Ondrofenitori

Wi E Kisi Blesi te Wi E Teki a Kari Di Yehovah E Gi Wi

SOLEKI FA MARIA DO CÉU ZANARDI FRUTERI

„Yehovah sabi san a e du. Efu a seni yu a kari, dan yu musu sori sakafasi èn teki a kari.” Mi papa ben taigi mi a sani disi so wan 45 yari pasa. Den wortu disi ben yepi mi fu teki a fosi kari di mi ben kisi fu Yehovah en organisâsi, èn dati na fu dini leki wan furuten dinari. Tide mi de nanga tangi na ati ete fu a rai di mi papa ben gi mi, bika a teki di mi teki a kari dati tyari furu blesi kon gi mi.

NA INI 1928 mi papa ben teki wan abonnement fu man kisi a Waktitoren tijdschrift doronomo. Dati meki a ben wani kon sabi moro fu Bijbel. A ben tan na ini a mindrisei pisi fu Potogisikondre. Dati meki a wan-enkri fasi fa a ben kisi fu du nanga Gado en gemeente ben de nanga yepi fu den buku di a ben kisi nanga post, èn a ben abi wan Bijbel di ben de fu mi granpa nanga granma fosi. Na ini 1949, di mi ben abi 13 yari, mi famiri froisi go na Brasyonkondre, a kondre pe mi mama gebore. Drape wi seti wisrefi krosibei fu a foto Rio de Janeiro.

Den nyun birtisma fu wi ben aksi wi fu go na a kerki fu den. Wi ben go wan tu leisi. Mi papa ben lobi fu poti aksi gi den di abi fu du nanga a helfaya, a sili, nanga a tamara fu grontapu, ma den no ben man piki en kwetikweti. „We, wi sa abi fu wakti den tru Bijbel studenti”, na so mi papa ben gwenti fu taki.

Wan dei, wan breniman ben kon na wi oso fu pristeri A Waktitoren nanga Ontwaakt! Mi papa ben poti den srefi aksi gi en èn a man ben gi bun piki komoto fu Bijbel. A wiki baka dati, wan tra Kotoigi fu Yehovah kon na wi oso. Di a ben kaba piki tra aksi, dan a ben taki dati a ben musu gowe fu du a preikiwroko. A ben gebroiki Mateus 13:38 fu sori taki a wroko dati musu du na heri grontapu. Mi papa ben aksi en: „Mi  kan go tu?” A Kotoigi piki en taki: „Iya, yu kan go tu.” Wi ben prisiri srefisrefi taki wi feni Bijbel waarheid agen! Mi papa teki dopu na a tra kongres di ben hori, èn mi teki dopu syatu baka dati, na ini november 1955.

Mi E Teki a Fosi Kari Di Mi Kisi

Wan nanga afu yari baka dati, dan mi kisi wan bigi broin envelop fu a bijkantoro fu Yehovah Kotoigi na ini Rio de Janeiro. A ben abi wan papira na ini nanga a kari fu go na ini a furuten preikiwroko. Fu di a gosontu fu mi mama no ben de so bun, meki mi go na mi papa fu aksi rai. „Yehovah sabi san a e du”, a ben taki nanga overtoigi. „Efu a seni yu a kari, dan yu musu sori sakafasi èn teki a kari.” Den wortu disi ben gi mi deki-ati srefisrefi. Mi teki a papira, mi piki ala den aksi na tapu èn na so fasi mi bigin nanga a furuten diniwroko tapu 1 yuli 1957. A fosi presi pe mi ben musu go ben de Três Rios, wan foto na ini a distrikt Rio de Janeiro.

Fosi, den sma fu Três Rios no ben wani arki a boskopu fu wi, bika wi no ben gebroiki a Bijbel di den Katoliksma ben abi. Wi ben kisi yepi di wi bigin studeri Bijbel nanga Geraldo Ramalho di ben de Katolik. Nanga yepi fu en, mi ben man kisi wan Bijbel. A nen fu a priester fu a presi drape ben de na ini. Sensi a ten dati, ala leisi te sma ben taki dati den no wani arki, dan mi ben sori den a nen fu a priester, èn den no ben aksi noti moro. Geraldo teki dopu baka ten.

Mi ben prisiri srefisrefi di wan kring-konmakandra ben hori leti na ini a mindrisei pisi fu Três Rios na ini 1959. A skowtu basi di ben studeri Bijbel na a pisi ten dati, ben meki sma span duku srefi fu bariwroko gi a programa na ini a heri foto. Baka di mi wroko dri yari langa na ini Três Rios, dan mi ben kisi a kari fu go wroko na wan tra presi. A presi dati ben de Itu di de 110 kilometer westsei fu São Paolo.

Redi, Blaw, Nanga Geri Buku

Baka di mi nanga mi pionier patna ben suku wan presi fu tan, dan wi ben feni wan bun tanpresi mindrifoto na ini na oso fu Maria, wan weduwe. Na uma dati ben abi switifasi. A ben si wi leki en eigi umapikin. Ma no langa a baka, a beskopu fu a Lomsu Kerki fu Itu go na en oso, a taigi en taki a musu seni wi gowe. Ma Maria taki sondro draidrai: „Di mi masra dede, unu no ben du noti fu trowstu mi. Den Yehovah Kotoigi disi yepi mi ala di mi no de fu a kerki fu den.”

Na a pisi ten dati, wan uma ben fruteri wi taki den Katolik priester fu Itu ben tapu den sma fu a kerki fu den fu teki „a redi buku di e taki fu Didibri”. Den ben sori go na a buku „God zij waarachtig”, a Bijbel publikâsi di wi ben pristeri na sma a wiki dati. Fu di den priester ben „tapu” sma fu teki a redi buku, meki wi ben seti sani fu pristeri a blaw buku [„Nieuwe hemelen en een nieuwe aarde” („Nyun hemel nanga wan nyun grontapu”)]. Baka dati, di den kerki tiriman kisi fu yere fu a kenki disi, dan wi gebroiki a geri buku [„Wat heeft de religie voor de mensheid gedaan”? („San kerki du gi a libisma famiri?”)], èn so moro fara. A ben bun srefisrefi taki wi ben abi difrenti sortu buku èn taki den kafti ben abi difrenti kloru!

 Baka di mi ben de wán yari so na ini Itu kaba, dan mi ben kisi wan telegram. A ben gi mi a kari fu kon fu wroko wan syatu pisi ten na Bethel, a bijkantoro fu Yehovah Kotoigi na ini Rio de Janeiro, fu sreka sani gi a kongres drape. Mi teki a kari nanga prisiri.

Tra Grani Nanga Tyalensi

Bun furu wroko ben de fu du na Bethel èn mi ben breiti fu yepi nanga iniwan sani di ben de fu du. Mi ben leri furu sani te mi ben go na a takimakandra fu a deitekst ibri mamanten, èn so srefi te mi ben go na a Waktitoren-studie makandra nanga a famiri tapu munde neti! Den opregti begi fu Otto Estelmann nanga den begi fu den tra memre fu a Bethelfamiri di abi furu ondrofeni, ben naki mi ati trutru.

Di a kongres ben hori kaba, dan mi poti ala mi krosi nanga tra sani na ini den kofru fu mi fu drai go baka na Itu. Ma sondro taki mi fruwakti dati, dan a bijkantoro dinari, Grant Miller, gi mi wan brifi pe mi ben kisi a kari fu tron wan memre fu a Bethelfamiri. A sisa di ben tan na ini a srefi kamra nanga mi, ben de Sisa Hosa Yazedjian. A e dini ete na a Bethel fu Brasyonkondre. Na ini a ten dati a Bethelfamiri ben pikin. Soso 28 sma ben de èn wi alamala ben de bun mati fu makandra.

Na ini 1964, João Zanardi, wan yongu furuten dinari, ben kon na Bethel fu kisi leri. Na a ten dati a ben kisi a wroko fu dini leki kringopziener. A ben go na difrenti gemeente krosibei fu Bethel. Son leisi wi ben miti te a ben kon na Bethel fu tyari den raportu fu en. A bijkantoro opziener ben gi João primisi fu kon na a famiri studie tapu munde neti. Na so fasi wi ben man de nanga makandra moro furu. Mi nanga João trow na ini augustus 1965. Mi ben prisiri fu teki a kari fu du a kringwroko makandra nanga mi masra.

Na ini a ten dati, a kringwroko di wi ben du na ini a busi fu Brasyonkondre ben span srefisrefi. Noiti mi sa frigiti a ten di wi ben musu go na wan grupu preikiman na a foto Aranha, na ini a distrikt Minas Gerais. Wi ben musu teki loko, èn baka dati wi ben musu waka a tra pisi fu a pasi ete. Wi ben syow nanga kofru, wan skrifimasyin, wan apparaat fu sori atosigi, velddiensttas èn so srefi nanga buku. Wi ben breiti srefisrefi taki ala ten Lourival Chantal, wan grani brada, ben e wakti wi na a loko station fu yepi wi nanga a bagasi fu wi.

Den konmakandra na ini Aranha ben hori na ini wan yuru oso. Wi ben e sribi na ini wan pikin kamra na bakasei. Na a wan sei fu a kamra, wi ben meki udu faya, dan wi ben gebroiki dati fu bori èn fu faya a watra di den brada nanga sisa ben e tyari gi wi na ini embre. Mindribere fu wan krosibei bambu pranasi, wan olo ben de di wi ben gebroiki leki kumakoisi. Na neti wi ben leti faya fu yagi den asege gowe. Den insekt disi kan meki sma kisi a Chagas siki. Mamanten wi noso ben blaka fu a smoko ala ten. Dati ben de wan tumusi aparti ondrofeni!

Di wi ben e dini den gemeente na ini a distrikt Paraná, dan agen wi ben kisi wan fu den bigi broin envelop fu a bijkantoro. Yehovah en organisâsi ben gi wi ete wan kari. Disi leisi den ben gi wi a kari fu go dini na Potogisikondre! A brifi ben gi wi a rai fu prakseri a gronprakseri fu Lukas 14:28 èn fu teri den kostu bifo wi ben o teki a toewijzing, fu di den tiriman fu Potogisikondre  ben tapu a Kresten diniwroko fu wi drape, èn den ben sroto furu brada nanga sisa kaba.

Wi ben o go na wan kondre pe wi ben sa man kisi fu du nanga a frufolgu dati? João ben taki: „Efu den Potogisi brada nanga sisa fu wi kan tan drape èn dini Yehovah getrow, dan fu san ede wi no kan du dati?” Fu di mi ben memre den wortu fu mi papa ete di a ben gi mi leki deki-ati, meki mi ben agri fu teki a kari. Mi ben taki: „Efu Yehovah seni wi a kari, dan wi musu teki en èn frutrow na en tapu.” Syatu baka dati wi ben de na Bethel na ini São Paulo. Drape wi ben kisi rai san wi ben musu du moro fara èn wi ben sreka den papira fu wi fu man gowe.

João Maria Nanga Maria João

A boto di ben tyari wi, ben nen Eugênio C. A komoto na a lanpresi fu Santos, na ini a foto São Paulo, tapu 6 september 1969. Wi ben de neigi dei na tapu se fosi wi doro Portugal. Na ini a bigin, wi ben wroko wan tu mun makandra nanga brada nanga sisa di abi ondrofeni. Wi ben go na ini den smara pasi fu Alfama nanga Mouraria, di de na ini na owru distrikt Lisabon. Den leri wi fu de na ai, so taki skowtu no ben sa man kisi wi makriki.

Wi ben hori gemeente konmakandra na ini den oso fu Kotoigi. Te wi ben si taki den birtisma ben kon sabi san wi ben du, dan esi-esi wi ben luku wan tra presi fu man hori den konmakandra. Na so fasi, sma no ben sa broko kon na ini na oso, noso den brada no ben sa abi fu go na strafu-oso. Wi ben e hori den bigi konmakandra fu wi na ini Monsanto Park, krosibei fu Lisabon, èn na Costa da Caparica, wan presi krosibei fu a se pe furu bon e gro. Wi ben weri aladei krosi gi na okasi èn wan grupu brada ben e hori wakti na den presi pe den man si efu tra sma e kon. Efu wan sma ben kon krosibei di den brada no ben frutrow, dan wi ben abi nofo ten fu seti wan prei, noso wi ben kan teki den nyanyan-sani fu wi, noso wi ben kan bigin singi wan singi makandra.

Wi no ben gebroiki wi trutru nen, so taki skowtu no ben man sabi makriki suma na wi. Den brada nanga sisa ben sabi wi leki João Maria nanga Maria João. Den no ben skrifi wi nen na tapu brifi noso na tapu tra prenspari papira. Na presi fu dati, ibriwan fu wi ben kisi wan nomru. Mi ben meki spesrutu muiti fu no hori den strati nen na ede pe den brada nanga sisa ben libi. Na so fasi mi no ben sa man tori den efu sma ben sroto mi.

Ala di a wroko ben tapu, toku mi nanga João  ben abi a fasti bosroiti fu gebroiki ibri okasi fu gi kotoigi, fu di wi ben sabi taki dyonsro wi ben sa kan lasi a fri fu wi. Wi leri fu frutrow tapu wi hemel Tata, Yehovah. Yehovah na a Sma di e kibri wi, èn a ben e gebroiki den engel fu en na so wan fasi, taki wi ben firi leki wi ’ben e si a Sma di wi no man si’.—Hebrewsma 11:27.

Wan leisi, wi ben e preiki oso fu oso na ini Porto, dan wi ben miti wan man. Nomonomo a ben wani taki wi ben musu go na ini en oso. A sisa di mi ben wroko nanga en no draidrai, a ben go wantewante. So bun, mi no ben man du noti fu tapu en ma ben abi fu go nanga en. Wan fowtow di ben anga na ini a gadri meki mi ati dyompo. A sma tapu a fowtow ben weri srudatikrosi. San wi ben o du now? A man aksi wi fu teki presi, dan a aksi mi: „Yu ben o meki yu manpikin tron srudati efu a ben kisi a kari fu du dati?” Wi ben o abi fu gebroiki koni fu man piki na wan yoisti fasi. Baka di mi begi gi misrefi, dan na wan bedari fasi mi piki a man taki: „Mi no abi no wan pikin, èn mi de seiker taki efu mi ben aksi yu so wan sani wantronso, dan yu ben o piki mi a srefi sani.” A tan pî. So bun, mi taki moro fara: „Now efu yu ben aksi mi fa a de te yu e lasi wan brada noso wan papa na ini dede, dan mi kan gi yu wan piki, fu di mi pikin brada èn so srefi mi papa dede.” Mi ai bigin lon watra di mi taki dati èn mi si taki a man ben wani krei tu. A fruteri wi taki en wefi dede no so langa pasa. A ben arki bun di mi fruteri en fu a howpu fu na opobaka. Baka dati, wi taigi en adyosi na wan lespeki fasi, dan wi gowe. Wi libi a tori na ini Yehovah anu.

Awinsi a wroko ben tapu, toku opregti sma ben kisi yepi fu kon sabi a waarheid. Fu eksempre, na ini Porto, mi masra bigin studeri nanga Horácio, wan bisnisman, èn a ben go na fesi esi-esi. Baka ten, a manpikin fu en, Emílio, di de wan tumusi bun datra, teki a bosroiti tu fu dini Yehovah èn a ben teki dopu. Fu tru, noti no man tapu a santa yeye fu Yehovah.

„Yu No Sabi Kwetikweti San Yehovah Kan Meki Pasa”

Na ini 1973, mi nanga João ben kisi a kari fu go na a „Goddelijke zegepraal” Internationaal Kongres na ini Brussel, Belgia. Dusundusun brada nanga sisa fu Spanyorokondre nanga Belgia ben de drape, èn sma kon so srefi fu Mosambik, Angola, Kaap Ferdia, Madeira, nanga den èilanti di den e kari Azoren. Na a kaba fu a taki fu en, Brada Knorr fu na edekantoro na ini New York ben frumane: „Tan go doro fu dini Yehovah getrow. Yu no sabi kwetikweti san Yehovah kan meki pasa. Kande tra leisi yu sa go na a internationaal kongres na ini Potogisikondre!”

A yari baka dati, wi ben kisi primisi akruderi lantiwet na ini Potogisikondre fu du a preikiwroko. Den wortu fu Brada Knorr ben kon tru, bika na ini 1978 wi ben hori wi fosi internationaal kongres na ini Lisabon. A ben de wan bigi grani srefisrefi taki wi ben man go na tapu den strati fu Lisabon fu gi kotoigi nanga yepi fu traktaat  nanga tijdschrift, èn fu gi sma wan kari fu kon na a publikitaki! Wi ben howpu tapu a sani disi srefisrefi, èn a kon tru!

Wi ben kon lobi den Potogisi brada nanga sisa fu wi trutru. Furu fu den ben musu koti strafu èn ben kisi fonfon fu di den no ben wani abi noti fu du nanga politiek èn no ben wani tron srudati na ini a legre. Wi ben wani tan dini na ini Potogisikondre. Ma wi no ben man du dati. Na ini 1982, João ben kon siki seryusu na en ati, èn a bijkantoro ben gi wi a rai fu drai go baka na Brasyonkondre.

Wan Tumusi Muilek Ten

Den brada na a bijkantoro fu Brasyonkondre ben horibaka gi wi trutru èn den ben poti wi fu dini na ini Gemeente Quiririm na ini Taubaté, na ini a distrikt São Paulo. A gosontu fu João ben go na baka esi-esi, èn no langa baka dati a no ben man komoto na oso. Sma di ben wani sabi moro fu Bijbel, ben kon na wi oso fu studeri. Ibri dei, konmakandra fu go na ini a preikiwroko ben hori na wi oso èn so srefi na alawiki bukustudie. Den seti disi ben yepi wi fu tan tranga na yeye fasi.

João ben tan du san a ben man du ete na ini a diniwroko fu Yehovah te leki a dede tapu 1 oktober 1985. Mi ben sari èn mi ben firi brokosaka pikinso, ma mi ben abi a fasti bosroiti fu tan go doro na ini a diniwroko fu mi. Wan tra takru sani ben pasa na ini 1986. Fufuruman broko kon na ini mi oso, dan den teki pikinmoro ala sani. Na ini mi heri libi, disi ben de a fosi leisi di mi ben frede èn ben sari trutru. Na wan lobi-ati fasi, wan trowpaar ben aksi mi fu go tan nanga den wan pisi ten. Mi de nanga tangi na ati trutru gi dati.

A dede fu João èn a kon di den fufuruman ben broko kon na ini mi oso, ben abi krakti tu tapu mi diniwroko gi Yehovah. Mi no ben firi misrefi seiker moro na ini a preikiwroko. Baka di mi skrifi wan brifi go na a bijkantoro fu meki den kon sabi a problema fu mi, dan mi ben kisi wan kari fu go tan wan pisi ten na Bethel fu kisi misrefi baka. A pisi ten dati meki mi kisi krakti trutru!

Di mi si taki mi ben firi pikinso moro betre, dan mi teki a kari fu dini na ini Ipuã, wan foto na ini a distrikt São Paulo. A preikiwroko meki taki mi ben abi furu fu du, ma son leisi mi ben firi brokosaka. Te mi ben kisi a firi dati, dan mi ben bel den brada nanga sisa fu a gemeente na ini Quiririm, dan wan osofamiri ben kon fu tan wan tu dei nanga mi. Den fisiti dati ben gi mi deki-ati trutru! A fosi yari di mi ben de na ini Ipuã, dan 38 brada nanga sisa ben teki a langa pasi dati fu kon luku mi.

Na ini 1992, siksi yari baka a dede fu João, mi ben kisi wan tra kari fu Yehovah en organisâsi. Disi leisi mi ben musu froisi go na Franca, wan foto na ini a distrikt São Paulo, pe mi e dini ete leki wan furuten dinari. Furu sma dyaso de klariklari fu arki a bun nyunsu. Na ini 1994, mi bigin studeri Bijbel nanga a komsarsi. Na a ten dati, a ben hori konmakandra fu meki sma stem gi en fu a kan tron wan memre fu a grupu tiriman fu Brasyonkondre. Ala di a ben abi so furu fu du, toku wi ben studeri ibri munde bakadina. A ben kiri a telefon fu en, so taki sma no ben man bel en na a ten di wi ben studeri. Mi ben prisiri srefisrefi di mi si taki safrisafri a no ben teki prati moro na ini politiek afersi èn taki a meki a trowlibi fu en waka bun baka nanga yepi fu a waarheid! En nanga en wefi teki dopu na ini 1998.

Te mi e prakseri baka fa sani ben waka na ini mi libi, dan mi kan taki dati mi kisi bun furu blesi nanga grani leki wan furuten dinari. A teki di mi teki a kari di Yehovah ben gi mi nanga yepi fu en organisâsi, trutru tyari furu blesi kon gi mi. Èn awinsi sortu kari mi sa kisi na ini a ten di e kon, mi de klariklari ala ten ete fu teki en.

[Prenki na tapu bladzijde 25]

Na ini 1957, di mi go na ini a furuten diniwroko, èn now

[Prenki na tapu bladzijde 26]

Mi nanga a Brasyon Bethelfamiri na ini 1963

[Prenki na tapu bladzijde 27]

A trow fu wi na ini augustus 1965

[Prenki na tapu bladzijde 27]

Wan bigi konmakandra na ini Potogisikondre di a wroko ben tapu

[Prenki na tapu bladzijde 28]

Wi ben e gi kotoigi na ini den strati fu Lisabon di a „Goddelijke zegepraal” Internationaal Kongres ben hori na ini 1978