„Nanga a Leti fu Yu, Wi Kan Si Leti”

FURUTRON wi e si leti leki wan sani di e kon fu ensrefi, teleki a leti no de moro èn a birti pe wi e libi e kon dungru srefisrefi. Koloku taki a son na hemel e gi wi leti ala ten. Na a leti fu a son e meki taki wi man si, taki wi man nyan, taki wi man hari bro èn taki wi man libi.

Fu di leti de prenspari gi a libi, meki a no musu fruwondru wi fu leisi na ini Genesis taki leti ben kon de fu si na a fosi dei di Gado meki sani. „Gado ben taki moro fara: ’Meki leti kon’. Dan leti ben kon” (Genesis 1:3). Sma di ben anbegi Gado so leki Kownu David, ben si Yehovah ala ten leki a sma di e gi libi nanga leti. David ben skrifi: „Na yu na a Sma fu pe a libi komopo; nanga a leti fu yu, wi kan si leti.”—Psalm 36:9.

San David taki de so gi a trutru leti, èn so srefi gi na agersi leti. Na Encyclopædia Britannica e taki: „Na leti e meki taki wi man si sani.” Dan a buku e taki moro fara: „Nanga yepi fu den ai, na edetonton fu libisma e kisi moro bodoi leki san a yesi, a noso, a tongo noso iniwan tra pisi fu a skin kan gi en.” Bun furu fu san wi e leri e anga fu a man di wi man si sani. Fu man si sani bun wi abi leti fanowdu. Dati meki den Buku fu Bijbel e gebroiki leti tu na wan agersi fasi.

Fu dati ede Yesus ben fruteri den disipel fu en: „Mi na a leti fu grontapu. A sma di e waka na mi baka, no sa waka na ini dungru kwetikweti, ma sa abi a leti fu libi” (Yohanes 8:12). A leti di Yesus ben taki fu en ben de a boskopu fu waarheid di a ben preiki. A leti disi ben opo a frustan fu den sma di ben arki en. A ben meki taki na ati fu den sma disi frustan sani moro bun. Furu yari a yeye leti no ben de na grontapu. Te fu kaba den disipel fu Yesus ben kan frustan san Gado abi na prakseri nanga a libisma famiri èn sortu howpu a Kownukondre e gi sma. Disi ben de trutru „a leti fu libi”, fu di den ben kan kisi têgo libi te den ben sabi dati. Di Yesus ben begi en hemel Tata, a ben taki: „Disi wani taki têgo libi, fu den e teki sabi na ini den fu yu, a wan-enkri tru Gado èn fu en di yu seni kon, Yesus Krestes” (Yohanes 17:3). No meki noiti wi e teki a yeye leti disi leki wan sani di e kon fu ensrefi!