro taki den abi wan trowpatna, ma tra sma de di e taki dati o moro den yari e pasa gowe, o moro den e firi taki den wani trow èn taki den wani kisi pikin. Sandra e taki: „Ala ten mi e firi taki mi e misi wan sani fu di mi no abi wan trowpatna. A firi disi no wani gowe.”

Te wan sma abi fu sorgu gi papa nanga mama di kon owru kaba, dan dati kan de wan tra sani di e meki a sma sari srefisrefi taki a de en wawan. Sandra e taki: „Fu di mi no trow, meki den tra memre fu mi famiri ben wani taki mi musu sorgu gi wi papa nanga mama di kon owru kaba. Aladi mi na wan fu den siksi pikin na ini na osofamiri, toku a de so taki tutenti yari langa mi tyari a moro bigi pisi fu a hebi frantwortu disi. A libi no ben o hebi so gi mi efu mi ben abi wan masra di ben e horibaka gi mi.”

Frances e kari wan tra sani di e meki taki a sari taki a de en wawan. A e fruteri: „Sontron sma e aksi mi langalanga, ’Fu san ede yu no trow ete?’ Den sortu aksi disi e meki mi firi sontron, taki kande na misrefi meki taki mi no trow ete. Pikinmoro na ala trowfesa di mi e go, wan sma de di e aksi mi a fruferi sani disi: ’So, o ten yu o trow dan?’ Èn dan mi e bigin prakseri: ’Efu a de so taki den brada di tranga na yeye fasi no e luku mi nanga wan ai, dan kande mi no abi den yoisti Kresten fasi nanga maniri, noso kande mi no moi nofo.’”

San yu kan du fu no sari moro taki yu de yu wawan? San tra sma kan du fu yepi?

 Frutrow tapu Yehovah

A psalm skrifiman ben singi: „Trowe yu hebi na Yehovah srefi tapu, èn ensrefi sa horibaka gi yu. Noiti a sa meki taki a regtfardikiwan e degedege” (Psalm 55:22). Na ini a Hebrewtongo na ini Bijbel, a wortu „hebi” wani taki „a pisi di a kisi”, èn a abi fu du nanga den sorgu nanga broko-ede di wan sma kan abi di de neleki wan lai di a musu tyari na ini a libi. Yehovah sabi moro bun leki iniwan tra sma san na den hebi lai disi di wi musu tyari èn a kan gi wi a krakti di wi abi fanowdu fu man tyari den. Fu di Angela ben frutrow tapu Yehovah Gado, meki a no ben sari moro taki a ben de en wawan. A sisa disi e fruteri fu a furuten diniwroko fu en èn a e taki: „Di mi bigin pionier, dan mi nanga a sisa di ben pionier makandra nanga mi ben e tan bun fara fu a moro krosibei gemeente. Wi ben leri fu poti ala wi frutrow tapu Yehovah èn dati yepi mi na ini heri mi libi. Te mi e bigin prakseri sani di no bun, dan mi e taki nanga Yehovah èn a e yepi mi. Psalm kapitel 23 de wan bigi trowstu gi mi, èn mi e leisi en ibri tron baka.”

Na apostel Paulus sosrefi ben abi wan tumusi hebi lai di a ben musu tyari. Na sowan dri okasi, Paulus ’ben begi Masra tangitangi fu meki a maka na ini en skin, gowe libi en’. Paulus no ben kisi yepi nanga wan wondru, ma a ben kisi a dyaranti taki a bun-ati fu Gado ben o horibaka gi en (2 Korentesma 12:7-9). Paulus ben kon frustan tu fa fu prisiri nanga san a abi. Bakaten a ben skrifi: „Na ini ala situwâsi mi leri a kibritori fu ala tu: fu nyan te a sari mi èn fu abi angri, fu abi sani pasa marki èn fu mankeri sani. Gi ala sani mi abi a tranga fu en di e gi mi krakti.”—Filipisma 4:12, 13.

Fa wan sma kan kisi krakti fu Gado te a lasi-ati noso te a sari taki a de en wawan? Paulus ben skrifi: „No broko un ede nanga nowan sani, ma na ini ibriwan sani, meki Gado kon sabi san unu wani fu di unu e begi èn e aksi en tangitangi aladi unu e taigi en grantangi tu; Èn a vrede fu Gado, di pasa ala suma frustan, sa kibri un ati nanga un frustan nanga yepi fu Krestes Yesus” (Filipisma 4:6, 7). Disi na san Sandra e du. A e fruteri: „Fu di mi no trow, meki furu tron mi de mi wawan. Disi e gi mi nofo ten fu begi Yehovah. Mi e firi taki mi abi wan bun matifasi nanga en èn taki mi no frede fu fruteri en san na mi problema èn sortu sani e gi mi prisiri.” Frances e taki: „A feti di mi wawan e feti nanga fowtu denki na wan feti di no e kaba. Ma te mi e fruteri Yehovah krinkrin fa mi e firi, dan dati e yepi mi bun furu. Mi sabi taki Yehovah e poti prakseri na iniwan sani di kan abi krakti tapu a yeye fasi fu mi èn tapu a fasi fa mi e firi.”—1 Timoteyus 5:5.

„Tan tyari den hebi fu makandra”

Te wi de na mindri wi Kresten brada nanga sisa, dan wi no abi fu tyari wi hebi wi wawan. Na apostel Paulus ben gi a deki-ati: „Tan tyari den hebi fu makandra, èn du san a wet fu Krestes e taki” (Galasiasma 6:2). A demakandra di wi abi nanga tra Kresten brada nanga sisa, kan yepi wi fu kisi „a bun wortu” fu deki-ati di e meki a lai kon moro lekti te wan sma e sari taki a de en wawan.—Odo 12:25.

Prakseri fu eksempre san Bijbel e taki fu na umapikin fu Yefta, wan krutuman fu Israel. Bifo Yefta wini a feti di a ben feti nanga den feanti legre fu Amon, dan a ben meki wan sweri. A ben pramisi Yehovah taki a ben o gi En a fosi sma fu en oso di ben o lon kon miti en fu fristeri en. A fosi sma di ben lon kon miti en ben de en umapikin (Krutuman 11:30, 31, 34-36). Disi ben wani taki dati na umapikin fu Yefta no ben o man trow noiti moro èn taki a no ben o man seti wan osofamiri moro. Dati na wan sani di ibri umasma na ini a ten dati ben wani. Toku a ben de klariklari fu du san en papa ben sweri èn a go dini na a santa presi na Silo en heri libi langa. Tra sma ben warderi a bigi sani disi di a du? A no de fu taki, bika „ibri yari den umapikin fu Israel ben abi a gwenti fu go prèise na umapikin fu Yefta, a Gileadsma, fo dei na ini a yari” (Krutuman 11:40). Iya, te yu e prèise wan sma fu san a e du, dan dati kan gi en deki-ati. Sobun, meki wi tan meki muiti fu prèise den wan di fiti fu kisi prèise.

A bun efu wi luku na eksempre fu Yesus tu. Aladi a no ben de wan Dyu gwenti taki wan man-nengre ben e sidon taki tori nanga umasma, toku Yesus ben e teki ten fu taki nanga Marta èn nanga Maria. A kan taki den ben de tu weduwe noso sma di no ben trow. Yesus ben wani taki ala tu ben kisi wini na yeye fasi fu a matifasi di den ben  abi nanga en (Lukas 10:38-42). Wi kan waka baka na eksempre fu Yesus tu fu di wi e kari den sisa fu wi di no trow, fu abi prisiri demakandra nanga wi èn fu di wi e seti sani fu wroko nanga den na ini a preikiwroko (Romesma 12:13). Den sa breiti te sma e poti prakseri na den na a fasi disi? Wan sisa ben taki: „Mi sabi taki den brada lobi mi èn taki den e warderi mi, ma mi breiti te den e meki ten spesrutu fu de nanga mi.”

Sandra e taki: „Fu di wisrefi no abi wan osofamiri, meki wi abi moro lobi fanowdu. Na so fasi wi kan firi taki wi de wan pisi fu wan osofamiri fu brada nanga sisa na yeye fasi.” A no de fu taki dati Yehovah e broko en ede nanga den sortu sma dati. Sobun, te wi e meki den firi taki wi wani den na wi mindri èn taki wi lobi den, dan wi e sori taki wi e wroko makandra nanga Yehovah (1 Petrus 5:6, 7). Te yu e sori taki yu e broko yu ede nanga den sortu sma disi, dan a no de fu taki dati Gado sa si dati, fu di „a sma di e sori bun wani na den mendriwan, e leni na Yehovah èn [Yehovah Gado] sa pai a sma dati baka gi san a du”.—Odo 19:17.

„Ibriwan sma sa tyari en eigi lai”

Tra sma kan gi yepi, èn a yepi di den e gi kan de wan bigi deki-ati. Toku a de so taki „ibriwan sma sa tyari en eigi lai” (Galasiasma 6:5). Ma te wi e sari taki wi de wi wawan, dan wi musu luku bun nanga wan tu sani di kan tyari problema kon gi wi. Fu eksempre, a kan taki wi no ben sa wani abi demakandra nanga tra sma moro efu wi e sari tumusi dati wi de wi wawan. Na a tra sei, te wi e sori lobi gi tra sma, dan wi no e firi sari moro taki wi de wi wawan (1 Korentesma 13:7, 8). Te wi e gi sma sani èn te wi e prati sani nanga tra sma, dan dati e meki wi feni koloku, awinsi fa wi libi de (Tori fu den Apostel 20:35). Wan pionier sisa di e wroko tranga e taki: „Mi no abi furu ten fu sidon denki taki mi de mi wawan. Te mi e firi taki tra sma abi mi fanowdu èn taki nofo sani de fu du, dan mi no e firi sari taki mi de mi wawan.”

Wi musu luku bun sosrefi taki a firi disi no e pusu wi fu go du sani di no fiti, so taki wi ben sa hori nanga wan sma nomo fu di wi e sari taki wi de wi wawan. Prakseri fu eksempre, taki a ben sa de wan sari sani efu wi ben sa gi pasi meki a firi taki wi wani trow, breni wi frustan so taki wi no e si den furu problema di kan kon te wi ben sa trow nanga wan sma di no de na bribi. Spesrutu te wi no ben sa si moro taki a rai fu no kon na ondro wan tyatyari nanga wan sma di no de na bribi, na koni rai! (2 Korentesma 6:14) Wan Kresten uma di brokotrow ben taki: „Wan sani de di moro ogri leki te yu no abi wan trowpatna. Dati na te yu no trow nanga a yoisti sma.”

Te wi no man lusu wan problema nownow, dan wi musu leri fu libi nanga dati teleki wan kenki kon. Nanga a yepi fu Gado, wan sma kan horidoro awinsi a sari taki a de en wawan. Te wi e tan dini Yehovah, dan wi kan abi a fasti frutrow taki wan dei sa kon taki wi sa kisi ala den sani di wi abi fanowdu. Iya, wi sa kisi ala den sani disi bogobogo.—Psalm 145:16.

[Futuwortu]

[Prenki na tapu bladzijde 28]

Te wan sma lobi fu gi sani èn e prati sani nanga trawan, dan a no sa sari moro taki a de en wawan